Lukas 9
9
Yesus Mautus Kadue Balas Murid
(Mat. 10:5-15; Mrk. 6:7-13)
1Limbaste Yesus mantehau kadue balas kawan murid-Ah akan bakumpul melai taharep-Ah, tuntang manenga ewen kuasa tuntang wewenang akan mangusir uras roh setan bara kawan uluh tuntang mapangkeleh kawan uluh je pehe. 2Yesus manyuhu kawan murid-Ah akan tulak tuntang masanan dengan kawan uluh tentang Karajaan Allah tuntang mapangkeleh kawan uluh pehe. 3Yesus bapander dengan ewen: Ela maimbit narai-narai akan pananjunganmu. Ela maimbit tungket, atau tas, atau panginan. ela maimbit duit atau pakaian tambahan. 4Katika ikau irawei balihi melai ije huma, tarus ih balihi melai huma te sahingga sampai waktu ah akan malihi eka te. 5Amun kawan uluh melai ije kota manolak akan manarima ikau, lihi kota te. Katika ikau tulak, puhus dabu kota te bara paimmu. Hal jituh akan maparendeng kawan uluh melai kota te awi Tuhan akan mahukum ewen kacuali amun ewen batobat. 6Limbaste kawan murid Yesus tulak bara ije lewu ka lewu je beken tuntang ewen mangabar Injil dengan kawan uluh melai uras eka tuntang mapangkeleh kawan uluh je pehe.
Kabingungan Herodes Tentang Kabar Mangenai Yesus
(Mat. 14:1-12; Mrk. 6:14-29)
7Samentara te, Herodes, je mamarintah saluruh wilayah Galilea, mahining tentang uras hal luar biasa je terjadi. Iye dia' tawan narai je harus imikirkan ah, awi kawan uluh mamander awi Yesus yelah Yohanes Pambaptis je jadi ipelum awi Allah bara antara uluh matei. 8Uluh beken mamander tentang Yesus awi nabi Elia jadi haluli bara surga tuntang je beken hindai mamander awi sala ije nabi beken je belum melai masa huran jadi belum haluli. 9Tatapi Herodes bapander huang atei: “Dia' mungkin Yohanes, awi aku jadi manyuhu kawan parajuritku akan manetek takuluk Yohanes. Jadi, ewehkah uluh jituh je aku hining hal-hal je luar biasa tentang-Ah?” Jadi te Herodes handak hasundau dengan Yesus.
Yesus Manenga Kuman Lime Ribu Uluh
(Mat. 14:13-21; Mrk. 6:30-44; Yoh. 6:1-14)
10Limbaste kadue balas murid je iutus Yesus haluli bara pananjungan ewen. Ewen masanan dengan Yesus uras je jadi ewen nguan. Limbaste Yesus maimbit ewen kaije kota baaran Betsaida, melai kanih ewen tau mangabuat. 11Tatapi katika uluh are mangatawan kakueh Yesus tuntang kawan murid-Ah tulak, ewenpun tulak ka kanih, Yesus dengan hanjak atei manarima ewen tuntang mangajar ewen tentang Karajaan Allah tuntang mapangkeleh kawan uluh je pehe. 12Katika matan andau nampara leteng, kadue balas murid-Ah guang Iye tuntang mausul: “Guru, dohop nyuhu ih uluh are te tulak, mangat ewen tau tulak ka lewu-lewu tuntang tana-tana melai sakitar hetuh tuntang mandinu panginan akan ikinan tuntang manggau eka batiruh, awi melai hetuh eka je suni.” 13Tatapi Yesus bapander dengan ewen: “Ketun kabuat ih je harus manenga ewen kuman!” Ewen manumbah: “Kilenampi ikei tau manguan ah? Ikei baya tege lime roti kurik tuntang due lauk kurik je jadi imasak. Ikei dia' maina cukup panginan kacuali ikei tulak akan mamili panginan akan uras uluh are jituh.” 14Ewen mamander hal jituh awi tege kira-kira lime ribu uluh kawan-hatue melai huang kumpulan uluh are te. Tatapi Yesus manyuhu kawan-murid-Ah akan manyuhu uras uluh te munduk bakalompok kira-kira lime puluh uluh ije kalompok. 15Maka kawan-murid manguan narai je Yesus manyuhu tuntang uras uluh are te munduk bakalompok. 16Limbaste Yesus manduan lime roti tuntang due lauk te, Iye manampayah ka langit, mangucap sukur dengan Allah, lalu manenga-nenga roti tuntang lauk te manjadi pire-pire bagian tuntang manega akan kawan-murid-Ah akan manenga-nenga ah dengan uluh are. 17Tuntang uras uluh kuman sampai besuh. Limbaste, kawan-murid mangumpul tetek-tetekkan roti je tisa kakarei due balas kusak.
