Lukas 23
23
Yesus Melai Taharep Pilatus
(Mat. 27:1-2,11-14; Mrk. 15:1-5; Yoh. 18:28-38)
1Limbaste uras pamimpin bangsa Yahudi mendeng tuntang maimbit Yesus ka taharep Pilatus. 2Limbaste ewen nampara manuduh Yesus dengan bapander: “Ikei nampayah Uluh jituh mangasut rakyat ikei tuntang mangahana ikei akan mambayar pajak dengan Kaisar, serta mamander ah awi Iye yelah Masias, iye ije uluh Raja.” 3Pilatus baisek dengan Yesus: “Naraikah Ikau Raja uluh Yahudi?” Yesus manumbah: “Bujur kilau je ikau mander.” 4Limbaste, Pilatus bapander dengan kawan-imam tambakas tuntang uluh are: “Aku dia' manyundau kasalan dengan Uluh jituh.” 5Tatapi ewen samakin kuat manuduh, tuntang pander ah: “Iye mampangaruhi masyarakat dengan ajaran-Ah melai uras wilayah Yudea, Iye nampara melai daerah Galilea tuntang jadi sampai ka hetuh.” 6Katika Pilatus mahining kilau te iye maisek ah, naraikah Yesus uluh Galilea. 7Tuntang katika iye tawan, awi Yesus uluh bara daerah kakuasaan Herodes, iye mangirim Yesus manaharep Herodes, je metuh waktu te tege kia melai kota Yerusalem.
Yesus Melai Taharep Herodes
8Katika Herodes nampayah Yesus, iye puna hanjak. Awi jadi tahi iye handak nampayah-Ah, awi rancak mahining tentang Iye, Herodes handak nampayah kilenampi Yesus manguan mujizat. 9Lalu, Herodes manenga are paisek dengan Yesus, tatapi Yesus dia' manenga jawaban naraipun denga ah. 10Kawan-imam tambakas tuntang kawan pangajar hukum Musa je mendeng melai hete tuntang manenga tuduhan-tuduhan je hai' taharep Yesus. 11Tuntang nampara ih Herodes tuntang pasukan tantara ah maolok-olok Yesus, iye mahapan jubah raja denga-Ah, lalu mangirim Yesus haluli dengan Pilatus. 12Tuntang metuh andau te kia hakawal ih Herodes dengan Pilatus, sahindai te ewen bamusuhan.
Yesus Haluli Ka Taharep Pilatus
(Mat. 27:15-26; Mrk. 15:6-15; Yoh. 18:38—19:16)
13Lalu Pilatus mangumpul kawan-imam tambakas tuntang kawan-pamimpin serta masyarakat, 14Limbaste, iye bapander dengan ewen: “Ikau maimbit Uluh jituh ka taharepku sabagai ije uluh je manyasat masyarakat. Ikau payah kabuat awi aku jadi manyiksa-Ah, tuntang bara kasalan-kasalan je ikau tuduhkan denga-Ah jatun tege je kunyundau denga-Ah. 15Tuntang Herodes kia dia', awi iye mangirim Yesus te haluli dengan ikei. Sabujur ah dia' tege ije pun je inguan-Ah je sabanding dengan hukuman matei. 16Jadi aku akan mahajar Iye, lalu malapaskan-Ah.” 17Awi iye wajib malapas ije uluh akan ewen huang andau parayaan te. 18Akan tatapi, uluh are te mangariak bahayak-hayak: “Patei Uluh te! Lapaskan ih Barabas akan ikei!” 19Barabas je iname ka huang panjara awi ije pambarontakkan je jadi terjadi huang kota tuntang awi papatei. 20Sinde hindai Pilatus bapander dengan suara nyaring akan ewen, awi iye handak malapas Yesus. 21Tatapi ewen mangariak: “Salibkan ih Iye! Salibkan ih Iye!” 22Akan katelu kali ah Pilatus baisek dengan ewen: “Buhen? Kajahatan narai je jadi Uluh jituh nguan? Iye dia' sala. Aku dia' manyundau kasala naraipun denga-Ah je layak mandinu hukuman matei. Awi te, aku akan mahajar Iye lalu malapaskan-Ah.” 23Tatapi ewen tarus mangariak awi Yesus harus isalib. Tuntang akhir ah kariak ewen bahasil. 24Lalu Pilatus mamutuskan, mangat tuntutan ewen ingabul. 25Iye malapaskan Barabas, je tege huang panjara awi manampa pambarontakkan tuntang mampatei. Akan tatapi, manyarah Yesus akan ewen mangat ewen manguan naraipun je ewen handak.
Yesus Iimbit Akan Isalib
26Katika kawan tantara maimbit Yesus tulak, ewen kia manahan ije uluh, yete Simon bara Kirene je harun dumah bara kota Kirene. Kawan tantara maandakkan salib Yesus melai hunjun bahu ah tuntang manyuhu maetun salib te tuntang mananjung manuntut melai likut Yesus. 27Kakarei uluh manuntut Iye, melai antara ah are bawi je manangis tuntang mamasi Iye. 28Yesus bapaling dengan ewen tuntang bapander: “Hei kawan-bawi bara kota Yerusalem, ela ih ikau manangisi Aku, tatapi nangisi ih bitimu kabuat tuntang kawan-anakmu! 29Hining, akan sampai wayah ah kawan-uluh akan bapander: Bahanjak ih bawi tamanang tuntang je rahim ah dia' puji manak, tuntang je tusu ah dia' puji manusui. 30Metuh wayah te, ewen akan balaku mangat gunung-gunung tuntang bukit-bukit: Runtuh, kubur ih ikei. 31Amun uluh manguan hal-hal buruk jituh dengang-Ku, je kilau batang bahijau, narai je akan terjadi dengan kawan uluh badosa je kilau batang je keang?”
