Lukas 12
12
Pangajaran khusus bagi murid-murid
(Mat. 10:26-27)
1Pada saat am samah, ribuan urang bakumpul ka homan Yesus baaraa. Sagin banyanya, rang saling bajoja suti dengan am bukan. Pertama, Yesus bapaner ka murid-Nya. Ujaa Yesus, Pengaruh buru rang menyebar ka urang-urang bukan samahkan ragii pada adonan. Bahati-hatilah supayaa kolai hontaa manjadi urang munafik samahkan urang-urang Farisi. 2Sagala hal am ditutup-tutup laii kalunen akan di ungkap laii Allah. Allah akan maungkap uras am rang tabu. Dan hontaa araa sasuatu jam am tatabu am hontaa akan diingat. 3Laii iyah apa am kolai panerkan ka lalam potang akan di dongar ka lalam torang dan am babisii ka lalam kamar akan di kabarkan mulaa tingii hatap-hatap dangau. 4Satelah iyah Yesus malanyutkan pamaneran-Nya: “Dongarlah, Kawalku Laii iyah, uras hal am ikam parah lalam kapotangan akan dinyatakan lalam torang ka uras urang, dan apa jam am kolai bisikan sacara rahasia lalam ruang tatutup akan disorukan mulaa atap-atap dangau. Aku bapaner ka kolai hai sahabat-sahabat-Ku hinamlah kolai golaa terhadap rang am banyaa tahuu mambunuh dan hontaa tahuu mangaruh apa-apa mulaa. 5Aku akan mampailakan kan kolai sapakah am harus kolai golaa. Golalah ka Allah am jarii mambunuh, mahompu kuasa honii manibarkan kolai ka lalam lubang homan hukuman dan penderitaan. Sabujurnya Aku bapaner ka kolai, golalah ka Allah! 6Bukankah uras urang ingat bahwa lima iku burung pipit di jual bayaa dengan dua koin tembaga? Tatapi, meski jam hampir hontaa araa rogaanya, tatapi Allah hontaa malupakan suti jam mulaa rang! 7Tatapi tahoyulah Bahkan jumlah balau dikapalamu jam tahitung urasnya. Laii iyah umet golaa laii kolai jauh lobih barogaa mulaa banyaa burung pipit.” 8Allah bapaner ka kolai, satiap urang am mangaku Aku di paharap kalunen, Anaa Kalunen yaiyah Yesus Kristus jam akan mangakui inya di paharap Malaikat utusan mulaa Allah. 9Tatapi barangsapa am manyangkal Allah di paharap urang bukan. Anaa Kalunen jam akan manyangkal iaa di paharap Malaikat utusan mulaa Allah. 10Satiap urang am mamarahkan sasuatu malawan Anaa Kalunen yaiyah Yesus Kristus, iaa dapat maafkan, tatapi barangsapa am mahinaa Roh Kudus, iaa hontaa mamaafkan. 11“Apabilaa urang manaing kolai ka dangau ibadah urang Yahudi atau di paharap para panguasa dan pamimpin, umet kolai golaa macam apa am harus kolai parah honii mambela diriimu. 12Sebab metuh iyah jam Roh Kudus akan malajar kolai apa am harus kolai parahkan.”
Perumpamaan tontang Urang sugih am uwong
13Kemudian Saurang kalaki mulaa antaraa urang banyaa iyah bapaner ka Yesus: “Guru, parahkan ka manyariku supayaa iaa mambagiikan warisan akan aku.” 14Tatapi Yesus manjawab: “Manyari, sapakah am jarii mamilih Aku manjadi hakim atau pelantaraa atas kolai?” 15Ujaa Yesus bapaner mulaa ka rang: “Bajaga-jagalah dan hatii-hatilah terhadap sagala kasarakahan, walau jam rang balimpah-limpah panataunya, hidupnya hontalah tagantung mulaa panataunya iyah.”
16Lalu Yesus mangesahkan sutii parumpamaan ka rang: “Araa saurang am sugih, tanahnya balimpah-limpah hasilnya. 17Iaa batanyaa ka lalam hatiinya. Apakah am harus Ku karuh laii aku hontaa mahompu homan kamanih aku tahuu mangoraa hasil tanahku. 18Lalu Iaa bapaner. Itiilah am akan Aku karuh, aku akan manoraa lumbung-lumbungku dan mangaruh lumbung am lobih bakah. Kemudian aku manggora di lalamnya hasil tanahku yaiyah bulir gandum dan barang-barang Ku. 19Satelah iyah Aku, Bapaner ka diriiku kanirii, aku mahompu banyaa barang am di goraa batahun-tahun lamatnya, baristirahat, makan, marailah dan basanang-sananglah!” 20Tatapi Allah bapaner ka rang iyah: “Hai ikam urang am salah, malam itii kosahmu honaa di alap mulaa kolai, dan apa am jarii kolai sariakan akan manjadi hompu urang bukan.”
