Lukas 24
24
Kabangkitan Yesus
1Metuh arii pertama mengoo iyah, metuh arii masih amat suung, para labini-labini iyah ingkas ka kuburan Yesus samil manaing kambang-kambang am jarii rang sadia. 2Metuh rang jarii damping ka kuburan iyah, rang manyadari bahwa araa saurang am jarii mananarkan batu bakah iyah mulaa pintu tamaa kuburan, 3dan Metuh rang tamaa ka lalam kubur, rang mailaa tubuh Yesus jarii hontaa araa. 4Samantara para labini iyah am badirii koyah dengan bingung dan taheran apa am jarii tajadi. Lalu tiba-tiba dua urang kalaki badirii ka sisi rang. Ka dua kalaki iyah mahonii pakaian am mamancar samahkan kilat. 5Para labini-labini iyah amat golaa dan rang basujud ka para kalaki iyah sabagai tannaa hormat. Kemudian para kalaki iyah batanyaa ka rang: “Umetlah kolai manggau Inya di bumi am jarii hidup di antaraa urang matii? 6Yesus hontaa araa ditii. Inya jarii hidup mulaa. Ingatlah apa am Inya parahkan ka kolai uras Metuh Inya masih barotaa kolai urasnya di wilayah provinsi Galilea. 7Inya jarii bapaner bahwa Inya, Anaa Kalunen yaiyah Yesus Kristus harus disorahkan ka jari urang-urang am badosa akan di paku ka kayuu am di sapalaki laii rang, tatapi Inya akan dihidupkan mulaa metuh arii am katolu.” 8Satelah iyah, para labini-labini maningalkan kuburan iyah. Rang ingkas ka kota dan mangesahkan ka murid-murid Yesus. 9Satelah Labini iyah pulang mulaa kuburan rang mangesahkan hal itii ka dua belas murid-murid-Nya dan murid am bukan. 10Namaa-namaa labini-labini iyah araalah Maria Magdalena mulaa Magdala, Yohana dan Maria inai Yakobus. Mamanerkan hal-hal iyah ka para murid-murid-Nya dan murid am bukannya. 11Tatapi apa am di parahkan laii para labini iyah tadongar mustahil bagi para murid, sahingga rang hontaa mempercayainya.
12Tatapi, Petrus badarii dan baguang ka kubur Yesus. Iaa tukus dan mailaa ka lalam, tatapi iaa hontaa mailaa Tubuh Yesus salain mandapatkan kain putih pembungkus tubuh Yesus. Satelah iyah, Petrus baulang ka dangau, dan batanya-tanya apa am sebenarnya tajadii.
Yesus mampailaa diriinya ka dua murid-Nya lalam pajalan ka Emaus
13Kemudian metuh arii am samah, dua murid Yesus ingkas ka suti banua am banama Emaus am jaranya kira-kira 11 kilometer mulaa kota Yerusalem. 14Di lalam pajalanan, rang saling bapaner totang hal-hal am haru meh tajadi. 15Metuh rang agii bapaner dan saling batukar pandapat hal-hal itii suti dengan am bukan, Yesus kanirii tiba-tiba datang mandamping rang dan manampara bajalan barotaa rang. 16Meski jam rang mailaa-Nya, rang hontaa mangasene-Nya. 17Yesus bapaner ka rang: “Apa am kolai panerkan sammil bajalan?” Rang nua badirii koyah dengan muhaa sedih dan murung. 18Salah saurang mulaa murid iyah am banama Kleopas, manjawab ka Yesus: “Apakah Ikam suti-sutinya urang asing am datang ka kota Yerusalem am hontaa ingat totang peristiwa-peristiwa am tajadi koyah lalam babarapa arii itii?” 19Yesus urang Nazaret batanya ka rang: “Apa am jarii tajadi? Rang manjawab,” Hal-hal am jarii tajadi atas dirii Yesus. Inya araalah saurang Nabi. Inya mangaruhkan banyaa hal bakah dan Inya mamarahkan pantal-pantal am ponuh kuasa ka paharap Allah dan uras urang. 20Tatapi Para imam bakah agama urang Yahudi, dirii manuduh-Nya dan manyorahkan-Nya ka pemerintah kaisar Romawi. Pemerintah kaisar Romawi mamutuskan bahwa Iaa harus matii dan di paku ka kayuu am di sapalaki. 21Kami mangharap Inya araalah Kristus am akan mambebaskan uras urang ka turunan bangsa Israel. Tatapi hal itii tampaknya hontaa mungkin akan tajadi botii, laii jarii toluu arii balalu sejak uras itii tajadi. 22Salain iyah, babarapa labini mulaa kalompok kami bujur-bujur mangaruh kami tagiat laii suung-suung sakali rang ingkas ka kuburan Yesus, kamanih tubuh Yesus di kubur. 23Tatapi tubuh Yesus hontaa araa koyah! Kemudian para labini iyah baulang dan mamarahkan bahwa rang jarii mailaa Malaikat utusan mulaa Tuhan. Malaikat utusan mulaa Tuhan iyah mamarahkan bahwa Yesus masih hidup. 24Kemudian babarapa urang mulaa kalompok kami ingkas ka kubur dan rang mandapatkan bahwa kubur iyah jarii kosong, samahkan am jarii di panerkan laii para labini iyah, tatapi rang hontaa mailaa Yesus. 25Lalu Yesus bapaner ka rang: “Hai, kolai amat salah! Kolai amat sulit akan mamparcayai uras am jarii dituliskan laii saurang Nabi ka lalam Kitab Suci. 26Kolai saharusnya ingat bukankah Yesus Kristus harus mangalami panderitaan itii dan tamaa ka lalam kemuliaan-Nya?” 27Lalu Yesus manjelaskan ka rang apa am di parintah laii Kitab Suci tontang dirii-Nya, Inya manampara mulaa kitab-kitab am ditulis laii pangajar hukum Musa dan pamori hukum sampai saluruh kitab para nabi bukan di lalam Kitab Suci totang dirii-Nya.
