Lukas 7
7
Yesus Mapangkeleh Ije Uluh Palayan Perwira Romawi
(Mat. 8:5-13; Yoh. 4:46-53)
1Limbas Yesus salesai mangajar uluh are, Iye tame ka kota Kapernaum. 2Melai kanih tege ije uluh perwira tentara Romawi je maina ije uluh palayan je metuh kapehe parah bahkan handak matei, tuntang perwira te puna manyayangi iye. 3Katika palayan perwira Romawi te mahining barita tentang Yesus, iye manyuhu pire-pire kawan-bakas uluh Yahudi dumah dengan Yesus akan balaku-Ah dumah tuntang mapangkeleh palayan ah. 4Katika ewen hasundau dengan Yesus, ewen bujur-bujur balaku dohop dengan Yesus mangat mandohop perwira te, kuan ewen: “Perwira jituh layak Ikau dohop. 5Awi iye mangasihi itah, kawan-uluh Yahudi tuntang yelah je mambangun eka ibadah itah.” 6Maka tulak ih Yesus hayak ewen. Katika Yesus jadi tukep dengan huma palayan perwira te, palayan perwira te manyuhu pire-pire kawal ah akan bapander dengan Yesus: “Tuan, ela ih repot-repot awi aku dia' layak manarima Tuan melai huang humaku. 7Jituh awi ah, aku kabuat mangkeme dia' layak akan mangguang Ikau. Tatapi Ikau cukup bapander hindai, maka palayanku akan keleh. 8Awi aku kia ije uluh bawahan tuntang aku manempun ije uluh prajurit melai pendaku. Amun aku manyuhu ije uluh prajurit tulak, maka iye pasti tulak. Amun aku mamander dengan prajurit je beken: Dumah ih ka hetuh! Maka iye pasti dumah, ataupun dengan palayanku je beken: Gawi ih jituh, maka iye pasti manggawi ah.” 9Katika Yesus mahining hal te, Iye mangkeme heran dengan perwira te, tuntang sambil manoleh dengan kawan-uluh je manuntut Iye tuntang bapander: “Aku bapander dengammu, Aku dia' puji hasundau dengan uluh Israel je maina iman kahain jituh.” 10Limbas kawan-kawal perwira te haluli ka huma ah, ewen nampayah awi palayan te jadi keleh.
Yesus Mampahingkat Anak Ije Uluh Balu Melai Lewu Nain Bara Kapatei
11Pire-pire andau limbaste, Yesus hayak kawan-murid-Ah tuntang are uluh tulak hayak Iye ka lewu je aran ah Nain. 12Katika ewen handak sampai melai pintu gerbang lewu te, ewen hasundau dengan kawan-uluh bara lewu te je maimbit hantun ije uluh hatue. hantun hatue te yelah anak ije-ije ah bara ije uluh balu, tuntang kumpulan uluh are bara desa te tulak mampahayak ah akan manguburkan hantun anak ah. 13Katika Yesus nampayah balu te, Iye mangkeme ngasi lalu Iye bapander denga ah: “Ela nangis hindai!” 14Yesus manukep kakurung te tuntang maimbing ah, kawan-uluh je maetun kakurung te tende mananjung. Lalu Yesus bapander: “Aku bapander dengammu, hingkat ih ikau hei anak muda!” 15Maka hingkat ih uluh je matei te, iye munduk tuntang nampara bapander. Tuntang Yesus manyarahkan ah dengan indu ah. 16Uras uluh je manampayah te mangkeme mikeh tuntang kagum. Ewen mamuliakan Allah tuntang bapander: “Ije uluh nabi je bakuasa tege melai hetuh hayak itah, Allah jadi dumah akan mandohop itah.” 17Maka berita tentang Yesus manyebar ka uras wilayah Yudea tuntang sakitar ah.
Yohanes Pambaptis Mangirim Paimbit Pesan Dengan Yesus
(Mat. 11:2-19)
18Kawan-murid Yohanes masanan dengan Yohanes je metuh melai panjara tentang uras hal je Yesus nguan. 19Maka Yohanes mantehau due uluh bara antara murid ah tuntang manyuhu ewen dumah ka eka Yesus akan maisek: “Naraikah ikau Masias je Allah janjikan akan dumah te? Atau haruskah ikei manunggu uluh beken?” 20Kadue murid te dumah ka eka Yesus, ewenpun bapander: “Yohanes pambaptis manyuhu ikei baisek dengam-Mu: Ikaukah je akan dumah te? Atau haruskah ikei manunggu uluh beken?” 21Metuh wayah je sama, katika kawan-murid Yohanes tege melai kanih Yesus mapangkeleh are uluh je pehe tuntang are uluh je ikuasai awi roh-roh jahat tuntang Iye manampa are uluh je dia' manampayah manjadi tau nampayah. 22Limbaste Yesus manumbah due uluh endau: “Haluli ih ka eka Yohanes, mander ih denga ah narai je jadi ketun payah tuntang hining awi uluh je dia' nampayah jadi tau nampayah, uluh je dia' tau mananjung jadi tau mananjung, uluh je pehe basamah impakeleh, uluh je dia' tau mahining jadi tau mahining, uluh je matei jadi belum haluli, tuntang kawan-uluh susah mandinu Kabar Bahalap. 23Tuntang Tuhan akan mamberkati uluh je dia' maragukan Aku.”
