Lukas 24
24
1Metuh andau kasulak minggu te, andau masih puna susung, kawan-bawi te tulak ka kubur Yesus sambil maimbit rampah-rampah pangawet je jadi ewen nyadia. 2Katika ewen sampai ka kanih, ewen nampayah awi batu hai' je iandak melai baun tunggang kubur jadi taguling. 3Tuntang limbas tame ewen dia' mayundau hantun Yesus. 4Samentara ewen mendeng taheran-heran awi hal te, salenga-lenga tege due uluh mendeng tukep ewen mahapan pakayan je mangkilau-kilauan. 5Ewen puna mikeh tuntang manunduk kuluk ka arah petak, tatapi kadue uluh te bapander dengan ewen: “Buhen ketun manggau Iye je jadi belum, melai antara uluh matei? 6Iye dia' tege melai hetuh, Iye jadi hingkat. Ingat tentang narai je jadi Iye mander degammu katika masih melai daerah Galilea. 7Iye bapander awi Iye, Anak Kalunen je Allah utus akan inyarah ka lengen kawan-uluh badosa tuntang ewen akan manyalibkan-Ah, tuntang akan hingkat metuh andau je katelu.” 8Maka taingat ih ewen dengan panderan Yesus te. 9Tuntang limbas ewen haluli bara kubur, ewen mangesah uras ah te dengan kasabalas murid tuntang dengan pahari je beken 10Kawan-bawi te yete Maria bara Magdalena, tuntang Yohana, tuntang Maria indu Yakobus. Tuntang kawan-bawi beken kia je bahayak-hayak dengan ewen manyampai dengan kawan-murid-Ah. 11Tatapi kawan murid dia' manganggap panderan kawan-bawi te dia' mungkin tuntang ewen dia' percaya dengan kawan-bawi te.
12Sungguhpun kilau te Petrus misik, limbaste capat-capat tulak ka kubur te. Katika iye nampayah ka huang kubur, je tege baya kain kapan bewei. Lalu iye tulak, tuntang iye baisek huang atei ah narai je kira ah jadi terjadi.
Yesus Mamparahan Biti Dengan Due Murid-Ah Melai Jalan Ka Lewu Emaus
13Metuh andau te kia, due uluh bara kawan murid Yesus tulak ije lewu baaran Emaus je jarak ah kira-kira sebalas kilo meter bara kota Yerusalem. 14Tuntang ewen bapander-pander tentang uras kaije je jadi terjadi. 15Katika ewen metuh mambahas tentang paristiwa papatei Yesus, Yesus kabuat dumah manukep ewen palus mananjung bahayak-hayak ewen. 16Tatapi tege kaije je manghalangi mata ewen, sahingga ewen dia' tau mangasene Iye. 17Yesus bapander dengan ewen: “Naraikah je ikau pander samentara ikau mananjung?” Maka tende ih ewen dengan bau sedih. 18Sala ije uluh bara ewen je baaran Kleopas bapander denga-Ah: “Naraikah Ikau ije-ije ah uluh asing melai kota Yerusalem je dia' mangatawan tentang narai je terjadi melai kanih harun-harun jituh?” 19Pander-Ah dengan ewen: “Naraikah te?” Tumbah ewen: “Narai je terjadi dengan Yesus uluh bara kota Nazaret. Iye yete ije uluh nabi je bakuasa huang gawi ah tuntang panderan melai taharep Allah tuntang melai taherep uras bangsa ikei.” 20Tatapi Kawan-imam tambakas tuntang kawan-pamimpin ikei manyarah Iye akan ihukum matei tuntang ewen jadi manyalibkan-Ah. 21Padahal ikei huran maharapkan, awi Iye ih je dumah akan malapas bangsa Israel. Tatapi jadi mahalau telu andau, metuh uras te terjadi. 22Tatapi pire-pire bawi bara kalangan ikei jadi manarewen ikei, susung sama sinde ewen jadi tulak ka kubur, 23ewen dia' manyundau hantun Yesus. Lalu, ewen haluli tuntang mamander awi ewen jadi nampayah malaikat Utusan Tuhan, je mamander awi Yesus jadi hingkat. 24Limbaste, pire-pire bara ikei tulak ka kubur tuntang mandinu kilau je kawan-bawi te mander. Akan tatapi, ewen dia' nampayah Yesus. 25Limbaste Yesus bapander dengan ewen: “Buhen ketun kilau te sulit akan mampercayai uras kaije je jadi kawan nabi mander. 26Bekenkah Masias harus mandarita uras ah te akan tame ka huang kamuliaan-Ah?” 27Lalu Iye manjelaskan dengan ewen narai je tatulis tentang Iye huang uras gulungan Kitab Suci, nampara bara gulungan Kitab-Kitab hukum Musa tuntang uras gulungan Kitab kawan-nabi.
