Lukas 19
19
Yesus Hasundau Dengan Zakheus Si Pamungut Pajak
1Limbaste, Yesus tuntang kawan-murid-Ah sampai melai kota Yerikho tuntang mananjung mahalau ah. 2Ije uluh baaran Zakheus balihi melai kanih. Iye yelah ije uluh pamimpin panagih pajak tuntang iye tatau sanang. 3Katika Yesus mahalau kota, Zakheus handak nampayah kilau naraikah Yesus te, tatapi iye dia' tau nampayah ah awi iye yelah ije uluh je pandak tuntang are uluh melai sakaliling Yesus. 4Jadi, Zakheus hadari manyahelu uluh are tuntang mandai batang bua ara mangat iye tau nampayah Yesus, awi Yesus akan mahalau jalan te. 5Katika Yesus sampai melai eka Zakheus je tege, Iye nampayah ah tuntang bapander denga ah: “Zakheus, capat ih muhun bara batang te, awi Aku handak manginap melai humamu andau jituh.” 6Maka, Zakheus capat muhun tuntang manarima Yesus tame ka huang huma ah dengan hanjak. 7Tatapi uras uluh je tege melai kanih nampayah hal te, ewen nampara mangomel-ngomel, tuntang bapander: “Iye jadi tulak manguang huma ije uluh badosa.” 8Tatapi Zakheus mendeng tuntang bapander dengan Yesus: “Dohop hining ih jituh, Tuhan. Aku bajanji akan manenga satengah bara harta tempunku dengan uluh susah tuntang sakira ah tege kaije je kuperas bara harta are uluh akan kunenga haluli epat kali lipet.” 9Limbaste Yesus bapander dengan iye: “Allah jadi manyalamat kawan-uluh je tege melai huma jituh metuh andau jituh, awi ikau kia percaya dengan Allah kilau je inguan awi datu hiangmu, Abraham. 10Awi Aku, Anak Kalunen je Allah utus, dumah ka dunia akan mangau ewen je nihau tuntang manyalamatkan ewen bara hukuman hunjun dosa-dosa ewen.”
Kesah Tentang Koin Mina
(Mat. 25:14-30)
11Yesus jadi tege melai tukep kota Yerusalem, tuntang kawan-uluh mangira awi Karajaan Allah akan dumah sacara salenga-lenga katika Iye sampai. Jadi, katika uluh are metuh mahining pangajaran-Ah, Iye mangesah kesah jituh. 12Yesus bapander dengan ewen: “Tege ije uluh bakadudukkan gantung tulak ka daerah je kejau akan manarima kuasa bara kaisar akan manjadi raja melai wilayah ah. Limbas iye manarima kakuasaan, iye akan haluli ka daerah ah akan mamaritah. 13Sahindai iye tulak, iye mantehau sapuluh uluh palayan ah akan dumah denga ah. Iye manenga ije duit mina#19:13 Upah bagawi per andau huang saratus andau dengan ewen masing-masing. Limbaste iye bapander dengan ewen: Hapa koin jituh huang ije bisnis akangku sampai aku haluli ka huma. 14Tatapi kawan-uluh melai daerah ah mambenci ah, sahingga ewen mangirim utusan akan mamander dengan kaisar: Ikei dia' handak uluh jituh manjadi raja hunjun ikei. 15Amun, kaisar mangangkat ah manjadi raja tuntang iye haluli ka huma. Limbaste iye mantehau sapuluh palayan je jadi iye nenga koin te. Iye handak tawan pire karei hindai koin je jadi ewen hasil dengan koin te. 16Je sulak dumah denga ah tuntang bapander: Raja, dengan ije koin je Ikau nenga dengan aku, aku jadi mangasil sapuluh koin hindai. 17Raja bapander dengan palayan ah: Te puna bahalap! Ikau yelah palayan je bahalap. Ikau jadi satia huang manguan hal je kurik dengangku, jadi aku manengamu kuasa akan mamerintah sapuluh kota. 18Je kadue dumah tuntang bapander denga ah: Raja, aku jadi mandinu lime koin hindai dengan koin je Ikau nenga dengan aku.” 19Raja bapander denga ah: Aku akan manengamu kuasa akan mamerintah lime kota. 20Limbaste palayan je katelu maju tuntang bapander: “Raja, jituh koinmu. Aku mambungkus ah dengan salambar kain tuntang manyahukkan ah mangat aman. 21Ikau yelah uluh je karas, tuntang awi te aku mikeh dengammu. Ikau manduan ije bara uluh beken je beken tempunmu tuntang ikau kilau panana je mangetem parei je jadi iimbul awi panana beken. 22Raja manumbah, Aku akan manghakimi ikau dengan panderanmu kabuat, hei palayan je dia' taat! Naraikah ikau bujur-bujur percaya awi aku yelah uluh je karas tuntang awi aku manduan duit je dia' kukumpulkan tuntang mangetem hasil je dia' kuimbul? 23Amun kalute, buhen Ikau dia' maina koinku melai bank? Amun ikau manguan hal te, katika ikau haluli, aku akan manarima koinku dengan isut kauntungan. 24Limbaste Raja bapander dengan kawan-uluh je mendeng melai tukep ah: Duan ih koin te bara palayan te tuntang nenga ih dengan palayan je tege sapuluh koin. 25Tatapi kawan-palayan te bapander denga ah: Tatapi Raja, palayan jituh jadi manempun sapuluh koin. 26Raja manumbah: Aku bapander dengammu, uluh je tau ipercaya akan inenga labih are hindai. Tatapi uluh je dia' tau ipercaya, bahkan isutpun je jadi inenga denga ah akan induan bara ah. 27Wayahtuh, mangenai kawan-musuhku je dia' handak aku manjadi raja ewen, imbit ih ewen ka hetuh tuntang patei ih ewen melai hetuh, melai taharep aku.”