24Limbas kadue murid Yohanes tulak, Yesus bapander dengan uluh are te tentang Yohanes: “Katika Yohanes mambaptis melai padang pasir, narai je handak ikau payah melai kanih?” Naraikah akan nampayah puring je ihimbun riwut? 25Jadi, amun ikau dia' tulak ka kanih akan nampayah te, narai je handak ikau payah? Uluh je bapakayan bahalap? Uluh je mahapan pakayan bahalap tuntang tatau eka ah melai istana raja. 26Jadi, narai je ketun payah? Naraikah akan nampayah ije uluh nabi? Bujur, bahkan Yohanes te labih bara nabi. 27Awi melai gulungan Kitab Suci jadi tege tatulis mangenai Yohanes: “Allah jadi berfirman dengan Kristus, Allah akan mautus utusan-Ah sahindai Iye mautus Kristus akan manyadia pandumah-Ah. 28Aku bapander dengammu, sabujur ah Yohanes labih hai' bara uras uluh je puji lahir melai dunia. Amun, uluh je paling kurik huang Karajaan Allah pun labih hai' bara iye.” 29Mahining panderan Yesus, uluh are tuntang kawan pamungut pajak mangakui kabujuran Allah, awi ewen jadi ibaptis awi Yohanes. 30Akan tatapi kawan-uluh bara golongan Farisi serta kawan pangajar hukum Musa manolak rancana Allah huang pambelum ewen, awi ewen dia' handak ibaptis awi Yohanes.
31Lalu Yesus bapander: “Kilenampi Aku tau mambanding kawan-uluh je belum metuh jaman jituh? Kilau narai ewen? 32Ewen kilau kawan-anak je bamain melai eka umum. Pire-pire anak mangariak dengan kawal ah: Ikei mamain musik hanjak-sanang dengan suling akammu, tatapi ikau dia' manari. Lalu ikei manyanyi lagu kasedihan tatapi ikau dia' kia manangis.
33Awi Yohanes pambaptis dumah, ikau bapander awi iye karasukan setan, awi iye dia' kuman panginan je biasa itah kuman tuntang mihup anggur. 34Tatapi katika Aku, Anak kalunen je Allah utus dumah, kinan panginan biasa tuntang mihup anggur kilau uluh beken ikau bapander awi Iye ije uluh je bagahas tuntang pabusau, kawal panagih pajak tuntang uluh badosa. 35Tatapi hikmat akan bermanfaat dengan uluh je manarima ah.”
Ije Uluh Bawi Je Badosa Manguhus Miyak Harum Ka Pai Yesus
36Tege ije uluh bara golongan Farisi baaran Simon marawei Yesus ka huma ah akan kuman. Yesus dumah ka huma uluh Farisi te, lalu munduk akan kuman. 37Melai kota te, tege ije uluh bawi je belum huang pambelum je kuntep dosa. Amun iye tawan awi Yesus metuh kuman melai huma uluh bara golongan Farisi te, dumah ih iye dengan maimbit botol je baisi minyak harum je mahal. 38Lalu bawi te mendeng melai likut Yesus tukep pai-Ah sambil manangis tuntang danum mata ah mambisa pai Yesus, limbaste iye mamparasih-ah dengan balau-ah, limbaste bawi te manyium pai Yesus tuntang manguhus ah dengan minyak harum. 39Katika uluh bara golongan Farisi te nampayah narai je bawi te nguan, iye bapander melai huang atei: “Awi Iye bujur-bujur ije uluh nabi, Iye pasti mangatawan eweh tuntang bawi macam naraikah je maimbing-Ah te, awi bawi te belum huang dosa.” 40Lalu Yesus bapander: “Simon, tege je handak Kupander dengammu.” Simon manumbah: “Pander ih Guru.”
41Limbaste Yesus manumbah: “Tege uluh je maminjamkan duit dengan due uluh. Iye maminjamkan lime ratus kapeng duit perak dengan ije uluh tuntang ije uluh hindai lime puluh kapeng duit perak. 42Katika kadue uluh te dia' tau mambayar utang ah, uluh je maminjamkan duit te bapander dengan ewen: Ketun dia' perlu hindai mambayar utang ketun. Awi te, numbah ih Aku, eweh je manurut ikau paling mangasihi uluh je maminjamkan duit te?” 43Simon manumbah: “Manurut ku uluh je paling are maminjam duit denga ah akan labih mangasihi iye.” Lalu Yesus bapander dengan Simon: “Jawabanmu bujur.” 44Yesus nampayah bawi endau sambil bapander dengan Simon: “Payah ih bawi te, iye dumah ka hetuh lalu mambisa paing-Ku dengan danum mata ah, mangeang ah dengan balau ah, tatapi katika Aku dumah ka humamu, ikau dia manenga danum dengang-Ku akan mamenyau pai. 45Ikau dia' manyium Aku, tatapi metuh aku tame ka humamu, iye dia' tende manyium paing-Ku. 46Ikau dia' manguhus minyak melai takuluk-Ku, tatapi iye manguhus paing-Ku dengan minyak zaitun harum. 47Awi te Aku bapander dengammu: Meskipun iye rancak manguan dosa, dosa-ah te jadi iampuni awi iye manunjuk ah kasih je hai', tatapi uluh je manarima isut pangampunan awi isut dosa je iye nguan, akan mangasihi isut kia.” 48Lalu Yesus bapander dengan bawi te: “Aku jadi maampun dosamu.” 49Kawan-uluh beken je munduk kuman hayak Yesus nampara maisek-isek huang atei ewen: “Ewehkah uluh jituh sahingga Iye tau maampun dosa kalunen?” 50Tatapi Yesus bapander dengan bawi te: “Imanmu jadi manyalamatkan ikau, tulak ih tuntang samoga Allah tarus manenga damai sajahtra-Ah dengammu!”
Currently Selected:
Lukas 7: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
