Lukas 9
9
Yesus mautus dua belas murid
(Mat. 10:5-15; Mrk. 6:7-13)
1Kemudian Yesus manimaii ka dua bolas murid-Nya bakumpul ka paharap-Nya, dan mamori rang kuasa dan wewenang honii mausir uras roh jahat mulaa urang-urang am di tamaa laii di roh jahat dan akan mambaiikan urang-urang am sakit. 2Dan Iaa manyuruh murid-murid-Nya ingkas ka berbagai homan dan manggabarkan ka urang-urang tontang kadatangan Karajaan Allah dan jam mamaikan urang-urang am sakit. 3Sahompan rang ingkas, Yesus bapantal ka rang: “Umetlah kolai manaing salah suti mulaa barang-barang itii lalam pajalananmu, tongkat, tas, makanan, duwit, atau pakaian honii baganti. 4Dan jaka urang-urang di kota iyah hontaa manarima kolai, tingalkan kota iyah. Metuh kolai ingkas, kibaskan dabu kota iyah mulaa kakiimu. Hal itii akan mapareneng urang-urang di kota iyah bahwa Tuhan akan ma hukum rang kacuali rang honaa batobat. 5Bagi rang am hontaa honaa manarima kolai, tingalkan banua iyah lalu kibaskan dabu mulaa kakiimu samacam peringatan akan urang iyah.” 6Kemudian murid-murid Yesus ingkas mulaa suti banua ka banua am bukan dan rang manaing pantal mulaa Tuhan dan manggabarkan kabar baii tontang Karajaan Allah ka urang-urang ka saluruh panjuru dan mambaiikan urang-urang am sakit.
Herodes bingung manongar kabar tontang Yesus
(Mat. 14:1-12; Mrk. 6:14-29)
7Metuh Herodes Antipas, Raja wilayah Galilea, manongar totang uras am dikaruhkan Yesus, inya amat bingung. Laii banyaa urang mamarahkan banyaa hal totang Yesus. Babarapa diantara rang mamarahkan bahwa Inya araalah Yohanes Pembaptis am jarii hidup mulaa. 8Araa jam am bapaner: “Yesus araalah Nabi Elia saurang juru bapaner akan Allah, am jarii datang di bumi.” Dan babarapa urang bukan bapaner: “Inya araalah saurang juru bapaner akan Allah am jarii lamat matii dan hidup mulaa!” 9Tatapi Herodes Antipas bapaner lalam hatiinya: “Hontaa mungkin Yohanes pembaptis, laii aku jarii manyuruh prajuritku manotaa palaa Yohanes pembaptis. Jadi, sapakah urang iyah am aku dongar hal-hal am luar biasa tontang Yesus?”
Yesus mamorii makan lima ribu urang
(Mat. 14:13-21; Mrk. 6:30-44; Yoh. 6:1-14)
10Kemudian murid-murid-Nya jarii datang mulaa pajalanan rang. Rang mangesahkan ka Yesus uras am jarii rang karuh. Kemudian Yesus manaing rang ka suti kota am banama Betsaida, koyah rang dapat mangganirii. 11Tatapi Metuh urang banyaa ingat kamanih Yesus dan murid-murid-Nya ingkas, rang ingkas koyah. Metuh rang sampai, Yesus dengan senang hatii manarima rang dan malajar rang totang Kerajaan Allah dan mambaiikan urang-urang am sakit.
12Metuh mata arii manampara potang, ka dua belas murid mandampingi Yesus dan mausulkan: “Guru, tolong suruhlah urang banyaa ingkas supayaa rang dapat ingkas ka banua-banua dan ladang-ladang di sakitar ditii dan mandapatkan makanan honii dirii makan dan manggau homan dirii tidur, laii dirii baaraa ka daerah am hontaa araa berpenghuni.”
