Biyiriki bya Bantumu 2
2
Nyisulu Mpeeve Yangisi
1Kiluumbu kya Pantekote bu kyayisa, bobanso baba bakutukuna ha kibeendu kyokimosi. 2Nasisuu, kwayisa lusuku lwafumuna ku yulu, bunu kiteembu kyamakwa, kyaluulusa nzo yoyinso, yibaba badzakala. 3Milaka miri bunu mya mbaawu, myamonoko kuri bo, myakabuma na myasunduka ha yulu mosi mosi mu bo. 4Bobanso baluula mu Mpeeve Yangisi, na bo babaandika mu kudzoonso mandiinga makaka, bunu bwa baheeriri Mpeeve mu kudzoonso.
5Ku Yerusalemi kwaba dzakalaana Bayudayo, bari na kinzaambi kyamakwa, bafumini mu makaanda momanso mari ha butoto. 6Lusuku lulwo bu lwayukuna, mpuumbu baatu yakutukina, na yakimuka, bukuri mpisi nde waba yukaana bo, badzoonso mu ndiinga bula. 7Bo bapamuka na bakimuka, baleele ti : "Buri bobanso ba, kari bari Ngalile ko bari mu kudzoonso ? 8Ngo buri mpisi nde mu beetu, kari mu kuyuka badzoonso mu ndiinga bula ? 9Kuri bari Parete, bari Medese, bari Elami, na badzakala ku Mesopotami, ku Yuuda, ku Kapadose, ku Ponto, ku Adzya, 10ku Feringe, ku Pamfili, ku Ngipiti, na bari mu mankoonsi ma Libi, ma Kirene na bari Looma. 11Bayudayo, na baatu bakimi, bakoto mu Nzaambi bo, bari Kerete na bari Arabi, beetu tuyuka bo, badzoonso mu mandiinga ma beetu, myabweeye mya Nzaambi. 12Bobanso bapamuka, na madyeele mabawa ; balelesene bo na bo ti : "Sa bi nki ?" 13Bakaka basaana, baleele ti : "Malu maaku bari mu kwekolo."
Kinzoonsi kya Peetelo
14Peetelo, bu kateleme kintwaari na bo kuumi na mosi, watoombolo mbeembu yaandi, waleele kuri bo ti : "Bari Yuuda, na badzakala mu Yerusalemi beenu bobanso, dimadi dyayelemene kuba dyayabakana kuri beenu, kebeenu maampu ma me. 15Pele, ka maluri mu kutsima beenu ko, ti bamaba bakolo malu, bukuri twakiri mu kilookolo kyabitatu. 16Mamama maleeriri mubikiri Yoweeli :
17"Mu biluumbu bya manunu, bwaleeriri Nzaambi,
me sa nyatsaamuna Mpeeve yaami ha yulu mpisi nde,
na baala beenu bababakala, na babakyeetu sa babikula,
bituuti sa bamono mamono-miisu,
na binuni byeenu, sa balooto mandosi.
18Na ha yulu bisari byaami se,
byababakala na byabakyeetu,
mu biluumbu bibyo,
me sa nyatsaamuna Mpeeve yaami,
na bo sa babikula.
19Me sa nyayirika bimaangu ku yulu,
na bidiimbu ha butoto :
Sa kwaba makila, mbaawu na matuti ma mwiisi.
20Ntaangu sa yakituka mampimbisi,
ngoondo sa yakituka makila,
tekesele kiluumbu kyakinene, na kyansisi kya Mfumu kikwiisa.
21Haho, mpisi wunde wuteele nkuumbu Mfumu, sa kaba wabvuukusu."
22"Bari Iselili, yukeenu maampu mamama : Yisu wa ku Nadzareti, Nzaambi wamusooriri mu kuyirika bimaangu, mya nkimukunu na bidiimbu, mu ntoono beenu. Nzaambi wayirika byo mu nde, ha kakati dya beetu, bunu bu luyaari beenu-meene. 23Muutu wunde, bunu bwaba nzeengulu na nyaabulu ya Nzaambi, wayekulu mu myooko mya bahele na mangisi, bamudzusa mu kumukomono ha kuruwa. 24Nde Nzaambi kari kafulukisa, mu kumukuula mu myaangala mya lufwa, bukuri bwaketi kuba ko ti, lufwa lumukwaata. 25Mukwongo, Daavidi waleele mu ntoono nde ti :
"Mu mpisi ntaangu, me nyaba monaana Mfumu ha busu bwa me,
bukuri nde wuri ha lubakala lwa me, mpisi me mpele kubwa,
26mu ntoono yiyo, mutima waami wuri mu kumono kiminu, ludima lwaami lukeembe,
na nyutu yaami sa yawuuma ha yulu nsiitu,
27bukuri ye wuri nyekele kiluunsi kya me, ku nsi ya bafwa ko,
ye ka wutala ko ti wangisi waaku kamono mbolulu.
