Lukas 22
22
Yudas Basakongkol Dengan Kawan Paminpin Yahudi Akan Mahianati Yesus
(Mat. 26:1-5; Mrk. 14:1-2; Yoh. 11:45-53)
1Wayah te handak sampai waktu ah bagi kawan uluh Yahudi akan marayakan pesta Roti Dia' Baragi je kia inyewut Paskah. 2Kawan-imam tambakas tuntang kawan pangajar hukum Musa bausaha manggau cara akan mampatei Yesus sacara benyem-benyem awi ewen mikeh dengan kawan uluh je mahining panderan Yesus.
Yudas Mahianati Yesus
(Mat. 26:14-16; Mrk. 14:10-11)
3Limbaste Setan manguasai Yudas, je kia inyewut Iskariot, je marupakan sala ije bara due balas murid Yesus. 4Yudas tulak akan bapander dengan kawan-imam tambakas tuntang kawan panjaga Bait Allah tentang kilenampi iye tau mandohop ewen manekap Yesus. 5Kawan imam tambakas tuntang pangawal Bait Allah puna hanjak tuntang satuju akan manenga Yudas sajumlah duit awi jadi mandohop ewen manekap Yesus. 6Yudas pun satuju dengan kasapakatan te tuntang jatun ingatawan kawan uluh iye nampara manggau kasampatan je pas akan manyarah Yesus dengan kawan imam tambakas.
Yesus Kuman Panginan Terakhir-Ah Hayak Kawan-Murid-Ah
(Mat. 26:17-19; Mrk. 14:12-16)
7Sampai ih wayah ah akan marayakan perjamuan Paskah tuntang sampai wayah ah akan mangurbankan domba Paskah. 8Lalu Yesus manyuhu Petrus dengan Yohanes, pander-Ah: “Tulak ih manyadiakan perjamuan Paskah bagi itah mangat itah kuman.” 9Pander ewen denga-Ah: “Melai kueh Ikau handak ikei manyadia ah?” 10Tumbah-Ah: “Amun ikau tame ka huang kota, ikau akan manyundau dengan ije uluh je maimbit baluh asip basuang danum. Nuntut ih iye ka huang huma je iname ah, 11Tuntang mander ih dengan uluh huma te: Guru baisek dengammu: Melai kuehkah ruangan eka Aku bahayak-hayak dengan kawan-murid-Ku akan kuman panginan perjamuan Paskah? 12Lalu uluh te akan manunjukkan ah dengammu eka ruangan je hai' je jadi lengkap, ka hete ikau harus manyadia ah.” 13Maka tulak ih ewen tuntang ewen mandinu uras kilau je imander Yesus dengan ewen. Lalu ewen manyadiakan panginan akan perjamuan Paskah melai kanih.
Yesus Kuman panginan Paskah Bahayak-Hayak Murid-Ah
(Mat. 26:20-29; Mrk. 14:17-25; Yoh. 13:21-30)
14Katika sampai wayah ah, Yesus munduk kuman bahayak-hayak dengan kawan-murid-Ah. 15Yesus bapander dengan ewen: “Aku handak sinde kuman perjamuan Paskah jituh denganmu sahindai Aku mandarita tuntang matei. 16Awi, Aku bapander dengammu, Aku dia' akan makuman ah hindai sampai hal jituh igenapi huang Karajaan Allah.” 17Lalu, Yesus manduan cangkir basuang anggur tuntang mangucap sukur, limbaste Iye bapander dengan kawan murid-Ah: “Duan ih jituh tuntang bagi ih uras ah. 18Awi Aku bapander dengammu, nampara wayahtuh Aku dia' akan mihup anggur sampai Karajaan Allah akan dumah.” 19Limbaste, Yesus manduan roti tuntang mangucap sukur, Iye mamulek-mulek roti te tuntang manenga ah dengan ewen sambil bapander: “Roti jituh yelah biting-Ku je Kunenga dengammu; nguan ih jituh sabagai ingatan akan Aku.” 20Kilau te kia, Yesus manduan cangkir basuang anggur tuntang bapander: “Cangkir basuang anggur jituh yelah perjanjian taheta awi daha-Ku, Aku akan mangorbankan akan kapentinganmu.
21Tatapi hining! uluh je mahianati Aku, tege bahayak dengan-Ku melai meja jituh. 22awi Anak Kalunen je Allah utus memang akan matei kilau je jadi inetap, akan tatapi, alangkah buruk ah uluh je manyerah Aku.” 23Lalu nampara ih ewen baisek ije sama je beken, eweh melai antara ewen je akan babuat kalute.
