Ananyao 2
2
Ana ratantona ntiti ama kovem
1Inya, sya arikainye winy, syare nyo sya ana daura ranaun,
muno ana syo natutir dai mamo nyo raugasyo ntami no nanuga rai.
2Syare namarikoame rasakinade nyo ana ratantona ntiti ranaun,
muno mbekero nakari mbare rai.
3Tugae, ranivara nanto anakotare rai mamo nyo ranonae,
muno nakari mbare mamo ndanajo ra nde nai,
4ranivara windakani maisyare nyo perakije rakani wemaisy,
muno ndakani panyoambe maisyare nyo ana ngko dave rangkaokaibe ti ntami rakani wemaisy,
5wea umba AMISY asyanive mamo winanto ama ine rai,
muno Amisy aene mamo indati winanto rai.
6Weye AMISY Opirati Po Apa ana ratantona ntiti raunande vatane mai,
muno Apa ayao mirati mo akari mbare raunande.
7Opamo Po vatano manuga nsarokire mayaranande,
Opirati maisyare vakano no irati vatano wo ana ngkakai rave jewene maora.
8Opirati Po vatano wanya moyare rai mansayaranande,
muno Po vatano una tawan irati Ai mansayaranande.
9Weti nyo rinaraniv, wea umba indati winyo ana mamaisye muno moyare mamo winanto rai,
muno winanto irati nanuga nsarokir muno unanui mamaisye rai.
10Weye ana ratantona ntiti indati nsiso no nanuga rai,
muno anakotare raene mo nya jugara aveti anayanambe.
11Indati ana ratantona mbare mo nayaranande,
muno indati nakari mbare mo nayaranande,
12indamu wimpaya irati unanui ngkakai rai,
muno vatano wo anaopate ratore mai.
13Wimpaya irati vatano wo unanui nsarokire rapaya ti ntami,
muno wanya irati unanui ngkaumudi raita mai.
14Wimpaya irati nanawirati manayanambe wo ana mamune rave,
mananibe wo anapamponae rave mai,
15nanawirati awa unanui wanya rai nanto nande,
nanawirati awa anaube mamo ntoa ntivibe vayave.
16Muno wimpaya irati wanya nserere rai,
wanya mbaunam to weramu mo ayao manavane veano nanuga raugabe rai.
17Wanya namirati mo ama anya apaya ti tami,
muno ranimari aya urairijo yo raokaisyo Amisy Ai rai.
18Tugae mamo ama yavare ma nto ntami wene ama uga rai to,
ama unanui mo raito mamo mo amanija raronto.
19Vatano uta wanya umaso raive nawamo usakinav wakare kakai,
muno wakare utavono unanui mo kove raunande rai mamo mamaisye jewen.
20Maisyare omaisy ti, koveamo ntavono vatano kove awa unanui obo rai,
muno nyanya irati vatano mamaisy awa unanui obo rai.
21Weye vatano manuga nsarokir onawirati indati utantuna mino AMISY po raurairive rai,
muno vatano wo ana ngkakai rave jewene nanawamo indati una tawano rai.
22Yara vatano mamune nawamo maupaeta irati mine we rai,
muno vatano usarirae ti wo vatane maponaebeve nawamo indati mamaugusyo marambe mine we rai.
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)