28Metuh rang jarii damping ka banua Emaus, Yesus bajalan saakan-akan honaa malanjutkan pajalanan-Nya. 29Tatapi rang mamohon ka-Nya, ujaa rang: “Tingallah barotaa kami laii arii jarii honaa malam dan mata arii honaa tanggolam. Maka,” Yesus tamaa dan tingal barotaa rang. 30Metuh rang duru honaa makan, Yesus maalap roti, dan maucap syukur ka Allah, satelah marabitnya, Inya lalu mamoriikannya ka rang. 31Sakatika iyah jam mata rang dibukakan laii Tuhan dan rang mangerti bahwa Inya araalah Yesus, tatapi sakatika iyah jam Yesus mahilaa mulaa panampai rang. 32Satelah iyah, bapanerlah rang sutii kan am bukannya: “Bukankah hatii dirii berkobar-kobar metuh Iaa bapaner kadirii. Metuh Iaa mamanerkan ka dirii di jalan dan manjelaskan makna Kitab Suci ka dirii?”
33Metuh arii iyah jam, rang badirii dan baulang ka kota Yerusalem. Koyah rang manapatkan ka sabolas murid Yesus agii bakumpul barotaa dengan urang-urang bukan am menyertai rang. 34Para murid-murid iyah bapaner: “Iyah bujur! Tuhan bujur-bujur jarii hidup mulaa dan Inya manampakan dirii ka Simon Petrus!” 35Kemudian Ka dua murid-Nya mulaa Emaus iyah mangesahkan apa am jarii tajadii lalam pajalanan ka Emaus dan macam apa rang jarii mangasene Yesus Metuh Inya marabitkan roti akan rang.
Yesus mampailakan diriinya ka uras murid
(Yoh. 20:19-23)
36Metuh ka dua urang iyah masih mangesahkan paristiwa iyah, Yesus badirii ka tongah-tongah rang dan bapaner ka rang: “Damai sejahtera mulaa Allah menyertai kolai.” 37Metuh rang mailaa-Nya, rang mangiraa Yesus araalah hantu sahingga rang amat golaa. 38Tatapi kemudian Yesus batanyaa ka rang: “Mangapa kolai amat golaa? Araakah alasan bagimu akan manggora karaguan itii? 39Ilalah jari-Ku dan kaki-Ku. Itii bujur-bujur Aku. Joputlah Aku dan Ilalah, hantu hontaa mahompu tubuh am takaruh mulaa daging dan tulang, samahkan am kolai ilaa ka Aku mahompu tubuh.” 40Satelah Yesus mamarahkan hal iyah, Iaa mampaila bokas luka ka jari dan kaki-Nya ka rang. 41Tatapi murid-murid-Nya masih hontaa parcayaa bahwa Inya bujur-bujur hidup baulang, laii rang amat senang dan takjud mailaa Inya, lalu Yesus bapaner ka rang: “Borilah Aku makanan?” 42Rang mamoriikan satotaa panggang lauu ka Inya. 43Dan Yesus maalap lauu iyah dan mamusehnya di paharap rang.
44Lalu Yesus bapaner ka rang: “Itiilah paneran am jarii Aku panerkan ka kolai Metuh Aku masih barotaa kolai. Aku bapaner ka kolai, bahwa uras am araa tatulis lalam kitab-kitab totang Aku pangajar hukum Musa, kitab para nabi, dan Mazmur harus di gonapkan.” 45Kemudian Yesus maungkap pikiran rang sahingga rang dapat mamahami Kitab Suci. 46Yesus bapaner mulaa ka rang: “Araa tatulis bahwa Kristus harus mandarita dan bangkit mulaa antaraa urang matii metuh arii ka toluu. 47Lalam Kitab Suci jam tatulis bahwa murid-murid Yesus, harus mamarahkan pantal itii ka urang-urang, Araa maafkan dosa bagi uras urang am batobat. Rang harus manggabarkan hal itii pertama-tamaa di kota Yerusalem dan kemudian ka saluruh bangsa-bangsa di dunia itii. 48Dan kolai harus basaksi ka uras urang totang uras hal itii. 49Dan dongarkanlah, Aku akan mautus Roh Kudus am jarii dijanjikan Bapa-Ku ka Kolai. Tatapi kolai manotaplah ka kota Yerusalem sampai kolai diborii kuasa mulaa Sorga homan Allah dan Malaikat-malaikat tingal.”
Yesus naii ka sorga
50Kemudian, Yesus mamimpin para murid-Nya maluar mulaa kota Yerusalem barotaa penduduknya sampai rang honaa damping ka banua Betania. Diyah Yesus maincang jari-Nya dan memberkati rang. 51Metuh Tuhan memberkati rang, Iaa maincang jarii-Nya mulaa rang dan Yesus taincang ka langit. 52Lalu, rang manyembah-Nya dan baulang ka kota Yerusalem barotaa penduduknya dengan amat basuka cita. 53Rang salalu araa di lalam dangau Allah dan mamuji Allah.
Currently Selected:
Lukas 24: ATV
Highlight
Copy
Compare
Share
Want to have your highlights saved across all your devices? Sign up or sign in
Tamuan Bible by Beyond Translation is licensed under Creative Commons Attribution-ShareAlike 4.0 License.
