Lukas 6
6
Yesus Maina Kuasa Hujun Andau Sabat
(Mat. 12:1-8; Mrk. 2:23-28)
1Sinde katika melai andau Sabat, katika Yesus tuntang kawan murid-Ah mahalau tana gadum, kawan murid-Ah mamulek gadum. Ewen manggosok-gosok gandum te akan malapas upak ah dengan lenge tuntang limbaste makuma. 2Tatapi pire-pire uluh bara golongan Farisi nampayah narai je ewen nguan tuntang ewen baisek: “Awi narai ketun mamulek gandum metuh andau Sabat? Te malangar Hukum Pengajaran Musa!” 3Yesus manumbah: “Dia'kah ikau mambaca huang gulungan Kitab Suci narai je inguan raja Daud katika iye tuntang kawan uluh je hayak ah blau? 4Iye tame ka huang kemah Suci Allah tuntang manduan roti je jadi ipersembahkan dengan Allah. Iye makuma tuntang limbas te iye manenga kia roti te dengan kawan uluh je tege hayak ah, meskipun Hukum Pengajaran Musa dia' mangizinkan eweh pun kacuali imam Yahudi akan makuma ah.” 5Limbaste Yesus maakhiri dengan bapander: “Aku, Anak Kalunen je Allah utus#6:5 galar je hapan awi Yesus akan mamparahan awi Iye yelah panyalamat je iutus Allah, maina kuasa hunjun narai je harus tuntang dia' tau inguan uluh metuh andau Sabat.”
Yesus Mapangkeleh Uluh Metuh Andau Sabat
(Mat. 12:9-14; Mrk. 3:1-6)
6Metuh sinde andau Sabat je beken, Yesus tame ka eka ibadah uluh Yahudi tuntang nampara mangajar kawan uluh melai kanih. Melai kanih tege uluh je lumpuh lenge gantau ah. 7Kawan pangajar hukum Musa, serta kawan uluh bara golongan Farisi je tege melai hete mamperhatikan-Ah dengan taliti, naraikah Iye akan mapangkeleh uluh te metuh andau sabat, awi ewen handak sinde manggau-gau kasalan-Ah. 8Tatapi Yesus mangatawan narai je ewen pikirkan. Maka Iye bapander dengan uluh je lumpuh lenge ah te: “Misik ih tuntang mendeng ih melai bentuk-bentuk hetuh.” Uluh te pun misik tuntang mendeng melai hete. 9Limbaste Yesus bapander dengan kawan uluh Farisi, tuntang pangajar hukum Musa je tege ihuang eka ibadah te: “Naraikah je Hukum Pengajaran Musa nyuhu akan itah nguan metuh andau Sabat? Manguan je bahalap atau je papa? Manyalamatkan uluh atau mancalakakan ah?” 10Yesus nampayah uras uluh je tege melai sakaliling-Ah, limbas te Iye bapander dengan uluh je lenge ah lumpuh te: “Ngulur lengemmu.” Limbas uluh te mangulur lenge ah tuntang lenge ah manjadi keleh. 11Tatapi katika kawan pangajar hukum Musa tuntang kawan uluh bara golongan Farisi nampayah hal te, ewen puna basingi tuntang nampara bapander ije sama je beken: “Narai je tau itah nguan taharep Yesus?”
Yesus Mamilih Kadue Balas Murid
(Mat. 10:1-4; Mrk. 3:13-19)
12Pire-pire andau limbaste, Yesus tulak kaije eka bukit akan badoa dengan Allah, melai hete Iye badoa sapanjang alem. 13Susung jewu ah, Yesus mantehau kawan murid-Ah tuntang mamilih due balas uluh bara antara ewen, ewen te yelah: 14Simon je kia ara ah Petrus, Andreas pahari Petrus, Yakobus, Yohanes, Filipus, Bartolomeus, 15Matius, Tomas, Yakobus anak Alfeus, Simon je inyewut uluh Zelot, 16Yudas anak Yakobus, tuntang Yudas, Iskariot je manjadi penghianat.
Yesus Mangajar Tuntang Mapangkeleh Are Uluh
(Mat. 4:23-25)
17Yesus tuntang kawan-murid-Ah muhun bara bukit tuntang tende melai eka je datar. Lalu, dumah ih denga-Ah sarombongan hai' kawan-murid-Ah je beken tuntang uluh are je dumah bara saluruh wilayah Yudea, kota Yerusalem, serta bara daerah Pantai kota Tirus tuntang Sidon. 18Ewen dumah akan mahining ajaran Yesus tuntang akan balaku kakeleh bara panyakit ewen. Tuntang, kawan uluh je kana rasuk roh-roh jahat kia balaku kakeleh bara Iye. 19Ewen uras barusaha handak maimbing Yesus, awi ewen percaya tege kuasa Yesus je tau mapangkeleh ewen uras.
Yesus Mangajar Kawan Murid-Ah
(Mat. 5:1-12)
20Lalu Yesus manampayah kawan murid-Ah tuntang bapander: “Bahagia ih uluh je kurang mampu awi ewen akan mandinu bagian bara Karajaan Allah. 21Bahagia ih ikau je wayahtuh mangkeme klauan, awi ikau akan imbesuh. Bahagia ih ikau je wayahtuh manangis awi ikau akan tatawe. 22Bahagia ih uluh je imbenci, ihina, je ihindari, serta ifitnah awi ketun percaya Aku, Anak kalunen je Allah utus. 23Metuh andau te, hanjak-hanjak, awi sasungguh ah upahmu hai' melai Surga; awi datu hiang ewen kia manguan hal te dengan kawan nabi je huran. 24Uluh je belum mangat awi harta, akan mandinu kasulitan hai', awi ewen jadi manarima kamangat huang pambelum jituh. 25Ikau je jadi besuh akan mandinu kasulitan hai', awi ikau akan klauan. Ikau je wayahtuh tatawe akan mandinu kasulitan hai', awi ikau akan basedih tuntang manangis. 26Ikau je wayahtuh ipuji uluh akan mandinu kasulitan hai', awi kilau te ih datu hiang ewen mamuji guru palsu.”
