Biyiriki bya Bantumu 1
1
Bantumu ba Yisu bakiingila Mpeeve Yangisi ku Yerusalemi
1Tehofile, mu mukaanda me watete, me nyatina myominso, mya baandikiri Yisu kuyirika na kuyikisa 2natee mu kiluumbu kiri, kamanaa kuha, mu Mpeeve Yangisi, ntumu dzaandi kuri bantumu bakasooriri, nde wanaangunu. 3Kuri bo nde kamonikini ha mambisa ma mpasi dzaandi : Bo babakiri bidiimbu byalaka kuri, mu biluumbu makuumi mana, nde wamonokono kuri bo, na wabadzoonsolo mu Kimfumu kya Nzaambi. 4Bu kaba mu kudya na bo, nde wabaha lutumu lu : "Yaa lusasika na Yerusalemi ko, ngo kiingileenu lusiilulu lwa Taata, kikabu ki nyaluyaabisiri me ti : 5Yowane wabotoko mu maampa, ngo beenu, sa balubotoko mu Mpeeve Yangisi, mu mwabiluumbu byantele".
Yisu wanwaata ku yulu
6Baba bakutukuna bamufuula ti : "Mfumu, buri mu ntaangu yi, ye wubweese kudzakisa kimfumu kya Iselili" ?
7Yisu wababvutula ti : "Diri dya beenu ko, mu kuyaaba mantaangu bunu pele bilookolo byadzeenge Taata mu lutumu lwa nde-meene ; 8ngo beenu sa lwataambula mpinu, ntaangu yikulumuka Mpeeve Yangisi ha yulu beenu, na sa lwaba bambaangi baami ; mu Yerusalemi, mu Yuuda dyodinso na mu Samariya, natee ku nsukulu butoto". 9Bu kamana na kuleele mamo, nde wanaangunu kuri bo bari mu kumumono, na tuti dyamusweeke ha miisu mya bo. 10Bu baba mu kumono ku yulu ku kaba kweende, baatu boolo bamonokono kuri bo, mu binkutu byahembeke, 11na baleele kuri bo ti : "Bari Ngalile, mu nki ntoono beenu luri mu kutalaa ku yulu ? Yisu di, wu bayisiri ha kakati dya beenu, weensi ku yulu, bunubwo se mbasi tsuku kabweese kwiisikila, bunu bu lumumwiini bu kensikiri ku yulu."
Matyaasi wayiingina ha kibeendu kya Yuuda
12Bo babvutuka ku Yerusalemi, kuholosono ku mulaandu wa Mi-olibve, wuri bebele na Yerusalemi, kiteesu kiri ha kakati haho, mu mweendu lo ndaambu kilookolo. 13Bu bakoto mu bvula, bo batoomboko ku kihekiri kya ku yulu, ku baba na kifu kya kukutukunaa ; kwaba Peetelo, Yowane, Yaakobo, Andere, Filipo, Toma, Baretelemi, Mataayi, Yaakobo mwaana Alafa, Simoni Mudzeloti na Yuuda mwaana Yaakobo. 14Bobanso babo, baba basyaama mu mutima mosi, mu lusaambulu, kintwaari na bakyeetu, na Maari nguri Yisu, na bampaangi ba Yisu.
15Mu biluumbu bibyo, Peetelo wateleme ha kakati dya bampaangi. Mpuumbu baatu yaba ha kibeendu kikyo, yaba kampe, nkama na makuumi moolo ma baatu. Nde waleele ti : 16"Bampaangi, bwaba bwayelemene ti myaleeriri Mpeeve Yangisi, mu munwa Daavidi, mu ntoono Yuuda, wakitukiri munatisi babo, babakaanga Yisu, mayirima, 17bukuri nde wabee mosi mu lutaangu lwa beetu, na nde wabakiri kibari kya kisalu kimaki. 18Hango nde, wasuumbiri nseke mu mufutu wa bubayi ; wabwiila kya mutu, wabuuluka mwooyo na midya myaandi myominso myatsamukina ; 19na dyayabukina kuri bobanso badzakala mu Yerusalemi, mu kiteesu kiri baluka nseke yiyo, mu ndiinga ya bula bwa bo ti Hakeledama, mbangukulu ti "Nseke ya makila." 20Mukwongo, dyaba dyatinu mu mukaanda Mikuunga ti :
"Nzo yaandi yiba yayekulu,
na yaa kuba muutu wudzakala mu yo ko."
Na ti :
"Muutu mukimi kaholo kisalu kya nde."
21Hango, buri bwayelemene ti, ha kakati dya baatu babee kweyendaa na beetu, mu mantaangu momanso mari, Mfumu Yisu, wabee kweyendaa ha kakati dya beetu, 22kubaandika kunu mbotokulu Yowane, natee mu kiluumbu kikyo ki kayisikiri ha kakati dya beetu, mosi mu babo, kaba mbaangi ya mfulukulu yaandi, kintwaari na beetu."
23Bo batelemese baatu boolo : Yoosefi wubateelaa Barasaba, wu baheeri nkuumbu ya kusakana Yusitusi, na Matyaasi. 24Bu basaambila baleele ti : "Mfumu, ye yaari mitima mya baatu bobanso, soongo na mu boboolo ye sooriri, 25mu kuholo kibeendu kya kisalu kya nde, kya buntumu, kiri Yuuda nde-meene wasiisiri, mu kweende kukimi. 26Bo bata wari mu bo, na wari dyabwa ha yulu Matyaasi, na bamukotoso mu mpuumbu ya bantumu kuumi na mosi.
Currently Selected:
Biyiriki bya Bantumu 1: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024