Lukas 17
17
Pangajaran Yesus Tentang Dosa, Iman, Tuntang Tugas
1Yesus bapander dengan kawan-murid-Ah: “Satiap uluh pasti akan mangkeme pancobaan akan manampa dosa, tatapi sungguh babehat ah hukuman bagi uluh je mancobai uluh beken akan manampa dosa. 2Labih bahalap uluh kilau te injakah ka laut limbas manjarat batu je babehat kauyat ewen daripada iye manampa uluh je dia' basala badosa. 3Jadi buah-buah ih huang pambelum. Amun ije uluh je percaya dengang-Ku manampa dosa, tagur ih iye. Amun iye batobat bara dosa-dosa ah, ampun ih iye. 4Bahkan amun uluh je percaya dengang-Ku manampa dosa taharepmu uju kali huang ije andau, tuntang setiap kali iye dumah dengammu tuntang bapander: Aku batobat, maka ikau harus maampun ah setiap kali.”
5Limbaste kawan murid bapander dengan Yesus: Dohop ih ikei akan percaya dengan Allah dengan labih kuat. 6Tatapi Yesus bapander: “Amun ikau maina iman, bahkan kakurik bawak sawi, ikau tau bapander dengan batang je hai' jituh: Cabut ih tuntang iimbul ih ka huang laut, tuntang narai je ikau pander te akan terjadi.”
Kawajiban Ije Uluh Palayan
7Amun sala ije uluh bara ketun maina ije uluh palayan je mambajak tana atau mangurus domba buli bara mambajak tana atau mangurus domba, tentu ketun dia' akan bapander dengan palayan te: “Ayu, munduk ih melai hetuh tuntang kuman ih.” 8Sabalik ah, Ikau akan bapander dengan palayanmu: “Nyadia ih panginan hamalem akangku! Limbaste hapa ih pakayan je dia' rigat tuntang layani ih aku sampai aku salesai kuman. Limbas aku salesai kuman, harun ih ikau tau kuman panginanmu. 9Tuntang naraikah tuan ah batarima kasih dengan palayan ah awi jadi manguan narai je jadi inyuhu? Tentu bewei dia'. 10Tuntang kalute ih saharus ah dengan Ikau. Apabila ikau jadi manguan uras je inyuhu awi tuanmu dengammu, maka mander ih. Ikei dia' layak manarima pujian, ikei baya ih palayan tuntang ikei baya manguan narai je saharus ah ikei nguan.”
Yesus Mapangkeleh Sapuluh Uluh Je Pehe Basamah
11Sinde andau katika Yesus tulak ka kota Yerusalem hayak kawan murid-Ah, Iye mahalau perbatasan antara daerah Samaria tuntang daerah Galilea. 12Katika Iye tame ije lewu dumah ih sapuluh uluh je pehe basamah manyundau Yesus. Tatapi ewen batende dia' kejau bara hete. 13Ewen mangariak dengan suara nyaring denga-Ah: “Yesus, Guru ikei, ngasi ih ikei tuntang pangkeleh ih ikei.” 14Yesus nampayah ewen tuntang bapander: “Tulak ih dengan kawan-imam Yahudi mangat mapariksamu.” Tuntang katika ewen metuh huang pananjungan ka kawan-imam, Allah mapangkeleh ewen. 15Katika sala ije bara ewen manyadari awi Allah jadi mapangkeleh ah, iye haluli dengan Yesus tuntang bapander dengan nyaring: “Allah te hai'!” 16Iye dumah tuntang balutut dengan randah atei melai pai Yesus akan manunjukkan rasa hormat tuntang batarima kasih denga-Ah. Uluh te barasal bara lewu uluh Samaria tuntang beken uluh Yahudi. 17Limbaste Yesus manumbah: “Aku jadi mapangkeleh kasapuluh uluh te. Jalatien uluh beken ah saharus ah kia haluli akan mamuji Allah! 18Tatapi baya ije bara sapuluh uluh te je haluli dengangku akan batarima kasih dengan Allah, tuntang uluh te bahkan beken uluh Yahudi!” 19Lalu Yesus bapander dengan uluh te: “Mendeng ih tuntang tulak ih. Ikau jadi percaya dengan Allah tuntang te jadi mapangkeleh ikau.”
