Mataayi 22
22
Nkuma ya munkeembu wa makweele
(Luk 14.15-24)
1Yisu bu kaba mu kubvutula, wadzoonso mu mankuma makimi kuri bo, waleele ti : 2« Kimfumu kya mayulu kyafwanikina bunu mbyaasi mosi, wayirika munkeembu makweele ma mwaana waandi. 3Nde waheeke bisari byaandi mu kweteele, babateeriri mu kwiisa kudya ku munkeembu ; ngo bo basii tya kwiisa ko. 4Wabweese kuheke bisari bikimi, mu kuleele ti : "Leele kuri babo babateerirye ti : Munkeembu wa ndiilu weki wayirima, bamwaadzusa bangoombo na bibulu byabinene. Byobinso byeki byayirima, wasee ku munkeembu !" 5Ngo babo babateeriri mbila, banyaafuna mbila, na bayende kwaaku, wamosi ku nseke yaandi ; wakaka ku mumbungu waandi kusala. 6Bakaka basiiri babo, bakwaata bisari bya mbyaasi babatuka na babadzusa. 7Mbyaasi wabaka nkesi. Nde waheeke bayongolo baandi mu kweedzusa baatu babo, na wayoko bvula dya bo. 8Hanaho, waleele kuri bisari byaandi ti : "Munkeembu weki wayirima, ngo babateerirye bahele kuba basoongolo. 9Yende mu mahaambu ma manzila, bobanso balumono, bateele ku munkeembu." 10Bisari byapala na bayende mu manzila, bakutikisa bobanso babamwiini, babatsiina na babeeru. Munkeembu waluula mu baatu bayisiri. 11Mbyaasi wakoto mu kwetala bari ha munkeembu, na wamono muutu mosi waba wahele na kinkutu kya munkeembu. 12Wamufuula ti : "Nduku yaami, buri siiri mu kukoto hamaha, kuri ye wahele na kinkutu kya munkeembu ?" Muutu wunde wakaanga munwa ! 13Hanaho, mbyaasi waleele kuri bisari byaandi ti : "Mukaangee miilu na myooko, na mutubee ku mampimbisi ma ku mbasi, kukwo kuba bidilu na nkweetulu miinu." 14Bukuri, balaka bari bateelu, ngo bantele basoolu. »
Mpaku yi bafutaa kuri Sedzare
(Mal 12.13-17; Luk 20.20-26)
15Hanaho, Bafarisi bu bayende ku mfuundu, bakaanga kitsimi kya kumutekele mweete, mpisi bamubaka mu nzoonsulu. 16Bo baheeke bayiki ba bo, kintwaari na baatu ba Eroode kuri nde, baleele ti : « Muyikisi, beetu tuyaari ti ye ngaa-ngwanwa, na ye wuri mu kweyikisa nzila ya Nzaambi mu ngwanwa ; ye wabataa muutu ko ; bukuri ye wamonaa kinzeri kya baatu ko, 17ngo leele beetu, kitsimi kya ye buri kiri : Buri kuri na miswa mu kufuta mpaku kuri Sedzare ho ti pele ? » 18Ngo Yisu, bu kaba kayaari mutima bubi wa bo, wabaleele ti : « Bangaa bumpitu-bumpyoongo, buri lutekele me mweete ? 19Soongee mbeti me mupata wa mpaku. » Bo bamusoongo kidenayi kimosi. 20Nde wafuula kuri bo ti : « Kidzisi ki na bisoni bi bya na ? » 21Bo babvutula kuri nde ti : « Bya Sedzare », haho nde kaleele kuri bo ti : « Hango bvutulee bya Sedzare, kuri Sedzare, bya Nzaambi kuri Nzaambi. » 22Bu bayuka, bakimuka, na bu bamusiisa bayende.
Kifuuri mu ntoono mfulukulu ya bafwa
(Mal 12.18-27; Luk 20.27-40)
23Mu kiluumbu kikyo, Basaduki bamonokono kuri nde, baleelaa ti mfulukulu ya bafwa yiri ko, bamufuula, 24bamuleele ti : « Muyikisi, Moose waleele ti : "Mbuti muutu fwiiri kwahele baala, lo mpaangi yaandi kakondolo mufwiiri nde, mu kumubutila baala." 25Ngo ku bula bwa beetu, kwaba bampaangi nsaamu ; watete kakweelaana fwiiri kwahele baala, na siisiri mufwiiri waandi, kuri mpaangi yaandi. 26Bwobumosi mu waboolo, tumi wabatatu, natee wansaamu. 27Ha mambisa ma bobanso, mukyeetu wafwa. 28Heki, mbasi tsuku haba mfulukulu, mukasi wa na wuba mu bo nsaamu ? Bukuri bobanso bamubakiri. » 29Yisu wabvutula, waleele kuri bo ti : « Beenu lwawumuka bukuri lwahele kuyaaba Matinu na mpinu dza Nzaambi. 30Bukuri, mu kiluumbu kya mfulukulu, babakala na bakyeetu bakweele ko. Ngo sa baba bunu bambasi, mu mayulu. 31Ngo mu ntoono ya mfulukulu ya bafwa, beenu lwasii taanga maleele Nzaambi kuri beenu ko ? Waleele ti : 32"Me ngo Nzaambi ya Abarahami, Nzaambi ya Isaki, na Nzaambi ya Yakobi." Nde kari Nzaambi ya bafwa ko, ngo Nzaambi ya baatu bamwooyo. » 33Mampuumbu bu mayuka, makimuka mu nyikusulu dzaandi.
Ngisi yibvuriri bunene
(Mal 12.28-34; Luk 10.25-28)
34Bafarisi bu bayuka, ti Yisu kaangisiryeenu Basaduki minwa, bakutukina ha kibeendu kinikyo. 35Mutini-mangisi mosi mu bo, wamufuula kifuuri mu kumutekele mweete : 36« Muyikisi, nkya lutumu lubvuriri bunene mu mangisi ? » 37Nde wamubvutula ti : « "Tya Mfumu Nzaambi yaaku, mu mutima waaku ndemunso, mu muheebulu waaku ndemunso na mu dyeele dyaaku dyodinso." 38Lulwo ngo lutumu lubvuriri bunene na lwatete. 39Lwadzoolo lwafwanikina na lulwo ngo lumalu : "Tya mbaasi yaaku bunu ye-meene." 40Mangisi momanso na babikiri, byakaangama mu ntumu dzodzoolo dzidzo. »
Kiristo na Daavidi
(Mal 12.35-37; Luk 20.41-44)
41Bafarisi bu baba bakutukina, Yisu wabafuula, 42waleele ti : « Kitsimi kya beenu buri kiri mu ntoono ya Kiristo ? Nde mwaana na kari ? » Bo babvutula kuri nde ti : « Wa Daavidi. » 43Nde waleele kuri bo ti : Ngo dyaburi, mu Mpeeve Daavidi wumuteele "Mfumu" ? Na wuleele ti :
44"Mfumu wuleele kuri Mfumu yaami ti :
Dzakala ha lubakala lwaami,
natee ku nyisuusa me bataatu baaku kunsa bitaambi byaaku !"
45Hango, mbuti Daavidi wumuteele ti "Mfumu", lo dyaburi nde kabweese kuba mwaana Daavidi ? 46Muutu ti mosi, kasii bangisina kumuleele ntoono ti mosi ko, mu kumuha mvutu. Kuholosono kiluumbu kikyo, kuri muutu waba bweese kutsiitsa kumuha kifuuri ko.
Currently Selected:
Mataayi 22: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024