Lukas 1
1
Panduluan
1Teofilus je ku hormati, Are uluh jadi manulis tentang narai je jadi terjadi melai antara itah. 2Ewen jadi mancatat narai je ingesah awi kawan uluh je nampayah paristiwa-paristiwa te dengan itah. Kawan uluh te tege melai kanih metuh kasalak paristiwa te terjadi, tuntang ewen tarus mangesahkan ah metuh wayah te. 3Aku kabuat jadi manyalidiki dengan taliti sagala kaije je terjadi metuh kasalak. Jadi aku mamutuskan awi aku kia harus manulis laporan je tepat akammu, Teofilus. 4Aku handak ikau tawan awi narai je jadi ingesah kawan uluh tentang Yesus yelah bujur.
Ije Uluh Malaikat Utusan Tuhan Mansanan Tentang Kalahiran Yohanes Pambaptis
5Katika Herodes manjadi raja wilayah Yudea, tege ije uluh imam Yahudi baaran Zakharia balihi melai kanih. Iye tamasuk huang kalompok imam je inyewut Abia. Iye tuntang sawa ah, Elisabet, yelah katurunan imam kasulak Israel, yete Harun. 6Zakharia tuntang Elisabet yelah uluh je bujur melai taharep Allah. Ewen manaati sapenuh ah uras je inyuhu Tuhan sahingga ewen ianggap dia' bacacat. 7Tatapi, ewen dia' maina anak awi Elisabet dia' puji tau batihi. Je beken te, kadue ah jadi puna bakas akan maina anak.
8Sinde andau Zakharia metuh batugas malayani sabagai imam melai taharep Tuhan, awi kalompok ah metuh batugas malayani Tuhan melai Bait Allah melai Yerusalem. 9Jadi manjadi kabiasaan kawan imam akan manduan undian akan manentukan eweh je akan tame ka huang Bait Allah akan mamapui dupa. Kawan imam manguan hal jituh tuntang aran Zakharia balua. 10Metuh wayah Zakharia mamapui dupa melai hujun meja persembahan, are uluh badoa dengan Tuhan melai halaman Bait Allah. 11Salenga-lenga ije uluh malaikat utusan Tuhan mamparahan biti dengan Zakharia. Malaikat utusan Tuhan te mendeng melai silan gantau mezbah eka mamapui dupa. 12Zakharia nampayah malaikat utusan Tuhan te tuntang iye puna mikeh. 13Tatapi malaikat utusan Tuhan te bapander denga ah: “Ela mikeh, Zakharia. Awi Allah jadi mahining metuh ikau badoa akan mandinu ije uluh anak hatue. Maka, sawammu Elisabet akan maanak ije uluh anak hatue bagimu, tuntang ikau harus manenga ara Yohanes. 14Iye akan manampa ikau puna hanjak tuntang are uluh je akan puna hanjak katika iye lahir. 15Iye akan manjadi hai' melai taharep Tuhan tuntang dia' tau mihup anggur atau minuman karas je beken ah. Bahkan, metuh bara tihin indu ah, iye akan inguntep awi Roh Kudus. 16Sabagai hasil ah, iye akan mamimpin are uluh Israel haluli dengan Tuhan Allah ewen. 17Iye akan manjadi ije uluh je manempun roh tuntang kuasa kilau nabi Elia. Iye akan manyahelu pandumah Tuhan, manyadia kawan uluh akan pandumah-Ah. Iye akan mandamaikan bapa tuntang anak, tuntang iye akan mangubah pikiran je dia' taat akan manarima hikmat Tuhan.” 18Limbaste Zakharia bapander dengan malaikat utusan Tuhan te: “Kilenampi ih aku mangatawan awi narai je ikau pander te akan bujur-bujur terjadi? Aku jituh jadi bakas, tuntang sawangku kia jadi cukup bakas akan maina ije uluh anak.” 19Malaikat utusan Tuhan te bapander denga ah: “Arangku Gabriel tuntang aku mendeng melai taharep Allah akan malayani Iye. Allah jadi mautus aku akan mangabar kabar bahalap jituh dengammu tentang anakmu. 20Tatapi katawan ih ikau akan dia' tau pander sampai anakmu lahir. Hal jituh akan terjadi awi ikau dia' percaya dengan narai je jadi Aku pander dengammu. Uras je jadi Kupander akan terjadi dengan waktu je tepat.” 21Melai luar, melai halaman Bait Allah, kawan uluh masih manunggu Zakharia tuntang ewen tarewen awi iye balihi melai huang Bait Allah akan waktu je labih tahi bara biasa ah. 22Katika Zakharia balua bara Bait Allah, iye dia' tau bapander dengan ewen. Limbaste kawan uluh tawan awi iye jadi nampayah panampayah bara Tuhan melai Bait Suci awi iye manampa isyarat dia' tau bapander. 23Katika minggu palayanan ah melai Bait Allah jadi salesai, iye haluli ka huma ah melai wilayah Yudea.