21“Macam iyahlah am akan tajadi dengan urang am magumpulkan panatau bagi diriinya kanirii, namun hontaa sugih di paharap Allah.”
Hal kakuatiran
(Mat. 6:25-34)
22Yesus bapaner ka murid-Nya. “Laii iyah, Aku bapaner ka kolai, umet kawatir totang hidupmu, apa am honaa kolai makan, dan umetlah kolai kuatir akan tubuhmu, apa am honaa kolai honii. 23Laii, hidup lobih baartii mulaa pamakan dan tubuhmu iyah lobih baartii mulaa pakaian. 24Ilalah burung-burung kak am hontaa manabur dan hontaa mamanen dan rang hontaa mangoraa lumbung, namun Allah mamori rang makan. Batapa amat barogaanya kolai mulaa burung-burung iyah! 25Sapakah di antaraa kolai am laii asa kuatirnya dapat manamah sehasta umur hidupmu? 26Jadi jaka kolai hontaa sanggup mangaruh hal-hal am paling konii, mangapa kolai kawatir akan hal-hal am bukan? 27Ilalah bunga bakung, am hontaa mamintal dan maanyam, namun Aku bapaner ka kolai. Salomo ka lalam sagalaa kuasa dan kemuliaan jam hontaa bapakaian am saromis mulaa salah suti bunga bakung iyah. 28Jadi jaka rumput hijau am di ladang, arii itii tumuh dan pagii dibuang di lalam apii, maka Allah akan marawatmu. Hai urang am kurang pacayaa! 29Jadi, umet kolai mampersoalkan apa am honaa kolai makan atau apa am honaa kolai marai dan umetlah hatiimu ragu-ragu. 30Uras iyah digauu bangsa-bangsa di dunia am hontaa mangasene Allah. Akan tatapi Bapamu ingat, bahwa kolai memang memerlukan urasnya. 31Tatapi, gaulah holu Karajaan Allah, maka urasnya iyah diborikan ka kolai.
32Umet golaa, hai urang-urang konii, laii Bapamu basadiaa mamoriikan kolai Karajaan Allah.
33Juallah sagala hompumu dan borikanlah sadekah. Karuhlah akan kolai kantong duit am hontaa tahuu rusaa, yaiyah panatau am ka Sorga homan Allah dan malaikat-malaikat tingal am hontaa tahuu habis am hontaa tahuu di alap laii maling atau di rusaa laii rayap. 34Laii kamanih panataumu baaraa diah jam hatiimu baaraa.”
Kewaspadaan
(Mat. 24:43-51)
35Yesus jam bapaner ka murid-murid-Nya: “Bajagalah agar kolai salalu siap akan kadatanganku. Basiaplah salalu samahkan am jarii bapakaian lengkap siap akan bagawi dengan lampu am manyala ka jarinya basiaplah am akan datang, bapakaianlah dengan lengkap dengan palitaa kolai am manyala. 36Lalu katika iaa pulang ka dangau dan mangatuk pintu, pelayan-pelayanya jarii siap akan mangungkap pintu dengan copat agar supayaa tuannya tahuu tamaa. Samahkan palayan-palayan am manantii tuan-tuan rang am ingkas manghadiri jamuan perkawinan. 37Bahkan jaka tuannya pulang di tongah malam atau sahompan nahari datang, Metuh tuannya datang dan mandapatkan para hamba jarii misik dan siap manantii kadatangan tuannya, tuannya akan amat senang dengan rang. 38Dan apabilaa tuannya datang tongah malam atau metuh nahari dan mandapat rang mangaruh camiyah, maka babahagialah rang. 39Jaka am hompu dangau iyah ingat pukul barapaa maling datang, iaa hontaa akan maubah dangaunya di tamaa laii maling. 40Dan sabaiinya kolai siap sadia laii Anaa Kalunen yaiyah Yesus Kristus datang metuh saat am hontaa kolai sangka-sangka.”