Pangakuan Petrus Bahwa Yesus Yelah Masias
(Mat. 16:13-20; Mrk. 8:27-30)
18Sinde andau Yesus malihi uluh are akan badoa kabuat. Baya kawan-murid-Ah je tege hayak-Ah. Lalu Yesus baisek dengan ewen: “Kuan uluh ewehkah Aku jituh?” 19Kawan-murid-Ah manumbah: “Tege je sanan Ikau yelah Yohanes Pambaptis je jadi belum haluli, tatapi tege kia je masanan awi Ikau yelah nabi Elia je jadi haluli ka bumi bara surga, tege kia je masanan awi Ikau yelah sala ije bara nabi je jadi tahi matei tuntang wayahtuh jadi belum haluli.” 20Yesus baisek dengan ewen: “Tatapi manurut ikau kabuat, ewehkah Aku jituh?” Petrus manumbah: “Masias je Allah janjikan akan iutus.” 21Dengan tegas Yesus manyuhu ewen, mangat ewen ela masanan hal jituh akan eweh bewei.
Pantehau Akan Manjadi Murid Yesus
(Mat. 16:21-28; Mrk. 8:31—9:1)
22Limbaste Yesus bapander: “Aku, Anak Kalunen je Allah utus harus maetun are panderitaan. Kawan-bakas Yahudi, kawan-imam tambakas, tuntang kawan pangajar hukum Musa akan manolak Aku, tuntang Aku akan ihukum matei. Tatapi metuh andau je katelu Allah akan mampelum Aku.” 23Limbaste Yesus bapander dengan ewen uras: “Satiap uluh je handak manjadi murid-Ku, harus manolak kahandak biti ah kabuat. Harus siap akan memikul salib panderitaan bahkan matei. Harun ih tau bujur-bujur jadi murid-Ku. 24Awi eweh bewei je handak manyalamatkan belum ah melai dunia jituh, dia' akan mandinu belum je katatahi; tatapi eweh pun je manyarahkan belum ah awi iye yelah murid-Ku akan mandinu belum je katatahi. 25Narai guna ah amun ije uluh maina uras panatau melai dunia, tatapi balang manarima belum je katatahi hayak Tuhan. 26Amun ikau mahamen manjadi murid-Ku tuntang awi ajaran-Ku, maka Aku, Anak Kalunen je Allah utus, akan manyangkal ikau sabagai murid-Ku, amun Aku dumah haluli ka dunia jituh huang kamuliaan-Ku tuntang kamuliaan Bapa tuntang kawan-malaikat Kudus melai surga. 27Tuntang Aku jamin, melai antara uluh je dumah melai hetuh tege je dia' akan matei sahindai ewen nampayah Karajaan Allah.”
