Lukas 5
5
Yesus Mamilih Kawan Murid Ah Je Kasulak
(Mat. 4:18-22; Mrk. 1:16-20)
1Metuh sinde andau tege are uluh je bakumpul melai sakitar danau Galilea mangalilingi Yesus tuntang handak akan mahining firman Allah, metuh Yesus mendeng melai saran danau te. 2Yesus nampayah due jukung je ijarat melai saran danau, samentara palauk je tempun jukung te metuh mamparasih jala melai tukep danau. 3Lalu Yesus mandai ka jukung, yete jukung ayun Simon, tuntang manyuhu Simon mambesei jukung te mangejau bara saran danau, limbaste Yesus munduk melai huang jukung tuntang nampara mangajar uluh are te. 4Limbas Yesus jadi mangajar, Yesus bapander dengan Simon: “Besei ih jukung jituh ka eka je danum handalem tuntang birik ih jalamu akan manawan lauk.” 5Simon manumbah: “Guru, ikei jadi ngambirik jala sapanjang alem tatapi ikei dia' dinu narai-narai, tetapi awi Ikau je manyuhu ikei mangambirik jala jituh, maka aku akan mangambirik ah.” 6Katika ewen mangambirik jala, ewen mandinu are lauk sampai jala ewen nampara barabit. 7Lalu ewen balaku dohop dengan kakawalan ah je tege melai jukung je beken. Maka kakawalan ewen te dumah tuntang ewen sama-sama maisi kadue jukung ewen dengan lauk sampai kuntep hingga jukung ewen nampara kuntep dengan danum. 8Katika Simon je inyewut kia Petrus nampayah kajadian te iye basujud melai taharep Yesus lalu bapander: “Lihi aku Tuan, awi aku uluh je badosa.” 9Simon tuntang uras uluh je nampayah kajadian te palus heran awi ewen are mandinu lauk. 10Kalute kia dengan kadue kawal Simon, yete Yakobus dengan Yohanes, kawan-anak Zebedeus. Yesus bapander dengan Simon: “Ela mikeh! Nampara wayahtuh ikau akan manjadi panyampai kabar kasalamatan akan maimbit uluh percaya dengang-Ku.” 11Simon, Yakobus serta Yohanes mambesei jukung ewen manuju ka saran danau, ewen malihikan uras je tege melai jukung, lalu tulak hayak Yesus akan manjadi murid Yesus.
Yesus Mapangkeleh Ije Uluh Hatue Je Kana Panyakit Basamah
(Mat. 8:1-4; Mrk. 1:40-45)
12Ije andau katika Yesus tege melai sala ije kota melai daerah te, tege ije uluh hatue je takana panyakit basamah. Katika uluh te nampayah Yesus, iye manunduk sampai bau ah takana petak, tuntang mamohon denga-Ah: “Tuan, amun Ikau dia' kabaratan, Ikau tau mapangkeleh aku.” 13Yesus maimbing uluh te sambil bapander: “Keleh ih!” Wayah te kia keleh ih panyakit basamah ah te. 14Tatapi Yesus balaku uluh te mangat dia' mangesah ah dengan uluh are, pander-Ah: “Tulak ih maguang imam Yahudi tuntang laku dengan iye akan mamasti awi ikau jadi keleh bara panyakit basamah tuntang tulak ih manyarah kurban persembahan kilau je puji Musa nyuhukkan, sabagai bukti akan uluh are awi ikau bujur-bujur keleh.” 15Akan tatapi barita tentang Yesus samakin maluas tuntang are uluh je dumah akan mahining pangajaran Yesus, tuntang mangat Yesus mapangkeleh panyakit ewen. 16Amun Yesus rancak tulak melai eka je suni mangat tau badoa dengan Tuhan.
