Lukas 10
10
Yesus Mautus Uju Puluh Murid
1Limbas te, Tuhan Yesus mamilih uju puluh murid beken tuntang manyuhu ewen tulak huang kalompok-kalompok je tapendeng bara due uluh ka setiap kota tuntang lewu je akan iguang-Ah. 2Iye bapander dengan ewen sahindai mautus ewen: “Are uluh je siap akan percaya dengang-Ku, tatapi dia' are uluh je tau mangabarkan kabar bahalap dengan ewen. Ewen kilau tana je iimbul parei je luas je siap ingetem, tatapi dia' tege cukup panggawi akan manggetem ah. Jadi badoa ih dengan Tuhan, je bakuasa hunjun tana te, mangat mangirim labih are uluh akan mangumpul hasil getem ah. 3Wayahtuh tulak ih, tatapi hining! Limbas Aku mautus ikau, ikau akan manaharep bahaya kilau anak sapi melai bentuk-bentuk serigala je ganas. 4Ela maimbit duit, atau tas, atau bahkan due sapatu. Ela bapander dengan uluh je ikau nyundau melai jalan. Awi ikau dia' maina cukup waktu. 5Satiap kali tame kaije huma, kasulak-sulak berkati ih kaluarga te dengan bapander: Samoga Tuhan manenga damai sejahtra akan uras je tege melai huma jituh. 6Amun ewen je balihi melai kanih handak manarima kadamaian bara Tuhan, doamu akan kadamaian akan mamberkati ewen; amun ewen dia' mahandak ah, Tuhan dia' akan manenga kadamaian tuntang berkat dengan ewen. 7Ela bapindah-pindah bara ije huma ka huma beken ah. Balihi ih melai ije eka, kuman hayak ewen. Ela ih ragu akan manarima karamahan, awi ije uluh panggawi harus inenga upah ah. 8Satiap kali ikau tame kaije kota tuntang kawan uluh melai kanih manarima ikau, kuman ih naraipun je ewen nyadia akan ikau. 9Pangkeleh ih kawan-uluh pehe je tege melai kota te tuntang sanan ih akan ewen: Karajaan Allah jadi tukep dengammu. 10Tatapi amun ikau tame ka huang ije kota tuntang kawan uluh dia' manarima ikau, tulak ih ka eka melai kueh uras uluh tau mahining ikau tuntang manderkan ih: 11Ikei maparasih dabu kotamu je maleket melai pai ikei sabagai paringatan awi Tuhan akan mangadili ikau. Amun, ikei handak ketun mangatawan awi Karajaan Allah jadi manukep dengan ikau!” 12Yesus malanjutkan panderan-Ah: “Aku bapander dengammu awi metuh andau panghukuman, Tuhan akan mahukum kawan uluh melai kota te labih babehat bara kawan uluh jahat je belum jaman huran melai kota Sodom.” Aku masanan akammu: “Metuh andau te Sodom akan labih mahian tanggungan ah bara kota te.”
Kasangsaraan Bagi Panduduk Kota-Kota Je Dia' Batobat
(Mat. 11:20-24)
13“Alangkah buruk ah narai je akan manimpa panduduk kota Khorazim tuntang Betsaida! Awi, amun aku manguan mujizat-mujizat kilau je-Ku nguan melai kota-kota Tirus tuntang Sidon, kilau je-Ku nguan melai kotamu, pasti ih panduduk ah akan palus batobat. Ewen akan mahapan pakaian je kasar tuntang munduk melai hunjun abu akan mamparahan kasedihan hunjun dosa-dosa ewen. 14Waktu Tuhan mahakimi satiap uluh, Iye akan mahukum kawan uluh melai kota Khorazim tuntang Betsaida labih babehat bara kawan uluh melai kota Tirus tuntang Sidon. 15Tuntang kawan uluh bara kota Kapernaum, ela ih ikau mangira awi Allah akan mamuliakan ikau melai surga. Sabalik ah, iye akan manjakah ikau ka huang naraka.”
16Limbaste Iye bapander dengan kawan murid-Ah: “Eweh pun je manarima peteh mu, iye manarima Aku, tuntang eweh pun dia' manarima ah, iye manolak Aku. Uluh je manolak Aku baarti manolak Allah je mautus Aku.”
Haluli Ah Kauju Puluh Murid
17Pire-pire waktu limbaste, kauju puluh murid Yesus haluli bara pananjungan ewen dengan hanjak atei tuntang bapander dengan Yesus: “Tuhan, bahkan kawan-setan pun taat dengan ikei saat ikei mahapan kuasa aram-Mu akan mangusir ewen bara kawan-uluh!” 18Yesus manumbah ewen dengan bapander: “Katika kawan setan te manaati ketun, Aku nampayah setan ikalahkan dengan salenga-lenga manjatu bara langit kilau kilat je manyambar sacara salenga-lenga. 19Aku jadi manengamu kuasa akan mananjung melai antara kawan handipe tuntang katipkala. Dengan pander beken, Aku jadi manengamu kuasa akan mangalah uras kakuatan musuh, iye te setan, Sama sinde dia' tege je akan mangapehe ikau. 20Tatapi ela ih basukacita baya awi roh-roh jahat. Sabalik ah, basukacita ih awi Allah jadi manuliskan aran-aran ikau melai huang gulungan kitab-Ah melai surga.”
