Lukas 18
18
Kesah Tentang Balu Tuntang Hakim
1Limbaste Yesus mahapan kesah jituh akan mangajar kawan-murid Ah mangat ewen halajur badoa tuntang dia' putus asa. 2Iye bapander dengan ewen: “Tege ije uluh hakim je balihi melai kaije kota. Iye dia' mahormati Allah tuntang kalunen. 3Melai kota je sama, tege ije uluh balu kia. Iye tarus manguang hakim tuntang mamohon mangat hakim mandohop ah mandinu kaadilan bara uluh je mancoba manipu ah. 4Akan pire-pire waktu, sang hakim dia' handak mandohop ah. Amun akhir ah iye mamutuskan: Memang bujur awi aku dia' mikeh dengan Tuhan atau mahormati eweh pun. 5Tatapi balu jituh manggangguku sahingga aku harus mamperlaku ah dengan adil. Maka iye dia' akan dumah mamohon dengangku hindai, tuntang aku akan mandinu kadamaian.” 6Limbaste Yesus bapander: “Perhatikan ih narai je imander awi hakim je dia' bujur te. 7Tatapi bagi Allah, Iye pasti akan manguan narai je bujur bagi kawan-uluh je jadi Iye pilih. Katika ewen tarus badoa denga-Ah akan mandohop ewen, Iye dia' akan manunda-nunda akan mandohop ewen. 8Aku jamin, Allah akan manguan narai je bujur bagi umat-Ah tampa panundaan! Amun, katika Anak Kalunen je Allah utus dumah haluli ka bumi, naraikah Iye akan manyundau ije uluh pun melai bumi je percaya denga-Ah?”
Kesah Tentang Uluh Farisi Tuntang Panagih Pajak
9Tege pire-pire uluh je mahining Yesus percaya akan kabujuran ewen kabuat. Ewen mahina uluh beken. Yesus masanan kesah jituh dengan ewen. 10Iye bapander: “Tege due uluh tame ka halaman Bait Allah akan badoa dengan Allah. Je ije uluh yelah uluh bara golongan Farisi, tuntang je beken yelah panagih pajak. 11Uluh bara golongan Farisi te mendeng tuntang badoa huang atei: Yoh Allah, aku basukur dengam-Mu, awi aku dia' badosa kilau uluh beken. Aku beken parampok atau uluh je dia' bujur. Aku dia' bazinah. Aku bahkan dia' kilau panagih pajak te. 12Aku bapuasa due kali saminggu akan badoa, tuntang aku manenga sapuluh persen bara uras pangasilanku. 13Tatapi panagih pajak te mendeng dengan randah atei tapisah bara kawan uluh beken tuntang bahkan mangkeme dia' layak akan mamandang Allah melai surga. Iye mamukul-mukul usuk ah dengan lenge ah akan mamparahan kasedihan ah. Limbaste iye badoa: Dohop ih, Tuhan, aku uluh badosa. Aku mohon balas kangasi tuntang ampun ih aku! 14Aku bapander dengammu: Panagih pajak te buli ka huma ah sabagai uluh je iampuni Allah, sedangkan uluh Farisi te dia'. Bara kanih itah tawan, awi eweh bewei mahunjun biti, iye akan irandah, tuntang eweh bewei marandah biti, iye akan ihunjun.”
Jadi Ih Randah Atei Kilau Anak Kurik
(Mat. 19:13-15; Mrk. 10:13-16)
15Maka dumah ih kawan-uluh maimbit kawan-anak je kurik dengan Yesus, mangat Iye mamberkat ewen. Katika kawan murid nampayah hal te, ewen manyingi kawan-uluh te awi dumah dengan Yesus. 16Tatapi Yesus mantehau kawan anak te tuntang bapander dengan kawan murid-Ah: “Biar ih kawan-anak te dumah dengang-Ku, tuntang ela ikau mahalang-halang ewen, awi kawan uluh je kilau jituh ih je akan tame ka huang Karajaan Allah. 17Aku bapander dengammu, sabujur ah amun ije uluh dia' handak manarima Karajaan Allah dengan randah atei kilau ije anak kurik, iye dia' akan manjadi umat-Ah ka huang Karajaan-Ah.”