24Salenga limbas te, sawa ah, Elisabet batihi, tuntang salama lime bulan iye dia' tulak ka eka umum. 25Iye bapander: “Tuhan jadi mamungkinkan aku akan maina ije uluh anak. Iye jadi puna murah atei dengangku wayahtuh tuntang Iye jadi manganan rasa mahamenku melai antara kawan uluh awi dia' maina anak.”
Pasanan Tentang Kalahiran Yesus
26Huang bulan je kajahawen tihin Elisabet Allah manyuhu malaikat utusan-Ah, Gabriel tulak kaije kota melai daerah Galilea baaran kota Nazaret, 27Iye iutus akan manyundau ije uluh parawan je batunangan dengan ije uluh hatue baaran Yusuf, bara katurunan raja Daud. Ara parawan te yelah Maria. 28Katika utusan Allah te tame ka huma Maria, iye bapander: “Salam, hai ikau je ikarunia, Tuhan mampahayak ikau.” 29Maria tarewen mahining panderan te, lalu baisek melai huang atei ah, naraikah arti salam te. 30Pander malaikat utusan Tuhan te denga ah: “Ela mikeh, hai Maria, awi ikau mandinu kasih karunia melai taharep Allah. 31Sabujur ah ikau akan batihi tuntang akan maanak ije uluh anak hatue tuntang harus ih ikau manenga aran Iye Yesus. 32Iye akan manjadi hai' tuntang akan inyewut Anak Allah Je Mahagantung. Tuhan Allah akan manenga-Ah takhta raja Daud, datu hiang-Ah. 33Tuntang Iye akan manjadi raja hunjun kaum katurunan Yakub sampai Katatahi ah tuntang karajaan-Ah dia' akan berakhir.” 34Pander Maria dengan malaikat utusan Tuhan te: “Kilenampi te mungkin terjadi, awi aku parawan?” 35Malaikat utusan Tuhan te manumbah tuntang bapander denga ah: “Roh Kudus akan dumah hujunmu tuntang kuasa Allah Je Mahagantung akan mahagamu. Te ih awi ah, Anak je Kudus te akan inyewut Anak Allah. 36Tuntang ngatawan ih awi Elisabet, paharimmu te, metuh batihi kia metuh umur bakas ah. Iye je huran inyewut tamanang, metuh jituh jadi batihi jahawen bulan. 37Awi bagi Allah je bakuasa tau manampa uras hal.” 38Tuntang Maria bapander: “Sabujur ah, aku jituh hamba Tuhan. Aku akan manampa narai je ikau mander te sampai terjadi.” Limbaste malaikat utusan Tuhan te tulak malihi ah.
Maria Tuntang Elisabet
39Pire-pire waktu limbaste tulak ih Maria tuntang palus mananjung capat-capat ka bukit manuju kaije kota melai daerah Yehuda. 40Melai hete iye tame ka huma Zakharia tuntang manenga salam akan Elisabet. 41Tuntang katika Elisabet mahining salam Maria, malonjak ih anak je huang rahim ah tuntang Elisabet pun kuntep dengan Roh Kudus 42Sahindai te Elisabet mangariak dengan suara nyaring: “Imberkati ih ikau melai antara uras bawi, tuntang imberkati ih anakmu melai rahim. 43Ewehkah aku sahingga indu Tuhan dumah manyundau aku? 44Awi sabujur ah, katika salammu sampai akan pindingku, anak je melai huang rahimku malonjak kahanjakkan. 45Tuntang hanjak ih iye, je jadi percaya, awi narai je imander denga ah bara Tuhan, akan terjadi.”