13Tatapi Yesus bapaner ka rang: “Kolai kaniriilah am mamori makan.” Rang manjawab: “Macam apa kami dapat malakukanya? Kami bayaa mahompu lima roti konii dan dua lauu konii am jarii di mansa. Kami hontaa mahompu cukup makanan kacuali kami ingkas mamolii akan uras urang itii.” 14Rang mamarahkan hal itii laii araa sakitar lima ribu urang kalaki am badirii sakaliling urang banyaa iyah. Tatapi Yesus manyuruh murid-Nya durukan uras urang lalam bakalompok, sakitar lima puluh urang lalam satiap kalompok. 15Maka, para murid ma lakukan apa am disuruh laii Yesus dan uras urang duru bakalompok. 16Yesus maalap lima roti dan dua lauu iyah dan manogakan ka langit. Inya mangucap syukur ka Tuhan dan mamisah-misah roti dan lauu iyah. Kemudian Inya lalu mamoriikannya ka murid-Nya dan rang mambagikannya ka urang banyaa. 17Uras urang makan sabanyaa am rang honaa. Satelah iyah, para murid mangumpulkan sisa makanan dan mangisi dua belas muncah.
Pengakuan Petrus bahwa Yesus araalah Kristus
(Mat. 16:13-20; Mrk. 8:27-30)
18Metuh Yesus agii badoa ka Allah saurang dirii dan murid-Nya baaraa di dampingnya. Satelah jarii badoa Yesus batanyaa ka murid-nya: “Ujaa urang, sapakah Aku itii?” 19Murid-Nya manjawab: “Babarapa urang mamarahkan bahwa Ikam araalah Yohanes pembaptis am jarii hidup mulaa, tatapi am bukan mamarahkan bahwa Ikam araalah Nabi Elia saurang juru bapaner akan Allah am jarii datang baulang ka bumi. Dan araa jam am mamarahkan bahwa Ikam araalah salah saurang juru bapaner akan Allah am jarii lamat matii dan botii hidup mulaa!” 20Yesus batanya ka rang: “Tatapi macam apa pendapatmu sapakah Aku itii?” Jawab Petrus: “Ikam araalah Kristus mulaa Allah.” 21Yesus dengan tegas manyuruh rang: “Umet kesahkan hal itii ka sapaa jam.”
Yesus pemberitahuan am pertama totang penderitaan dan syarat-syarat maumaa Yesus
(Mat. 16:21-28; Mrk. 8:31—9:1)
22Kemudian Yesus manjelaskan ka rang am pangajar hukum Musa: “Aku, Anaa kalunen yaiyah Kristus, harus mananggung penderitaan. Para tuhaa-tuhaa agama Yahudi, imam-imam bakah hontaa manarima Aku sabagai Kristus. Rang akan mambunuh Aku dan ma hukum matii Aku, Tatapi arii katolu, satelah Aku matii Allah akan mahuaskan Aku mulaa antaraa urang matii.” 23Kemudian Yesus bapaner ka uras urang: “Barang sapaa am honaa umaa Aku, harus malopaskan diriinya. Rang harus siap mamikul kayuu am di sapalaki manjadi alat honii ma hukum sasaurang satiap arii, dan inya dapat manjadi murid-Ku. 24Laii sapa am honaa manyalamat kosahnya di dunia itii hontaa akan mandapatkan hidup am kekal, tatapi sapa jam am manyorahkan hidupnya laii inya araalah murid-Ku akan mandapatkan hidup am kekal. 25Macam apa jam, hontaa araa gunanya jaka sasaurang mahompu uras panatau di dunia itii, tatapi gagal manarima kehidupan am kekal barotaa Tuhan. 26Jaka araa di antaraa kolai am malu manjadi murid-murid-Ku dan manulat ajaran-Ku, maka Aku, Anaa Kalunen yaiyah Yesus Kristus, hontaa mangaku kolai sabagai murid-Ku, apabilaa Aku datang baulang ka dunia itii, lalam keadaan am bacahaya lalam kemuliaan-Nya dan kemulian Bapa-Nya am kudus serta kemuliaan Malaikat utusan mulaa Tuhan. 27Aku bapaner am sabujurnya bahwa babarapa mulaa ikam am hadir ditii hontaa akan matii sahompan mailaa Karajaan Allah.”
