Lukas 21
21
Persembahan Ije Uluh Balu Susah
(Mrk. 12:41-44)
1Katika Yesus tuntang kawan murid-Ah masih tege melai halaman Bait Allah, Yesus nampayah ka sakaliling tuntang nampayah kawan uluh tatau maname persembahan ewen melai kota persembahan Bait Allah. 2Limbaste Iye kia nampayah ije uluh balu susah dumah maname isut duit ka huang kotak persembahan. 3Yesus bapander: “Aku mamander je sasungguh ah dengammu awi balu susah jituh manenga labih are bara uras uluh beken te. 4Awi ewen manenga persembahan bara kalabihan ewen, tatapi balu te manenga persembahan ah bara kakurangan ah, yete uras je iye tempu akan pambelum.”
Bait Allah Akan Ihancurkan
(Mat. 24:1-2; Mrk. 13:1-2)
5Katika pire-pire murid-Ah mamander tentang Bait Allah ihiasi dengan batu-batu hai' tuntang dengan persembahan-persembahan amas tuntang banda-banda beken je jadi inenga uluh sabagai panenga dengan Allah, Yesus bapander: 6“Aku akan masanan dengammu kaije tentang hal-hal je ikau payah jituh. Akan dumah waktu ah satiap bangunan akan ihancurkan. Uras batu akan iruntuhkan.”
Kasulak Pandaritaan
(Mat. 24:3-14; Mrk. 13:3-13)
7Kawan murid baisek denga-Ah: “Guru, pea Bait Allah akan ihancurkan tuntang narai je mamparahan dengan itah awi hal te akan terjadi?” 8Yesus bapander: “Bahati-hati ih mangat ikau ela inyasat uluh. Awi are uluh akan dumah dengan manyamar sabagai uluh je maina kuasa hunjun-Ku. Ewen akan bapander: Aku ih Masias! tuntang Wayah ah dunia jituh akan barakhir jadi sampai. Ela percaya narai je ewen mander! 9Ela tarewen katika ikau mahining tentang perang tuntang karusuhan. Hal-hal kilau te pasti akan terjadi, tatapi perang te dia' baarti dunia akan barakhir metuh wayah te.”
10Limbaste Yesus bapander dengan ewen: “Kawan uluh bara ije bangsa akan manyarang kawan uluh bangsa beken. Raja-raja tuntang pasukan ah akan berperang malawan raja-raja beken tuntang pasukan ah. 11Melai babagai eka melai dunia, masa klauan je mangerikan akan dumah, tuntang panyakit-panyakit parah akan manyebar dengan capat ka are uluh. Uras jenis tanda mampikeh tuntang maherankan akan terjadi bara surga. 12Tatapi sahindai uras peristiwa te terjadi, kawan-uluh akan manekap tuntang manguanmu dengan kejam. Ewen akan manuduh pire-pire uluh melai antara ikau melai eka ibadah uluh Yahudi ikau akan ipanjara. Ikau akan iimbit ka taharep raja-raja tuntang kawan panguasa awi ikau yelah kawan murid-Ku. 13Katika hal te terjadi, ikau akan manempun kasempatan akan basaksi tentang Aku dengan ewen. 14Amun, ingat ih akan dia' khawatir tentang narai je akan ikau mander akan mayakinkan ewen awi ikau dia' basala sahindai ah. 15Aku akan manengamu hikmat akan mangatawan narai je harus ikau mander. Dia' ije uluh pun bara ewen je manuduh ikau akan tau manantangmu atau mamander awi ikau sala. 16Ketun akan inyarah awi uluh bakas ketun, kawan pahari, kaluarga, tuntang kawan kawal ketun dengan kawan musuh ketun tuntang sabagian bara ketun akan ipatei awi ewen. 17Tuntang ketun akan inolak awi uras uluh awi ketun yelah kawan murid-Ku. 18Tatapi Tuhan akan mahaga ikau bara bahaya je katatahi. 19Amun ikau batahan, huang masa-masa kilau te tampa malapas imanmu dengang-Ku, Allah akan manenga belum je katatahi.”
