Biyiriki bya Bantumu 27
27
Poolo bamuheekiri ku Looma
1Bu baholo nzeengulu dza kunata beetu ku Italya, baha Poolo na maboroko makimi kuri mukuutu nkama bayongolo, nkuumbu yaandi, Yulyusi, mu mukaangu bayongolo wa Onguste. 2Beetu twanwaata mu bwaatu, bwa Aderamite, bwaba kweende mu mabula ma Adzya, mari mu teke mubu. Baba na beetu ngo Arisetarako wa ku Masedoni wudzakalaa ku Tesalonika. 3Kiluumbu kyanama, beetu twatuula ku Sidoni. Yulyusi waba hololo Poolo mu bumuutu, wamuha miswa mu kwemono banduku baandi, mu kutaambula lubakusu, lukaba na nzala lwo. 4Bu twayisika haho, twayende mu teteke dya simu, dya Sipere, mu ntoono kiteembu kyaba tubwaana, 5na beetu twataba mubu, bebele dya Silisi na Pamfili, na twasunduka ku Mira, ku Lisi. 6Haho, mukuutu nkama bayongolo bu kamono bwaatu bwa ku Alekandere bwaba kweende ku Italya, nde wutunwaatisa mu bwo. 7Mu biluumbu byalaka, beetu twaba kweyende ntentele mu maampa ; na mu mpasi dzalaka beetu twatubuka ku teke bvula dya Kinide, ngo twasii mbangisina kusunduka haho ko, mu ntoono kiteembu kyaba tukakisila. Beetu twayendekele mu teteke dya simu, twabwa ha kakati dya maampa dya Salemone, mu kutubuka ku Kerete. 8Mu mpasi, beetu twatubuka ku kibeendu kibateelaa ti Masabu Mamabwete, bebele na bvula dya Lase.
9Ntaangu yalaka yaba yimwaaluta, na bwaba bweki bwabubi, mu kweyendekele mu maampa, mu bukuri ntaangu ya loomi yaba yimwaaluta. Poolo walubula, 10waleele kuri bo ti : "Banduku baami, me nyimono ti budyeengi bu, buri na nsisi, kari munu mu bitotolo ko, ngo se na mu kidziingu kya mpisi nde mu beetu." 11Kasi mukuutu nkama, waba bvuriri kusiila nsiitu mu munati na mu ngaa-bwaatu, ti na mu maba leele Poolo. 12Ngo bukuri sabu dyaba, bwa kulutisila pe ntaangu ya kyoosi, balaka baha kitsimi kya kuyisika haho, mu kuri ti kampe tutubukiri ku Fenisi, sabu dya Kerete, ku teke suude bebele na wesete na ku noode bebele na wesete.
Kiteembu kyamakwa mu mubu
13Kiteembu kyadzuuna kyafumuna ku suude kyabeke kupeepe. Bo batsima ti lo beensi kwaaku ; ngo bayende mu nzila ya Kerete. 14Mwa kidzika kyantele, kiteembu kyamakwa, ki bateelaana Erakilo, kyasangumuka. 15Kiteembu kyanata bwaatu, na bu twaba, bwakusiila pe, twayendekele bunubwo. 16Bu twaba mu kuluta ku nsuku kibumu kibateelaa Koda, mu mpasi dzalaka beetu twabangisina kuholo mwaa bwaatu bwantele bwa lubakusu. 17Bakolokoso bwaatu bubwo mu misiinga mya lubakusu. Mu kubata kuri ti bakwiisa kutukoko natee ku Sirite, bo basundula bitsuri bya miti bikoobaanaa byakolokoso mu bwaatu, na bahemese bee yendekele mu kiteembu bunubwo. 18Kiluumbu kyanama, kiteembu bunu kyaba kyakiri mu kutuningisa. Baatu babeke kulooso bitotolo mu kuleengese bwaatu. 19Na mu kiluumbu kyabitatu, bo basundula makuunsi ma bwaatu mu myooko mya bo-meene. 20Mu biluumbu byalaka, ntaangu na bambwetete byasii pala ko ; kiteembu kyasii kuluka ti mwaakwantele ko, na nsiitu ya kubvuuka yaba yeki yope.