28Katika ewen manukep lewu je ewen nuju, lalu Yesus manampa saolah-olah handak manarus pananjungan-Ah. 29Tatapi ewen puna mandasak-Ah, pander ah: “Balihi ih bahayak-hayak dengan ikei, awi andau jadi handak hamalem tuntang matan andau tukep leteng.” Lalu tame ih Iye akan balihi bahayak-hayak dengan ewen. 30Waktu Iye munduk dengan ewen, Iye manduan roti, mangucap sukur, lalu mamulek-mulek ah tuntang manenga ah akan ewen. 31Katika te tabuka ih matan ewen tuntang ewenpun mangasene Iye, tatapi Iye nihau bara bentuk-bentuk ewen. 32Pander ewen ije uluh dengan je beken: “Dia'kah atei itah mangkeme hanjak, katika Yesus bapander dengan itah melai bentuk jalan tuntang katika Yesus manjelaskan makna bara gulungan Kitab Suci dengan itah?”
33Metuh wayah te kia, ewen mendeng tuntang haluli ka kota Yerusalem. Ewen manyundau kasabalas murid tuntang kawan-uluh je metuh bakumpul bahayak-hayak. 34Pander ewen: “Sabujur ah Tuhan jadi hingkat tuntang jadi mamparahan biti-Ah akan Simon.” 35Lalu kadue uluh te pun mamander narai je terjadi melai bentuk jalan tuntang kilenampi ewen mangasene Yesus metuh waktu Yesus mamulek-mulek roti.
Yesus Mamparahan Biti Dengan Uras Murid
(Yoh. 20:19-23)
36Katika kadue uluh te masih mamander peristiwa te, Yesus salenga-lenga mendeng melai bentuk-bentuk ewen tuntang bapander dengan ewen: “Damai bahayakmu.” 37Ewen tarewen tuntang mikeh tuntang manyangka awi ewen nampayah taluh. 38Akan tatapi Iye bapander dengan ewen: “Buhen ikau tarewen tuntang narai awi ah lembut karagu-raguan melai huang atei ikau? 39Payah ih lenge-Ku, tuntang paing-Ku, Aku kabuat ih jituh, manjapai ih Aku tuntang payah ih, awi taluh dia' tege daging tuntang tulang ah, kilau je ikau payah tege dengang-Ku.” 40Sambil bapander hindai, Iye manampayah lenge tuntang pai-Ah dengan ewen. 41Samentara ewen masih hindai percaya awi bahanjak ah tuntang taheran-heran, Yesus baisek dengan ewen: “Tegekah panginan melai hetuh?” 42Lalu ewen manenga denga-Ah ije tetek lauk goreng. 43Iye manduan ah tuntang makuman ah melai taharep matan ewen.
44Limbaste Yesus bapander dengan ewen: “Jituh ih panderan je Aku pander dengammu katika Aku masih bahayakmu. uras kaije je tatulis tentang Aku huang Pangajaran Hukum Musa, gulungan kitab kawan nabi, tuntang gulungan kitab Mazmur harus talaksana.” 45Lalu Iye mambuka pikiran ewen, sahingga ewen mangerti arti bara gulungan Kitab Suci. 46Pander-Ah akan ewen: “Tege tatulis, Masias harus mandarita tuntang hingkat bara antara uluh matei waktu andau je katelu. 47Tuntang, pertobatan akan pengampunan dosa akan Iye nyatakan huang aran-Ah akan uras bangsa, nampara bara kota Yerusalem. 48Ikau yelah saksi bara uras ah jituh. 49Katawan ih, Aku mangirimkan janji Bapa-Ku dengammu. Akan tatapi, balihi ih eka kota Yerusalem sampai Tuhan Allah mapalengkapi ikau dengan kuasa bara surga.”
Yesus Haluli Ka Surga
50Limbaste, Yesus maimbit kawan murid-Ah ka luar kota sampai melai lewu Betania, lalu Iye mangangkat lenge-Ah tuntang mamberkati ewen. 51Tuntang katika Iye metuh mamberkati ewen, Iye bapisah bara ewen tuntang taangkat ka surga. 52Lalu, ewen manyembah-Ah tuntang haluli ka kota Yerusalem dengan atei je puna hanjak. 53Ewen tabiasa tege melai huang Bait Allah tuntang mamuliakan Allah.
Currently Selected:
Lukas 24: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
