Ananyao 3
3
Kovo no no ana ratantona ntiti rai
1Inya, sya arikainye winy, vemo nanimari irati ana syo nanyao dai rai nora,
yara kove mamo nyo sya anaparatote so raugasyo ntamijo nanuga rai,
2maisyare omaisy, indati nya tume gwaravainy ti nyanyana nto irati mana ama are pampamo rai,
muno indati wino irati saumane muno kove rai.
3Nya muinye muno mbeto mavabe mamo vemo raumandi nai nora!
Omamo nyo rangkion no nya isyisye rai, muno ndaugasyo ntamijo nanuga rai.
4 #
Lukas 2:52
Weamo indati Amisye anayanambe nai muno nya tame ngkov
no Amisy amun muno vatane mai.
5Nyanave AMISY Ai irati nanuga ntenami rautan,
vemo nanaveano nya ana nanto rai obo ramen inya.
6Nyo AMISY aijaro nya uisye rai,
wirati Po naugavo unanui nsarokire raita.
7 #
Roma 12:16
Vemo nyo taune nakarae nyare nya ana ndatatantona ntiti to, omai nora!
yara nyo AMISY asyaniv muno vemo nyo ana ngkakai rave nora.
8Weye omirati mo saumane raugavo nanasine rai,
muno mo vambunine raugavo nanuga rai.
9Nyo AMISY abumbundi irati nya romane rai,
muno nde irati nya anare ndayanyume ama mano manasyine ratavon,
10wirati nya yavaro nyo anaisye ratavun dai mamo ntairija raivuve,
muno nya kavinonamo nyo veano anggurije rakugan asya ntuna raije mamo ntairi jirati anggurije rai.
11 #
Ayub 5:17
#Ibrani 12:5-6 Inya, sya arikainye winy, vemo nyo AMISY Apa ananyao ramumuibe nora,
muno Po nanyaowa vemo nyonae nora.
12 #
Muni Akari 3:19
Weye AMISY Po vatano bekobe aije anyao,
maisyare ajae inta po apa arikainyo bekobe ai rave inta aura wemaisy.
13Kove ngkov irati vatano peyave ana ratantona ntiti rai ai,
muno vatano akari mbare ai.
14Weye ama ngkove nseo ti mo perakije rakivan,
muno ama ngkove manakoe emasije rakivan.
15Omamo ama mangke ntiti nseo ti mo oramo mamani rakivan,
muno ana rui mirati winyo ramamaribe mamo inta nseo ra me imamai kava ramu.
16Tume nggwaravainye no no ranem ngkove rai,
muno ranem ngkakai ananu manui muno nya tame ngkov.
17Ama unanuije mamo unanuijo mo anayanambe raugavo nanuga rai,
ama unanuije mainy ntenambeamo kovo saumane no rai vintabo.
18Wemirati moto njayaisy irati vatano po raijaro matuve ai,
weti arepi po raijaro matuve, weamo kove ngkov irati ai.
19Ana ratantona ntiti wemirati AMISY Po veano munije so ama ruke ratonam,
ndeo Apa akari mbare rai, Po naume raveti no vombe,
20ndeo Apa ana daene rai, Po mana ami no no mine ate rave ti ntatipu sen njam,
muno kaipoe no no naume warae mo maru rasui aje mine so rai.
21Weti sya arikainye winy, nya ana ndakarae muno ana ndatantona mbare wenayamo vemo yaumandi nai nora,
yara ndaugavo narijat,
22weye wemirati nya jugara jayaisyo rai,
muno omirati rayanyave nya isyisye rai.
23Wea umba nya unanuijo nyanya raito mamo ngkov bayave,
muno najoe mamo indati rantatukambe jewen.
24Ranivara winiki, indati wintampoto nai jewen,
yara niki mariraave.
25Ana inta ranso nande papabe, vemo nyo rasyaniv nora,
maisyare vatano mamune nao, wene ndeamo mo makuvuta.
26Weye AMISY Opirati nggaugambe Ai Pije,
muno Opi Po najoe raijar deto marambe irati marova awa isyeare rai.
Ayao raugaje ntavon dai indamu nya ana mbe ngkov
27Nya kove raunanto irati vatano mamaisyo awa ura rai mai, vemo ndamavu nora,
yara winya bambunin inda nyo vatano maindi ayaranande.
28Vemo ndaura nanto nya arakove inta maija nyare, ‘‘Wata kai rati umba wapakare,
syimane pa umba syo inta raunande,’’ yara ana wo ranajo omamo ntami narijat ivae.
29Vemo nyo ana ngkakai inta ratantona nanto vatano we wana mararaive mansai nora,
yara wana kavana wanave wasaija.
30Vemo nyo arare veano vatane inta ave vayave nora,
weye opamo po ana ngkakai inta ravera nande winai ramu.
31Vemo nanuga nto vatano mamun apa ananu rai nora,
muno vemo nyo apa keape rantami nora.
32Weye vatano umaso apa ana dave ntutugawi ti gwambe no AMISY Amun,
yara vatano anuga nsarokire pirati AMISY kavaveo ai.
33Anaamatano AMISY ngkapainy irati vatano mamune awa yavare rai,
yara Po kove raugasyo vatano mamaisy awa yavaruga rai.
34 #
Yakobus 4:6; 1 Petrus 5:5 AMISY Po vatano wo vatane maura tantunawi, maura tantunawi tavon,
yara vatano anuga mpayaje opirati AMISY bekobe ai.
35Vatano apa ana datantona ntiti opamo apa tame ngkov,
yara vatano ponae anyao pamo ave samaneve.
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)