Mataayi 23
23
Kusa madyeele mu Batini ba mangisi na Bafarisi
(Mal 12.38-39; Luk 11.43,46; 20.45-46)
1Hanaho, Yisu wadzoonso kuri mampuumbu na kuri bayiki baandi, 2waleele ti : « Batini na Bafarisi, bari na kilemu kya kubaangulaa mangisi ma Moose. 3Hango, yirikee na kebee momanso ma baluleele, ngo ya lwesalila bunu buri biyiriki bya bo ko ; bukuri bo baleele ngo bahele kusalila. 4Bo bakwekaanga matsulu mamanene, maleme mu kunata, na bamateeteke ha yulu maheembu ma baatu, kasi bo, batiiri kumaningisa mu muleembu wa bo-meene ko. 5Biyiriki bya bo byobinso, kwesa mu kuri ti baatu babatala. Bo bakweyirika bisweekulu bya maampu byabinene, bi bakwelwaata, na bakwenonono maheengu ma binkutu. 6Bo batiiri bibeendu bya lukiinsu, mu minkeembu mya ndiilu, na byatete mu manzo ma nkutukunu, 7bo batiiri ba bahaa mamboto mu bibeendu bya bobanso, na babateelaa ti "Muyikisi" kuri baatu. 8Ngo, beenu yaa baluteele ko ti "Muyikisi" ; bukuri beenu Muyikisi mosi luri na nde ; beenu bobanso luri bampaangi. 9Yaa luteele muutu ti mosi ko ha butoto ti "Taayi" dya beenu, bukuri dimosi luri na dyo, ngo taayi dya ku yulu. 10Yaa baluteele se ko ti "mutwaalisi", bukuri mutwaalisi beenu mosi wuri, ngo Kiristo. 11Wubvuriri bukuutu mu beenu, yelemini kuba kisari kya beenu. 12Mpisi wunde wudzaangama mu nde-meene, sa bamukulula ; na mpisi wukuluka mu nde-meene sa bamudzaangisa. »
Bumpitu-bumpyoongo bwa Batini ba mangisi na Bafarisi
(Mal 12.40; Luk 11.39-52; 20.45-47)
13« Kyaari kuri beenu, Batini na Bafarisi bangaa bumpitu-bumpyoongo, bukuri beenu luri mu kukaanga mweelu Kimfumu kya mayulu kuri baatu ; kuri beenu-meene lwahele kukoto, na lwahele kukotoso se batiiri kukoto. » [14] 15« Kyaari kuri beenu, Batini na Bafarisi, bangaa bumpitu-bumpyoongo, bukuri lukwesa budyeengi mu mubu na ha butoto, mu kubaka muutu mosi wuyiinga dyeele ; ngo bu lumubakiri lumukituri mwaana munyeenge-mbaawu, walutila beenu mu biteesu byoolo. » 16« Kyaari kuri beenu, binati byafwa miisu, lukweleele ti : "Wunde wulaba maalu mu nzo yangisi, lo wahele mu dyaambu ; ngo, wunde wulaba maalu mu woolo dya mu nzo yangisi, lo wuri kunsa dyaambu." 17Beenu biwulu na lwafwa miisu, nki bibvuriri mufunu, woolo ho ti nzo yangisi, yihaanaa woolo bungisi ? 18Na lubweese kuleele ti : "Wunde wulaba maalu mu dziku, wahele na dyaambu ; ngo wunde wulaba maalu mu kikabu kiri ha yulu dziku, lo wuri mu dyaambu." 19Beenu baatu bafwa miisu, nki bibvuriri mufunu, kikabu ho ti dziku dikoohaa kikabu bungisi ? 