Yesus dimuliakan ka tingii gunung
(Mat. 17:1-8; Mrk. 9:2-8)
28Sakitar samengoo satelah Yesus malajarkan hal-hal itii, Yesus manaing Petrus, Yohanes dan Yakobus, naii ka tingii bukit honaa badoa ka Tuhan. 29Metuh Yesus agii badoa ka Tuhan, muhaa dan pakaian-Nya baubah. Kaduanya manjadi putih bacahaya samahkan kilat. 30Kemudian tiba-tiba dua urang am agii bapaner dengan Yesus. Rang araalah Musa dan Nabi Elia. Rang jam datang dengan bapakaian putih am cahaya dan rang bapaner dengan Yesus totang kematian-Nya am akan datang dan macam apa Inya akan mangonapi hal itii sasuai dengan kahona Allah di kota Yerusalem. 31Kaduanya mampailakan diriinya lalam kemuliaan dan bapaner totang kamatian Yesus am akan mangonapi di kota Yerusalem. 32Samantara iyah, Petrus dan ka dua murid am bukannya amat mangantu, tatapi metuh rang misik, rang mailaa bukti nyataa kahadiran Tuhan lalam kuasa dan kemuliaan lalam Yesus dan bacahaya torang. Rang jam mailaa dua urang am badirii barotaa-Nya. 33Metuh Musa dan Nabi Elia manampara maningalkan Yesus, Petrus hontaa ingat apa am honaa dibapanerkannya, iaa bapaner ka Yesus: “Guru, amat baii jaka dirii tingal ditii! Kami akan mangaruh toluu kemah samantara suti kemah akan Ikam, suti kemah akan Musa, dan suti kemah mulaa akan Elia.” 34Metuh Petrus agii bapaner, habun datang dan mangalilingi rang. Para murid manjadi golaa laii habun iyah manggalilingi rang. 35Maka tadongar suaraa Allah bapaner mulaa lalam habun dan bapaner: “Itiilah Inya, Anaa-Ku. Aku jarii mailaa Inya, dongarkanlah apa am Iaa parah.” 36Satelah suara iyah bapaner, ka toluu murid iyah mailaa bahwa Yesus am araa koyah barotaa rang. Rang hontaa mamarahkan ka sapaa jam totang apa am jarii rang ilaa dan dongar sampai babarapa waktu am lamat.
Yesus mausir roh mulaa saurang anaa am sakit
(Mat. 17:14-21; Mrk. 9:14-29)
37Suung ariinya, Yesus turun bukit barotaa dengan ka toluu murid-Nya dan banyaa urang datang honaa badapat dengan Yesus. 38Lalu tiba-tiba saurang kalaki mulaa tongah urang banyaa basoruu ka yesus: “Guru, aku mohon ka Ikam, lakukan sasuatu honii manolong anaa kalaki ku suti-sutinya! 39Roh jahat rancak manguasai diriinya dan tiba-tiba mangaruhnya basoruu. Roh iyah manguncangnya dengan onyaa dan sampai nyawanya babusa. Roh jahat iyah amat manyakitiinya dan sampai hontaa honaa maningalkannya. 40Aku jarii mamohon ka murid-Mu honii mausirnya, tatapi rang hontaa tahuu malakukanya!” 41Metuh Yesus manongar hal iyah, Iaa bapaner ka urang-urang metuh iyah: “Kolai hontaa bujur-bujur pacayaa ka Allah dan kolai araalah urang-urang am badosa! Aku jarii lamat barotaa ikam, tatapi ikam totap hontaa pacayaa ka Aku!” Kemudian Yesus bapaner ka urang iyah: “Tainglah anaamu kotiikan.” 42Metuh anaa iyah datang ka Yesus, roh-roh jahat iyah mahompas anaa iyah ka tanah dan manguncangnya dengan onyaa. Tatapi Yesus manyuruh roh jahat iyah maningalkan anaa iyah. Yesus mamaikan anaa kalaki iyah, dan bapaner ka ompai anaa iyah: “Itiilah anaamu.” 43aUras urang takjub mailaa kuasa Allah am bakah iyah.
Pemberitahuan ka dua totang Penderitaan Yesus
(Mat. 17:22-23; Mrk. 9:30-32)
43bMetuh uras urang iyah masih heran mailaa sagalaa am dikaruh Yesus, bapanerlah Inya ka murid-Nya, 44“Kolai harus manongar baii-baii dan maingat apa am Ku parahkan Anaa Kalunen yaiyah Yesus Kristus, honaa disorahkan ka lalam kakuasaan kalunen.” 45Tatapi murid-murid-Nya hontaa paham pamaneran iyah, sahingga rang hontaa dapat memahaminya. Tatapi rang golaa mamintaa Yesus mamarahkan artii pamaneran-Nya.