21Byandya byaba bimwaawa na kidzika. Poolo, bu kateleme ha kakati dya bo, waleele ti : "Beenu ! Banduku, bwaba bwayelemene ti beenu kunywiila ; twaketyee kuyisika Kerete ko, mu kuhele kusuumbuka na kuhele kuhoomboso byobinso bi. 22Mu lumalu me nyiluloombo ti lwaatee kibakala. Kuri muutu mu beenu wufwa ko, ngo bunu bwaatu bubvukuna. 23Nzaambi yibakiri me, na yinkoosalila me, mbasi yaandi yiisiryee kumonokono me, mu butsuku, 24na yileeriryee kuri me ti : "Poolo yaa ba na boomo ko, ye yelemini kuteleme ha busu bwa Sedzare ; na mono, Nzaambi wukusiiriri bweese, na bobanso baluri mu budyeengi. 25Hango nkuumbu, banduku beenee na kibakala, me nyiri na nsiitu mu Nzaambi ; mamo ma kaleeriryee kuri me, sa mayirima. 26Buri bwabubwete ti tutelemee ha yulu kibumu.
27Butsuku bubwo, bwaba bweki bwa kuumi na bina, na twaba tumwaawumuka, ha mubu wa Mediterane. Mu kakati dya butsuku, bisari bya mu bwaatu, babaka kitsimi ti kampe, tukokisiri bebele na butoto. 28Bo badiimba musundu, na babaka mankwaanga makuumi moolo ; bu bayende ha mankula, babweese kudiimba, na babaka mankwaanga kuumi na mataanu. 29Bo bamono boomo, ti bwee tukakiri mu matari, basundula binko bina ku mambisa ma bwaatu, na basuka mutima ti nkani bwiisi buwasula mu kukya. 30Bisari bya bwaatu baba na nzala kuyitika ; bu basundula mwaa bwaatu bwa lubakusu, ku mutu bwaatu, bo kuleele ti binko bakweeyirika. 31Poolo waleele kuri mukuutu nkama bayongolo na bayongolo ti : "Mbuti baatu ba bahele kuba munsa bwaatu, lo beenu lubangisina kubvuuka ko." 32Haho bayongolo batabula misiinga myaba myakolokoso mwaa bwaatu bwa lubakusu, na badipatula dyayende mu maampa.
33Tekesele bwiisi bukya, Poolo wasyaamisa bobanso ti nkani badya, waleele ti : "Kiluumbu ki kyakuumi na bina, luri mu kukiinga na lwahele kudya. 34Hango nkuumbu me nyilusyaamisa, mu kuholo byandya, bukuri mvuukulu yeenu yiri mu byo, na kuri ti lufu lumosi lwa mitu myeenu ludziimbila ko." 35Nde kaleelaa mimyo, waholo mpa, wabvutula matoondo kuri Nzaambi, ha busu bwa bobanso, na bu kabukuna, wabaandika kudya. 36Bobanso babaka makwa, na bo se baholo byandya mu kudya. 37Munsa bwaatu, twaba nkama dzoolo na makuumi nsaamu na baatu basaamunu. 38Bu bayukuta, bo balooso masaangu mu mubu mu kuleengese bwaatu.
Ndyaamunu bwaatu
39Bwiisi bu bwakya, basii bweese kuyaaba butoto ko, ngo batalila mwaa waanga diri, na kibeendu kyapalila munyeenge. Bo bakaanga kitsimi kya kweende ku simu, mbuti babangisini kusindikila bwaatu. 40Bu bapatula binko, bayende ha yulu mubu, mu ntaangu yoyimosi, banyanguna misiinga mya kisuunguki, bataanda nsaanda ya ku mankula ma bwaatu, mpisi heki kiteembu kibasindikila ku simu. 41Bo babwa ha kibumu kya munyeenge, kiri ha kakati dya mubu ; bo basaka bwakwendekele ku simu, ngo mutu wakakimina kunsa munyeenge ; bwaatu bwaba bwa kutembekele pe. Kitsuri kya mambisa kyatsaamuka mu ntoono makwa ma mipaku. 42Kutya kwa bayongolo kwaba ti badzusa maboroko, mpisi heki ti dimosi dihele kubwa mu mubu na kubvuuka ha mambisa ma kutsaya. 43Mukuutu nkama bayongolo bu katiiri kuyitikisa Poolo, wabakabikisa kitsimi kikyo. Nde watuma kuri babo babangisina kutsaya, mu kubwa batete mu maampa na beende ku simu. 44Heki mu babo basiiri, babamosi basalila mabaya, bakaka basalila mabaya ma bayisila mu bwaatu. Bubwo bobanso batubukiri ku simu, mpeembe-mpolo.
Currently Selected:
Biyiriki bya Bantumu 27: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024