Mataayi 20
20
Nkuma ya bangaamba ba bviinya
1« Mono, kimfumu kya mayulu buri kiri kyafwanikina : Muutu ngaa-nzo bu kapala mu kipari, waholo bangaamba mu kwesala ku nseke yaandi ya bviinya. 2Wayukisina na bangaamba mu kubafuta kidenayi kimosi mu kiluumbu, nde wabasindika ku nseke yaandi ya bviinya. 3Bu kapala mu kilookolo kyabitatu, nde wamono baatu bakimi badzakala ha kibeendu kya bobanso, ngo bahele na kisalu. 4Nde waleele kuri bo ti : "Beenu se yendee ku nseke bviinya, tumi me nyiluha byayelemene." 5Bo bayende. Ngo bu kabweese kupala, kampe mu kilookolo kyabisaamunu na kyawa, wasa bwobumosi. 6Bu kapala kampe mu kilookolo kyakuumi na kimosi, wamono bakimi bateleme, wabafuula ti : "Buri luri lwateleme hamaha, bwiisi bwabutsiina, kwahele kusala ?" 7Bo baleele kuri nde ti : "Bukuri kwahele muutu wutuhoriryee mu kisalu." Nde waleele kuri bo ti : "Beenu se yendeenu ku nseke bviinya." 8Nsinsika yatubuka, ngaa-nseke bviinya waleele kuri mukebi lubaku lwaandi ti : "Teele bangaamba na wubaha mufutu waaku ; kubandikila mu bampotulu natee mu batete." 9Bangaamba ba kilookolo kyakuumi na kimosi, bayisa na bataambula mpisi nde kidenayi kimosi. 10Ba kilookolo kyatete bayisa, batsima ti bee bataamburi bibvuriri ; ngo, bo se bataambula mpisi nde kidenayi kimosi. 11Bu bari mu kwetaambula mufutu, bari mu kwemunguta, mu ntoono ngaa-nzo. 12Baleele ti : "Ba kilookolo kyampotulu bamaba, kilookolo kimosi basiiryee, ngo ye kubaha kiteesu kimosi na beetu, tunaangunyee kilemu kya bwiisi na mwiini !" 13Ngaa-nzo wabvutula kuri mosi mu bo, waleele ti : "Nduku yaami, me nyahele na bubayi ku wuri ye ; buri kari mu kidenayi kimosi ye yukisinyee na me ko ? 14Holo kyaaku na yende. Me ntiiri kuha kuri wumawu kidenayi kimosi, bunu buri kuri ye se. 15Buri me nyahele na miswa mu kuyirika mantiiri mu bitotolo byaami, ho ti ye wuri na miisu mbengele, bukuri me ngaa-mutima-bubwete ?" 16Mu bubwo, bampotulu sa baba batete na batete sa baba bampotulu. »
Yisu wuyaabisa lufwa na mfulukulu yaandi
(Mal 10.32-34; Luk 18.31-34)
17Bu kaba mu kutoomboko ku Yerusalemi, Yisu waholo bayiki bo kuumi na boolo bobakaka, na mu nzila nde waleele kuri bo ti : 18« Mono, Turi mu kutoomboko ku Yerusalemi, na Mwaana muutu sa kaba wayekulu, kuri bakuutu ba bangaanga-nzaambi, na kuri Batini ba mangisi. Bo sa bamukesele mukanu wa lufwa, 19na sa bamuyekele mu myooko mya bangooyi mu kumusaana, kumulata nkwaasulu, kumukomono ha yulu kuruwa, na kiluumbu kyabitatu sa kaba wafulukusu. »
Ndoombolo nguri Yaakobo na Yowane
(Mal 10.35-45)
20Hanaho, nguri baala ba Dzebede wakokosolo kuri nde, kintwaari na baala baandi, wamutsukumina mu kuloombo kitotolo kimosi kuri nde. 21Yisu waleele kuri nde ti : « Nki ye tiiri ? » Nde wabvutula kuri Yisu ti : « Ha miswa mpisi heki, baala ba me boboolo ba, mbasi tsuku baba badzakala, mosi ha lubakala lwa ye, mosi ha lumosi lwa ye, mu Kimfumu kyaaku. » 22Yisu wabvutula, waleele ti : « Beenu lwahele kuyaaba maluri mu kuloombo. Buri beenu lo lubangisini kunwa mbasa yiyo, yi nyelemini kunwa me ? » Bo babvutula : « Beetu lo tubangisini. » 23Yisu wabaleele ti : « Mbasa me, beenu ngo luri sa lwanwa ; ngo mu matariri kudzakala ha lubakala, na ha lumosi lwa me, kari me nyiha miswa mimyo ko, ngo bibeendu bibyo bya babo, bari Taayi dya me wabayirikila byo. » 24Bayiki kuumi bakaka bu bayuka bubwo, babakila bampaangi boboolo babo nkesi. 25Yisu wabateele na wabaleele ti : « Yaabee ti bamfumu ba mansi, bakoosalilaa bumfumu mu mansi mamo, na bakuutu bakoosalilaa lutumu ha yulu mo. 26Kari bubwo buyelemini kuba ha kakati dya beenu ko ; ngo wunde wutiiri kuba mukuutu mu beenu, lo yelemini kuba kisari kya beenu. 27Na wutiiri kuba watete mu beenu, lo sa kaba nkutu beenu. 28Bwobumosi, Mwaana muutu wahele kwiisa mu kuri ti bamusalila, ngo mu kusalila na kuha kidziingu kyaandi, bunu kikori mu balaka. »
Yisu watsinikisa bafwa miisu boolo
(Mal 10.46-52; Luk 18.35-43)
29Bu baba mu kupala mu Yeriko, mpuumbu yayinene yamunama. 30Na mono, baatu boolo bafwa miisu badzakala ha teke nzila, bu bayuka ti Yisu wuri mu kuluta, bo bafula misaakulu, baleele ti : « Mfumu, mwaana Daavidi, siila beetu ngebe ! » 31Mpuumbu yabaŋaŋana mpisi bawura. Ngo bafwa miisu bahamisa kufula misaakulu, baleele ti : « Mfumu, mwaana Daavidi, siila beetu ngebe ! » 32Yisu bu kateleme, wabateele mbila, wabafuula, waleele ti : « Nki lutiiri me nyiluyirikila ? » 33Bo babvutula kuri nde ti : « Mfumu, hemese miisu mya beetu midzibuma. » 34Yisu wamono ngebe, wabelemene miisu mya bo, na hanaho, bamono na banama Yisu.
Currently Selected:
Mataayi 20: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024