Yesus Mangajarkan Akan Mangasihi Musuh
(Mat. 5:38-48)
27“Aku bapander dengan ikau, je mahining Aku, ikau harus mangasihi musuhmu, tuntang manampa kahalap akan uluh je mambenci ikau. 28Ikau harus mamberkati uluh je maneheu ikau; badoa akan uluh je mahina ikau. 29Amun tege uluh manampar pipimu je silan, biar ih iye manampar je silan kia. Amun tege uluh je manduan paksa baju panjangmu maka biar ih kia iye manduan bajumu. 30Katika tege uluh balaku kaije dengan ikau, maka nenga ih te, tuntang ela balaku haluli kaije je jadi ikau nenga. 31Nguan akan uluh beken uras kaije je ikau handak ewen nguan akan ikau. 32Katika ikau baya mangasihi uluh je mangasihi ikau, maka ikau dia' tege beda ah dengan uluh je dia' mangasene Tuhan. 33Ikau dia' akan mandinu pujian katika ikau manguan je bahalap dengan uluh je manguan kahalap dengammu, awi uluh je dia' mangasene Tuhan kia manguan hal je sama. 34Ikau dia' akan mandinu pujian amun ikau maminjamkan kaije tatapi maharap imbalan. Kawan uluh je dia' mangasene Tuhan kia mainjamkan kaije dengan kawan uluh beken je kia dia' mangasene Tuhan mangat ewen tau manarima haluli dengan jumlah je sama. 35Tatapi, ikau harus mangasihi musuhmu tuntang manampa kahalap akan ewen, amun manenga pinjaman ela maharapkan balasan, dengan kalute ikau akan mandinu upah je hai' tuntang manjadi kawan anak Allah je Mahagantung, awi Tuhan te bahalap dengan uluh je dia' tau batarima kasih tuntang jahat. 36Tatap ih ikau manjadi uluh je bahalap atei, sama kilau Bapamu je melai Surga.”
Ela Mahakimi Uluh Beken
(Mat. 7:1-5)
37“Amun ikau dia' handak uluh tuduh, maka ela manuduh, ela ih ikau mahukum uluh, mangat uluh dia' mahukum ikau. Nenga ih pangampunan akan uluh beken mangat ewen maampun ikau. 38Babagi ih dengan uluh je mamerlukan maka ikau akan manarima narai je ikau perlukan. Kaije takaran je pas, je balimpah balua akan manjadi bagianmu. Awi ukuran je ikau hapa akan uluh beken yelah ukuran je akan Tuhan hapa dengan ikau.”
39Limbaste Yusus mamander kesah jituh dengan ewen: “Naraikah uluh je dia' nampayah tau mampahayak uluh je dia' tau nampayah kia. Pasti ewen badue akan manjatu ka huang rumbak.
40Katika ije uluh masih manjadi murid, kaharati ah dia' akan malabihi guru ah, tapi katika murid te manyelesaikan palajaran ah harun iye akan sama dengan guru ah.
41Buhen ikau nampayah dosa kurik kilau bisak kayu huang mata paharimmu, tatapi mangabaikan dosamu je hai' kilau balok kayu huang matamu kabuat. 42Ikau dia' mungkin bapander dengan paharimmu amun ikau akan mampalua bisak kayu bara mata ah tapi balok kayu te tege huang matamu kia dia' ikau payah. Hai uluh je munafik, palua ih helu balok kayu bara matamu, maka ikau akan nampayah dengan jelas akan mampalua bisak kayu te bara mata paharimmu.”
Batang Ingasene Bara Bua-Ah
(Mat. 12:33-35)
43“Batang je bua ah tau ingkinan dia' akan mahasilkan bua je baracun, tuntang batang je bua ah baracun dia' akan mahasilkan bua je tau ikinan. 44Uluh mangatawan jenis batang bara bua ah, uluh dia' puji mamutik bua mangga bara eka pulau baduhi atau mamutik anggur bara pulau uru. 45Uluh je bahalap manguan hal-hal bahalap je baasal bara huang atei ah tuntang kawan-uluh je jahat manguan hal-hal jahat je baasal bara huang atei ah, awi panderan je ije uluh ucapkan barasal bara huang atei.”
Mambangun Melai Hujun Pandasi Je Kuat
(Mat. 7:24-27)
46“Buhen ikau mantehau Aku: Tuhan, Tuhan padahal ikau dia' manguan narai je Aku ajarkan? 47Aku akan mamparahan dengammu kilau narai uluh je dumah dengang-Ku tuntang mahining ajaran-Ku tuntang manguan ah. 48Iye kilau uluh je manampa ije huma. Limbas mangali rumbak je handalem, iye mambangun pandasi ah. Katika terjadi banjir tuntang huma te takana dehes je daras, hal te dia' manyebabkan narai-narai taharep huma te, awi inampa dengan pandasi je kuat. 49Amun, uluh je jadi mahining pangajaran-Ku tuntang dia' manguan ah, iye kilau uluh je manampa ije huma melai hunjun petak jatun pandasi ah. Katika terjadi banjir, huma te takana arus palus bakarak tuntang mangalami are karusakan.”
Currently Selected:
Lukas 6: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