Uluh Tatau Sulit Tame Karajaan Allah
(Mat. 19:16-26; Mrk. 10:17-27)
18Tege ije uluh pamimpin Yahudi je baisek dengan Yesus: “Guru, ikau yelah uluh je bahalap, narai je harus aku nguan akan manarima pambelum je katatahi?” 19Tatapi Yesus bapander denga ah: “Dia' tege je bahalap sacara sampurna kacuali Allah kabuat. Jadi, pikirkan ih narai je ikau mander katika ikau manyewut Aku bahalap. 20Ikau tawan parintah-parintah Allah: Ela bazinah, ela mampatei eweh pun, ela manakau naraipun, ela mander ah saksi manajaru, hormati ih bapamu tuntang indumu.” 21Iye bapander dengan Yesus: “Aku jadi mantaati uras parintah jituh metuh aku masih bujang.” 22Mahining te Yesus bapander denga ah: “Masih balihi ije hal hindai je ikau nguan ah: Jual ih uras je ikau tempu tuntang bagi-bagikan ih te dengan kawan-uluh susah, maka ikau akan are harta melai surga, limbas te dumah ka hetuh tuntang jadi ih murid-Ku.” 23Katika pamimpin te mamander narai je imander Yesus, iye manjadi puna kacewa, awi pamimpin te puna tatau tuntang dia' handak manenga narai je itempu ah. 24Yesus nampayah uluh te. Lalu Yesus bapander dengan kawan-uluh je tege melai kanih: “Sungguh sulit bagi uluh tatau akan tame ka huang Karajaan Allah! 25Sulit sama sinde ije kungan unta akan tame mahalau rumbak pilus bara ije uluh je tatau tame ka huang Karajaan Allah.” 26Katika uluh are mahining hal te, ewen baisek denga-Ah: “Kilenampi mungkin tege uluh je tau inyalamat?” 27Yesus bapander: “Narai je dia' mungkin bagi kalunen, mungkin bagi Allah.”
Upah Manuntut Yesus
(Mat. 19:27-30; Mrk. 10:28-31)
28Limbaste Petrus bapander dengan Yesus: “Ikei jituh jadi mangalihi uras ikei tempu akan manjadi kawan-murid-Mu.” 29Yesus manumbah: “Aku bapander dengammu, sabujur ah satiap uluh je awi Karajaan Allah mangalihi huma ah, kabalin atau pahari ah, uluh bakas atau kawan-anak ah. 30Akan manarima haluli lipet due metuh waktu jituh kia, tuntang waktu zaman je akan dumah iye akan inenga belum je katatahi.”
Yesus Haluli Mangesah Tentang Pampatei-Ah
(Mat. 20:17-19; Mrk. 10:32-34)
31Limbas te Yesus mantehau kadue balas murid-Ah, lalu bapander dengan ewen: “Hining ih! Wayahtuh itah tulak ka kota Yerusalem tuntang uras je jadi inulis awi kawan nabi zaman huran mangenai Anak Kalunen je Allah utus akan igenapi. 32Awi Iye akan inyerah dengan bangsa-bangsa je dia' mangasene Allah, iolok-olok, ihina tuntang iluja. 33Tatapi metuh andau katelu limbas papatei-Ah, Iye akan belum haluli.” 34Kawan murid dia' mangerti narai je Yesus pander. Ewen dia' tawan narai je Iye maksud, awi makna bara panderan-Ah tasuhukkan bagi ewen.
Yesus Mapangkeleh Ije Uluh Dia' Tau Nampayah Melai Tukep Kota Yerikho
(Mat. 20:29-34; Mrk. 10:46-52)
35Katika Yesus tuntang kawan murid-Ah manukep kota Yerikho, ije uluh dia' tau nampayah metuh munduk melai saran jalan balaku-laku dengan kawan uluh. 36Katika uluh je dia' tau nampayah te mahining uluh are je mahalau ah, iye baisek dengan kawan uluh melai tukep ah narai je metuh terjadi. 37Lalu ewen mansanan denga ah: “Yesus bara kota Nazaret mahalau hetuh.” 38Maka uluh je dia' tau nampayah te mangariak: “Yesus, Katurunan Raja Daud, ngasi ih aku, ngasi ih aku!” 39Tuntang kawan uluh je tege melai taharep uluh are te basingi: “Jadi ih mangariak, benyem ih! Tetapi iye mangariak labih kuat hindai: Yesus, katurunan Raja Daud, ngasi ih aku, ngasi ih aku!” 40Katika Yesus mahining hal te, Iye tende. Iye bapander dengan uluh are: “Imbit ih uluh te dengang-Ku.” Katika uluh te manukep, Yesus baisek denga ah, 41“Narai je ikau handak mangat narai je ikau handak Aku nguan akammu?” Tumbah uluh te: “Tuhan, aku tau manampayah hindai!” 42Yesus bapander denga ah: “Ikau tau nampayah hindai! Ikau keleh awi imanmu dengang-Ku.” 43Wayah te kia, uluh je dia' tau nampayah te tau nampayah haluli. Iye nampara manuntut Yesus melai sapanjang jalan tuntang iye mamuji Allah. Uluh are je nampayah narai je jadi terjadi tuntang ewen kia mamuji Allah.
Currently Selected:
Lukas 18: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
