Lukas 11
11
Yesus malajar murid-murid-Nya totang hal badoa
(Mat. 6:9-13; 7:7-11)
1Suatu arii Yesus agii badoa di salah suti homan. Satelah badoa ka Tuhan, salah suti murid Yesus bapaner: “Tuhan ajarkan kami cara badoa, samahkan Yohanes pembaptis malajar murid-muridnya.”
2Lalu Yesus manjawab,
“Apabilaa kolai badoa ka Tuhan,
bapanerlah Bapa, di muliakanlah namaa-Mu am kudus. Samoga Karajaan Allah datang mamimpin hidup kami.
3Borikanlah kami satiap arii makanan am cukup satiap arii.
4Dan maafkan dosa-dosa kami laii kami,
jam jarii mamaafkan urang am badosa ka kami;
Dan umetlah maijinkan kami dicobaai akan mangaruh dosa tatapi salamatkanlah kami mulaa Pancobaan.”
5Kemudian Yesus bapaner ka rang: “Jaka saurang di antaraa kolai metuh tongah malam ingkas ka dangau saurang sahabat dan bapaner kanya. Manyari, jomilah ka aku toluu roti, 6laii siku urang sahabatku salenga datang ka dangauku agii araa di lalam pajalananya. Tatapi aku hontaa mahompu makanan am akan aku sadia kanya.” 7Tatapi sahabatku am araa ka lalam dangaunya manjawab: “Umet naur aku, laii pintu jarii aku kunci dan serta anaa-anaa-ku jarii tidur, aku hontaa tahuu huas dan mamoriimu apa-apa saat itii.” 8Aku bapaner ka kolai: “Meski jam sahabat kolai iyah hontaa huas dan maungkap pintu, tatapi sahabatmu huas jam laii kajugulmu mamintaa.
9Dan Aku bapaner ka kolai, mintalah maka kolai akan manarimanya, gaulah maka kolai akan manarimanya dan katoklah maka pintu akan di ungkapkan akan kolai. 10Laii satiap urang am mamintaa ka Tuhan, akan manarimanya. Satiap urang am manggau mulaa Tuhan, manapatkan mulaa Tuhan dan Tuhan akan maungkapkan pintu bagi satiap urang am manggatuknya. 11Pasti hontaa araa ompai diantara ikam am akan mamoriikan ular ka anaanya metuh iaa mamintaa lauu? 12Atau iaa mamori kalaa, jaka iaa mamintaa tolur? 13Laii iyah, jaka kolai urang-urang jahat ingat macamapaa mamoriikan hal-hal am baii ka anaa-anaamu, talobih mulaa Bapa ka sorga honaa mamoriikan Roh Kudus ka rang am mamintaa ka-Nya!”
Yesus lobih bakuasa mulaa Iblis
(Mat. 12:22-30; Mrk. 3:22-27)
14Metuh Yesus mausir roh jahat mulaa urang am bisu. Roh jahat iyah maluar mulaa urang am bisu iyah. Iaa tahuu bapaner dan heranlah urang banyaa am araa diyah. 15Tatapi araa am bapaner: “Iaa mangusir honii kuasa roh jahat, pemimpin roh jahat iyah namanya Beelzebul.” 16Araa jam am mamintaa tannaa ajaib mulaa langit ka Yesus dan mampailaa ka rang bahwa Tuhan jarii mautus-Nya. 17Tatapi Yesus ingat apa am rang pikirkan tontang Inya, lalu Yesus bapaner ka rang: “Jaka saurang raja dan rakyat ka lalam kerajaannya salalu batangkar, maka kerajaannya akan hancur, dan metuh anggota suti kaluarga salalu batangkar suti dengan am bukan, rang pasti akan copat bapisah dan hontaa lagi manjadi sabuah kaluarga. 18Camiyah jam, roh jahat dan urang-urang am araa di karajaannya hontaa akan batahan lamat? Kolai mamarahkan bahwa Aku mangusir roh jahat laii Pemimpin namanya Beelzebul yaiyah iblis mamori aku kakuatan akan mangaruhnya. 19Jaka apa am Aku parahkan iyah bujur, lalu macam apa dengan murid-Mu? Rang hontaa mahonii kuasa pemimpin roh jahat am namanya Beelzebul honii mausir roh jahat iyah. Laii rang kanirii am akan manjadi hakim mu. 20Tatapi jaka Aku mausir roh jahat honii kuasa Allah dan itii bukti bahwa Karajaan Allah jarii mampaila Kuasa-Nya jarii datang ka kolai.” 21Yesus malanyutkan pangajaran-Nya dengan mahonii suti kesah. Iblis iyah samahkan saurang am kuat. “Apa bila saurang am kuat dan basanjata lengkap manjagaa dangaunya kanirii, maka amanlah sagalaa panataunya. 22Tatapi Metuh araa urang am lobih kuat mulaanya honaa manyarang dan mangalahkan inya, maka urang iyah akan marampas perlengkapan senjatanya talobih holu dan perlengkapan am diandalkannya, lalu mambagii-bagikan barang rampasan, am di dapatnya ka kawal-kawalnya.”
