Lukas 4
4
Iblis Mancobai Yesus
(Mat. 4:1-11; Mrk. 1:12-13)
1Limbas Yohanes mambaptis Yesus, Yesus inguntep awi Roh Kudus, Iye balua bara sungei Yordan. Roh Kudus mampahayak Yesus, limbaste Roh Kudus maimbit Yesus ka padang pasir. 2Yesus tege melai kanih salama epat puluh andau tuntang dia' kuman narai-narai limbaste Yesus mangkeme klauan, maka iblis dumah mancobai Iye. 3Iblis bapander dengan Yesus: “Amun Ikau Anak Allah, nampa ih batu te manjadi panginan.” 4Yesus manumbah iblis: “Tege tatulis huang gulungan Kitab Suci: Kalunen belum dia' bara panginan bewei.”
5Limbaste iblis maimbit Yesus kaije eka je gantung tuntang nampayahkan denga-Ah uras bangsa melai dunia. 6Iblis bapander denga-Ah: “Uras kamegahan te kunenga dengam-Mu, awi uras ah jadi manjadi aku tempu, tuntang aku akan manengakan ah akan eweh bewei je ku handak. 7Amun Ikau sujud manyembah aku, uras je tege melai hete Ikau tempu.” 8Tatapi Yesus manumbah: “Tege tatulis huang gulungan Kitab Suci: Ikau harus sujud manyembah Tuhan, Allahmu, tuntang ikau harus berbakti dengan Iye bewei!”
9Limbaste Iblis maimbit Yesus ka kota Yerusalem tuntang maandak Iye melai rawung huma Bait Allah, lalu bapander: “Amun Ikau Anak Allah, nakajuk ih ka penda, 10awi huang gulungan Kitab Suci tege tatulis: Allah akan manyuhu kawan malaikat-Ah akan mahaga-Mu, 11tuntang maimbing Ikau dengan lenge-Ah, mangat paim-Mu dia' bahimang awi tahantup batu.” 12Yesus manumbah, tege tatulis huang gulungan Kitab Suci: “Ela ih ikau mancobai Tuhan, Allahmu!”
13Limbas Iblis mancobai Yesus Iye malihi Yesus tuntang manunggu kasampatan je beken akan mancobai-Ah hindai.
Yesus Haluli Ka Daerah Galilea
(Mat. 4:12-17; Mrk. 1:14-15)
14Limbaste Yesus haluli ka daerah Galilea huang kuasa Roh Kudus. Kabar tentang Iye manyebar ka uras daerah te. 15Limbaste Iye mangajar melai eka ibadah uluh Yahudi tuntang uras uluh je tege melai hete mamuji Iye.
Yesus Inolak Melai Kota Nazaret
(Mat. 13:53-58; Mrk. 6:1-6)
16Limbaste Yesus tulak ka kota Nazaret, eka Iye balihi katika Iye masih kurik. Kilau biasa, metuh andau Sabat, Yesus tulak ka eka ibadah uluh Yahudi tuntang Yesus mendeng akan mambaca gulungan Kitab Suci. 17Ije uluh manenga Yesus gulungan Kitab nabi Yesaya tuntang Yesus mambuka gulungan Kitab te tuntang mambaca ayat je tege tatulis: 18“Roh Tuhan mampahayak Aku akan mandohop-Ku. Tuhan jadi mamilih Aku akan mangabar Kabar Bahalap akan kawan uluh susah. Tuntang akan manyapaikan dengan tahanan awi ewen jadi ibebaskan, tuntang awi uluh je dia' tau manampayah akan nampayah hindai, tuntang akan mambebaskan uras uluh je mandarita awi iperlakukan dia' adil, 19tuntang akan manyapaikan awi jituh wayah ah Tuhan akan mamparahan kahalap-Ah.”
