Biyiriki bya Bantumu 26
26
Poolo wakalila nyutu yaandi ha busu bwa Angiripa
1Angiripa waleele kuri Poolo ti : "Wuri na miswa mu kukalila nyutu yaaku." Haho Poolo kalaambula kooko wadzoonso mu kukalila nyutu yaandi : 2"Mu myominso mya fuundiri me Bayudayo, mbyaasi Angiripa, me nyiri na kiminu kyalaka, mu kukalila nyutu yaami ha busu bwa ye, lolo dimadi ; 3bukuri ye wuri na nyaabulu ya myominso, mitariri bifu bya Bayudayo, na mi bakwesiila bo mpaka. Hango nkuumbu, me nyikuyingukila ti nkiindisa mutima mu kunywiila.
4"Hango, kidziingu kyaami, kuholosono kunu mbandukulu butuuti bwaami, me nyikiyookisiirye hansa kaanda dyaami ; Bayudayo bobanso badzakala mu Yerusalemi bayaari. 5Kuholosono na kidzika banyaari ; lo bateeriri me kimbaangi. Me netyee kidziingu kyaami bunu Mufarisi, bunu buri nsambukulu yeetu. 6Na mu lumalu, mu nsiitu dza lusiilulu dzasa Nzaambi kuri bataayi beetu, me ntelimini ku mutsuundu. 7Kintwaari kya makaanda mo kuumi na moolo meetu, makwesalila mu kifiki, butsuku na mwiini, mari na nsiitu mu kumono nsiilulu dzidzo. Mu ntoono nsiitu dzidzo, mbyaasi, Bayudayo, bafuundiri me. 8Bukuri nki luri mu kutsima, ti Nzaambi kari mfulukisa bafwa ko ? 9"Me ngo wuri, nyaba na kitsimi kya kunwaanisa, mu manzila momanso, nkuumbu Yisu, wa ku Nadzareti. 10Mamo se, me nyasiiri ku Yerusalemi. Nyasoko bangisi balaka mu boroko, bu nyataamburi lutumu lwa bakuutu ba bangaanga-nzaambi. Me nyataamburi kuri ti babadzusa, habaanaa babakesiri mukanu wa lufwa. 11Me nyayende mu manzo ma nkutukunu mu kwebaseembe. Nyabakwiikisa mu kuri basaana nkuumbu Yisu, na mu nkesi dzalutila kiteesu, nyabanama natee mu mabvula manzeense.
Poolo wuyaabisa nyiingulu madyeele maandi
(Biy 9.1-19; 22.6-16)
12Mu ntoono misamu mimyo, me nyayende ku Damasiko, na lutumu na kisalu kya mpeeri bakuutu ba bangaanga-nzaambi. 13Mu nkati mwiini, ha kakati dya nzila, buungi bubvuriri na ntaangu, bwafumuna ku yulu, bwadyengekele me, ha kimosi na baba kwemfila. 14Beetu bobanso twabwa ha nsi, me nyayuka mbeembu yabaleele me mu ndiinga ya kihebereho ti : "Sawuli, Sawuli ! Mu nki wuri mu kwekwaamisa me ? Diri mpasi kuri ye, mu kunwaanisa kutya kwa Nzaambi. 15Me nyafuula ti : "Mfumu ye na ? Mfumu waleele ti : "Me ngo Yisu, wu wuri mu kwekwaamisa. 16Kasi, siimbika na teleme mu miilu myaaku ; me nyikumonokini mu kusa ye kisari kyaami na mbaangi me mu mamwiini, na ma wubweese kumono, ha nyikumonokono me. 17Me sa nyakukuula mu myooko mya kaanda dyaaku, na kuri makaanda makaka ma bangooyi, ku nyikuheeke me. 18Me nyikuheekiri mu kudzibula miisu mya bo, mpisi bapala mu mampimbisi biisa ku buungi, bapala na mu lutumu lwa Saatana, mu kuba mu lwa Nzaambi, mu kutaambula mpemusunu ya masumu, na bataambula kikuuku ha kakati dya bangisi, mu kanyi dibasa mu me."
Poolo wudzoonsolo mu kisalu kyaandi
19Mu bubwo, mbyaasi Angiripa, me nyasii tungukila mamono-miisu, ma ku yulu mamo ko. 20Kubandikila kuri bari ku Damasiko, tumi bari ku Yerusalemi, nkoonsi yoyinso ya Yuuda, na kuri bangooyi, nyayikisa ti bayiinga madyeele, na babvutuka kuri Nzaambi, na basalila biyiriki byayelemene, na nyiingulu madyeele. 21Mu ntoono yiyo, bu nyaba mu Nzo-Nzaambi, Bayudayo bankaanga na basaka bwa kunzusila. 22Ngo mu bweese bwa Nzaambi, me nyiri natee mu kiluumbu ki, na me nyiri mu kuta kimbaangi, ha busu bwa bilesi na bakuutu, kwahele kuleele ti dimosi, ha yulu mayaabisiri babikiri na Moose, 23mu kuyaaba ti Kiristo sa kabama, na nde ngo wufuluka watete mu bafwa, nde sa kayaabisa buungi, kuri kaanda na kuri bangooyi."
Poolo wuloombo kuri Angiripa mu kusa kanyi
24Poolo bukari mu kukalila nyutu mu mamo, Fesetusi mu mbeembu yadzaangama waleele ti : "Ye walawuka, Poolo ! Nyaabulu yiwuri na ye, kukunata ku kulawuka !" 25Poolo wabvutula ti : "Me nyahele kulawuka, Wa lukiinsu Fesetusi, ngo ma ndeeriri me mangwanwa, na ma madyeele. 26Mbyaasi yaari myominso mimyo, na me lo nzoonsiri mu nsiitu ha busu bwa nde. Me nyirikiri kuyaaba ti, nde kadziimbiri ti dimosi mu mamo ko, bukuri mamo mahele kuyirima mu nsweeki. 27Buri ye wusa kanyi mu babikiri, mbyaasi Angiripa ? Me nyaari ti ye, wusa kanyi !" 28Angiripa waleele kuri Poolo ti : "Ha siiri, ha ntele ye tiiri kukitula me Mukiristo." 29Poolo waleele kuri nde ti : "Ntaangu yiba yantele, bunu pele yalaka, me nyisaambila Nzaambi, kari mu wunu ye ko, ngo mu beenu bobanso luri mu kuyuka me lolo di, mpisi luba bunu me, ngo kwahele bikonyi bi !"
30Mbyaasi, ngoforo, Berenike na bobanso baba na bo, bateleme, 31na bu bayende ku mfuundu, badzoonso bo na bo, baleele ti : "Muutu wu wahele kuyirika ntoono ti mosi yi bayelemini kumudzusila bunu pele kumusa mu bikonyi." 32Angiripa waleele kuri Fesetusi ti : "Muutu wubeeri wayelemene kumupatula, mbuti bee wahele kuloombo kuri ti Sedzare kalalama."
Currently Selected:
Biyiriki bya Bantumu 26: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024