Musa Tuntang Elia Mamparahan Biti Hayak Yesus
(Mat. 17:1-8; Mrk. 9:2-8)
28Kira-kira hanya' andau limbas Yesus mangajar hal-hal jituh, Yesus maimbit Petrus, Yohanes, tuntang Yakobus, lalu mandai ka hujun bukit akan badoa dengan Allah. 29Katika Yesus metuh badoa, bau-Ah manjadi babeda tuntang pakaian-Ah manjadi puti basinar. 30Tuntang salenga-lenga due uluh lembut tuntang nampara bapander dengan Yesus, ewen yelah nabi Musa tuntang Elia. 31Musa tuntang Elia kia lembut dengan pakaian puti je basinar tuntang ewen bapander dengan Yesus tentang papatei-Ah je akan dumah tuntang kilau narai Iye akan manampa hal te manjadi kanyataan sasuai dengan kahandak Allah melai kota Yerusalem. 32Samentara te Petrus tuntang kawan kawal ah jadi batiruh tuntang katika ewen misik, ewen nampayah cahaya kamuliaan je baasal bara Yesus. Ewen kia nampayah kadue uluh je mendeng melai tukep Yesus. 33Tuntang katika Musa tuntang Elia handak malihi Yesus, Petrus bapander dengan Yesus: “Guru, puna bahalap amun itah melai hetuh. Ikei akan manampa telu puduk, ije akan Ikau, ije akan Musa tuntang ije akan Elia.” Tatapi Petrus dia' tawan narai je iye mander te. 34Samantara Petrus metuh bapander, kaije awan mambungkus ewen. Tuntang katika ewen tame huang awan te, ewen manjadi mikeh. 35Limbaste ewen mahining suara Allah bara huang awan te, je bapander: “Jituh ih Anak-Ku je Kupilih, hining ih tuntang taati ih Iye.” 36Katika suara te tahining, kawan-murid nampayah awi baya Yesus je tege melai kanih. Ewen dia' masanan akan eweh pun tentang narai je jadi ewen payah tuntang hining sampai pire-pire waktu limbaste.
Yesus Mapangkeleh Ije Uluh Anak Hatue Je karasukan Roh Jahat
(Mat. 17:14-21; Mrk. 9:14-29)
37Andau jewu ah, Yesus tuntang kawan-murid-Ah muhun bara bukit, are uluh dumah akan hasundau dengan Yesus. 38Ije uluh bara uluh are te batariak: “Guru, aku balaku dengan Ikau, nguan ih kaije akan mandohop anak hatueku, awi iye yelah anaku ije-ije ah! 39Roh jahat rancak manguasai biti ah, tuntang mandadak iye mangariak. Roh te manyebabkan anak te manjadi kejer-kejang tuntang bure balua bara bau ah. Roh te puna mayiksa iye tuntang handak dia' puji malihi ah. 40Tuntang aku jadi balaku dengan kawan-murid-Mu mangat ewen mangusir roh te, tatapi ewen dia' tau manguan ah.” 41Katika Yesus mahining hal te Iye bapander dengan kawan-uluh te: “Hei ikau je belum masa jituh, sungguh dia' percaya ah tuntang jahat ah ikau! Pire katahi hindai Aku harus balihi hayakmu tuntang mananggung dia' percaya mu?” Limbaste Yesus bapander dengan uluh te: “Imbit anakmu te ka hetuh!” 42Katika anak te dumah dengan Yesus, roh jahat te manjakah anak te ka petak tuntang manyebabkan iye mangalami kejer-kejang. Yesus manyuhu roh setan te akan malihi anak te. Yesus mapangkeleh anak te tuntang manenga haluli akan bapa ah. 43aUras uluh tarewen nampayah kuasa Allah je hai' te.
Panyampaian Kadue Tentang Panderitaan Yesus
(Mat. 17:22-23; Mrk. 9:30-32)
43bKatika uras uluh te heran dengan uras hal je jadi Yesus nguan, Yesus bapander dengan kawan-murid-Ah: 44“Ikau harus mahining bahalap-halap tuntang mangingat narai je Aku pander: Aku, Anak Kalunen je Allah utus akan inyarah ka huang kuasa kalunen.” 45Kawan murid-Ah dia' mangerti narai je Yesus maksud, awi arti ah inyuhukkan akan ewen. Tatapi ewen kia mikeh akan baisek dengan Yesus narai arti bara panderan-Ah te.