Yesus Mangajarkan Hindai Tentang Manjadi Randah Atei
(Mat. 26:31-35; Mrk. 14:27-31; Yoh. 13:36-38)
24Limbaste, terjadi kalahian melai antara kawan-murid Yesus, ewehkah je paling hai' melai antara ewen. 25Yesus bapander dengan ewen: “Kawan-raja bangsa-bangsa mamenrintah rakyat ewen tuntang kawan-uluh je manjalankan kuasa hunjun ewen tuntang ewen handak inyewut palindung-palindung. 26Tatapi ikau dia ih kalute, eweh je pangkahai' melai antara ikau nguan ih manjadi sabagai je paling tabela tuntang maatur kilau uluh palayan. 27Awi ewehkah je labih hai', je munduk kuman, atau je malayani? Bekenkah iye je munduk kuman? Tatapi Aku tege melai bentuk-bentuk ikau sabagai palayan. 28Ikau ih je tatap balihi bahayak-hayak dengan Aku huang sagala cobaan je Aku keme. 29Tuntang Aku mamander hal-hal Karajaan dengammu, sama kilau Bapa-Ku mamander dengang-Ku. 30Awi ikau akan kuman mihup wayah dengan Aku melai huang Karajaan-Ku tuntang ikau akan munduk melai hunjun takhta akan mahukum kadue balas suku Israel.”
31Limbaste Yesus bapander dengan Simon Petrus: “Hining ih Aku! Setan jadi manuntut akan mangiap ikau kilau parei, 32tatapi Aku jadi badoa dengammu, mangat imanmu ela manjatu. Tuntang ikau, amun ikau jadi batobat tuntang hahuli dengang-Ku, kuatkan ih kawan paharimmu.” 33Tumbah Petrus: “Tuhan, aku basadia tame ka panjara tuntang matei bahayak-hayak dengan Ikau!” 34Tatapi Yesus bapander: “Aku bapander dengammu, Petrus, sahindai manuk manandu susung jewu, ikau akan mamander telu kali awi ikau dia' mangasene Aku.”
35Lalu Yesus bapander dengan ewen: “Katika Aku mautus ikau dengan dia' maimbit dompet, bekal tuntang sapatu tambahan, tegekah ikau kakurangan narai-narai?” 36Tumbah ewen: “Ije pun dia'.” Pander-Ah dengan ewen: “Tatapi wayahtuh, eweh je tege dompet, ayu ih iye maimbit ah, kilau te kia je tege bekal. Tuntang ewen je dia' tege ah ayu ih iye manjual baju ah tuntang mamili pisau. 37Awi Aku bapander dengan ikau, awi je tege tatulis huang ayat gulungan Kitab Suci jituh harus igenapi dengang-Ku: Iye akan tahitung bahayak kawan-uluh badosa. Awi je tatulis tentang Aku metuh terjadi wayahtuh.” 38Lalu, ewen bapander: “Payah ih Tuhan, melai hetuh tege due pisau.” Tuntang, Yesus bapander: “Jite cukup.”
Yesus Badoa Dengan Bapa-Ah Melai Bukit Zaitun
(Mat. 26:36-46; Mrk. 14:32-42)
39Limbaste, Yesus balua tuntang tulak ka Bukit Zaitun kilau je biasa Iye ka hete; tuntang kawan-murid-Ah kia tulak manuntut Iye. 40Katika Yesus sampai melai eka te, Iye bapander dengan ewen “Badoa ih mangat ikau ela tame huang pancobaan.” 41Limbaste, Yesus mangejau biti bara ewen kira-kira sakejau batu kana jakah, lalu batunduk tuntang badoa. 42“Ya Bapa-Ku, amun Ikau handak, duan ih cangkir pandaritaan jituh bara-Ku. Akan tatapi, ela ih kahandak-Ku je terjadi, tatapi kahandak-Mu.” 43Limbas te, ije malaikat utusan Tuhan bara surga maparahan biti denga-Ah tuntang manguatkan-Ah. 44Tuntang, huang panderan-Ah, Iye badoa labih bujur-bujur hindai; hebes-Ah manjadi kilau hantisan daha je mahantis ka petak. 45Katika Yesus salesai badoa, Iye tulak dengan kawan-murid-Ah tuntang nampayah ewen metuh tiruh awi ewen puna sedih. 46Yesus bapander dengan ewen: “Buhen ketun tiruh? Misik tuntang badoa ih mangat ketun ela tame huang pancobaan.”
