Lukas 8
8
Kawan Bawi Je Malayani Yesus
1Limbaste, Yesus tuntang kadue balas murid-Ah tulak ka kota-kota tuntang lewu-lewu akan mangabar Injil Karajaan Allah. 2Tuntang kia pire-pire uluh bawi je jadi Yesus pangkeleh bara roh-roh setan tuntang berbagai macam panyakit. Sala ije bara kawan bawi te yelah Maria je inyewut Magdalena, Yesus jadi mambebas iye bara uju roh jahat, 3Yohana sawan Khuza bendahara Herodes, Susana tuntang are bawi beken. Uras bawi te manyadia kaperluan Yesus tuntang kawan murid-Ah bara harta ewen kabuat.
Kesah Tentang Ije Uluh Panabur
(Mat. 13:1-23; Mrk. 4:1-20)
4Metuh sinde andau, are uluh bara berbagai kota bakumpul melai sakitar Yesus. Lalu Yesus mangguna ije kesah akan mangajar ewen, pander-Ah: 5“Ije uluh pamalan tulak manabur bibit melai tana. Katika iye manabur, pire-pire bibit manjatu melai saran jalan. Kawan uluh mananjung melai hujun ah tuntang kawan burung melai udara makuma bibit te. 6Pire-pire bibit manjatu melai petak je babatu-batu. Bibit-bibit te tumbu tatapi manjadi keang awi jatun danum. 7Pire-pire manjatu melai bentuk-bentuk eka baduhi tuntang kadue ah sama-sama tumbu sahingga bibit te tagapit pulau duhi. 8Tuntang pire-pire manjatu melai petak je subur, tuntang katika tumbu bibit-bibit te mahasil babua saratus kali lipet.” Limbas Yesus mamander hal-hal jituh, Yesus bapander dengan suara nyaring dengan uluh are: “Eweh je tau mahining narai je Aku pander, harus ih iye bausaha mamahami ah!”
9Limbaste kawan-murid-Ah baisek dangan-Iye: “Narai maksud kesah te?” 10Lalu Yesus manumbah: “Allah jadi manyampaikan dengammu rahasia Karajaan Allah. Tatapi akan kawan-uluh beken, Aku manyampaikan hal te huang kesah, mangat sinde pun mamandang, ewen dia' nampayah tuntang sinde pun mahining, ewen dia' mangerti. 11Arti bara kesah jituh yelah: Bibit te malambang firman Allah. 12Je manjatu melai petak saran jalan te manggambarkan uluh je mahining firman Tuhan, tatapi iblis dumah tuntang manduan firman te bara ewen akan manahan ewen percaya tuntang inyalamat awi Tuhan bara dosa-dosa ewen. 13Pire-pire uluh kilau petak babatu je melai hunjun ah manjatu pire-pire bibit. Katika kawan uluh te mahining firman Tuhan, ewen percaya dengan hanjak atei. Tatapi ewen dia' mambiar firman Tuhan bauhat melai huang atei, sahingga ewen percaya akan samentara waktu, tatapi wayah tege pancobaan, ewen tende percaya dengan Tuhan. 14Pire-pire uluh kilau melai petak je baduhi melai kueh pire-pire bibit manjatu. Kawan uluh te mahining Firman Tuhan, tatapi sairing bajalan ah waktu, ewen taalih bara peteh Tuhan awi kakhawatiran, panatau, tuntang kamangat belum jituh. Akibat, ewen dia' puji tumbu huang kadewasaan rohani. 15Pire-pire uluh kilau petak je subur je melai hujun manjatu pire-pire bibit. Kawan uluh jituh mahining peteh Tuhan dengan atei jujur tuntang tulus. Limbaste tarus percaya tuntang ewen mahasil bua dengan kasabaran.
Kesah Tentang Sumbu
(Mrk. 4:21-25)
16Dia' tege ije uluh pun je jadi mampelum sumbu lalu manutup dengan mangkok atau maina ah melai penda eka batiruh. Tatapi iye akan maina sumbu te melai hunjun eka sumbu, mangat uluh je tame ka huang huma tau nampayah cahaya sumbu te. 17Awi dia' tege kaije je nyuhukkan je dia' akan isanan, tuntang dia' tege kaije rahasia je dia' akan ikatawan tuntang iumumkan. 18Awi te, hining ih bujur-bujur narai je Aku ajar, awi uluh je handak mangatawan narai je Aku ajar, Tuhan akan manenga labih are pengertian, tatapi uluh je dia' handak mangerti, Tuhan akan manduan pengertian je jadi ewen tempu.”