32Katika kawan prajurit maimbit Yesus, ewen kia maimbit due uluh beken akan ipatei metuh wayah je sama. Kadue uluh te yelah panjahat.
Yesus Isalib
(Mat. 27:33-44; Mrk. 15:22-32; Yoh. 19:17-24)
33Katika ewen sampai melai ije eka je baaran “Bukit Tangkorak.” Kawan tantara manyalibkan Yesus bahayak kadue panjahat te, ije uluh melai silan gantau-Ah tuntang ije uluh melai silan sambil-Ah. 34Limbaste Yesus bapander: “Ui Bapa, ampun ih ewen, awi ewen dia' tawan narai je ewen nguan.” Lalu, kawan tantara mangundi akan mambagi-bagi pakayan Yesus melai antara ewen. 35Uluh are mendeng melai hete tuntang nampayah uras ah. Kawan-pamimpin mahina Iye, pander ah: “Uluh beken Iye salamatkan, biar ih wayah jituh Iye manyalamat biti-Ah kabuat, amun Iye yelah Masias, uluh je ipilih Allah.” 36Kawan-prajurit maolok-olokkan Iye, ewen manjuluk aggur masem denga-Ah. 37Tuntang bapander: “Amun Ikau yelah raja uluh Yahudi, salamatkan ih bitim-Mu.” 38Tege kia tatulis melai hujun takuluk-Ah: Jituh ih raja uluh Yahudi.
39Sala ije bara panjahat je tasalib melai kanih mahina Yesus, pander ah: “Bekenkah ikau yalah Masias? Salamatkan ih bitim-Mu tuntang ikei!” 40Tatapi je ije uluh managur Iye, pander ah: “Dia' kah ikau mikeh dengan Allah, sedangkan ikau manarima hukuman je sama? 41Itah memang pantas ihukum, awi itah manarima balasan je sabanding dengan perbuatan itah, tatapi uluh jituh dia' manguan ije je sala.” 42Lalu iye bapander: “Yesus, ingat ih akan aku, apabila Ikau dumah huang Karajaan-Mu.” 43Limbaste, Yesus bapander denga ah: “Aku basanan sabujur ah dengammu, andau jituh kia, ikau akan bahayak Aku melai huang surga.”
Yesus Matei
(Mat. 27:45-46; Mrk. 15:33-41; Yoh. 19:28-30)
44Katika te andau jadi kira-kira jam due balas, lalu kaput manutup uras daerah te sampai jam telu, 45Awi matan andau dia' basinar tuntang tenda je tagantung melai Bait Allah salenga-lenga barabit manjadi due. 46Lalu, Yesus mangariak: “Ui Bapa, ka huang lengem-Mu Kunyarah tahaseng-Ku.” Limbas pander te, Yesus manarik tahaseng-Ah je tarakhir. 47Katika tambakas pasukan tantara romawi nampayah narai je terjadi, iye mamuliakan Allah, pander ah: “Sungguh, Uluh jituh yelah Uluh bujur!” 48Katika uluh are je dumah bahayak-hayak akan nampayah paristiwa te manyaksikan narai je jadi terjadi, ewen buli dengan panyesalan. 49Uras je kenal Yesus tuntang pire-pire bawi je jadi manuntut Yesus bara daerah Galilea mendeng kejau-kejau tuntang manyaksikan kajadian te.
Yesus Ingubur
(Mat. 27:57-61; Mrk. 15:42-47; Yoh. 19:38-42)
50Tege ije uluh hatue baaran Yusuf, anggota Dewan panasehat kawan-uluh bara suku Yahudi, ije uluh je bahalap tuntang bujur. 51Iye kabuat dia' manyatuju kaputusan tuntang tindakan kawan pimpinan agama uluh Yahudi je balaku manyalibkan Yesus. Yusuf baasal bara kota Arimatea, ije kota melai wilayah Yudea. Iye kia ije uluh je mananti-nantikan Karajaan Allah. 52Iye tulak mangguang Pilatus tuntang balaku ijin akan mangurus hantun Yesus. 53Lalu, iye mapuhun hantun Yesus bara kayu salib tuntang mambungkus-Ah dengan kain linen. Limbaste, iye mampenter hantun Yesus huang ije kubur je imahat melai bukit batu. Dia' puji tege hantun je inamekan ka hete. 54Uras jituh terjadi katika andau persadiaan, yete andau Sabat.
55Kawan-bawi bara daerah Galilea manutut Yusuf serta nampayah iye maimbit tuntang mapenter hantun Yesus melai huang kubur. 56aTuntang sahindai buli, ewen manyadia rampah-rampah tuntang minyak harum.
Kahingkat Yesus
(Mat. 28:1-10; Mrk. 16:1-8; Yoh. 20:1-10)
56bTuntang akan andau Sabat ewen baistrahat manumun Hukum Pengajaran Musa.
Currently Selected:
Lukas 23: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