23“Sapa am hontaa barotaa Aku baartii malawan Aku, dan sapa am hontaa bagawi barotaa Aku baartii bagawi malawan Aku.”
Baulangnya roh jahat
(Mat. 12:43-45)
24Kemudian Yesus malanjutkan: “Metuh roh-roh jahat maluar mulaa tubuh kalunen iyah, roh-roh jahat iyah akan manggambara ka homan daerah am hontaa araa berpenghuni akan manggau homan manotap, tatapi roh-roh jahat iyah hontaa mandapatkan homan manotap honii baistirahat, roh jahat iyah lalu bapaner, Aku akan baulang ka urang am jarii aku tingalkan iyah.” 25Metuh roh jahat iyah baulang ka dangau am iaa tingalkan sahompannya, roh jahat iyah mailaa hontaa araa saurang jam am tingal ka lalam dangau iyah. Urang iyah samahkan suti dangau am jarii disapu barasih, tailaa rapi dan teratur. 26Lalu roh jahat iyah maluar ka homan daerah am hontaa araa berpenghuni iyah. Dan manaing tujuh roh jahat am lobih jahat mulaa inya, rang tamaa dan badiam diyah, Maka keadaan urang iyah akhirnya lobih buru mulaa am jarii.
Yesus malajarkan macam apa tontang bujur-bujur di berkati
27Metuh Yesus agii malajar, araa saurang labini di antaraa urang banyaa basoruu dan bapaner dengan suara nyaring ka Yesus: “Barbahagialah inai am jarii manganung Ikam dan manyusui ikam.” 28Tatapi Yesus manjawab: “Tatapi diberkatilah rang am manongar Firman Allah.”
Urang-urang mamintaa tannaa mulaa Yesus
(Mat. 12:38-42)
29Metuh urang banyaa bakumpul manggalilingi-Nya, Yesus bapaner: “Genarasi itii araalah genarasi am jahat. Rang mamintaa suatu tannaa, tatapi hontaa sutii tannaa jam am akan di pailakan ka urang iyah sabukan tannaa Yunus. 30Samahkan Yunus am manjadi tannaa akan urang-urang Niniwe, camiyah jam anaa Kalunen yaiyah Yesus Kristus akan manjadi tannaa bagi genarasi itii. 31Metuh arii kiamat, Ratu mulaa Selatan akan huas barotaa urang mulaa genarasi itii dan iaa akan ma hukum rang. Laii ratu itii datang mulaa ujung bumi honaa manongar hikmat Salomo, sedangkan ditii araa saurang am lobih baii mulaa Salomo. 32Metuh arii kiamat, urang-urang bukan saurang panduduk asli Niniwe akan huas barotaa genarasi itii dan rang honaa mahukumnya. Laii urang-urang Niniwe jarii batobat metuh Yunus bakotbah ka paharap rang, tatapi am araa ditii saurang am lobih baii mulaa Yunus!”
Palitaa Tubuh
33“Hontaa araa saurang am tahuu mahidupkan palitaa lalu mangoranya di lobaa dangau atau di lobaa gantang, malainkan ka tingii kaki homan palitaa am tatabu. Sabalinya urang manggora palitaa iyah di kaki palitaa sahingga urang-urang am tamaa dapat mailaa cahayanya. 34Matamu araalah Palitaa tubuhmu. Jaka matamu baii, saluruh tubuhmu akan di ponuhii dengan cahaya, tatapi jaka matamu jahat, saluruh tubuhmu akan di ponuhii kajahatan. 35Laii iyah, bahati-hatiilah supayaa cahaya di lalam diriimu hontaa manjadi potang. 36Jaka saluruh tubuhmu di ponuhii laii cahaya dan hontaa araa bagian tubuhmu am potang, tubuhmu iyah akan di ponuhii cahaya saluruhnya, samahkan sutii palitaa manorangmu honii cahayanya.”
