Lukas 8
8
Labini-labini am malayani Yesus
1Satelah iyah, Yesus ingkas bakaliling mulaa kota ka kota dan banua. Inya manaing pantal mulaa Tuhan dan manggabarkan kabar baii tontang Karajaan Allah ka urang-urang tontang perintah Allah. Ka dua belas murid-Nya umaa dengan Inya. 2Babarapa labini jam malakukan pajalanan barotaa Yesus. Inya jarii mambebaskan babarapa labini itii mulaa roh jahat marasukii kalunen iyah dan mamaikan am bukannya mulaa panyakit. Salah suti mulaa labini-labini iyah araalah Maria Magdalena pangikut Yesus am baasal mulaa banua Magdala. Inya jarii mausir tujuh roh jahat mulaa Maria. 3Dan Yohana binii Khuza. Inya araalah manejer Raja Herodes Antipas. Labini bukannya araalah Susana. Araa jam banyaa labini bukan am jarii di sangka laii Yesus. Uras labini itii mamoriikan panatau rang manyadiakan kabutuhan Yesus dan murid-murid-Nya.
Perumpamaan totang saurang panabur
(Mat. 13:1-23; Mrk. 4:1-20)
4Metuh banyaa urang mulaa bamacam kota bakumpul di sakaliling Yesus. Kemudian Yesus mahonii parumpamaan itii honii malajar rang. 5Saurang petani ingkas manabur bonih di ladang. Metuh iaa manaburkan bonih, babarapa bonih jatu ka sisi jalan. Urang-urang bajalan katinginya dan burung-burung ka langit mamusehnya. 6Babarapa bonih jatu di tanah babatu. Bonih-bonih iyah tumuh tatapi tanaman iyah kolas laii hontaa araa arai ka lalam batu iyah. 7Babarapa bonih am bukannya jatu di tanah antaraa rumput baduri. Rumput baduri tumbuh barotaa dengan tanaman am mura dan manggopihnya. Jadi, tanaman iyah hontaa manghasilkan bijii-bijian. 8Dan sabagian mulaa bonih iyah jatu di tanah am subur. Satelah Yesus mangesahkan perumpamaan itii, iaa bapaner dengan nyaring ka urang banyaa: “Jaka kolai honaa manongar, maka dongarkan, pikirkanlah baii-baii apa am jarii kolai dongar.”
9Kemudian murid-Nya mamintaa Yesus manjelaskan artii parumpamaan iyah. 10Lalu, Yesus manjawab: “Allah jarii manyatakan ka kolai am bujur tatabu totang Kerajaan Allah. Tatapi Aku mahonii parumpamaan honii malajar urang-urang am bukan murid-Ku, supayaa gonaplah am tatulis lalam Kitab Suci, rang hontaa mailaa apa-apa, dan manongar apa am Ku ajarkan, tatapi hontaa mangerti apa-apa.” 11Maka mulaa parumpamaan itii, bonih iyah ibratkan firman Allah. 12Araa urang-urang am di ibaratkan samacam bonih am jatu di sisi jalan dan manongarnya. Rang manongar firman Allah iyah, tatapi Roh jahat datang dan maalap firman iyah mulaa rang, supayaa rang bahonti pacayaa dan hontaa di salamatkan laii Allah mulaa dosa-dosa rang. 13Araa urang-urang am di ibaratkan sabagai bonih am jatu di tingii lapisan tanah am tipis. Urang-urang itii manongar firman Allah dan manarimanya dengan sukacita. Tatapi firman iyah hontaa baurat ka lalam dirii rang, kemudian rang mangaruh dosa ka Tuhan dan hal-hal am sulit manimpa rang. 14Araa urang-urang am dapat di ibaratkan sabagai bonih am jatu di tanah am rumput baduri. Urang-urang itii manongar dan pacayaa ka firman Allah, tatapi khawatir akan kehidupan itii, tipu dayaa am sugih dan kahona-kahona akan hal-hal bukan tamaa ka lalam hidup rang dan hontaa manghasilkan buah am baii. 15Araa urang-urang am dapat di ibaratkan samacam bonih am jatu di tanah am baguna, yaiyah rang am manongar firman Allah dan marigap teguh pada firman iyah dengan bujur dan baii. Dan marigap teguh pada firman iyah dan rang taat umaa Allah dengan satia.
