Lukas 20
20
Kawan Pamimpin Yahudi Dia' Percaya Awi Yesus Dumah Dengan Kuasa Allah
(Mat. 21:23-27; Mrk. 11:27-33)
1Sinde andau katika Yesus metuh tege melai halaman Bait Allah akan mangajar tuntang mangabarkan tentang Kabar Bahalap, pire-pire kawan-imam tambakas, kawan pangajar hukum Musa, tuntang kawan-bakas dumah manaharep-Ah. 2Ewen baisek denga-Ah: “Narai hak-Mu akan manguan hal-hal jituh? Ewehkah je manenga kuasa kilau jituh dengam-Mu?” 3Yesus manumbah: “Biarkan Aku manenga ije paisek talabih helu. 4Coba mander naraikah kuasa Yohanes akan mambaptis uluh baasal bara Allah atau bara kalunen?” 5Ewen nampara barunding melai antara ewen: “Narai je harus itah mander? Amun itah manumbah awi kuasa ah baasal bara Allah, maka Iye akan baisek dengan itah buhen itah dia' mampercayai peteh ah. 6Tatapi amun itah mamander awi kalunen je manenga Yohanes kuasa akan mambaptis uluh, maka kawan uluh Yahudi akan manjakah itah dengan batu tuntang mampatei itah. Awi ewen percaya awi Yohanes yelah ije uluh nabi.” 7Lalu ewen manumbah Yesus: “Ikei dia' tawan eweh je manenga kuasa dengan Yohanes akan mambaptis uluh.” 8Yesus manumbah: “Awi ketun dia' tau manumbah paisek-Ku, Aku kia dia' akan masanan dengammu eweh je manenga kuasa dengang-Ku akan manguan hal-hal jituh.”
Kesah Tentang Panana Kabun Anggur Je Jahat
(Mat. 21:33-46; Mrk. 12:1-12)
9Limbaste Yesus nampara masanan kesah jituh dengan uluh are: “Tege ije uluh je tempun kabun anggur, iye manyewakan ah dengan pire-pire panana. Limbaste iye tulak ka daerah beken tuntang balihi melai kanih akan waktu je tahi.” 10Katika sampai waktu ah akan mamanen bua anggur, tempun kabun anggur endau manyuhu sala ije palayan ah tulak dengan kawan panana akan manarima bagian ah bara hasil panen sasuai kasapakatan. Amun kawan panana mamukul palayan te tuntang mangusir tampa manenga naraipun. 11Sinde hindai, tempun kabun manyuhu palayan je beken dengan kawan panana te. Amun, palayan te imikul, ihina tuntang inyuhu tulak tampa maimbit naraipun. 12Akan katelu ah, tempun kabun manyuhu ije uluh palayan tulak dengan panana. Amun, ewen mapahimang palayan te tuntang mangusir ah balua bara kabun anggur. 13Jadi tempun kabun anggur te bapikir: Aku tawan narai je akan aku nguan salanjut ah. Aku akan mangirim ije-ije ah anak hatueku je tasayang. Pasti ih ewen akan mahormati ah. 14Tatapi katika kawan panana te nampayah anak hatue te dumah, ewen nampara barunding, tuntang bapander: Iye yelah uluh je akan mawarisi kabun jituh. Ayu itah patei iye mangat kabun jituh manjadi tempun itah. 15Jadi, katika anak hatue te dumah, ewen maimbit dengan paksa balua bara kabun anggur tuntang mampatei ah. Tatapi, jituh ih je akan inguan awi tempun kabun te katika iye mangatawan narai je jadi ewen nguan dengan anak ah. 16Iye akan dumah tuntang mampatei panana-panana te, lalu manyewa kabun anggur ah dengan uluh beken. Katika uluh are mahining kesah te, ewen bapander: “Ela ih hal jituh sampai terjadi!” 17Yesus nampayah ewen tuntang bapander: “Ketun saharus ah tau mamahami arti bara narai je tatulis huang gulungan Kitab Suci tentang Masias, je mamander: Allah jadi manampa batu je tukang-tukang bangunan anggap dia' baguna manjadi ije batu patok. 18Uluh manolak Aku Masias yelah kilau uluh je manjatu melai hujun batu te, iye akan hancur. Atau iye kilau uluh je kana penyet batu hai', iye akan ramuk rakai.”
19Kawan pangajar hukum Musa tuntang kawan-imam tambakas manyadari awi Yesus manyinggung ewen dengan kesah te. Ewen handak manekap-Ah wayah te kia. Tatapi ewen dia' bahanyi, awi mikeh uluh are akan manyarang ewen.
