Lukas 2
2
Kalahiran Yesus
(Mat. 1:18-25)
1Metuh wayah te, Kaisar Agustus manyuhu mangat uras uluh je balihi melai kakaisaran Romawi harus mandaftar ara. 2Hal jituh inguan kasulak katika Kirenius manjadi pimpinan wilayah Siria. 3Jadi, satiap uluh tulak ka kota atau lewu eka datu hiang ah mangat ewen tau manuliskan aran ewen melai ije buku melai kanih.
4Maka Yusuf tulak bara kota Nazaret melai daerah Galilea tuntang tulak ka kota Betlehem melai wilayah Yudea. Yusuf tulak ka kanih awi iye marupakan katurunan Raja Daud je kota asal eka ah melai Betlehem. Betlehem kia ikenal sabagai kota Daud. 5Yusuf tulak ka kanih akan mandaftar dengan Maria awi iye jadi batunangan dengan ah tuntang metuh batihi.
6Katika Yusuf tuntang Maria tege melai kanih, sampai ih waktu ah Maria akan maanak anak ah. 7Iye maanak tabela hatue kasulak ah. Iye mambungkus ah dengan tetekkan kain tuntang maandak ah melai huang ije kotak eka panginan metu paliharaan. Awi dia' tege eka je tasadia akan ewen manginap.
Kawan Malaikat Masanan Dengan Kawan Gembala Tentang Kalahiran Yesus
8Melai daerah sakitar kota Betlehem hamalem te kawan pangembala metuh mengembalakan domba ah melai pulau uru tukep kota Betlehem. 9Lalu salenga-lenga ije uluh malaikat utusan Tuhan mamparahan biti dengan kawan gembala tuntang cahaya kamuliaan Tuhan manyinari ewen. Jadi, ewen puna mikeh. 10Tatapi malaikat utusan Tuhan te bapander dengan ewen: “Ela ih mikeh. Aku mangabar kabar bahalap je hanjak bagi uras uluh. 11Andau jituh Jurusalamatmu jadi lahir melai kampumg halaman Raja Daud. Iye yelah Masias tuntang Iye yelah Tuhan. 12Tuntang kilautuh ih cara ikau mangasene tabela te: Ikau akan manyundaukan ah ibungkus dengan kain tuntang iye akan iandak melai huang kotak panginan metu.” 13Metuh wayah te, sajumlah hai' malaikat utusan Tuhan bara surga lembut hayak malaikat utusan Tuhan je pangkasulak tuntang ewen mamuji Tuhan. Ewen bapander: 14“Tuhan manarima kamuliaan melai surga, tuntang kalunen je iberkati Tuhan manarima damai sajahtra melai bumi.” 15Katika kawan malaikat utusan Tuhan haluli ka surga, kawan pangembala bapander ije sama je beken: “Ayu itah tulak ka kota Betlehem wayahtuh kia tuntang nampayah Jurusalamat je Allah masanan dengan itah.” 16Maka ewen uras palus tulak ka kota Betlehem tuntang manggau sampai ewen manyundau Maria tuntang Yusuf tuntang nampayah tabela je tampenter melai huang kotak panginan metu. 17Katika kawan pangembala nampayah tabela te, ewen masanan peteh je inyampai malaikat utusan Tuhan dengan ewen tentang tabela te dengan uras uluh. 18Uras uluh je mahining kabar bara kawan pangembala te tarewen. 19Amun Maria maina uras je jadi terjadi huang atei ah tuntang tarus mamikirkan ah. 20Katika kawan gembala haluli ka tana, ewen puna mamuji Tuhan. Awi uras je ewen hining tuntang payah sama kilau je isanan malaikat utusan Tuhan dengan ewen.
Uluh Bakas Yesus Manenga Iye Dengan Tuhan Melai Bait Suci
21Metuh andau kahanya' limbas tabela te lahir, ewen manyunat ah sasuai hukum Tuhan, tuntang uluh bakas ah Yusuf tuntang Maria manenga-Ah ara Yesus. Malaikat utusan Tuhan jadi manyuhu Maria akan manenga ara jituh dengan tabela ah sahindai iye batihi.
22Katika sampai wayah ah Maria tuntang Yusuf tulak ka Bait Suci melai kota Yerusalem akan manyucikan biti sasuai Hukum Musa, maka ewenpun maimbit serta tabelan Yesus akan ipersembahkan akan mangabdi dengan Tuhan. 23Awi tege tatulis huang hukum Musa: “Satiap anak kasulak hatue, harus ikuduskan akan Tuhan.” 24Ewen kia tulak akan manenga kurban sasuai dengan narai je inyuhu awi Hukum Musa. Imander: Kurbankan due kungan burung takukur atau due kungan anak burung merpati.
