Ananyao 4
4
Ananyao raugaje inda ntavono raija nyo ana ratantona ntiti rakani
1Inya, sya arikainye weap, wadanide, wapa injae risyo wasanyao ti wadanaun!
muno wadaranivo mavabe indamu wananta irati anakotare rai,
2weye syo ana ngkove veano wasanyao;
vemo wapo ana ngkovo syo wasanyao dai so rapaya ntami nora.
3Weye arono ta ribe arikaimbe weamo ino no sya injaya apa yavar,
muno risyirati ingkoa ranuga no rinai rave weye ama arikainyo intabo dave pi risy.
4Sya injaya po rinanyao, pare, ‘‘Nanuga mo sya ayao raijar matuve,
syare winyo ana idarorone raijar wirati wingkov.
5Wimbeker damu nyo ana ratantona ntiti raugav, nanto irati anakotare rai janyi.
Vemo nanikakova nora, vemo nakirive sya ananyao daura rai nora.
6Vemo nyo ana ratantona ntiti rapaya ntami nora, omirati mo nayaranande.
Weti mbekobe irati rai, wea umba omirati mo naman.
7Weti ana ratantona ntiti nsiso wansai, manasyimbe mamo mbeker da nanto ana ratantona ntiti taune rai,
muno ana rui mirati wambeker da nanto rai, wambeke dave tavon inda nanto anakotare rai janyi.
8Nyo ana ratantona ntiti raijaseo vombe, weamo indati mo naijaseo vombe tavon.
Ranivara nyo rakepan nande matuve, wea indati mo nya tame raveti ngkov.
9Indati mo anayanya ngko dave raugasya nakari rai,
mo kakiono ngko dave raugasyo nai.
10Inya, sya arikainye winy, nyo sya ana idaura raraniv muno ndaugav,
wirati nya tumo njayaisyo rai nggwaravainy.
11Syo nanyao irati ana ratantona ntiti ama unanuije rai,
Syo naugav irati unanui nsarokire rai.
12Weti arono nyanya, nawanto mamo ana inta nsosobe nai jewen,
arono nyansanan, winajo rantukan da tende jewen.
13Ana nanyao rai mamo ndaijar matuve, vemo ndapaya inya,
nyo rayaranande, weye omirati winy njayaisy dije.
14Vemo wintavono vatano mamune awa ana ube rai nora,
muno vemo wintavono vatano mamune awa unanuije rai jinya.
15Winggwaravainyo unanui namije rai, vemo ntavon dai jinya,
nyanya nto marambe rai muno nyanya nsarokibe to kobe.
16Weye wenawamo ranivara wo ana mamune rave vatane inta mai jewen, weamo unaki kakai,
wenawamo ranivara wo vatane inta mataopone jewen, weamo mami maomone kakai.
17Weye awa mamunem omirati mbe anaibe mai,
muno awa soowate omirati maisyare awa angguri mijem.
18Yara vatano mamaisy awa unanui mamo maisyare uma apa varo tipu seo kobe,
nami mba dave kobe ti ntoa masyote yasyin.
19Vatano mamun awa unanui ngkaumudi;
weti wantatukambe ana mbeti majo rantukam dai ti utaopone rai.
20Inya, sya arikainye winy, nyo sya ayao raraniv mavabe,
namarikoame rasakinade sya ana daura rai.
21Vemo nanimari sya ayao idaura rai tenambe nora,
yara nyo raugasyo ntami tenambe no nanuga.
22Weye omirati mo kove raude vatano unanta raije mai,
muno mo saumane raunande mai.
23Nanuga rayaranande mavabe kobe rave,
weye nanuga omirati mo nya ana ndave rapatimu.
24Vemo naunane mansako ampapirbe inya,
muno vemo nyo aarurijate ratoro yasyimbe nora.
25Koveamo nyeravo usye bo raito kobe,
muno nami ntami ana ngkove bo rai.
26 #
Ibrani 12:13
Nyanya irati unanui mavae bo rai
weamo nyanya ti nto mariraave.
27Vemo nanto nande nora,
vemo najo mo naugavo unanui ngkakai raito nora.
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)