Perumpamaan totang palitaa
(Mrk. 4:21-25)
16Yesus malanjutkan: “Metuh saurang mahidupkan palitaa, iaa hontaa manutupnya honii gantang atau mangoranya di lobaa meja. Sabalinya, iaa mangoranya di tingii meja, sahingga tahuu manorangkan urang-urang am tamaa ka lalam dangau. 17Sebab, sagala sasuatu am tatabu botii akan di ilaa, dan sagala sasuatu am rahasia botii akan di parahkan ka uras urang. 18Laii iyah, dongarkan baii-baii apa am Aku ajarkan, laii urang am honaa mangerti apa am Aku ajarkan, Tuhan akan mamoriikan lobih banyaa pengertian, tatapi urang am hontaa honaa mangerti, Tuhan akan maalap pengertian am jarii rang hompu.”
Yesus dan manyari-manyari-Nya
(Mat. 12:46-50; Mrk. 3:31-35)
19Suatu arii, Metuh Yesus agii malajar, inai dan aring-aring-Nya datang mangguang-Nya. Tatapi araa banyaa urang am bakumpul di sakaliling-Nya sahingga rang hontaa tahuu manamping-Nya. 20Sasaurang bapaner ka Yesus: “Inai dan aring-aring-Mu tegee ditii honaa bapaner dengan-Mu, dan rang badirii di luar.” 21Tatapi Yesus bapaner ka uras urang: “urang-urang am manongar pantal Allah dan manulatnya araalah samahkan kan inai dan manyari-manyari-Ku.”
Ribut saluh di hontikan
(Mat. 8:23-27; Mrk. 4:35-41)
22Suatu arii, Yesus bapaner ka murid-Nya: “Ayoo dirii kasorap danau dan ingkas ka dipah.” Lalu, rang naii ka jukung dan nampara balayar. 23Metuh rang agii balayar, Yesus tidur. Tiba-tiba ribut batiub onyaa di danau, dan jukung rang ponuh laii arai sahingga rang lalam bahaya bakah dan jukung rang honaa tanggolam. 24Maka, murid-murid datang mamisik-Nya dan bapaner: “Guru! Guru, tolonglah kami, kami akan matii. Kemudian Inya badirii dan mamarintahkan ribut dan danau manjadi tenang.”
25Kemudian Yesus bapaner ka murid-murid-Nya: “Mangapa kolai hontaa pacayaa ka-Ku?” Murid-murid-Nya manjadi golaa dan heran, lalu rang bapaner suti ka am bukan: “Urang macam apakah Inya itii, Inya mamori perintah ka ribut dan arai, dan rang taat ka Inya!”
