Mataayi 21
21
Nkotulu Yisu ku Yerusalemi
(Mal 11.1-11; Luk 19.28-40; Ywa 12.12-19)
1Bu bari mu kwekokosolo na Yerusalemi, batubuka ku bula bwa Betefange, ku mulaandu wa Mi-olibve, haho, Yisu waheeke bayiki boolo. 2Nde waleele kuri bo ti : « Yendee ku bula buri ha mankula ma beenu, na hanaho, beenu sa lwamono mukasi mpuunda wakaangu na mwaana. Banyanguneenu na batwaalee kuri me. 3Na mbuti muutu wululeeriri ntoono, mubvutukileenu ti : "Mfumu wuri na nzala byo." Hanaho, nde sa kaheeke byo. »
4Mamama mayirimini mpisi heki maleele mubikiri meende mu mana :
5« Leeleenu kuri mwaana mukyeetu wa ku Syooni ti :
Mono ! Mbyaasi yaaku yiri mu kwiisa kuri ye,
wadzuuna kwalaka, wanwaata ha yulu mpuunda yamukasi,
na ha yulu mwaana mpuunda,
mwaana kibulu kiri na kifiki. »
6Bayiki ba Yisu, bayende na bakukisa mabaleeriri Yisu. 7Bo batwaala mpuunda na mwaana waandi, bateeteke mansaanda na binkutu ha yulu byo, na Yisu wadzakala ha yulu. 8Mpuumbu yayinene yayala binkutu bya bo mu nzila, na baatu bakaka batabula bimpaala bya miti, bi bayala mu nzila. 9Mampuumbu maba ku mankula na ku mambisa ma Yisu, maba kwebikisa, maleele ti : « Hosaana kuri Mwaana Daavidi ; wasakumunu wunde wukwiisa mu nkuumbu ya Mfumu ; Hosaana mu bibeendu bibvuriri kudzaangama. »
10Yisu bu kakoto ku Yerusalemi, bvula dyodinso dyatekete dyaleele ti : « Wu ngo na ? » 11Mampuumbu makweleele ti : « Wu ngo Yisu, mubikiri wa ku Nadzareti, dya Ngalile. »
Yisu mu Nzo-Nzaambi
(Mal 11.15-19; Luk 19.45-48; Ywa 2.13-22)
12Bu kakoto mu Nzo-Nzaambi, nde wabinga bobanso babayarikaana na baba suumbaana munsa Nzo-Nzaambi, wabwiisa mataabala mababayiingaana mboongo, na bidzakukulu bya baba yarikikaana mabeembe. 13Yisu waleele kuri bo ti : Diri dyatinu :
"Nzo yaami sa bateele, yo nzo lusaambulu."
Ngo beenu lumwaasa yo, ntari bangaa-kwiibi.
14Bafwa miisu na babeele miilu, bakokosolo kuri nde mu Nzo-Nzaambi, na nde wabatsinikisa.
15Bakuutu ba bangaanga-Nzaambi na Batini ba mangisi, babaka nkesi, bubamwiini misamu myansisi mikayirikiri, na mwaa baala baba bikisaa mu Nzo-Nzaambi ti : « Hosaana mwaana Daavidi ! » 16Bo baleele kuri nde ti : « Buri ye wuri mu kuyuka mari mu kuleele bamaba ? » Yisu wabvutula kuri bo ti : « Hein-hein ! Buri beenu lwasii taanga ko ti : "Mu minwa mya mwaa baala bantele na bansoombo, ye wayirika ndumusu yaaku" ? » 17Bu kabasiisa, nde wapala mu bvula, na wayende ku Betani ku kalutisa butsuku.
Yisu wabulila mungenge mpopi
(Mal 11.12-14,20-24)
18Mu kipari, habaanaa weki bvutuka ku mabvula, nde wabaka nzala. 19Nde watalila mungenge mu nzila na wakokosolo kuri nde, ngo kasii mono kitotolo ko, ha yulu mani makaya kitsu. Na wamuleele ti : « Kya bufuu kya bufulukutuu, ye wuri mbakila bimbutu ko ! » Na ha nsi na nsi mungenge wakana. 20Bayiki baandi bu bamono bakimuka na baleele : « Dyaburi mungenge kakanini ha nsi na nsi ? » 21Yisu kabvutula kuri bo, waleele ti : « Mu ngwanwa me nyiluleeriri, mbuti beenu lubeeri na kanyi, na lwahele kusa mpaka, kari mana malumwiini mu mungenge, luketi kuyirika kitsu ko, ngo na kuri mulaandu wu se, ha beeri lo luleeriri ti : "Yisika na yende bwa mu mubu", lo bubwo buyirimini. 22Momanso ma luloombo beenu mu lusaambulu, bu lusiiri kanyi sa lumataambula. »
Kuri kwafumuna lutuma lwa Yisu ?