Yesus Inekap
(Mat. 26:47-56; Mrk. 14:43-50; Yoh. 18:1-11)
47Katika Yesus masih bapander, sarombongan uluh dumah, tuntang iye je inyewut Yudas, ije bara due balas murid te, mamimpin ewen. Lalu, Yudas manukep Yesus akan manyium-Ah. 48Akan tatapi, Yesus bapander denga-ah: “Yudas, buhen ikau manyerahkan Anak Kalunen je Allah utus dengan ciuman?” 49Katika kawan-murid-Ah je mendeng melai kaliling-Ah nampayah narai je akan terjadi, ewen bapander: “Tuhan, haruskah ikei manyarang ewen dengan pisau?” 50Limbaste, tege ije bara murid te manyarang palayan imam hai' palus manejep pinding silan gantau ah. 51Akan tatapi Yesus bapander: “Jadi, cukup!” Lalu, Yesus maimbing palayan te tuntang mapangkeleh ah.
52Limbaste, Yesus bapander dengan kawan-imam tambakas, tambakas pangawal Bait Allah, tuntang kawan-bakas je dumah akan manekap-Ah: “Buhen ikau uras dumah dengan pisau tuntang gagada. 53Katika Aku bahayakmu melai Bait Allah satiap andau, ikau dia' manekap Aku. Amun, jituh ih wayah ah akammu tuntang kuasa je jahat metuh bagawi.”
Petrus Dia' Mangasene Yesus
(Mat. 26:57-58,69-75; Mrk. 14:53-54,66-72; Yoh. 18:12-18,25-27)
54Limbas manekap-Ah, kawan-uluh te pun mampahayak tuntang maimbit Yesus ka huma Imam hai'. Akan tatapi, Petrus manuntut ewen bara kejau. 55Limbaste, kawan-uluh te mampelum apui melai bentuk-bentuk halaman tuntang munduk bahayak-hayak, Petrus kia munduk melai antara ewen. 56Amun, ije uluh palayan bawi je nampayah Petrus, lalu bapander: “Uluh jituh kia bahayak denga-Ah.” 57Amun, Petrus manyangkal, pander ah: “Uy bawi, aku dia' mangasene Iye.” 58Dia' tahi limbaste, ije uluh beken nampayah ah tuntang bapander: “Ikau kia tamasuk sala ije bara ewen!” Amun Petrus bapander: “Dia, aku beken sala ije bara ewen!” 59Kira-kira ije jam katahi ah, ije uluh je beken hindai bapander dengan yakin: “Pasti uluh jituh kia bahayak denga-Ah, awi iye kia uluh Galilea.” 60Akan tatapi, Petrus bapander: “Aku dia' tawan narai je ikau manderkan!” Wayah te kia, metuh Petrus masih bapander, manuk jagau manandu. 61Lalu, Yesus noleh tuntang nampayah Petrus. Petrus pun maingat akan panderan Yesus, awi Iye bapander denga ah “Sahindai manuk jagau manandu handau jituh, ikau jadi telu kali nyewut dia' kenal Aku.” 62Limbaste, Petrus balua tuntang manangis tuntang bujur-bujur sedih.
Yesus Melai Taharep Mahkamah Agama
(Mat. 26:63-68; Mrk. 14:60-65; Yoh. 18:19-24)
63Kawan-uluh je manahan Yesus nampara maolok-olok tuntang mamukul-Ah. 64Ewen manutup mata-Ah tuntang bapander: “Coba ih mander ewehkah je mamukul Ikau?” 65Ewen tarus mahina Yesus dengan babagai cara.
66Katika bentuk andau ah, kawan-bakas pamimpin Yahudi, kawan-imam tambakas, serta kawan pangajar hukum Musa bakumpul tuntang maimbit Yesus ka Mahkamah Agama. 67Ewen bapander dengan Yesus: “Ikau yelah Masias, mander ih dengan ikei.” Amun Yesus bapander dengan ewen: “Amun Aku bapander dengammu, ikau dia' akan percaya dengang-Ku. 68Tuntang, Amun Aku baisek, ikau dia' akan manumbah ah. 69Akan tatapi, nampara wayahtuh, Anak Kalunen je Allah utus akan munduk melai silan gantau Allah je Mahakuasa.” 70Ewen uras bapander: “Amun kalute, naraikah Ikau Anak Allah?” Yesus manumbah ewen: “Ikau ih je mamander awi Aku ih Anak Allah.” 71Limbaste, ewen bapander: “Kasaksian narai hindai je itah perlukan? itah jadi mahining ah bara paderan-Ah kabuat.”
Currently Selected:
Lukas 22: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