Nyanyian Pujian Maria
46Lalu pander Maria: “Bitingku mamuliakan Tuhan, 47tuntang atei-ku hanjak awi Allah, Jurusalamatku. 48Awi, Allah jadi mamilihku palayan-Ah je hina jituh. Nampara wayahtuh, uras panerus akan manyewut aku imbarkat. 49Awi Je Mahakuasa jadi manguan panggawi-panggawi hai' dengangku tuntang aran-Ah yelah kudus. 50Tuntang rahmat-Ah turun-tamurun hunjun uluh je mikeh akan Iye. 51Iye jadi manampayahkan kuasa-Ah dengan panggawi lenge-Ah tuntang mancerai-beraikan kawan-uluh je sombong atei ah. 52Iye mapuhun kawan-uluh je bakuasa bara tahta ah tuntang mahunjun kawan-uluh je randah atei ah. 53Tuhan jadi manega kuman kawan-uluh je blau dengan hal-hal je bahalap, tatapi Iye jadi mangejau kawan-uluh tatau dengan dia' manega ewen narai-narai. 54Allah jadi manenga padohop akan bangsa Israel, palayan-Ah, awi maingat kasih sayang-Ah, 55kilau je ijanji-Ah akan datu hiang itah, Abraham tuntang katurunan ah akan katatahi ah.”
56Limbaste, Maria balihi hayak Elisabet salama kurang labih telu bulan tuntang limbaste haluli ka huma ah melai Nazaret.
Kalahiran Yohanes Pambaptis
57Katika genap ih bulan ah bagi Elisabet akan maanak tuntang iye pun maanak ije uluh anak hatue. 58Kawan tatangga tuntang kaluarga ah mahining awi Tuhan jadi manunjukkan kasih sayang-Ah je hai' akan Elisabet, tuntang ewen hanjak kia hayak denga ah. 59Maka dumah ih ewen metuh andau je kahanya akan manyunat anak te tuntang ewen handak manenga aran iye Zakharia manurut aran bapa ah, 60tatapi indu ah bapander: “Ela, iye harus inenga aran Yohanes.” 61Pander ewen denga ah: “Dia' tege melai antara kawan paharimmu je baaran kalute.” 62Lalu ewen manenga isyarat dengan bapa ah akan baisek aran narai je handak nenga dengan anak ah te. 63Iye balaku batu tulis, lalu manulis pander-pander te: “Aran ah yelah Yohanes.” Tuntang ewenpun heran uras ah. 64Dengan salenga, jela Zakharia saolah-olah talapas tuntang iye tau bapander hindai, tuntang nampara mamuji Allah.
65Maka mikeh ih uras uluh je melai sakitar ah, tuntang uras peristiwa te manjadi tasebar melai saluruh bukitan wilayah Yudea. 66Uras uluh je mahining ah, bapikir tuntang bapander: “Manjadi naraikah anak te kareh?” Awi lengen Tuhan mampahayak iye.
Nyanyian Pujian Zakharia
67Tuntang Zakharia, bapa ah, kuntep dengan Roh Kudus, lalu bernubuat, pander ah: 68“Terpuji ih Tuhan, Allah Israel, Awi Iye dumah akan mandohop itah, umat ah tuntang Iye akan manyalamat itah. 69Iye jadi manyandia Jurusalamat je bakuasa akan itah bara katurunan Daud, hamba-Ah. 70Jituh ih je jadi ijanji-Ah metuh huran awi kawan-nabi-Ah je Kudus. 71Mangat sang Jurusalamat te manyalamat itah bara kawan-musuh itah, tuntang bara lengen uras uluh je mambenci itah. 72Allah jadi manguan hal jituh akan manunjukkan-Ah akan datu hiang itah tuntang mangingat akan perjanjian-Ah je Kudus. 73Yete perjanjian je iucap-Ah akan Abraham, bapa laluhur itah, awi Iye manenga kasalamatan akan itah. 74Awi Allah akan malapas itah bara lengen kawan-musuh itah tuntang Iye maijinkan itah tau malayani-Ah tampa rasa mikeh, 75mangat itah manjadi Kudus tuntang bujur melai taharep-Ah saumur belum itah. 76Tuntang ikau hei' anakku, akan inyewut nabi Allah Je Mahagantung, awi ikau akan mananjung nyahelu Tuhan akan manyadia jalan denga-Ah. 77Akan manenga dengan umat-Ah pangertian akan kasalamatan je badasarkan pangampunan dosa-dosa ewen. 78Awi rahmat tuntang balas kangasi bara Allah itah, dengan aran Iye akan mahaga itah, tuntang Masias akan dumah dengan itah bara surga kilau matan andau je lembut. 79Akan manarangi ewen je balihi huang naungan maut akan mangarah pai itah dengan jalan damai sajahtra.”
80Maka, anak te batumbu samakin dewasa. Tuntang biti ah manjadi kuat. Iye balihi melai padang pasir, sampai dumah waktu ah Iye akan nampara bakhotbah dengan bangsa Israel.
Currently Selected:
Lukas 1: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