20Ngo wunde wulaba maalu mu dziku, lo wulaba mu dyo, na mu bitotolo byobinso biri ha yulu dyo. 21Na wunde wulaba maalu mu nzo yangisi, lo wulaba maalu mu yo, na mu wunde wudzakala mu yo. 22Na wulaba maalu mu yulu, lo wulaba maalu mu mboloko Nzaambi, na mu wunde wadzakala ha yulu yo. » 23« Kyaari kuri beenu Batini ba mangisi na Bafarisi bangaa bumpitu-bumpyoongo, beenu luhaanaa kikuuku kyakuumi, kya binkoolo biri nkuumbu : hedwosemo, aneto, na kumino, na lubwoongolaa bibvuriri mufunu, mu mangisi : Nsungumunu, mutima wangebe na kanyi. Mimyo beenu luketyee kusalila, kwahele kubwoongolo se myakaka mimyo. 24Beenu batwaalisi bafwa miisu, beenu lukele kimbu ; ngo lumina kamelo. » 25« Kyaari kuri beenu, Batini na Bafarisi bangaa bumpitu-bumpyoongo, bukuri beenu lukwetsyeemese kimbisa kya mbasa na kya lukoombo, kunsa kati kwaluula mu nyiimunu, na kuhele kwa nkebulu nyutu. 26Ye Mufarisi wafwa miisu, tekeseleeti kutsyeemisa kunsa kati dya mbasa, mpisi heki ku mbasi, mbasa yiba se yatsyeemese. » 27« Kyaari kuri beenu, Batini na Bafarisi, bangaa bumpitu-bumpyoongo, bukuri beenu lwafwanikina na mampeembe makila mpeembe, mari ku mbasi mamonokono ti mahembeke, ngo kukati kwaluula mu miyisi mya bafwa, na nsumukunu ya bitsuumbu-bitsuumbu. 28Bwobumosi beenu seene, ku mbasi beenu lumonoko bangaa-kusuunguma, ngo kukati lwaluula mu bumpitu-bumpyoongo na mu bubayi. » 29« Kyaari kuri beenu, Batini na Bafarisi, bangaa bumpitu-bumpyoongo, bukuri beenu lukwetuunga mampeembe ma babikiri, na lukwebweeyese mampeembe ma basuunguma. 30Na luleele ti : "Mbuti beetu twaba mu biluumbu bya bataayi beetu, beetu twaketi kusa kintwaari na bo ko, mu kutsaamuna makila ma babikiri." 31Mu didyo, beenu luta kimbaangi mu beenu-meene ti, beenu luri baala ba badzusi ba babikiri. 32Hango, luuluseenu kiteesu kya bataayi beenu ! 33Beenu banyoko, kitsuumbu kya bampiri, buri beenu lusiila mu kuyitika la na mutsuundu wa lubila ? 34Mu didyo, mono, me nyiheeke babikiri, bangaa-madyeele, Batini ba mangisi kuri beenu. Beenu sa lwadzusa babamosi mu bo, na sa lwabakomono, bakaka sa lwabalata nkwaasulu mu manzo ma nkutukunu, na kubakwaamisa mu mpisi bvula, 35mpisi heki makila momanso ma basuunguma, matsaamukini ha butoto, kuholosono mu Abele, ngaa-kusuunguma, natee mu Dzakari, mwaana Barakya, wulwadzusiri ha kakati dya kihekiri kyangisi na dziku, mabwa ha yulu beenu. 36Mu ngwanwa, me nyiluleele ti : Momanso mamo sa mayirima mu kiseendu kimaki. »
Yisu na Yerusalemi
(Luk 13.34-35)
37« Yerusalemi, Yerusalemi, ye wudzusaa babikiri, wudzusaa mu matari bantumu baba bakuheekele, mantaangu makwe me nyatiiri kukutikisa baala baaku, bunu bu kutikisaa nguri nsusu baala baandi kunsa mapapu maandi, ngo beenu lwasii tya ko. 38Mono, nzo yeenu yeki yalubwongokolo yamukangala. 39Bukuri me nyileele kuri beenu ti, mu lumalu, beenu lubweese kumono me ko, natee ha luleele beenu ti : "Kaba wasakumunu wunde wukwiisa mu nkuumbu ya Mfumu !" »
Currently Selected:
Mataayi 23: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024