Yesus Mangampuni Dosa-Dosa
(Mat. 9:1-8; Mrk. 2:1-12)
17Metuh ije andau Yesus mangajar, pire-pire uluh bara golongan Farisi tuntang kawan pangajar hukum Musa munduk melai kanih. Ewen dumah bara kota Yerusalem, tuntang lewu-lewu bara daerah Galilea tuntang wilayah Yudea; kuasa Tuhan mampahayak Iye sahingga Iye tau mapangkeleh uluh pehe. 18Wayah te, pire-pire uluh dumah maimbit ije uluh je dia' tau mananjung menter melai hunjun eka batiruh. Ewen mangau akal akan maimbit uluh te tame ka huang huma mangat tau maimbit iye melai taharep Yesus. 19Tatapi awi lalau are uluh melai hete. Ewen dia' tau mamimbit uluh te. Awi te ewen maimbit ah mandai ka hunjun sapau huma lalu ewen mambukar pire-pire sapau huma, tuntang mapuhun uluh te bahayak-hayak dengan eka batiruh ah melai bentuk uluh are pas melai taharep Yesus. 20Yesus bapander dengan uluh te: “Pahari, dosamu jadi Ku ampuni.” 21Kawan pangajar hukum Musa tuntang kawan-uluh bara golongan Farisi nampara bapikir huang atei ewen: “Eweh uluh jituh, bahanyi mahina Allah? Eweh je tau manenga pangampunan dosa je beken bara Allah kabuat?” 22Yesus mangatawan paisek ewen. Lalu Iye bapander: “Buhen ketun baisek kilau te huang atei ketun? 23Je kueh labih murah, manyewut: Dosamu jadi Ku ampuni; atau manyewut misik tuntang mananjung ih? 24Tatapi wayah jituh Aku handak mambuktikan dengan ketun, awi Anak Kalunen je Allah Utus maina kuasa melai bumi akan maampun dosa.” Limbas mamander te, Yesus nampayah ka arah uluh je dia' tau mananjung te, tuntang bapander: “Hingkat ih, angkat eka batiruhmu, tuntang buli ih!” 25Limbas te kia, katika uras uluh manampayah uluh te misik lalu manduan amak ah tuntang buli sambil mamuji Allah. 26Uras uluh mangkeme heran tuntang mamuji Allah. Dengan rasa mikeh, ewen bapander: “Ikei jadi manampayah hal-hal je luar biasa andau jituh!”
Yesus Mamilih Ije Uluh Pamungut Pajak Baaran Lewi Akan Manjadi Murid-Ah
(Mat. 9:9-13; Mrk. 2:13-17)
27Limbaste Yesus balua tuntang manampayah ije uluh panagih pajak baaran Lewi, metuh munduk melai eka bagawi ah. Yesus bapander denga ah: “Ayu jadi murid-Ku.” 28Lewi mendeng tuntang malihi gawian ah te, lalu manuntut Yesus.
29Limbaste Lewi manampa pesta melai huma ah akan mahormati Yesus. Are kia kawan pamungut pajak tuntang kawan uluh beken umba kuman hayak ewen. 30Pire-pire uluh bara golongan Farisi tuntang kawan pangajar hukum Musa mangkeme dia' sanang, lalu bapander dengan kawan murid Yesus: “Buhen ketun kuman mihup hayak pamungut pajak tuntang kawan uluh badosa beken?” 31Yesus manumbah: “Uluh je pehe ih je mamerlukan pandohop dokter, tuntang beken uluh je barigas. 32Aku dumah beken baya akan mantehau kawan uluh je manyewut biti ah bahalap, tatapi akan kawan uluh je badosa, mangat ewen barubah tuntang malihi dosa-dosa ewen.”
Hal Bapuasa
(Mat. 9:14-17; Mrk. 2:18-22)
33Kawan uluh bapander dengan Yesus: “Murid Yohanes tuntang murid uluh bara golongan Farisi rancak bapuasa tuntang badoa. Buhen kawan murid-Mu dia' bapuasa tuntang badoa?” 34Yesus manumbah: “Taukah ketun manyuhu tamu irawei melai pesta kawin akan dia' kuman panginan katika panganten hatue tege hayak dengan ewen? Pasti ih dia'! 35Tatapi kareh katika panganten hatue te induan bara ewen. Waktu te ih ewen akan bapuasa.”
36Lalu Yesus masanan kesah dengan ewen: “Jatun uluh je manumpang baju je barabit dengan kain je taheta. Tuntang hindai kain taheta je ihapan akan manumpang te dia' pas dengan baju je barabit. 37Kalute kia uluh dia' maname danum anggur je taheta ka huang kambut upak je usang, awi danum anggur taheta te tau manampa kambut te baposit. Maka danum anggur te akan batusuh tuntang kambut te rusak. 38Uluh harus maname danum anggur je taheta ka huang kambut je taheta kia. 39Kalute kia jatun uluh je handak mihup danum anggur je taheta, limbas mihup danum anggur je usang. Awi ewen akan mamander awi danum anggur je usang te labih mangat.”
Currently Selected:
Lukas 5: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