Yesus mengecam urang-urang Farisi dan guru-guru Agama
(Mat. 23:1-36; Mrk. 12:38-40; Luk. 20:45-47)
37Metuh Yesus jarii malajar, urang Farisi maundang Yesus makan. Yesus jam datang, Yesus tamaa dangau iyah lalu duru makan. 38Urang Farisi iyah heran mailaa hal iyah, laii Yesus hontaa mamasuu jari-Nya sasuai dengan adat istiadat talobih holu sahompan makan. 39Tatapi Yesus bapaner: “Ikam urang Farisi amat mamatuhi adat istiadat agar tailaa bujur di mata urang samahkan mamasuu dan marasih bagian luar cagkir tatapi hontaa marasih bagian lalamnya am isaa. Ikam maumaa aturan mamasuu jari tapi mambiarkan pikiran ikam ponuh dengan kasarakahan dan kajahatan. 40Hai ikam urang-urang am salah mamahami tontang mamasuu jari sahompan makan! Tuhan am manciptakan tubuh kalunen dan manciptakan jiwa kalunen. Jiwamu harus barasih, hontaa bayaa jarimu. 41Akan tatapi umetlah kolai sarakah dan jahat, tatapi borikanlah mulaa hatiimu apa am araa ka kolai ka urang susah, maka kolai akan manjadi amat barasih di paharap Allah. 42Hai urang Farisi, kolai akan mangalami kasulitan bakah, laii kolai gagal memperlakukan urang bukan dengan adil dan gagal mangasihi Allah. Tatapi kolai dengan hatii-hatii mamoriikan persepuluhan mulaa rampah-rampah dan bumu-bumu dapurmu ka Allah. Alangkah baiinya jaka mamoriikan persepuluhan tatapi umet lupaa memperlakukan urang bukan dengan hontaa adil dan mengasihi Allah. 43Calakalah kolai, hai urang Farisi laii kolai rajin duru paharap ka dangau ibadah urang Yahudi dan sukaa manarima hormat ka homan-homan urang-urang banyaa. 44Calakalah kolai! Laii kolai samahkan kuburan am hontaa araa tannaa dan dijojaa-jojaa, laii rang hontaa ingat.”
45Salah sutii urang mulaa antaraa pangajar hukum Musa iyah bapaner ka Yesus. “Guru, Metuh Ikam mamanerkan hal-hal itii Ikam mahinaa kami jam.” 46Tatapi Yesus manjawab: “Celakalah jam kolai, hai guru-guru agama pangajar hukum Musa laii kolai manggora beban-beban borat am hontaa ulih ditanggung urang bukan, tatapi dirii kolai kanirii hontaa honaa manyontuu beban borat iyah honii suti jari jam. 47Celakalah kolai laii mangaruh makam saurang Nabi, tatapi hiaa umuhmu jarii mambunuh rang. 48Dengan malakukan iyah, Kolai mambuktikan bahwa Kolai satujuu dengan apa am dikaruh laii hia umuhmu, rang am mambunuh nabi iyah dan kolai mangaruh mesan akan kuburan rang.” 49Laii iyah, lalam hikmatnya Allah bafirman: “Aku akan mautus utusan husus saurang nabi dan rasul-rasul ka kolai. Tatapi sabagian mulaa rang akan kolai bunuh dan siksa.” 50Supayaa mulaa angkatan itii akan dituntut darah am hidup botii atas kematian uras nabi am jarii dibunuh laii hiaa umuhmu metuh Allah manciptakan Bumi. 51Nampara mulaa darah Habel dan Hawa dan manyari Kain sampai ka imam Zakharia am jarii dibunuh ka antaraa mezbah dan dangau Allah. Bahkan, Aku bapaner ka kolai urasnya iyah akan dituntun mulaa angkatan itii.
52“Celakalah kolai hai am pangajar Hukum Musa dan celakalah jam kolai guru urang Farisi laii kolai jarii maalap kunci honii maungkap pintu jalan akan mangasene Allah. Kolai kanirii hontaa mangasene Allah dan kolai mahalangi urang bukan am bausahaa honaa mangasene Allah.” 53Dan Satelah Yesus maningalkan dangau urang Yahudi iyah, am pangajar hukum Musa dan urang-urang Farisi manampara manyusahkan-Nya dan mananyakan banyaa hal honii manekan-Nya dengan bamacam-macam pertanyaan. 54Rang honaa menjebak Yesus supayaa mamarahkan sasuatu am salah agar rang dapat mangajukan tuntutan terhadap Yesus.
Currently Selected:
Lukas 11: ATV
Highlight
Copy
Compare
Share
Want to have your highlights saved across all your devices? Sign up or sign in
Tamuan Bible by Beyond Translation is licensed under Creative Commons Attribution-ShareAlike 4.0 License.