Yesus mausir roh jahat mulaa urang Gerasa
(Mat. 8:28-34; Mrk. 5:1-20)
26Lalu Yesus dan murid-murid-Nya sampai di pantai damping kota Gerasa sorap timur sungai Yordan, am baaraa dipahsorap danau provinsi Galilea 27Kemudian, Yesus dan murid-murid-Nya singah di pantai dan turun mulaa jukung lalu naii ka natai. Di kota iyah, araa saurang kalaki am di kuasai laii iblis. Santar roh jahat iyah manguasainya, sahingga urang-urang manggobatnya honii rantai dan mamangaa kaki dan manjaganya. Tatapi inya jarii malopaskan rantai dan pangganya iyah dan iblis iyah manainya ingkas ka homan am sunii. Koyah iaa tingal di kuburan. Iaa jarii lamat hontaa tingal di dangau dan mahonii pakaian. Metuh urang iyah mailaa Yesus, iaa basoruu dan datang dan sujud di paharap-Nya. Yesus manyuruh roh jahat maluar mulaa urang iyah. Kemudian urang iyah basoruu nyaring: “Mangapa Ikam manaur kami, Yesus Anaa Allah am Maha kuasa? Aku mohon umetlah ma hukum aku!” 28Metuh urang iyah mailaa Yesus, iaa basoruu dan basujud di paharap kaki Yesus. Urang iyah bapaner dengan suara nyaring: “Yesus, Anaa Allah am Maha kuasa, mangapa Ikam manaur kami tolong umet hukum kami.” 29Urang iyah basoruu laii Yesus jarii manyuruh roh-roh jahat iyah: “Tingalkan urang itii.” Urang-urang jarii manggobatnya dengan rantai dan mamangaanya, tatapi iaa akan malopaskan rantainya. Santar roh jahat iyah manguasai dan maaturnya serta mamaksanya ingkas ka daerah am hontaa araa berpenghuni. 30Kamudian, Yesus batanya ka urang iyah: “Sapa namaa kolai?” Urang iyah manjawab: “Namaa kami pasukan roh jahat am dijoku Legion.” Ikam mamarahkan namaa iyah laii banyaa roh jahat am manguasai urang iyah dan marasukinya. 31Lalu roh jahat iyah tarus mamohon ka Yesus supayaa Inya umet manyuruh rang tamaa ka lalam lubang homan am amat lalam.
32Metuh hal itii tajadi, araa babarapa kawanan bawi am di pelihara metuh manggau makan di biling bukit. Roh jahat iyah mamohon ka Yesus dan mamintaa ijin rang tamaa di lalam bawi-bawi iyah dan Yesus maijinkan rang tamaa di lalam bawi-bawi iyah. 33Lalu, roh jahat iyah jam maluar mulaa urang iyah lalu tamaa ka lalam bawi-bawi, kawanan bawi iyah langsung baguang turun kabiling bukit am curam manuju danau dan tangolam matii.
34Metuh urang-urang am mamelihara bawi-bawi iyah mailaa apa am tajadi ka bawi iyah, rang baguang badarii mulaa diyah dengan asa golaa. Rang ingkas ka kota rang dan di ladang daerah sakitarnya lalu mangesahkan apa am jadi tajadi ka uras urang. 35Kemudian urang banyaa ingkas koyah honaa mailaa apa am jarii tajadi. Rang sampai ka homan Yesus baaraa dan mailaa urang am jarii ditingal laii roh jahat iyah, agii duru ka paharap kaki Yesus dengan tenang. Urang iyah bapakaian rapi dan tampa baii. Metuh urang banyaa mailaa hal iyah, rang manjadi golaa ka Yesus. 36Rang am jarii mailaa kajadian iyah lalu mangesahkan ka urang banyaa macam apa, urang di salamatkan Yesus mulaa kuasai Roh jahat iyah. 37Kemudian urang-urang di daerah sakitar kota Gerasa sorap timur sungai Yordan manyuruh Yesus ka luar mulaa daerah rang. Laii rang amat golaa ka Yesus. Jadi, Yesus dan murid-murid-Nya naii ka jukung dan maningalkan homan iyah. 38Sahompan Yesus dan murid-Nya ingkas, urang am di kuasai roh jahat iyah mamohon: “Biarkan aku ingkas barotaa-Mu.” Tatapi Yesus manyuruh urang iyah pulang ka urang banyaa dan bapaner, 39“Pulanglah ka kaluargamu dan kesahkanlah ka urang-urang totang uras hal bakah jarii Allah karuhkan kolai.” Maka, urang iyah ingkas ka saluruh kota dan mangesahkan ka uras urang tontang hal-hal bakah am jarii Yesus karuhkan akan inya.
