Biyiriki bya Bantumu 28
28
Poolo ku kibumu kya butoto kya Malete
1Bu babvuuka mpeembe-mpolo, bo bayuka ti kibumu kya butoto ki batubukiri kikyo nkuumbu Malete. 2Bangaa-bula bubwo, batubwaana mu ntiilu yayinene. Bu banamuka mbaawu, batuteele mu kuyiyoto, mu ntoono mvula yaba yimwaanoko, na mu ntoono kyoosi. 3Poolo bu katolo bitsootso byalaka, wabituba ku mbaawu, mpiri yapala, mu ntoono nyangala, na yamutatika mu kooko. 4Bangaa-bula bu bamono nyoko, yiri mu kutsinga mu kooko kwa Poolo, bo na bo baleele ti : "Ngwanwa muutu wu mudzusi kari. Nde pariryee mpeembe-mpolo mu mubu, ngo nsundusulu dza Nzaambi dzimuha miswa ko mu kuba mwooyo. 5Hango nde, kakubulaa kooko, nyoko yabwa ku mbaawu ; nde wahele kumono mpasi ti dzimosi. 6Baatu babakiingilaa ti kooko bee kumutuundiri, bunu pele bee fwiiri nasisuu. Bo bakiingila kidzika kyalaka, na bahele kumono dyampasi dimutubukila. Bo bayiinga nzoonsulu, beki leele ti, muutu wu nzaambi kari.
7Bebele na kibeendu kikyo, kwaba bula bwa muutu mosi, mukuutu kibumu, nkuumbu yaandi Pubilyusi, watutaamburi, mu kimbaasi ku nzo yaandi, mu biluumbu bitatu. 8Ngo taayi dya Pubilyusi wabeele baawu, na mwooyo wamakila, waneŋene. Poolo wayende kuri nde, wasaambila, wamutetekele myooko, na wamutsinikisa. 9Mamo bu mamonoko, baatu bakimi ba ku kibumu, baba na babeeru bakokosolo, na Poolo wabatsiinikisa. 10Bo batuhololo mu lukiinsu lwolunso ; bu twaba tweki mu kweende, batuha bitwaba na nzala byo mu budyeengi.
Poolo watubuka ku Looma
11Ha lumbisa lwa mangoondo matatu, beetu twaholo bwaatu bwa ku Alekandere, bwalutiisiri ntaangu ya kyoosi ku kibumu. Bisoni byatina mu bwaatu byaba « Dyosekure. » 12Bu twatubuka ku Syrakusi, beetu twalutisa biluumbu bitatu haho. 13Bu twayisika haho, twatubuka ku Lengyoni. Ha mambisa ma kiluumbu kimosi, kiteembu kya suude kyatubuka, na bukyaanaana twatubuka ku Pudzole, 14kukwo twabaka bampaangi, batuteele mu kudzakala kuri bo, mu biluumbu nsaamu. Bubwo twatubukila ku Looma. 15Bampaangi ba ku Looma, bu bayuka mi twabwanikini na myo, bayisa mu kutubwaana natee ku dzaandu dya Apyo, na ku Manzo Matatu. Poolo bu kabamono wabvutula matoondo kuri Nzaambi, na walwaata kibakala. 16Mu ntaangu yi twakoto mu Looma, baha miswa kuri Poolo, mu kuba kwa nde-kaka na muyongolo waba kwemukebaana.
Poolo wayikisa ku Looma
17Ha mambisa ma biluumbu bitatu, Poolo wateele bakuutu batete ba Bayudayo ba ku Looma, ku nzo yikaba. Bu bakutukuna, nde waleele kuri bo ti : "Bampaangi baami, me nyahele kuyirika lumvuki ti lumosi kuri kaanda, bunu pele kuri bifu bya bataayi beetu. Bu nyabee mu boroko ku Yerusalemi, me banyekele mu myooko mya bari Looma. 18Bo bamfuulaana, baba batiiri kumpatula me, mu ntoono yiri bahele kumono kibila ki badzusila me. 19Ngo, Bayudayo basii tya ko, na me nya kati kuloombo ti Sedzare kansuundisa, kuri nyahele na kitsimi kya kufuunda kaanda dyaami. 20Mu ntoono yiyo, me ndoombiryee mu kulumono, na mu kuyolo na beenu. Mu ntoono nsiitu ya Iselili, me nyiri mu bikonyi bi nyiri na byobi. 21Bo bamuleele ti : « Mu mitariri ye, beetu twahele kutaambula mukaanda ti mosi, wafumina ku Yuuda ; kwahele se ti mosi mu bampaangi bayisiri kumaku, watuyaabisiri bunu pele wadzoonso mamabi mu ye. 22Ngo beetu tutiiryee kuyuka ye-meene, ma wutsima ye, mu mitariri kabu, dya minsaambiri myahaambuka, bukuri dyayabakana ku turi beetu, na mwomunso bari mu kudinwaanisa. »
23Bu bakaanga laki na Poolo, bo bayisa mu lutaangu lwalaka ku nzo yaandi. Kuri bo kayaabisa mu nteelulu kimbaangi kya Kimfumu kya Nzaambi, mu kubayukusa mu mitariri Yisu, kabandikila mu Mangisi ma Moose, natee mu babikiri, baholosonaa kipari natee nsinsika. 24Babamosi basiila kanyi mu ma kaba leelaana, bakaka babisa kusa kanyi. 25Bu baba kuyukusuna pe, bo na bo, batsamukina. Poolo waleele dyaambu dimosi ti : Bwabubwete, Mpeeve Yangisi yadzoonsiri mu Esayi kuri bataayi beenu, 26yaleele ti :
"Yende leele kuri kaanda didyo :
Beenu sa lwayuka, ngo kalubakula ko ;
beenu sa lwakyeese, ngo kalumono ko.
27Bukuri mutima kaanda di weki wakuba ;
bari na mpasi mu kuyuka mu makutu,
bakaangiryee miisu myaaku,
mpisi bahele kumono mu miisu,
na bahele kuyuka mu makutu,
na bahele kubakula mu mutima,
na bahele kuyiinga madyeele mpisi me nyibatsinikisa."
28Ngo diba dyayabakana kuri beenu ti, mvuukulu ya Nzaambi yi, yeki yaheeku, kuri bangooyi ; bo se sa bayuka ! [ 29]
30Poolo wadzakala mibvu myoolo, mu nzo ya kufutila. Nde waba taambulaa bobanso baba kweemumonaana. 31Nde wayaabisa Kimfumu kya Nzaambi, na wayikisa mu mitariri Mfumu Yisu Kiristo, mu nsiitu dzodzinso, kwahele mikakusulu.
Currently Selected:
Biyiriki bya Bantumu 28: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024