Pemberitahuan tontang penderitaan
(Mat. 18:1-5; Mrk. 9:33-37)
46Kemudian, para murid manampara batangkar di antaraa rang kanirii tontang sapa diantara rang am paling tabakah. 47Tatapi Yesus ingat apa am araa ka lalam pikiran rang. Laii iyah, Inya maalap jari saurang anaa konii dan manyuruhnya badirii ka sisi-Nya. 48Dan Iaa bapaner ka murid-murid-Nya: “Barangsapa am manyamut saurang anaa konii samahkan itii laii Aku, iaa manyamut Allah am mautus Aku. Barangsapa am paling rendah hatii, inyalah am paling bakah ka paharap Allah.”
Saurang am bukan murid Yesus mausir roh jahat
(Mrk. 9:38-40)
49Yohanes bapaner ka Yesus: “Guru, kami mailaa sasaurang mausir mahonii namaa-Mu, honii mausir roh jahat mulaa urang-urang iyah, dan kami bausahaa mahontikannya ma lakukan hal iyah laii bausahaa laii iaa hontaa tatama lalam kalompok kami.” 50Yesus manjawab: “Umet kolai mahontikan, laii barangsapa hontaa menentangmu, iaa araa dipihakmu.”
Yesus dan urang Samaria
51Metuh waktunya samakin damping Metuh Yesus akan taincang baulang ka sorga, Yesus dengan tegas mamutuskan honaa ingkas ka kota Yerusalem dan manampara ma lakukan pajalanan koyah barotaa para murid-Nya. 52Iaa mamintaa babarapa utusan manyahelu-Nya. Lalu rang ingkas ka banua urang Samaria di provinsi Samaria, akan mamparsiapkan homan Yesus dan urang bukan honaa bamalam. 53Namun, urang-urang Samaria iyah hontaa honaa manarima Yesus dan murid-murid-Nya akan tingal di banua rang laii jarii jelas bahwa rang agii lalam pajalanan manuju kota Yerusalem. 54Metuh ka dua murid-Nya, Yohanes dan Yakobus bapaner: “Tuhan, honaakah Ikam manyuruh kami akan manyuruh apii turun mulaa langit dan mabinasakan urang-urang itii?” 55Yesus bapaling dan manyaluu rang,
56Lalu, Yesus dan murid-murid-Nya ingkas ka banua am bukan.
Hal maumaa Yesus
(Mat. 8:19-22)
57Metuh Yesus dan murid-murid-Nya agii lalam pajalanan manuju Yerusalem, saurang kalaki datang ka Yesus dan bapaner: “Tuhan, aku akan manjadi murid-Mu dan maumaa Ikam kamanih jam Ikam ingkas.” 58Yesus bapaner ka inya: “serigala-serigala mahompu lubang dan burung-burung am tarobang ka langit dan tidur ka lalam sarangnya. Tatapi Aku, Anaa Kalunen yaiyah Yesus Kristus, Aku hontaa mangoraa dangau homan baristirahat.” 59Yesus bapaner ka urang iyah: “Ayoo umaa Aku!” Namun jam, urang iyah bapaner: “Tuhan, ijinkan aku ingkas dan manguburkan ompaiku nyulu.”
60Tatapi Yesus manjawab: “Nauhnya urang-urang am jarii matii sacara rohani manguburkan urang-urang am jarii matii di antaraa rang. Akan tatapi ikam ingkas manaing pantal mulaa Tuhan dan kabarkanlah Karajaan Allah kamanih-manih.” 61Kemudian araa urang bukan am bapaner ka Yesus: “Tuhan, aku honaa manjadi murid-Mu. Tatapi pertama-tamaa, ijinkanlah aku baulang ka keluargaku dan mangucapkan salamat tingal ka rang.” 62Tatapi Yesus bapaner: “Jaka saurang nampara manggarap ladang dan kemudian malingau ka lakang, gawiannya hontaa akan baguna. Camiyah jam, jaka saurang mangaruh gawian am baguna ka lalam Karajaan Allah.”
Currently Selected:
Lukas 9: ATV
Highlight
Copy
Compare
Share
Want to have your highlights saved across all your devices? Sign up or sign in
Tamuan Bible by Beyond Translation is licensed under Creative Commons Attribution-ShareAlike 4.0 License.
