Lukas 3
3
Yohanes Pambaptis
(Mat. 3:1-12; Mrk. 1:1-8; Yoh. 1:19-28)
1Metuh wayah te yelah nyelu kalime balas bara pamerintahan Kaisar Tiberius, katika Pontius Pilatus manjadi wali negeri wilayah Yudea, tuntang Herodes raja melai daerah Galilea, Filipus, pahari ah, raja wilayah Iturea tuntang Trakhonitis, tuntang Lisanias raja wilayah Abilene. 2Hanas tuntang Kayafas yelah Imam Hai'. Metuh waktu te, ije firman Allah dumah dengan Yohanes, anak Zakharia, je balihi melai padang pasir. 3Maka, tulak ih Yohanes ka saluruh daerah melai sakitar sungei Yordan tuntang mansanan baptisan pertobatan akan pangampunan dosa. 4Nabi Yesaya puji manulis tentang Yohanes melai huang gulungan Kitab nabi Yesaya: Tege ije uluh je bapander dengan nyaring melai padang pasir: Tuhan akan dumah, nyadia ih jalan bagi-Ah tuntang luruskan ih jalan te. 5Satiap ruak akan inimbun tuntang satiap bukit akan manjadi rata, je babelok-belok akan ilurus, tuntang jalan je kasar akan inampa mulus. 6Tuntang uras uluh nampayah panyalamat je iutus Allah.
7Lalu iye bapander dengan uluh are je dumah ka eka ah akan ibaptis, kua ah: “Hei ikau katurunan handipe hanjaliwan! Eweh ih je mamander dengammu awi ikau tau luput bara hukuman Allah je akan dumah?” 8Akan manghindari penghukuman, ikau harus belum dengan cara je mambutikan ikau jadi batobat bara dosa-dosamu! Ela ih bapikir huang ateimu, awi Abraham yelah datu hiangmu. Ingat: “Bara batu-batu te pun Allah sanggup manampa katurunan akan Abraham akan manggantikanmu. 9Bahkan, Allah jadi manyadia Kapak-Ah akan maneweng kayu sampai ka uhat-uhat ah. Awi te, uras batang je dia' mahasilkan bua je dia' tau ikinan akan ineweng tuntang injakah ka huang apui akan imapui.”
10Uluh are baisek denga ah: “Amun kilau te, naraikah je harus ikei nampa?” 11Iye manumbah: “Satiap uluh je maina due baju, iye harus mambagi ah dengan uluh je dia' maina baju sama sinde. Tuntang, satiap uluh je maina panginan, harus manguan hal je sama.” 12Tege dumah kia panagih pajak akan ibaptis tuntang ewen baisek denga ah: “Guru, naraikah je harus ikei nguan?” 13Tumbah ah: “Ela managih labih are bara je jadi inentukan dengammu.” 14Tuntang prajurit-prajurit baisek kia denga ah: “Tuntang ikei, naraikah je harus ikei nguan?” Pander Yohanes dengan ewen: “Ela ih marampas tuntang ela mameras tuntang cukupkan ih bitimu dengan gajihmu.”
15Tatapi awi uluh are metuh mananti tuntang maharap, tuntang uras ah baisek melai pikiran ah naraikah Yohanes mungkin yelah Masias 16Yohanes manumbah tuntang bapander dengan uras uluh are te: “Aku mambaptis ikau dengan danum, tatapi Iye je labih bakuasa baraku akan dumah tuntang mambuka tali sandal-Ah pun aku dia' layak. Iye akan mambaptis ikau dengan Roh Kudus tuntang dengan apui. 17Alat kiap jadi tege melai lenge-Ah akan maparasih laseh mangihik tuntang akan mangumpul parei je bahalap ka huang karangking-Ah, Akan tatapi, Iye akan mamapui apis parei ka huang apui je dia' akan puji belep.”