Yesus mahidupkan anaa Yairus dan mambaiikan saurang labini am sakit pendarahan
(Mat. 9:18-26; Mrk. 5:21-43)
40Metuh Yesus pulang barotaa dengan murid-Nya ka dipah sorap danau, banyaa urang manyambut-Nya laii rang uras manantikan kadatangan-Nya. 41Kemudian datanglah saurang am banama Yairus, saurang pamimpin dangau ibadah urang Yahudi. Iaa basujud di paharap kaki Yesus dan mamohon ka inya: “Datanglah ka dangau-Ku.” 42Dan baiikanlah anaaku am labini. Inya amat sakit dan sampai honaa matii. “Anaaku am labini baumur sakitar dua belas tahun dan anaaku suti-sutinya. Kemudian Yesus honaa dan ingkas barotaanya. Metuh Iaa ingkas ka dangau Yairus, urang banyaa manggalilingi Inya mulaa sagala panjuru.”
43Di antaraa karumunan urang banyaa, araa saurang labini am sakit pendarahan salama dua belas tahun. Inya jarii manghabiskan uras duwitnya honii ingkas ka dokter tatapi hontaa araa am ulih mambaiikanya. 44Iaa datang sunni-sunni ka lakang Yesus dan manyontuu ujung jubah-Nya honaa di baiikan dan sakatika iyah jam sakit pendarahan bahonti. 45Kemudian Yesus batanyaa ka urang banyaa: “sapa am manyontuu-Ku?” Urang di sakaliling-Nya mamarahkan bahwa rang hontaa manyontuu-Nya. Kemudian Petrus bapaner ka Yesus: “Tuan, urang banyaa magaliling dan basongka-songka terhadap-Mu, sahingga salah suti mulaa rang mungkin jarii manyontuu-Mu.” 46Yesus bapaner: “Sasaurang manyontuu Aku, laii Aku araa mansaii kuasa am maluar mulaa-Aku.” 47Metuh labini iyah mailaa bahwa iaa hontaa ulih manabukan diriinya, maka iaa datang dengan golaa dan basujud di kaki Yesus. Di paharap uras urang, labini iyah mangesahkan mangapa iaa manyontuu Yesus dan macam apa iaa baii sakatika iyah. 48Kemudian Yesus bapaner ka labini iyah: “Hai labini am terkasih, laii imanmu ka Aku jarii manyalamat ikam. Ingkaslah dengan damai dan samoga Allah tarus mamoriikan damai sejahtera-Nya ka kolai.” 49Metuh Yesus agii bapaner dengan labini iyah, datanglah sasaurang Pamimpin dangau ibadah urang Yahudi yaiyah Yairus dan bapaner: “Anaa labiniimu jarii matii. Jadi, umet manyusahkan guru mulaa.” 50Metuh Yesus manongar apa am di parahkan urang iyah, Iaa bapaner ka Yairus: “Umet golaa, tatapi pacayalah ka Aku, dan Kolai akan di salamatkan mulaa maut.” 51Metuh Yesus sampai di dangau Yairus, Inya bayaa manaing toluu murid-Nya, Petrus, Yohanes dan Yakobus dan serta urang tuhaa gadis iyah dan tamaa ka lalam kamar ka homan mayat gadis iyah tabaring. 52Metuh rang uras tamaa, urang-urang am araa ka lalam dangau iyah agii maratap dan manompi-manompi dara rang laii kematian anaa labini iyah. Yesus bapaner ka rang: “Bahontilah maratap, laii iaa hontaa matii, tatapi bayaa tidur.” 53Metuh rang manongar pamaneran-Nya, rang manampara magorahkan-Nya honii nada maolo, laii rang ingat bahwa gadis iyah jarii matii. 54Lalu, Yesus ingkas ka kamarnya dan dengan lembut marigap jarinya dan manimainya: “Anaa-Ku, badirilah!” 55Kemudian anaa labini iyah manjadi hidup mulaa dan dengan copat iaa badirii. Kemudian, Yesus bapaner ka urang tuhaanya: “borilah inya makan.” 56Ompai dan inainya amat heran. Yesus bapantal ka rang: “Umetlah kolai mangesahkan ka sapa jam totang apa am jarii tajadi.”
Currently Selected:
Lukas 8: ATV
Highlight
Copy
Compare
Share
Want to have your highlights saved across all your devices? Sign up or sign in
Tamuan Bible by Beyond Translation is licensed under Creative Commons Attribution-ShareAlike 4.0 License.