41Satelah iyah Petrus pawakilan Yesus batanyaa ka Yesus: “Tuhan, apakah Ikam mamaner parumpamaan itii bayaa ka kami atau ka uras urang?” 42Jawab Yesus. Jadi, sapakah pengurus palayan dangau am satia dan bijaksana am di parcaya laii tuannya manjadi pemimpin atas uras hambanya honii mamoriikan rang makan, metuh waktu am tepat? 43Berbahagialah hamba am di ilaa laii tuannya metuh mangawii tugasnya, metuh tuannya iyah datang? 44Aku bapaner ka kolai, sabujurnya tuannya iyah akan mamilih inya manjadi panyagaa saluruh panataunya. 45Akan tatapi amun hamba iyah jahat dan jaka hamba inya bapaner lalam gonangnya. Tuanku talamat datang lalu iaa manampara manukuh hamba-hamba kalaki dan hamba labini, lalu makan dan minum sampai mabu, 46Metuh tuan hamba iyah datang, metuh am hontaa di sangka-sangkanya dan metuh am hontaa diingatnya, tuannya honaa mamunuh hambanya dan manggora inya sanasib dengan urang-urang am hontaa satia.
47Hamba am ingat tuannya honaa mambunuhnya, tatapi iaa hontaa mangaruh persiapan atau hontaa malawan apa am dikahona tuannya, iaa manarima banyaa tukuh. 48Tatapi barang sapaa hontaa ingat apa am dikahona Tuannya dan mangaruh hal-hal am membuat inya pantas di hukum, inya akan manarima lobih kocii pukulan. Tuannya am jarii mamori banyaa, inya akan banyaa dituntut dan sapa am banyaa manarima, inya akan lobih banyaa dituntut.
Yesus manaing pemisah
(Mat. 10:34-36)
49Kemudian Yesus bapaner: “Tujuan Ku datang di dunia araalah akan manutung apii diantara kalunen. Dan Aku amat baharap apii iyah jarii hidup! 50Tatapi sahompan iyah tajadi, Aku harus manarima baptisan dan penderitaan amat borat. Aku akan sangat mandarita apa bila Aku hompan di baptis! 51Apakah kolai mangira bahwa Aku datang honaa manaing damai di bumi? Hontaa! Aku datang akan manaing perpecahan di antaraa kalunen. 52Manampara saat arii itii jaka araa lima anggota kaluarga ka lalam suti kaluarga, rang akan saling batentangan. Toluu urang honaa malawan dua urang dan dua urang malawan toluu urang. 53Artiinyaa, anggota kaluarga rang akan saling bamusuh. Para ompai akan malawan anaanya kalaki, anaa ka lakiinya honaa malawan ompainya. Inai honaa malawan anaanya labini dan anaa labiniinya honaa malawan inainya. Inai mantuhanya honaa malawan manantunya labini, dan manantu labiniinya honaa malawan inai mantuhanya.”
Manilai zaman
54Kemudian Yesus bapaner ka urang banyaa. Apabilaa kolai mailaa habun am bakumpul dan potang, kolai copat bapaner: “Hujan honaa turun,” dan hujan bujur-bujur turun. 55Dan Metuh kolai mailaa ribut batiub datang mulaa selatan, kolai bapaner: “Arii itii honaa porii,” dan hal iyah bujur-bujur tajadi. 56Hai, Dasar urang munafik! Kolai dapat mampakirakan cuaca dengan mailaa bumi dan langit. Manggapa kolai hontaa mamahami makna mulaa peristiwa am agii tajadi botii.
57Mangapaa ikam hontaa mamutuskan kanirii apa hal am akan kolai karuhkan? 58Sebab, Metuh ikam dengan musuhmu ingkas mahadap pemerintah, bausahalah badamai dengan inya salamaa di tongah jalan, supayaa umet ikam diseretnya ka hakim dan hakim manyorahkan ikam ka pembantunya dan pembantunya iyah manama ikam di lalam penjara. 59Aku bapaner ka kolai. Ikam hontaa akan maluar mulaa koyah, sahompan ikam mamayar utangmu sampai lunas.
Currently Selected:
Lukas 12: ATV
Highlight
Copy
Compare
Share
Want to have your highlights saved across all your devices? Sign up or sign in
Tamuan Bible by Beyond Translation is licensed under Creative Commons Attribution-ShareAlike 4.0 License.
