Mataayi 2
2
Bangaa-madyeele bayende kweemono Yisu
1Yisu wabutuka ku Beteleemi dya Yuuda, mu ntaangu yiri Eroode mbyaasi. Mono, bangaa-madyeele bafumini ku mpele ya Esete bayisa ku Yerusalemi. 2Baleele ti : « Mbyaasi Bayudayo yibutukiryee kuri kari ? Bukuri beetu twamwiini mbwetete yaandi, kupalilaa ntaangu, ngo twiisiri mu kumusaambila. » 3Mbyaasi Eroode kayukaa bubwo, mutima wasa mambaawu na Yerusalemi dyodinso se. 4Nde kakutukisaa bakuutu ba bangaanga-nzaambi, na Batini ba mangisi ba kaanda, wabafuula ku butukiryee Kiristo. 5Bo bamuleele ti : Ku Beteleemi dya Yuuda, bukuri mubikiri watinini bumabu ti :
6"Ye Beteleemi mu nsi ya Yuuda,
ye wuri kwaandi bvula, dibvuri buntele ko,
mu mabvula mamanene mari mu Yuuda ;
bukuri mu ye mu palila mutwaalisi,
wutwaalisa kaanda dyaami, Iselili."
7Hanaho, Eroode kateelaa bangaa-madyeele mu nsweeki, wasaka kuyaaba na deredee kuri bo, ntaangu yamonikini mbwetete. 8Nde wabasindika ku Beteleemi waleele ti : « Lumana kweende lo sakee kuyaaba na deredee mitariri mwaana. Bu lumeeni na kumudzuukila, yaabisee me mpisi me se nyeende mu kumusaambila. »
9Bo bamanaa kuyuka myaleeriri mbyaasi bayende, na mono, mbwetete yi bamwii kupalilaa ntaangu, yaba kweyendaana ku mankula ma bo, natee ye teleme ha kisusungu na haba mwaana. 10Bu bamono mbwetete, bo bakeembe mu kiminu nkati kyakinene. 11Bakotaa mu nzo, bamwiini mwaa mwaana wansoombo, na Maari nguri yaandi. Bo batsukuma na bamusaambila ; tumi badzibulaa bisweekulu bya bo, bamuheeri bikabu : Woolo, libano, na mire. 12Bo babalubula mu ndosi, mu kuhele kubvutukila kuri Eroode. Bo baholo nzila yikimi mu kweende ku bula bwaaku.
Nyitukulu ku Ngipiti
13Bangaa-madyeele bamanaa kubvutuka, mono, mbasi ya Mfumu yamonokono kuri Yoosefi mu ndosi, yamuleele ti : « Teleme, holo mwaana na nguri yaandi, na yitika ku Ngipiti, dzakala kukwo, natee ku nyikuleele me ; bukuri Eroode weki mu kiteesu kya kusaka mwaana mpisi kamudzusa. » 14Nde katelemaa bunu butsuku bubwo, horiri mwaana na nguri yaandi, na wayende kweesweeme ku Ngipiti. 15Nde wadzakala kukwo natee kwafwiiri Eroode ; mpisi heki maleeriri Mfumu, mu munwa mubikiri, meende mu mana, ti : « Me nyateele mwaana waami mu kupala mu Ngipiti. »
Eroode wadzusa mwaa baala
16Eroode kamonaa ti bangaa-madyeele bamuwunini, nde wabaka nkesi dzamakwa, na waheeke baatu mu kweedzusa mwaa baala bobanso, bari ku Beteleemi, na bari mu nkoonsi yoyinso, ba mvula dzoolo natee ku nsuku, bunu bwaba bwayelemene na ntaangu, yi bamutswiikisiri kuri bangaa-madyeele. 17Haho maleeriri mubikiri Yeremi mayende mu mana, ti :
18« Mbeembu mosi yayukukini ku Lama,
bidilu na minyoongi byalaka.
Lakele wuri mu kudila baala baandi,
na wabisa ti bamuboondo, bukuri baala beki bo pe. »
Mpalulu ku Ngipiti
19Eroode kamanaa kufwa, mbasi ya Mfumu yamonokono Yoosefi mu ndosi ku Ngipiti, 20yaleele kuri nde ti : « Teleme, holo mwaana na nguri yaandi, na bvutuka ku nsi ya Iselili, bukuri babo babasakaa kudzusa mwaa mwaana bamwaafwa. » 21Nde katelemaa, neti mwaana na nguri mwaana, na wakoto ku nsi ya Iselili. 22Yoosefi kayukaana ti, Arkelaho wuri mu kutuma nsi ya Yuuda, ha kibeendu kya Eroode taayi dyaandi, wamono boomo mu kweende kukwo. Bamulubula mu ndosi, nde wayende kweesweeme mu nkoonsi ya Ngalile. 23Bu katubuka, nde wadzakala ku bvula dya Nadzareti, mpisi heki maleeriri babikiri meende mu mana, ti : « Sa bamuteele ti wa ku Nadzareti. »
Currently Selected:
Mataayi 2: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024