25Metuh waktu te tege ije uluh hatue melai kota Yerusalem baaran Simeon. Iye uluh bujur tuntang satia dengan Tuhan. Iye metuh manunggu uluh je akan mahibur bangsa Israel. Roh Kudus mampahayak iye. 26Roh Kudus jadi masanan denga ah hindai ah awi sahindai iye matei, iye akan nampayah Masias je ijanjikan Allah akan iutus. 27Metuh andau te Roh Tuhan maimbit Simeon ka halaman Bait Allah, katika Maria tuntang Yusuf maimbit tabelan Yesus ka kanih akan mampersembahkan-Ah dengan Tuhan kilau je inyuhu awi hukum Tuhan. 28Simeon nampayah tabelan Yesus tuntang mangendong-Ah. Limbaste iye mangucap sukur dengan Allah tuntang bapader: 29“Tuhan, aku yelah hamba-Mu, biarkan ih aku matei dengan damai wayahtuh. Awi Ikau jadi manguan narai je jadi Ikau janjikan dengangku. 30Mataku jadi nampayah Jurusalamat je Ikau utus akan manyalamatkan kalunen. 31Ikau jadi manyadiakan ah akan ipayah awi uras uluh. 32Iye akan manjadi cahaya je mamparahan Allah dengan kawan uluh beken Yahudi, tuntang iye akan maimbit kahormatan bagi kawan uluh Israel, je yelah tempum-Mu.”
33Yusuf tuntang Maria tarewen dengan narai je ipander Simeon tentang tabelan Yesus. 34Limbas te, Simeon mamberkati kadue uluh bakas-Ah, lalu iye bapander dengan indu-Ah, Maria: “Allah jadi mamilih anak jituh akan mambinasakan are uluh tuntang manyalamatkan are uluh melai Israel. Iye akan manjadi tanda bara Allah, tatapi are uluh akan manantang-Ah. 35Akibat ah, iye akan mangungkapkan pikiran are uluh. Tuntang ikau Maria akan puna baduka.”
36Metuh andau te, tege kia ije uluh nabi bawi baaran Hana. Bapa ah baaran Phanuel je baasal bara suku Asyer. Hana jadi puna bakas. Iye harun kawin salama uju nyelu. 37Limbaste iye manjadi balu tuntang wayahtuh iye baumur hanya' puluh epat nyelu. Iye mampalepah sabagian hai' waktu ah melai palantaran Bait Allah, tuntang manyembah Allah dengan dia' kuman salama pire-pire waktu tuntang badoa. 38Katika uluh bakas Yesus masih tege melai Bait Allah, Hana manguang ewen tuntang nampara mangucap sukur dengan Allah. Iye nampara bapander tentang tabelan Yesus dengan uras uluh je manantikan Kristus akan dumah tuntang manyalamatkan kawan uluh kota Yerusalem.
39Limbas Yusuf tuntang Maria salesai manguan sagala kaije je inyuhu awi Pengajaran Hukum Musa, ewen haluli ka kota asal ewen, kota Nazaret, melai daerah Galilea. 40Tabelan Yesus manjadi dewasa tuntang Iye manjadi kuat sacara fisik. Iye manjadi puna bijaksana tuntang Allah mamberkati-Ah.
Yesus Metuh Umur Due Balas Nyelu Huang Bait Allah
41Satiap nyelu uluh bakas Yesus tulak ka kota Yerusalem akan marayakan andau paskah hayak are uluh Yahudi beken ah. 42Jadi, katika Yesus baumur due balas nyelu, Iye tuntang uluh bakas-Ah tulak ka festival melai kota Yerusalem kilau je biasa ewen nguan. 43Katika perayaan berakhir, uluh bakas Yesus, nampara buli ka huma. Ewen dia' manyadari awi Yesus jadi balihi melai kota Yerusalem te kabuat. 44Uluh bakas ah mangira awi Iye hayak kawan kawal je metuh batulakkan dengan ewen. Jadi, ewen mananjung salama ije andau, tuntang metuh akhir andau te ewen nampara manggau-Ah melai antara kaluarga tuntang kawan kawal-Ah. 45Katika ewen dia' manyundaukan-Ah, ewen haluli ka kota Yerusalem akan manggaukan-Ah melai kanih. 46Metuh andau katelu, ewen manyundau Yesus melai halaman Bait Allah. Iye metuh munduk melai kanih melai antara pire-pire pangajar hukum Musa. Iye mahining narai je ewen ajarkan tuntang kia mangajukan paisek-paisek dengan ewen. 47Uras uluh je mahining Yesus heran akan kacerdasan-Ah tuntang panumbah-Ah hunjun paisek-paisek ewen. 48Katika uluh bakas-Ah manyundaukan-Ah melai kanih, ewen puna tarewen. Indu-Ah bapander: “Anak-Ku, Ikau saharus ah dia' manguan hal jituh dengan ikei! Bapa-Mu tuntang aku puna khawatir, tuntang ikei jadi manggau-Mu.” 49Limbaste Yesus manumbah uluh bakas-Ah: “Ikau dia' perlu mangau Aku. Ikau saharus ah tawan awi Aku pasti tege melai huma Bapa-Ku.” 50Amun uluh bakas-Ah dia' mangerti arti bara narai je Yesus mander dengan ewen. 51Limbas te, Yesus haluli hayak uluh bakas-Ah ka kota Nazaret tuntang tarus mantaati ewen. Indu-Ah, Maria, halajur mangingat uras hal jituh tuntang rancak mamikirkan uras je jadi terjadi huang atei ah.
52Katika Yesus batambah dewasa sacara fisik, Iye manjadi labih bijaksana. Iye ikasihi awi Allah tuntang irajin awi kalunen.
Currently Selected:
Lukas 2: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
