Lukas 21
21
Persembahan saurang baluu am susah
(Mrk. 12:41-44)
1Metuh Yesus manampai ka tingii. Iaa mailaa babarapa urang sugih manamakan persembahan rang kakotak persembahan. 2Yesus mailaa saurang baluu am susah manamakan dua bingkap duit tammaga. 3Yesus bapaner: “Aku bapaner am sabujurnya ka kolai bahwa baluu susah itii mamoriikan lobih banyaa mulaa uras urang sugih iyah. 4Laii, rang mamori persembahan mulaa kalobihannya. Tatapi baluu itii mamori persembahannya mulaa ka kurangannya, bahkan mamori uras am iaa hompu honii malanjutkan hidup.”
Dangau Allah akan di runtuhkan
(Mat. 24:1-2; Mrk. 13:1-2)
5Metuh babarapa murid agii mamanerkan totang dangau Allah am di hiasii dengan batu-batu indah dan persembahan-persembahan, Yesus bapaner, 6“Akan datang waktunya, uras am kolai ilaa itii akan di hancurkan. Hontaa araa suti jam batu am badirii ka tingii batu am bukan am hontaa akan di runtuhkan.”
Permulaan penderitaan
(Mat. 24:3-14; Mrk. 13:3-13)
7Dan, para murid-Nya batanya ka Yesus: “Guru, papan hal itii honaa tajadi? Dan, apa tannanya bahwa uras itii honaa tajadi?” 8Jawab Yesus: “Bahati-hatilah supayaa kolai hontaa di sosatkan. Sebab, banyaa urang akan datang mahonii namaa-Ku dan bapaner: ‘Akulah Iaa, dan, Saatnya jarii damping.’ Umetlah kolai maumaa rang. 9Dan, Metuh kolai manongar totang perperangan dan pamberontakan, umet kolai golaa sebab hal-hal iyah memang harus tajadi talobih holu, tatapi iyah hontaa baartii kesudahannya jarii datang.”
10Kemudian, Yesus bapaner ka rang: “Bangsa akan bangkit malawan bangsa, dan kerajaan akan bangkit malawan karajaan, 11dan akan tajadi gempa bumi am dahsyat, bencana kaporan, dan bamacam-macam panyakit di bamacam homan dan timul jam peristiwa-peristiwa am mangerikan dan tannaa-tannaa bakah mulaa langit. 12Tatapi, sahompan urasnya itii tajadi, urang-urang honaa manangkap dan manganiaya kolai. Rang akan manyorahkan kolai ka dangau ibadah urang Yahudi, rang manamakan kolai ka lalam penjara. Rang jam akan manaingmu mahadap para raja dan gubernur laii namaa-Ku. 13Hal iyah akan tajadi kesepakatan ka kolai honii basaksi. 14Sebab iyah totapkan hatiimu supayaa kolai umet mamikirkan, apa am akan kolai panerkan honii mambela diriimu, 15Sebab Aku kanirii akan mamoriikan pamaneran hikmat dan kabijaksanaan ka kolai am hontaa dapat dilawan dan ditantang laii musuh-musuhmu. 16Dan kolai akan dihianatii laii urang tuhaamu, manyari-manyari kalakimu, dan urang honaa mamunuh babarapa urang di antaraa kolai. 17Dan kolai akan digilii laii uras urang laii namaa-Ku. 18Tatapi, hontaa araa salamar balau kolai am akan jatu dan hilaa mulaa palaamu. 19Amun kolai totap batahan, kolai akan mandapat kosahnya.”
Totang runtuhnya Yerusalem
(Mat. 24:15-21; Mrk. 13:14-19)
20“Apabilaa kolai mailaa kota Yerusalem di kalilingi laii pasukan-pasukan prajurit, kolai akan ingat bahwa kahancurannya jarii damping. 21Metuh iyah, urang-urang am araa ka provinsi Yudea harus badarii ka pagunungan, urang-urang am araa ka lalam kota harus maluar mulaa kota, dan urang-urang am araa ka banua-banua umet tamaa ka kota Yerusalem. 22Sebab iyahlah arii-arii penghukuman kamanih akan di gonapkan uras am araa jarii tatulis. 23Calakalah labini-labini am agii manganung dan manyusui metuh iyah! Sebab akan datang penderitaan am luar biasa di negeri iyah, dan murka am bakah atas bangsa itii. 24Dan rang akan matii laii pedang dan ditangkap laii bangsa-bangsa. Dan kota Yerusalem akan dikuasaii bangsa-bangsa asing sampai masaa kejayaan bangsa iyah berakhir.”
Kadatangan Anaa Kalunen
Perumpamaan totang puhun ara
(Mat. 24:29-35; Mrk. 13:24-31)
25“Dan akan araa tannaa-tannaa mulaa mata arii, bulan, dan bintang-bintang di bumi, bangsa-bangsa akan golaa lalam kebingungan, laii suara gemuruh lautan dan suara galumang. 26Urang-urang akan matii laii asa golaa manantii tannaa hal-hal am honaa tajadii di bumi itii, sebab uras kuasa am araa cahaya mulaa langit akan diguncangkan. 27Metuh iyah urang akan mailaa Anaa Kalunen yaiyah Yesus Kristus datang ka lalam habun dengan kuasa dan kemuliaan am bakah. 28Apa bilaa urasnya hal-hal itii manampara tajadi, badirilah dan incangkan palaamu laii waktu pembebasan jarii datang.”
Parumpamaan tontang puhun araa
29Lalu Yesus mangesahkan suti parumpamaan ka rang: “Ilalah puhun buah ara dan uras puhun am bukan. 30Apabilaa puhun-puhun iyah mahidupkan daun-daunnya, kolai akan paham dan maingat bahwa musim porii jarii damping. 31Camiyah jam, apabilaa kolai mailaa uras iyah am tajadii, ingatlah bahwa Karajaan Allah jarii damping. 32Sabujurnya Aku bapaner ka kolai, genarasi itii hontaa akan matii sampai uras hal itii tajadii. 33Langit dan bumi honaa hilaa, tatapi pamaneran-Ku hontaa akan balalu.”
Nasehat supayaa bajaga-jagaa
34“Bahati-hatilah agar hatiimu hontaa di ponuhii laii kahona hatiimu honaa bapesta, bamabu-mabu, dan mamikirkan kepentingan duniawi. Sahingga kolai hontaa siap metuh tiba-tiba arii iyah datang. 35Sebab iaa akan manimpa uras penduduk bumi itii. 36Bajaga-jagalah dan badoa ka Tuhan supayaa kolai maulih kakuatan honii malopas diriimu mulaa uras hal am akan tajadii iyah, dan honaa badirii di paharap Anaa Kalunen yaiyah Yesus Kristus.”
37Metuh siang arii, Yesus malajar urang banyaa di dangau Allah, metuh malam arii, Iaa ingkas maningalkan kota dan bamalam di Bukit Zaitun. 38Dan suung-suung ariinya, uras urang banyaa datang ka Yesus ka lalam dangau Allah akan manongar Yesus malajar.
Currently Selected:
Lukas 21: ATV
Highlight
Copy
Compare
Share
Want to have your highlights saved across all your devices? Sign up or sign in
Tamuan Bible by Beyond Translation is licensed under Creative Commons Attribution-ShareAlike 4.0 License.