Kahancuran Kota Yerusalem
(Mat. 24:15-21; Mrk. 13:14-19)
20Limbaste Yesus malanjutkan panderan-Ah: “Tatapi katika ikau nampayah tentara musuh nampara mangapung kota Yerusalem, maka ikau akan tawan awi ewen akan mahancurkan kota te sapenuh ah sahingga dia' tege ije uluh pun je basisa melai kanih. 21Metuh waktu te, ikau je balihi melai wilayah Yudea harus hadari ka bukit tuntang basahukkan. Ikau je balihi melai kota Yerusalem harus malihi ah, tuntang ikau je tege melai luar kota ela ih tame melai huang kota. 22Ikau harus hadari awi te akan manjadi andau-andau panghukuman bara Tuhan. Hal jituh terjadi mangat uras hal je tatulis huang gulungan Kitab Suci tentang hal jituh manjadi kanyataan. 23Puna mampikeh ah metuh masa te bagi kawan bawian je metuh batihi tuntang kawan indu je maina tabela je masih kurik! Kasusahan hai' akan terjadi melai negeri jituh, tuntang Allah akan basingi taharep kawan uluh jituh. 24Tuntang are bara ewen akan matei huang pertempuran, tuntang are hindai je akan iimbit sabagai tawanan ka babagai bangsa melai bumi. Tuntang kota Yerusalem akan ikalahkan tuntang imimpin awi kawan uluh beken katurunan Yahudi sampai waktu je jadi irencanakan Allah bagi ewen akan mamerintah barakhir.”
Pandumah Haluli Anak Kalunen Je Allah Utus
(Mat. 24:29-35; Mrk. 13:24-31)
25Limbas te, tanda-tanda ajaib akan terjadi metuh matan andau, bulan, tuntang kawan bintang je mamparahan awi akhir dunia jituh jadi tukep. Melai bumi kawan bangsa akan puna galisah tuntang bingung awi tege suara bara galombang laut je hai'. 26Kawan uluh akan tujah awi mikeh saat ewen manunggu bancana mampikeh je akan terjadi melai dunia. Awi uras banda melai langit akan ipindahkan bara eka biasa ah. 27Metuh waktu te uras uluh melai kueh bewei akan nampayah Aku, Anak Kalunen je Allah utus. Aku akan dumah ka bumi ikalilingi awi awan-awan, manunjukkan kuasa je hai' tuntang kamuliaan je basinar. 28Katika peristiwa-peristiwa je mampikeh nampara terjadi, jadi ih bahanyi tuntang percaya biti. Awi hal-hal jituh mamparahan awi Tuhan akan palus mambebaskanmu bara panderitaan.
29Limbaste Yesus masanan ije kesah akan manjelaskan masa ka baun jituh. Iye bapander: “Balajar ih bara batang ara atau batang bua-bua beken ah. 30Saat dawen-dawen tumbu melai hunjun ah. Ikau akan tawan kabuat awi musim balasut jadi tukep. 31Dengan cara je hayak, katika ikau nampayah hal-hal je mampikeh jituh terjadi, katawan ih awi Karajaan Allah akan palus dumah. 32Aku bapander dengammu, sasungguh ah uras uluh je belum wayahtuh pasti dia' akan matei sahindai uras hal jituh terjadi. 33Bumi tuntang langit sinde andau akan hancur. Amun, pander-pander je Kupander pasti akan terjadi.
Halajur Basadia Akan Pandumah Yesus Haluli
34Tatapi buah-buah ih dengan cara belummu, ela manganan-nganan waktumu akan bahanjak-hanjak, babusau-busau, tuntang khawatir tentang masalah-masalah huang pambelummu. Amun dia', ikau dia' akan sadia akan pandumah-Ku haluli awi andau te akan dumah dengammu sacara salenga-lenga kilau bajabak je manutup sacara nyalenga dengan ije kungan metu. 35Uras uluh melai saluruh dunia akan takana akibat ah metuh andau te. 36Bajaga-jaga ih satiap wayah. Badoa ih dengan Tuhan akan manenga kakuatan akan tetap satia huang sagala kaije je akan terjadi tuntang mendeng tampa rasa mahamen melai taharep-Ku, Anak Kalunen je Allah utus.”
37Satiap andau, Yesus mampalepah waktu mangajar melai Bait Allah, tuntang katika hamalem sampai, Iye akan balua tuntang bamalem melai Bukit Zaitun. 38Tuntang are uluh dumah susung-susung sinde akan mahining Yesus mangajar melai halaman Bait Allah.
Currently Selected:
Lukas 21: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