Paisek Jabakkan Tentang Mambayar Pajak
(Mat. 22:15-22; Mrk. 12:13-17)
20Limbaste pangajar hukum Musa tuntang kawan-imam tambakas manggau kasampatan akan manekap Yesus. Ewen mambayar pire-pire uluh akan manipu Yesus dengan pura-pura sabagai uluh je jujur. Ewen bausaha manjabak Yesus dengan panderan-Ah kabuat mangat ewen tau manyarah-Ah dengan Gubernur Romawi akan ihukum. 21Limbaste kawan uluh suruhan te bapander dengan Yesus: “Guru, ikei tawan awi ikau mamander tuntang mangajarkan narai je bujur tuntang Ikau manguan uras uluh dengan cara je sama. Tuntang ikau dengan bujur mangajarkan cara belum je Allah handak akan kalunen nguan. 22Naraikah hukum Tuhan manyuhu itah akan mambayar pajak dengan kaisar romawi?” 23Tatapi Yesus mangatawan awi kawan uluh te mancoba manjabak-Ah. 24Jadi, Iye bapander dengan ewen: “Tunjukkan ih dengang-Ku duit perak je ihapan akan mambayar pajak. Gambar tuntang aran eweh je tatulis melai hujun ah?” Kawan uluh te manumbah: “Gambar tuntang aran Kaisar.” 25Lalu Yesus bapander dengan ewen: “Amun kalaute, nenga ih dengan Kaisar narai je manjadi hak ah tuntang nenga ih dengan Allah narai je manjadi hak Allah.” 26Kawan uluh te dia' tau manampa-Ah mamander kaije je sala melai taharep uluh are. Ewen tabenyem awi kagum dengan auh-Ah je bijaksana.
Paisek Kawan Uluh Saduki Tentang Kahingkat Uluh Matei Tuntang Perkawinan
(Mat. 22:23-33; Mrk. 12:18-27)
27Limbaste, pire-pire uluh Saduki dumah dengan Yesus. Ewen golongan uluh je dia' percaya akan tege kahingkat. 28Ewen baisek: “Guru, huang Hukum Pengajaran Musa je inulis Musa akan itah, uluh Yahudi, iye mamander awi ije uluh hatue je jadi kawin lalu matei jatun maina anak, maka pahari ah harus mangawin balu te sahingga iye tau dinun anak. Anak hatue kasulak ewen akan inggap sabagai anak bara pahari ah je matei te. 29Misal ah, tege uju uluh bapahari. Pahari je bakas kawin, tatapi matei jatun dinun anak. 30Je kadue kawin dengan balu pahari ah te amun iye matei jatun dinun anak. 31Hal je sama kia terjadi metuh pahari katelu sampai kauju. 32Akhir ah bawi te kia matei. 33Jadi, metuh kahingkat uluh bara kapatei, ewehkah je akan manjadi bana bara uluh te awi kauju kawan pahari te jadi mangawin ah?” 34Yesus manumbah: “Melai dunia jituh, yelah hal je wajar bagi ije uluh hatue tuntang ije uluh bawi akan kawin. 35Tatapi kawan-uluh je Allah anggap layak mandinu kahingkat haluli bara kapatei tuntang je belum melai surga dia' akan kawin ije sama je beken. 36Ewen dia' tau matei hindai awi ewen sama dengan malaikat Tuhan. Ewen yelah kawan-anak Allah awi ewen jadi manarima kahingkat. 37Bahkan Musa mambuktikan huang kesah tentang uru je tapapui awi uluh je jadi matei akan belum haluli. Musa manulis awi Tuhan manyewut biti-Ah sabagai Allah Abraham, Ishak tuntang Yakub. 38Iye beken Allah bara kawan uluh je jadi matei. Sabalik ah, Iye yelah Allah bara kawan uluh je belum. Awi melai taharep-Ah uras umat-Ah masih belum.” 39Lalu pire-pire pangajar hukum Musa je dia' satuju dengan uluh Saduki bapander: “Guru, tumbah-Mu puna bujur.” 40Tuntang jadi te, dia' ije pun je bahanyi manega paisek jabakkan dengan Yesus.
Naraikah Masias Yelah Katurunan Daud
(Mat. 22:41-46; Mrk. 12:35-37)
41Limbaste Yesus baisek dengan kawan uluh je tege melai hete: “Naraikah maksud kawan gurumu katika ewen mamander awi Masias yelah Katurunan Daud? 42Huang gulungan kitab Mazmur, Raja Daud kabuat masanan: Allah bafirman dengan Tuhanku Masias. Munduk ih ka silan gantau-Ku, melai eka je paling mulia, 43samentara Aku maandak kawan musuh-Mu sapenuh ah melai penda kuasa-Mu. 44Huang ayat jituh, Raja Daud manyewut Masias sabagai Tuhan ah. Jadi kilenampi mungkin Masias kia marupakan katurunan ah?”
Ela Manuntut Taladan Je Buruk Bara Kawan-Pangajar Hukum Musa
(Mat. 23:5-7; Mrk. 12:38-40)
45Limbaste Yesus bapander dengan kawan-murid-Ah samentara uras uluh mahining. 46Pander-Ah: “Ela ih manuntut taladan je buruk bara kawan pangajar hukum Musa. Ewen rajin mananjung-nanjung dengan pakaian panjang tuntang ewen rajin itehau melai pasar. Melai eka ibadah uluh Yahudi tuntang melai pesta ewen rajin munduk melai eka paling tahormat. 47Ewen mananjaru kawan balu tuntang marampas huma ewen. Ewen manyahukkan kajahatan ah dengan badoa panjang-panjang. Awi te, hukuman ewen akan labih babehat bara je beken.”
Currently Selected:
Lukas 20: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