(Mal 11.27-33; Luk 20.1-8)
23Yisu wayende ku nzo-Nzaambi. Bu kaba mu kuyikisa, bakuutu ba bangaanga-nzaambi, na bakulu bababakala ba kaanda bakokosolo kuri nde, baleele ti : « Mu nki lutumu ye wuri mu kweyirikila mamo ? Na wakuha lutumu lumalu ? » 24Yisu wabvutula, waleele kuri bo ti : « Me se kifuuri kimosi me nyiluha, kiri mbuti beenu lumpeeri mvutu, tumi me se nyiluleeriri mu nkya lutumu me nyiri mu kweyirika mamo : 25Mbotokulu ya Yowane, yaba ya kuri ? Ya ku yulu ho ti ya baatu ? » Bo balelesene bo na bo ti : « Mbuti tuleeriri ti : "ya ku yulu", lo nde bee leeriri ti : "Hango buri lwaheri kusiila kanyi mu nde ?" 26Na mbuti tuleeriri ti : "Ya baatu", tubata mpuumbu. Bukuri bobanso bahololo Yowane bunu mubikiri. 27Bo babvutula kuri Yisu, baleele ti : "Beetu tuyaari ko. » Yisu wababvutula ti : « Me se nyiluleele ko, mu nkya lutumu me nyiri mu kweyirika mamo. »
Nkuma ya baala boolo
28« Beenu nki lutsimini ? Muutu mosi waba na baala boolo. Bu kakokosolo kuri watete, wamuleele ti : "Mwaana me, yende sala bwalolo ku nseke bviinya." 29Nde wabvutula, waleele ti : "Me nyahele kutya." Mwaa mantaangu bu maluta, nde wayiinga kitsimi na wayende. 30Bu kakokosolo kuri wakaka, waleele bwobumosi. Ngo nde wabvutula waleele ti : "Mfumu, me nyikweende", ngo wahele kweende. 31Na mu boboolo wayirika kutya kwa taayi ? » Bo baleele « watete ». Yisu waleele kuri bo ti : « Mu ngwanwa me nyileele kuri beenu ti : Batori ba mpaku na bakyeetu babiyala, sa balutekisile mu Kimfumu kya Nzaambi. 32Bukuri Yowane wayisa kuri beenu mu nzila yansungumunu, beenu lwasii siila kanyi mu nde ko ; kasi batori ba mpaku na bakyeetu babiyala basiila kanyi mu nde. Ngo beenu lwamono mamo, kasi ha mambisa haho lwahele kuyiinga dyeele, mu kusiila kanyi mu nde. »
Nkuma ya bakamuni ba bviinya bababi
(Mal 12.1-12; Luk 20.9-19)
33« Yukeenu nkuma yikimi : Muutu mosi waba ngaa-nzo, wakuna nseke bviinya, wadyengesele yo mu lupaangu, wahaka bulu dya kukamukina malu, watuunga nzo yadzaangama, wayukusina na bakamuni ba bviinya, na wayende ku budyeengi. 34Ntaangu ya kutolo bimbutu bu yatubuka, nde waheeke bisari byaandi kuri bakamuni ba bviinya, bee baholo kikuuku kya nde. 35Bakamuni ba bviinya, bakwaata bisari bya nde, balata wamosi, badzusa wakaka, na wabatatu bamudzusa mu matari. 36Nde wabweese kuheeke bisari bikimi, bibvuriri mu lutaangu ti na byatete ; na bo bayirika bwobumosi kuri bo. 37Mwaa mantaangu bu maluta, nde waheeke mwaana waandi kuri bo, waleele ti : "Bo sa babvumina mwaana me." 38Bakamuni ba bviinya bamonaa mwaana, balelesene bo na bo ti : "Wumawu ngo mukondiri-saala. Waseenu, tumudzuseenu, mpisi tumuholee na saala." 39Bamukwaata, bamutuba ku mbisa nseke, na bamudzusa. »
40« Hango, ntaangu yikwiisa ngaa-nseke, nki kasa kuri bakamuni ba bviinya ? » 41Bo babvutula kuri nde ti : « Nde sa kadzusa bababi babo mu kibakala, na sa kaha nseke kuri bakamuni bakimi, bamuha bimbutu, mu ntaangu ya bo. »
42Yisu waleele kuri bo ti : « Buri beenu lwasii taanga mu Matinu ko ?
"Tari dyaloosiri batuungi,
didyo ngo dyeki dyanguri ha nkuumbu.
Mimyo kuri Mfumu miri myafumuna,
na mya nkimukunu ha miisu mya beetu." »
43« Hango nkuumbu, me nyileele kuri beenu ti, Kimfumu kya Nzaambi, sa baluyusula na kyo, na sa baha kyo kuri kaanda dibuta bimbutu. [44Mpisi wubwa ha yulu tari di sa kakosoko ; na mpisi wuri dimubwirikiri, sa dyamunyifuna.] »
45Bakuutu ba bangaanga, na Bafarisi bayuka Mankuma ma Yisu, babakula ti Yisu mu bo kadzoonsolo. 46Basaka bwa kumukwaatila, ngo babata mampuumbu, bukuri babahololo Yisu bunu mubikiri.
Currently Selected:
Mataayi 21: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024