18Dengan are nasehat beken Yohanes mangabar Injil dengan uluh are. 19Akan tatapi, limbas Yohanes managur Herodes, raja wilayah, hunjun hal je jadi Herodes nguan awi peristiwa Herodias, sawan pahari ah, tuntang awi uras hal jahat je jadi Herodes nguan. 20Maka Herodes te manambah kajahatan ah hunjun uras ah dengan maajuk Yohanes ka huang panjara.
Yesus, Anak Allah, Ibaptis
(Mat. 3:13-17; Mrk. 1:9-11; Yoh. 1:32-34)
21Katika Yohanes jadi mambaptis uras uluh je dumah, iye kia mambaptis Yesus. Tuntang, katika Yesus badoa, langit tabuka, 22tuntang Roh Kudus muhun ka hunjun-Ah huang wujud burung merpati. Lalu, tege suara tahining bara langit tuntang bapander: “Ikau yelah Anak-Ku je Kukasihi. Dengam-Mu ih Aku berkenan.”
Daftar Datu Hiang Yesus
(Mat. 1:1-17)
23Yesus nampara bakhobah melai taharep umum tentang Tuhan katika Iye baumur kira-kira telu puluh nyelu tuntang manurut anggapan uluh, Yesus yelah anak Yusuf, Yusuf yelah katurunan Heli, 24Heli yelah anak Matat. Matat yelah anak Lewi. Lewi yelah anak Melki. Melki yelah anak Yanai. Yanai yelah anak Yusuf. 25Yusuf yelah anak Matica. Matica yelah anak Amos. Amos yelah anak Nahum. Nahum yelah anak Hesli. Hesli yelah anak Nagai. 26Nagai yelah anak Maat. Maat yelah anak Matica. Matica yelah anak Simei. Simei yelah anak Yosekh. Yosekh yelah anak Yoda. 27Yoda yelah anak Yohanan. Yohanan yelah anak Resa. Resa yelah anak Zerubabel. Zerubabel yelah anak Sealtiel. Sealtiel yelah anak Neri. 28Neri yelah anak Malkhi. Malkhi yelah anak Adi. Adi yelah anak Kosam. Kosam yelah anak Elmadam. Elmadam yelah anak Er. 29Er yelah anak Yesua. Yesua yelah anak Eliezer. Eliezer yelah anak Yorim. Yorim yelah anak Matat. Matat yelah anak Lewi. 30Lewi yelah anak Simeon. Simeon yelah anak Yehuda. Yehuda yelah anak Yusuf. Yusuf yelah anak Yonam. Yonam yelah anak Elyakim. 31Elyakim yelah anak Melea. Melea yelah anak Mina. Mina yelah anak Matata. Matata yelah anak Natan. Natan yelah anak Daud. 32Daud yelah anak Isai. Isai yelah anak Obed. Obed yelah anak Boas. Boas yelah anak Salmon. Salmon yelah anak Nahason. 33Nahason yelah anak Aminadab. Aminadab yelah anak Admin. Admin yelah anak Arni. Arni yelah anak Hezron. Hezron yelah anak Peres. Peras yelah anak Yehuda. 34Yehuda yelah anak Yakub. Yakub yelah anak Ishak. Ishak yelah anak Abraham. Abraham yelah anak Terah. Terah yelah anak Nahor. 35Nahor yelah anak Serug. Serug yelah anak Rehu. Rehu yelah anak Pelek. Pelek yelah anak Eber. Eber yelah anak Salmon. 36Salmon yelah anak Kenan. Kenan yelah anak Arpakhsad. Arpakhsad yelah anak Sem. Sem yelah anak Nuh. Nuh yelah anak Lamekh. 37Lamekh yelah anak Metusalah. Metusalah yelah anak Henokh. Henokh yelah anak Yared. Yared yelah anak Mahalaleel. Mahalaleel yelah anak Kenan. 38Kenan yelah anak Enos. Enos yelah anak Set. Set yelah anak Adam. Adam yelah anak Allah.
Currently Selected:
Lukas 3: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
