Mataayi 1
1
Muloongo kinkaaka kya Yisu
(Luk 3.23-38)
1Mukaanda kinkaaka kya Yisu Kiristo, mwaana Daavidi, mwaana Abarahami.
2Abarahami wabuta Isaki, Isaki wabuta Yakobi, Yakobi wabuta Yuuda na bampaangi baandi. 3Yuuda wabuta Fare na Dzara mu Tamaari. Fare wabuta Eseroni, Eseroni wabuta Arame. 4Arame wabuta Aminadabe, Aminadabe wabuta Naasoni. Naasoni wabuta Salemone, 5Salemone wabuta Bohese mu Lahabi ; Bohese wabuta Yobede mu Luti ; 6Yobede wabuta Yese, Yese wabuta Daavidi.
Daavidi wabuta Solomo mu mukasi Uri, 7Solomo wabuta Lobohame, Lobohame wabuta Abya, Abya wabuta Asafe, 8Asafe wabuta Yosafati, Yosafati wabuta Yorama, Yorama wabuta Odzyasi, 9Odzyasi wabuta Yohatama, Yohatama wabuta Ahadzi, Ahadzi wabuta Edzekyasi, 10Edzekyasi wabuta Manase, Manase wabuta Amosi, Amosi wabuta Yosya, 11Yosya wabuta Yekonya na bampaangi baandi, mu ntaangu ya natunu baatu ku Babiloni.
12Ha mambisa ma natunu baatu ku Babiloni, Yekonya wabuta Salatyeli, Salatyeli wabuta Dzorobabeli, 13Dzorobabeli wabuta Abihudi, Abihudi wabuta Elyakimi, Elyakimi wabuta Adzori, 14Adzori wabuta Sadoki, Sadoki wabuta Akimi, Akimi wabuta Eliyudi, 15Eliyudi wabuta Elehadzari, Elehadzari wabuta Matani, Matani wabuta Yakobi, 16Yakobi wabuta Yoosefi, mulumi Maari, maba buta Yisu wubateelaa ti Kiristo.
17Biseendu byobinso : Kuholosono mu Abarahami natee mu Daavidi, biseendu kuumi na bina ; kuholosono mu Daavidi natee natunu baatu ku Babiloni, biseendu kuumi na bina ; kuholosono natunu baatu ku Babiloni natee mu Kiristo, biseendu kuumi na bina.
Mbutukulu Yisu
(Luk 2.1-7)
18Mbutukulu ya Yisu Kiristo yaba bumabu. Maari, nguri yaandi, waba na lulelusunu lwa makweele na Yoosefi. Tekesele badzakala nzo mosi, nde wabaka yimi mu mpinu dza Mpeeve Yangisi. 19Yoosefi, mulumi waandi, bu kaba muutu wasuunguma, na bu kaba wahele kutya kumusaana ha busu bwa baatu, watsima kuhambikisa na nde mu nsweeki. 20Bu kaba mu kwetsima mimyo, mbasi ya Mfumu yamumonokono mu ndosi, yamuleele ti : « Yoosefi, mwaana Daavidi, yaa ba na boomo ko mu kuholo Maari, mukasi waaku, bukuri mwaana wubutuka mu nde, mu mpinu dza Mpeeve, wangisi. 21Nde sa kabuta mwaana wamubakala, na ye sa wamuluka nkuumbu Yisu ; bukuri nde sa kabvuukisa baatu baandi, mu masumu ma bo. »
22Myominso mimyo mayirimini, mpisi heki maleeriri Mfumu mu mubikiri, meende mu mana :
23« Mono, mwaa ntuumba yanswaasa sa kabaka yimi,
na sa kabuta mwaana wamubakala,
na sa bamuteele nkuumbu Emanweli. »
– Mbangukulu ti : « Nzaambi wuri na beetu ».
24Yoosefi kamanaa kusiimbuka tolo, wayirika bunu bwamutumini mbasi ya Mfumu, na waholo mukasi waandi. 25Ngo nde kasii yaaba kimpene kyamukasi ko, natee ku kabutiri mwaana, na wamuteele nkuumbu Yisu.
Currently Selected:
Mataayi 1: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024