Yesus Tuntang Kawan Pahari-Ah
(Mat. 12:46-50; Mrk. 3:31-35)
19Sinde katika indu tuntang pahari hatue Yesus dumah akan bapander denga-Ah. Tatapi ewen dia' tau manukep awi kilaute are uluh bakumpul melai sakaliling-Ah. 20Ije uluh bapander dengan Yesus: “Indu tuntang kawan paharim-Mu tege melai hetuh akan bapander dengam-Mu, tuntang ewen mendeng melai luar.” 21Tatapi Yesus bapander dengan uras uluh: “Kawan uluh je mahining peteh Allah tuntang manaati ah yelah sama kilau indu tuntang kawan paharing-Ku.”
Riwut Tuntang Galombang Taat Dengan Parintah Yesus
(Mat. 8:23-27; Mrk. 4:35-41)
22Metuh sinde andau, Yesus tuntang kawan-murid-Ah mandai ka huang ije jukung tuntang Iye bapander dengan ewen: Ayu itah tulak ka silan danau: “Maka ewenpun nampara mambesei.” 23Katika ewen metuh mambesei, Yesus batiruh. Salenga-lenga riwut je puna kancang mahimbun melai danau, tuntang jukung ewen kuntep dengan danum sahingga ewen tege huang bahaya hai' akan leteng. 24Maka, kawan-murid tulak mampisik Yesus tuntang bapander: “Guru, salamatkan ikei, ikei akan matei.” Limbaste Iye hingkat tuntang manyuhu riwut tuntang galombang akan tende, lalu riwut pun tende mahimbun tuntang danau manjadi tenang.
25Yesus bapander dengan ewen: “Aku kacewa awi ikau dia' labih percaya dengang-Ku!” Kawan-murid-Ah mikeh tuntang heran hujun narai je jadi terjadi. Lalu ewen bapander ije sama je beken: “Sungguh hebat tuntang kuasa ah uluh jituh! Bahkan riwut tuntang danum tunduk denga-Ah!”
Yesus Mangusir Roh-Roh Jahat
(Mat. 8:28-34; Mrk. 5:1-20)
26Lalu sampai ih Yesus tuntang kawan murid-Ah melai daerah uluh Gerasa, melai silan danau daerah Galilea. 27Limbas Yesus tuntang kawan murid-Ah muhun bara jukung, ije uluh je karasukan setan dumah dengan Yesus. Uluh jituh huran balihi melai kota Gerasa melai ije huma, tatapi wayahtuh balihi melai eka kuburan. Uluh jituh jadi tahi dia' mahapan pakaian. 28Katika uluh te nampayah Yesus, iye pun mangariak tuntang sujud melai taharep Yesus. Iye bapander dengan suara nyaring: “Yesus, Anak Allah je mahakuasa, ela ganggu ikei, ikei mohon dengam-Mu, ela siksa ikei!” 29Iye bapander kilau te, awi Yesus jadi manyuhu roh-roh setan te balua bara uluh te. Kawan uluh jadi mameteng lenge tuntang pai dengan rantai tuntang mahaga ah, tatapi uluh te halajur manggetus rantai te tuntang roh-roh jahat te akan maimbit ah ka eka je suni. 30Tuntang Yesus baisek denga ah: “Eweh arammu?” Uluh te manumbah: “Aran ikei Tentara.” Iye masanan aran te awi iye karasukan are setan. 31Lalu kawan-setan te balaku dengan Yesus, mangat Iye dia' mangirim ewen ka jurang maut.
32Katika te terjadi, tege are bawui palihara je metuh kuman uru melai saran bukit melai tukep ah. Kawan-setan te balaku dengan Yesus, mangat Iye maijinkan ewen tame ka huang kawan-bawui te. Tuntang Yesus manenga ewen ijin. 33Lalu, kawan-setan balua bara uluh te tuntang tame ka huang kawan-bawui te. Limbaste kawan-bawui te hadari dengan puna capat melai bukit je mereng manuju danau tuntang matei buseng.