Yesus Maname Kota Yerusalem Sabagai Raja
(Mat. 21:1-9; Mrk. 11:1-10; Yoh. 12:12-15)
28Limbas Yesus salesai mamander uras te, Iye tulak ka kota Yerusalem hayak kawan murid-Ah.
29Katika ewen samakin tukep dengan lewu Betfage tuntang Betania, tukep Bukit Zaitun, Yesus mautus due uluh murid-Ah akan manyahelu-Ah. 30Sahindai mautus ewen, Yesus bapader: “Tulak ih ka lewu je tege melai taharepmu. Katika ikau sampai melai kanih, ikau akan nampayah ije kungan kaledai bujang je ijarat melai kanih. Dia' tege je puji malumpat ah. Lapas ih jarat ah tuntang imbit ka hetuh. 31Amun tege uluh baisek dengammu: Buhen ikau malapaskan ah? Numbah ih kalutuh: Tuhan mamerlukan ah.” 32Lalu tulak ih ewen je inyuhu te, tuntang ewen mandinu uras kaije kilau je jadi imander Yesus. 33Katika ewen malapas kaledai te, bapander ih uluh je tempun kaledai te: “Buhen ikau malapas kaledai te?” 34Tumbah ewen: “Tuhan mamerlukan ah.” 35Lalu kawan murid maimbit kaledai bujang te dengan Yesus. Ewen maandak pakaian panjang ewen melai hunjun likut kaledai te. Limbaste ewen mandohop Yesus akan munduk hunjun ah. 36Limbaste Yesus nampara manuju kota Yerusalem dengan mandai kaledai bujang te. Kawan uluh tarus maandak pakaian panjang ewen melai jalan akan mahormati Iye. 37Katika Yesus tuntang kumpulan uluh are sampai melai jalan muhun Bukit Zaitun, uras kawan murid-Ah nampara manyayi dengan sukacita sambil mamuji Tuhan awi uras mujizat je jadi ewen payah. 38Ewen: bapander: “Iberkati ih Iye je dumah sabagai Raja dengan kuasa Tuhan. Wayahtuh itah manarima damai sajahtra dengan Allah je tege melai surga tuntang biar ih tege pujian-pujian bagi Allah melai eka je Mahagantung!”
39Pire-pire uluh bara golongan Farisi je tege melai bentuk kumpulan uluh are te bapander dengan Yesus: “Guru, nyuhu ih kawan murid-Mu akan tende mamander hal-hal jituh!” 40Yesus manumbah ewen: “Aku bapander dengammu, amun kawan uluh jituh tende mangariak pujian, maka batu-batu jituh akan nampara mangariak pujian!”
41Katika Yesus samakin tukep tuntang nampayah kota te, Iye nampara manangisi kota tuntang panduduk ah. 42Iye bapander: “Panduduk kota Yerusalem, Aku puna baharap awi ketun manyadari andau jituh yelah jalan bagi ketun akan tempun damai sajahtra dengan Allah. Tatapi wayahtuh, ikau dia' tau nampayah ah. 43Ketun uras mangalami kasulitan. Kawan musuh akan mangapung ketun tuntang mambangun tembok melai sakaliling ketun sahingga dia' tege je tau tame atau balua bara kota. Ewen akan manyarang ketun bara kueh bewei. 44Tuntang ewen akan maratakan kotamu dengan petak tuntang mapatei uras uluh. Ewen akan mahancurkan uras bangunan. Jituh akan terjadi awi ikau dia' tawan pea Tuhan akan dumah manyalamatkanmu.”
Yesus Tulak Ka Bait Allah
(Mat. 21:12-13; Mrk. 11:15-18; Yoh. 2:13-16)
45Limbaste Yesus tame ka halaman Bait Allah. Iye nampara mangusir kawan uluh je metuh bajualan melai kanih. 46Yesus bapander dengan ewen: “Tege tatulis huang gulungan Kitab Suci: Huma Allah akan manjadi eka badoa. Tatapi ikau manjadikan ah eka akan kawan parampok!”
47Lalu, Yesus mangajar melai Bait Allah setiap andau. Amun, kawan-imam tambakas, kawan pangajar hukum Musa, tuntang kawan pamimpin bangsa te manggau cara akan mampatei-Ah. 48Akan tatapi, ewen dia' tau manguan ah awi uras uluh puna handak mahining pangajaran-Ah.
Currently Selected:
Lukas 19: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