Yesus Mamander Dengan Kawan Murid-Ah Awi Ewen Harus Randah Atei
(Mat. 18:1-5; Mrk. 9:33-37)
46Kawan murid nampara badebat tentang eweh je paling penting melai antara ewen. 47Tatapi Yesus tawan narai je ewen pikirkan. Awi te Yesus maimbit ije uluh anak kurik tuntang manyuhu anak te mendeng melai silan-Ah. 48Limbaste Iye bapander dengan kawan murid-Ah: “Eweh pun manarima anak kurik kilau jituh awi Aku, iye kia manarima Aku; tuntang eweh pun manarima Aku, iye manarima Bapa je mautus Aku. Awi je eweh pun randah atei, iye ih paling hai' melai taharep Tuhan.”
Yesus Masanan Eweh Pun Dia' Manantang Ikau Iye Tege Melai Pihakmu
(Mrk. 9:38-40)
49Yohanes bapander dengan Yesus: “Guru, ikei nampayah ije uluh mahapan aram-Mu akan mangusir setan balua bara kawan uluh, ikei bausaha mangahana uluh te, awi iye dia' tarmasuk huang kalompok itah.” 50Tatapi Yesus manumbah: “Ela mangahana uluh kilau iye, awi eweh pun je beken musuhmu, iye tege melai pihakmu.”
Panduduk Lewu Samaria Manolak Akan Manarima Yesus
51Katika waktu ah samakin tukep bagi Yesus akan haluli ka Surga, Yesus marancana akan tulak ka kota Yerusalem. 52Yesus manyuhu pire-pire uluh utusan akan tulak labih helu. Lalu, utusan-utusan te pun tulak tuntang tame kaije lewu uluh Samaria akan manyadia eka bagi Yesus tuntang kawan uluh beken akan bamalem. 53Tatapi panduduk lewu Samaria te manolak Yesus tuntang kawan murid-Ah akan balihi melai lewu ewen awi ewen mangatawan awi Yesus tuntang kawan murid-Ah metuh huang pananjungan manuju kota Yerusalem. 54Katika kadue murid-Ah, yete Yakobus tuntang Yohanes, mahining hal jituh, ewen bapander dengan Yesus: “Tuhan, handakkah Ikau manyuhu ikei akan manyuhu apui muhun bara langit akan mamapui panduduk lewu jituh?” 55Tatapi Yesus haluli tuntang maningak ewen. 56Limbaste Iye dengan kawan-murid-Ah tulak ka lewu je beken.
Sulit Akan Manuntut Yesus
(Mat. 8:19-22)
57Katika Yesus tuntang kawan-murid-Ah metuh huang pananjungan manuju kota Yerusalem, ije uluh hatue dumah dengan Yesus tuntang bapander: “Tuhan, aku akan manjadi murid-Mu tuntang manuntut Ikau ka kueh bewei Ikau tulak.” 58Yesus bapander denga ah: “Serigala maina rumbak eka melai tuntang burung-burung melai udara maina sarangan. Akan tatapi Aku, Anak Kalunen je Allah utus, Aku dia' maina huma akan baistrahat.” 59Lalu Yesus bapander dengan uluh beken: “Umba ih jadi murid-Ku!” Tatapi uluh te bapander: “Tuhan ijinkan ih aku buli helu mangubur bapaku.” 60Tatapi Yesus bapander denga ah: “Biar ih kawan-uluh je jadi matei sacara rohani mangubur uluh je jadi matei melai antara ewen, tatapi ikau tulak ih tuntang mangabar mangenai Karajaan Allah dengan uras uluh.”
61Limbaste tege uluh beken je bapander dengan Yesus: “Tuhan, aku siap manjadi murid-Mu. Tatapi sahindai te ijinkan ih aku pamitan dengan kaluarga ku.” 62Tatapi Yesus manumbah: “Eweh pun manjadi murid-Ku tuntang limbaste handak haluli dengan pambelum je huran, iye dia' layak akan bagawi melai huang Karajaan Allah.”
Currently Selected:
Lukas 9: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