Pujian Yesus Dengan Bapa
(Mat. 11:25-27; 13:16-17)
21Limbaste Yesus inguntep dengan sukacita awi Roh Kudus tuntang Iye badoa dengan Allah: “Bapa-Ku, Ikau ih Tuhan hujun langit tuntang bumi, Aku basukur dengam-Mu awi Ikau jadi manyahukkan kabujuran jituh bara ewen je bapendidikan tuntang harati, tatapi Ikau jadi mamparahan dengan ewen je kilau anak kurik. Ya, Bapa, Ikau berkenan manguan dengan cara jituh. 22Limbaste Yesus bapander: Bapa-Ku jadi manenga dengang-Ku uras kuasa. Dia' tege je tawan eweh Aku, Anak, je beken Bapa. Dia' tege je tawan eweh Bapa je beken Aku, Anak, tuntang ewen je Aku pilih akan manunjuk ah.”
23Limbaste Yesus nampayah ka arah kawan murid-Ah tuntang bapander dengan ewen sacara khusus: “Uras uluh je jadi nampayah narai je jadi ikau payah sungguh bauntung. 24Aku pastikan dengammu, are nabi tuntang raja-raja metuh zaman huran je handak nampayah narai je jadi ikau payah, tatapi ewen dia' nampayah ah. Tuntang ewen handak sinde mahining narai je jadi ikau hining, tatapi ewen dia' mahining ah.”
Uluh Samaria Je Bahalap Atei
25Sinde andau ije uluh pangajar hukum Musa mendeng akan manguji Yesus dengan manenga paisek jituh. Iye baisek: “Guru, hal-hal naraikah je harus kunampa akan mandinu belum je katatahi?” 26Yesus baisek denga ah: “Narai je Musa tuliskan huang Pengajaran Hukum Musa mangenai hal jituh? Narai je ikau baca melai kanih?” 27Pangajar hukum Musa te manumbah: “Hukum Pengajaran Musa mamander: Kasihi ih Tuhan, Allahmu, dengan segenap ateimu tuntang dengan segenap bitimmu tuntang kakuatanmu tuntang dengan segenap akal budimu. Tuntang, kasihi ih sasamamu kalunen kilau ikau mangasihi bitimmu kabuat.” 28Yesus bapander: “Ikau jadi manenga jawaban je bujur. Amun ikau manaati parintah-parintah te, maka Allah akan manenga belum je katatahi dengammu.” 29Tatapi iye handak mamparahan awi paisek ah bujur, maka iye baisek dengan Yesus: “Ewehkah bahayakku kalunen?” 30Yesus manumbah ah dengan ije kesah: “Sinde andau, ije uluh hatue metuh mananjung bara kota Yerusalem ka kota Yerikho, kawan parampok manyarang ah tuntang marampas pakaian ah tuntang uras je iye tempu, ewen mamukuli ah tuntang malihi ah huang kaadaan handak matei. 31Katika iye tapenter melai kanih, ije uluh imam Yahudi kabetulan mahalau jalan je sama. Iye nampayah uluh je bahimang te tapenter melai kanih, tatapi iye mahalau ah melai saran jalan je beken. 32Kilau te kia ije uluh pambantu Bait Suci bara suku Lewi metuh mahalau jalan je sama. Iye nampayah uluh te tampenter melai kanih tatapi iye mananjung mahalau uluh te melai saran jalan je beken. 33Dia' tahi limbas te, ije hatue bara lewu uluh Samaria dumah mahalau jalan je sama melai kueh hatue te tampenter. Katika iye nampayah uluh te, atei ah mangkeme ngasi denga ah. 34Iye manguang uluh te tuntang manantamba himang-himang ah dengan manyiram minyak zaitun tuntang anggur ka hunjun ah sabagai obat. Limbaste iye maandak uluh te melai hunjun metu tunggangan ah tuntang tulak kaije panginapan limbaste iye marawat ah. 35Katika susung andau, iye mampalua due duit perak tuntang manenga dengan tempun panginapan tuntang bapander denga ah: Jaga ih uluh jituh. Amun ikau mapalepah labih bara te, aku akan mambayar mu saat aku buli kareh. 36Jadi wayahtuh, kilenampi manurut ikau? Bara telu uluh je nampayah hatue je irampok te, eweh je marupakan bahayak-hayak kalunen bagi ah?” 37Pangajar hukum Musa te manumbah: “Uluh je mamparahan balas kasih denga ah.” Yesus bapander denga ah: “Tulak ih tuntang nguan ih kilau je inguan ah.”
Yesus Manyundau Marta Tuntang Maria
38Yesus tuntang kawan-murid-Ah malanjut pananjungan ka kota Yerusalem. Katika ewen sampai ije lewu, ije uluh bawi baaran Marta marawei ewen akan manjadi tamu melai huma ah. 39Tuntang Marta maina ije uluh andi bawi je baaran Maria. Tuntang Maria munduk tukep pai Tuhan Yesus tuntang nampara mahining pangajaran-Ah. 40Marta mangkeme kesal dengan uras gawian huma kaluarga je harus iye nguan, jadi iye dumah dengan Yesus tuntang bapander, Tuhan, pahari bawiku dia' mandohop aku huang gawian jituh. Iye mambiarkan aku manguan ah kabuat. Te dia' adil. Pander denga ah awi iye harus mandohop aku! 41Tatapi Tuhan Yesus bapander: “Marta je terkasih, ikau palalau khawatir tentang are hal. 42Tapi baya ije hal je bujur-bujur penting tuntang Maria jadi mamilih akan manguan hal je bahalap. Dia' tege je tau manduan ah bara iye.”
Currently Selected:
Lukas 10: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