34Katika kawan-uluh je marawat kawan-bawui te nampayah narai je jadi terjadi dengan kawan bawui te, lalu ewen hadari bara eka te dengan mikeh. Ewen tulak tuntang masanan narai je jadi terjadi dengan kawan-uluh je ewen sundau melai kota tuntang lewu-lewu sakitar ewen. 35Limbaste are uluh tulak ka kanih akan nampayah narai je jadi terjadi. Ewen sampai melai eka Yesus tuntang ewen nampayah uluh je jadi Yesus mapangkeleh bara karasukan setan te metuh munduk melai taharep pai Yesus. Uluh te jadi bapakayan bahimat tuntang jadi waras. Uluh are nampayah hal te manjadi mikeh dengan Yesus. 36Ewen je jadi nampayah narai je jadi terjadi mangesah ah dengan kawan-uluh beken tentang kilenampi uluh je karasukan roh-roh jahat te inyalamat awi Yesus. 37Lalu, kawan-uluh je balihi melai sakitar kota Gerasa balaku Yesus akan malihi daerah ewen, awi ewen puna mikeh denga-Ah. Awi te, Yesus tuntang kawan-murid-Ah mandai ka jukung tuntang haluli ka daerah Galilea. 38Sahindai Yesus malihi eka te, uluh je jadi Yesus pangkeleh bara karasukan setan endau balaku mangat Yesus maijinkan iye umba denga-Ah. Tatapi Yesus manyuhu uluh te haluli dengan uluh are tuntang bapander: 39“Haluli ih kakeluargamu tuntang sanan ih dengan kawan uluh tentang uras hal je jadi Allah nguan dengammu.” Uluh te tulak ka uras kota tuntang masanan dengan uluh je iye nyundau tentang narai je jadi Yesus nguan denga ah.
Anak Bawian Yairus Tuntang Ije Uluh Bawi Je buah Panyakit Duruh Daha
(Mat. 9:18-26; Mrk. 5:21-43)
40Katika Yesus haluli hayak kawan murid-Ah ka silan danau, are uluh manyambut-Ah awi ewen uras manunggu pandumah-Ah. 41Metuh wayah te, ije uluh baaran Yairus dumah dengan Yesus. Yairus yelah ije uluh pamimpin eka ibadah uluh Yahudi melai hete iye basujud melai taharep pai Yesus tuntang balaku denga-Ah, mangat Yesus dumah ka huma ah, 42awi anak bawi ah metuh pehe tutu handak matei. Anak bawi te baumur sakitar due balas nyelu tuntang iyelah anak tunggal. Katika Yesus tulak ka huma Yairus, uluh are bakumpul mangalilingi Iye bara sagala arah.
43Melai hete tege ije uluh bawi je jadi buah panyakit duruh daha salama due balas nyelu, tuntang dia' ije uluh pun je tau mapangkeleh ah. 44Iye dumah manukep Yesus bara likut tuntang manjapai tapakan jubah-Ah tuntang metuh te kia duruh daha ah tende tuntang iye keleh. 45Limbaste Yesus baisek: “Eweh je jadi manjapai Aku?” Kawan-uluh melai sakaliling-Ah masanan awi ewen dia' manjapai-Ah, limbaste bapander ih Petrus dengan Yesus: “Guru, uluh are bakumpul tuntang badasak-dasak dengan Ikau, sahingga sala ije bara ewen mungkin jadi manjapai-Mu.” 46Tatapi Yesus bapander: “Ije uluh jadi manjapai Aku, awi Aku mangkeme tege kuasa mapangkeleh balua bara biting-Ku.” 47Katika bawi te manyadari awi Yesus mangatawan narai je iye nguan, iye dumah dengan hagejeh, mikeh tuntang balutut melai taharep-Ah. Melai taharep uras uluh bawi te masanan buhen iye manjapai Yesus tuntang kilenampi iye palus keleh. 48Limbaste Yesus bapander dengan bawi te: “Hei pahari-Ku je bawi, ikau jadi keleh awi ikau percaya awi Aku tau mapangkelehmu. Tulak ih tuntang samoga Allah tarus manenga damai sejahtra-Ah dengammu!”
49Katika Yesus masih bapander dengan bawi te, dumah ih ije uluh bara kaluarga pamimpin huma ibadah Yahudi te tuntang bapander: “Anakmu jadi matei, ela ikau manyusahkan Guru hindai!” 50Katika Yesus mahining panderan uluh te, Iye bapander dengan Yairus: “Ela mikeh, percaya ih dengang-Ku, maka anakmu akan inyalamat tuntang belum hindai.” 51Katika Yesus dumah melai huma Yairus, Yesus baya maijinkan telu murid-Ah, yete Petrus, Yohanes tuntang Yakobus tuntang uluh bakas anak te akan tame ka huang kamar anak te akan tame hayak-Ah. 52Uras uluh manangis tuntang mamparahan sungguh sedih ah ewen. Akan tatapi Yesus bapander: “Ela manangis; iye dia' matei, tatapi baya tiruh.” 53Ewen manatawe Iye, awi ewen tawan awi anak te jadi matei. 54Lalu Yesus maimbing lengen anak te tuntang bapander, pander-Ah: “Hei anak-Ku misik ih!” 55Limbaste dengan salenga bawi te belum haluli tuntang hingkat. Yesus manyuhu uluh bakas ah akan manenga panginan. 56Uluh bakas ah puna heran, tatapi Yesus manyuhu ewen akan dia' masanan dengan eweh pun tentang narai je terjadi.
Currently Selected:
Lukas 8: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