20Limbas mambaca gulungan kitab te, Yesus manenga gulungan Kitab te haluli dengan pangurus eka ibadah uluh Yahudi te, lalu munduk; uras uluh melai hete nampayah Iye. 21Limbaste Yesus nampara manjelaskan ayat Kitab Suci je jadi Iye baca endau dengan bapander: “Narai je teheta hindai ketun hining jadi manjadi kanyataan wayah jituh.” 22Ewen uras satuju dengan panderan-Ah tuntang ewen kagum dengan panderan bahalap je Yesus pander dengan ewen. Tatapi limbaste ewen baisek: “Bekenkah Iye jituh anak Yusuf?” 23Limbaste Yesus bapander: “Pasti ikau akan manyewut kesah jituh dengang-Ku: Dokter, pangkakeleh ih bitim-Mu kabuat. Ikei mahining mujizat je Ikau nguan melai kota Kapernaum, nguan ih te kia melai eka asal-Mu.” 24Yesus bapander hindai: “Awi sasungguh ah, kawan uluh dia' mahormati ije uluh nabi melai eka asal ah. 25Panderan-Ku jituh bujur, metuh zaman nabi Elia tege are balu melai bangsa Israel. Katika langit dia' manenga ujan salama telu nyelu satengah tuntang klauan je parah terjadi melai uras negeri. 26Tatapi Tuhan mautus nabi Elia dengan ije uluh balu melai kota Sarfat je tege melai daerah Sidon tuntang beken bara ije uluh bara bangsa Israel. 27Metuh zaman nabi Elisa tege are uluh kana panyakit basamah melai bangsa Israel, tatapi Tuhan baya mapangkeleh Naaman, uluh bara daerah Siria.” 28Panderan Yesus te manampa uras uluh je tege huang eka ibadah uluh Yahudi te manjadi basingi. 29Jadi ewen mendeng lalu maimbit Yesus ka biling bukit je tege melai luar kota te, tuntang handak mandorong Yesus bara biling bukit. 30Tatapi Yesus mananjung mahalau uluh are te tuntang malihi ewen.
Yesus Mangusir Roh Jahat Huang Eka Ibadah Uluh Yahudi Melai Kota Kapernaum
(Mrk. 1:21-28)
31Metuh sinde andau Yesus tulak ka kota Kapernaum, melai daerah Galilea, tuntang mangajar uluh are metuh andau Sabat melai eka ibadah uluh Yahudi. 32Panderan Yesus kuntep dengan kuasa sahingga ewen kagum dengan pengajaran-Ah. 33Melai eka ibadah uluh Yahudi te tege ije uluh hatue je ikuasai awi roh setan tuntang uluh te mangariak dengan suara je nyaring: 34“Hai Yesus, uluh bara kota Nazaret, naraikah Ikau akan dumah mahancurkan ikei? Aku tawan awi ikau Uluh Kudus je Allah utus.” 35Tatapi Yesus ngalait roh setan te: “Benyem, balua ih bara hatue jituh.” Setan te mahampas hatue te ka petak melai taharep uluh are, lalu balua bara hatue te tampa mangapehe-ah. 36Uras uluh je tege melai hete manjadi kagum tuntang bapander ije uluh dengan je beken: “Panderan-Ah jituh kuntep dengan kuasa sahingga hunjun parintah-Ah roh jahat te balua.” 37Tuntang kabar tentang narai je Yesus nguan tasebar ka uras eka melai daerah te.
Yesus Mapangkeleh Empu Simon Petrus Je Bawi tuntang Kawan Uluh Je Beken
(Mat. 8:14-17; Mrk. 1:29-34)
38Limbas Yesus mangalihi eka Ibadah uluh Yahudi te, Iye tulak ka huma Simon, awi jadi isanan dengan Yesus awi empu Simon je bawi haban badarem parah. Ewen balaku mangat Yesus mapangkeleh ah. 39Yesus mendeng melai silan eka batiruh empu Simon te tuntang mapangkeleh ah. Awi jadi keleh bara kapehe ah, bawi te misik bara eka batiruh tuntang manyadia panginan akan ewen.
40Metuh halemei andau, are uluh maimbit kaluarga ewen je pehe dengan macam-macam kapehe mangguang Yesus. Lalu Yesus mapangkeleh ewen dengan cara maandak lenge-Ah ka hunjun ewen uras. 41Tege pire-pire uluh je karasukan setan tuntang kawan setan te balua bara kawan uluh je pehe te sambil mangariak: “Ikau yelah Masias Anak Allah!” Tatapi Yesus basingi dengan kawan setan te tuntang Yesus manyuhu ewen benyem.
Yesus Mangajar Melai Kota-Kota Beken
(Mrk. 1:35-39)
42Susung jewu ah, Yesus tulak ka eka je suni. Kawan uluh nampara manggau Iye tuntang katika ewen hasundau dengan Iye, ewen balaku mangat Yesus dia' malihi ewen. 43Tatapi Yesus manumbah: “Allah mautus Aku akan mangabar tentang Injil Karajaan Allah beken baya melai kota jituh bewei, tatapi kia ka kota-kota je beken.” 44Jituh ih awi ah Yesus bakhotbah melai eka ibadah uluh Yahudi je tege melai wilayah Yudea.
Currently Selected:
Lukas 4: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