Pangajaran Yesus Tentang Waktu Karajaan Allah Akan Dumah
(Mat. 24:23-28,36-41)
20Sinde andau kawan-uluh bara golongan Farisi baisek dengan Yesus: “Peakah Karajaan Allah akan dumah?” Yesus manumbah: “Dia' akan tege tanda-tanda je mamparahan dengammu awi Karajaan Allah akan dumah. 21Dia' tege ije uluh pun je tau bapander: Payah, jituh iye! atau: Te iye! Awi Karajaan Allah tege melai bentuk-bentuk ikau.”
22Limbaste Yesus bapander dengan kawan-murid-Ah: “Akan tege wayah ah ikau puna handak nampayah Aku, Anak Kalunen je Allah utus walaupun baya jandau, tatapi ikau dia' akan nampayah te. 23Metuh waktu te, kawan uluh akan bapander dengammu: Iye tege melai kanih! atau Iye tege melai hetuh! Tatapi ela ih ikau manuntut atau mampercayai ewen tuntang ela ih ikau mangau Iye. 24Awi Aku, Anak Kalunen je Allah utus, akan dumah dengan cara je tampayah ah kilau kilat je cahaya ah manarangi uras langit. 25Amun sahindai te terjadi, Aku harus puna mandarita tuntang inolak awi kawan-uluh melai dunia jituh. 26Ingat ih narai je terjadi metuh zaman Nuh huran, sahindai peristiwa danum bah terjadi. Akan terjadi kilau te metuh wayah sahindai Aku, Anak Kalunen je Allah utus haluli ka bumi. 27Sahindai danum bah dumah, uras uluh manjalani pambelum kilau biasa, kuman tuntang mihup, tuntang kawin, sampai andau katika Nuh tuntang kaluarga ah tame ka huang bahtera. Limbaste salenga-lenga hujan mambanjiri bumi tuntang mampatei uras uluh je dia' tege melai huang bahtera. 28Limbaste kia, katika Aku haluli, kaadaan ah akan kilau huran, katika Lot belum melai bumi. Kawan uluh melai kota Sodom manampa pesta, badagang ije sama je beken, bakabun tuntang manana, manampa huma. 29Tatapi metuh andau Lot tulak mangalihi kota Sodom, Allah mampuhun apui tuntang batu-batu je bakehu bara langit tuntang mampatei uras uluh. 30Kilau te ih je akan terjadi metuh andau katika Aku, Anak Kalunen je Allah utus dumah haluli. 31Metuh andau te dia' tege ije uluh pun je tege melai sapau huma je tau muhun ka huang huma akan manduan kaije bara huma ah. Dia' tege ije uluh pun je tege melai tana je tau haluli ka huma akan manduan kaije. 32Balajar ih bara narai je terjadi dengan sawan Lot katika iye dia' mataati Tuhan. 33Uluh je bausaha manyalamat belum ah, akan kanihawan belum ah. Tatapi uluh je kanihawan belum ah akan salamat. 34Aku bapander dengammu awi metuh wayah Aku dumah haluli, due uluh mungkin tiruh melai ije eka tiruh. Allah akan manduan ije uluh tuntang malihi je beken. 35Amun tege due uluh bawi je mayadia panginan melai eka je sama, ije uluh akan iimbit tulak, tatapi je beken akan ilihi.
36Amun tege due uluh je bagawi melai tana je sama, ije uluh akan iimbit tulak, tatapi je beken akan ilihi.” 37Tuntang ewen bapander dengan Yesus: “Melai kueh, Tuhan?” Yesus manumbah ewen dengan ije pribahasa: “Uras burung je makuman bangkai halajur bakumpul melai kueh pun tege bangkai.”
Currently Selected:
Lukas 17: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