28Ye wayaabisiri kuri meenu manzila ma bumwooyo,
ye Nzaambi sa luulusa me mu kiminu."
29"Bampaangi, bu nyiri na miswa, mya kudzoonsolo mu nsiitu, ha busu bwa beenu, mu ntoono Daavidi mwa-nkaaka, ti nde se wafwa na wadziiku, na mukala waandi wuri ha kakati dya beetu, natee kiluumbu ki. 30Hango, nde waba mubikiri, na Nzaambi walabiri maalu kuri nde ti, mosi mu bilesi bya ye, sa kadzakala ha mboloko yaaku. 31Bu katekesele kumono, wadzoonso mu ntoono mfulukulu Kiristo ti :
"Nde basii muyekele ku nsi ya bafwa ko,
na nyutu yaandi yasii mono mbolulu ko."
32Yisu didyo, Nzaambi wamufulukisi mu bafwa, na beetu bobanso turi bambaangi ba myo. 33Nde wadzaangusu ha lubakala lwa Nzaambi, bu kataambula kuri Taayi, lusiilulu lwa Mpeeve Yangisi, yi kari kanyaka, mamo beenu se luri mu kumono na kuyuka. 34Mukwongo, Daavidi wahele kunwaata ku mayulu ; ngo nde waleele nde-meene ti :
"Mfumu Nzaambi waleele kuri Mfumu yaami ti :
Dzakala ha lubakala lwaami,
35natee me nsiiri bataatu baaku nkata-miilu myaaku."
36Hango, nzo yoyinso ya Iselili, yiyelemini kuyaaba kwangwanwa ti : Nzaambi wasa Yisu wu lwakomini beenu, Mfumu na Kiristo !"
37Bu bamana kuyuka mamo, bo bamono mpasi mu mitima, na baleele kuri Peetelo, na kuri bantumu bakaka ti : "Bampaangi, beetu buri tuyelemini kusa ?" 38Peetelo waleele kuri bo ti : "Yiingeenu madyeele bubwo kaleeriri, na mosi mosi mu beenu kataambula mbotokulu mu nkuumbu ya Yisu Kiristo, mu mpemusunu ya masumu ma beenu, tumi lutaambula kikabu kya Mpeeve Yangisi. 39Bukuri, lusiilulu basa lwo kuri beenu, kuri baala beenu, na kuri bobanso bari la, bobanso bari Mfumu Nzaambi yeetu wabateele mbila."
40Mu maampu makimi malaka, nde watswiikisa na wabasyaamisa, waleele ti : "Bvuukee kweenu mu kiseendu kyakibi ki !" 41Hango, bo bu bataambula maampu maandi, bababotoko, na mu kiluumbu kikyo, kampe 3.000 ma baatu mayikimini.
Kidziingu kya dibuundu
42Bobanso basyaama mu nyikusulu dza bantumu, mu kintwaari, mu mbukununu mpa, na mu nsaambulu. 43Mpisi nde watubuka mu kiteesu kya kuba na kibvumi ; bantumu bayirika bimaangu, na bidiimbu byalaka. 44Bobanso basiiri kanyi, baba kibeendu kimosi, na byobinso byaba byantwaari, 45babayarikaana lubaku na bitotolo byaaku, na baba kabulaana mboongo kuri bobanso, bunu bwaba manzala ma mpisi muutu. 46Mpisi kiluumbu, baba namitinaana, kuba mu kintwaari mu Nzo-Nzaambi, mu kubukuna mpa, na kukabula byandya ku nzo, 47badumusa Nzaambi, na bataambula bweese kuri kaanda dyodinso. Mpisi kiluumbu, Mfumu waba bweesaana, baatu babvuuka munsa dibuundu.
Currently Selected:
Biyiriki bya Bantumu 2: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024