Lukas 16
16
Kesah Tentang Bendahara Je Dia' Bujur
1Limbaste Yesus kia masanan kesah jituh dengan kawan murid-Ah: “Tege ije uluh tatau je tempun ije uluh kapercayaan akan mangalola harta ah, tatapi uluh kapercayaan te ituduh mahambur-hambur panatau ah. 2Maka uluh tatau te mantehau uluh kapercayaan ah tuntang bapander denga ah: Aku dia' hanjak dengan narai je jadi aku hining tentang ikau. Nenga ih aku laporan terperinci tentang narai je jadi ikau nguan dengan hartaku, awi ikau dia' tau manjadi uluh kapercayaanku hindai. 3Limbaste sang uluh kapercayaan bapikir: Tuanku manduan gawianku, narai je harus aku nguan wayahtuh? Aku talalu lemah akan bagawi melai tana tuntang aku mahamen balaku-laku dengan uluh beken. 4Wayahtuh aku tawan narai je akan aku nguan! Limbaste katika gawianku jadi dia' tege hindai, aku akan maina kawan kawal je akan manarima aku melai huma ewen. 5Limbas uluh kapercayaan te manampa rancana ah, iye mantehau uras uluh je bautang dengan tuan ah. Limbas ewen dumah, iye baisek dengan uluh je sulak: Pire karei utangmu dengan tuanku? 6Uluh te manumbah: Saratus kaleng minyak zaitun. Uluh kapercayaan bapander denga ah: Jituh tagihanmu, capat munduk tuntang tulis ih awi ikau bahutang lime puluh kaleng minyak zaitun. 7Uluh kapercayaan baisek dengan uluh beken: Pire karei utangmu? Uluh te manumbah: Saribu gabang parei. Limbaste uluh kapercayaan bapander denga ah: Jituh tagihanmu, awi ikau bautang hanya' ratus gabang parei. 8Katika tuan ah mahining narai je jadi inguan awi uluh kapercayaan ah je dia' jujur, iye mamuji awi iye dengan harati marancanakan masa depan ah. Hal jituh mamparahan awi kawan uluh duniawi labih harati huang basikap dengan sasama ah ibandingkan dengan kawan uluh je taat dengan Tuhan.
9Jadi Aku manyampai dengammu, hapa ih duit je ikau tempu melai dunia jituh akan mandohop uluh beken mangat ewen manjadi kawalmu. Limbaste katika ikau matei tuntang dia' tau hindai mahapan panatau te, kawan kawalmu akan manyambut ikau melai surga melai kueh ikau akan balihi katatahi ah.”
Satia Huang Pakara Je Kurik
10“Amun ije uluh tau ipercaya huang hal-hal kurik, maka iye kia tau ipercaya huang hal-hal hai'. Tatapi amun ije uluh dia' tau ipercaya huang hal-hal kurik, maka iye kia dia' tau ipercaya huang hal-hal hai'. 11Jadi, amun ikau dia' tau ipercaya akan mangalola panatau je tege melai dunia jituh, maka jadi pasti Tuhan dia' akan mampercayai ikau dengan panatau surga je sabujur ah. 12Amun ikau dia' satia huang mangalola duit tempun uluh beken, maka Tuhan dia' akan manenga kaije akan ikau kalola kabuat.
13Dia' mungkin bagi ije uluh akan malayani due tuan sacara saimbang. Amun iye manguan hal te, maka iye akan mangasihi sala ije tuan ah labih bara je beken atau iye akan mangabdi denga sala ije tuan ah labih bara je beken. Awi te, ikau dia' tau manyembah Tuhan tuntang panatau duniawi metuh wayah je bahayak-hayak.”
14Kawan uluh bara golongan Farisi je mancintai duit mahining narai je ipander Yesus, tuntang ewen manatawe Yesus. 15Lalu Yesus bapander dengan ewen: “Ikau rajin tampayah bujur melai taharep uluh, tatapi Allah mangatawan ateimu je jahat, Allah mambenci narai je ianggap uluh puna penting.
16Hukum Musa tuntang kawan nabi yelah panuntunmu sampai Yohanes pambaptis dumah tuntang bakhotbah. Tatapi wayahtuh Aku mangabar kabar bahalap tentang Karajaan Allah tuntang are uluh je puna handak manjadi bagian bara Karajaan Allah. 17Tatapi satiap Hukum Musa pasti akan terjadi. Labih murah bagi langit tuntang bumi akan ihancurkan bara ije pander huang Hukum Musa je dia' akan terjadi.
18Ije uluh hatue dia' tau mamisahkan kabalie ah tuntang limbaste mangawin bawi beken. Amun iye manguan ah, maka iye jadi bajinah. Kia, ije uluh hatue dia' tau mangawin ije uluh bawi je jadi hapisah. Te kia termasuk pajinahan.”
Uluh Tatau Tuntang Lazarus Je Susah
19Limbaste Yesus bapander: “Huran, belum ih ije uluh tatau je mahapan pakaian je puna mahal tuntang bahalap tuntang mangadakan pesta satiap andau. 20Tege kia ije uluh susah baaran Lazarus je maina buhit melai sahapus biti ah. Pire-pire uluh biasa maimbit tuntang maandak ah melai baun gerbang huma uluh tatau te. 21Tuntang iye makuman tisa panginan je tege limbas uluh tatau te kuman. Je beken te, kawan asu dumah tuntang nganjelap himang-himang ah. 22Limbaste, Lazarus matei tuntang kawan malaikat utusan Tuhan maimbit ah ka eka tahormat melai silan Abraham. Uluh tatau te kia matei tuntang hantun ah ikuburkan. 23Melai hades, eka uluh matei balihi, iye puna mandarita. Katika iye puna kapehe melai kanih, iye nampayah ka hunjun tuntang nampayah Abraham bara kejau tuntang Lazarus munduk melai tukep ah. 24Limbaste uluh tatau te batariak: Datu hiangku, Abraham, ngasi ih aku! Laku ih Lazarus manculup tunjuk ah ka huang danum tuntang dumah ka hetuh akan maandak ah melai jelaku sahingga manjadi sadingen. Aku puna mandarita melai huang apui jituh! 25Tatapi Abraham bapander dengan uluh tatau te: Esungku, ingat ih awi samasa belummu, ikau tempun sagala kaije je ikau handak, tatapi Lazarus dia' maina narai-narai. Jadi, wayahtuh iye belum dengan mangat, tuntang ikau belum huang pandaritaan je mangerikan. 26Je beken alasan jituh, tege rumbak hai' melai antara itah. Jadi, ewen je handak tulak bara hetuh ka eka ketun, dia' tau tulak tuntang ewen je handak dumah bara kanih dengan ikei dia' tau dumah. 27Lalu uluh tatau te manumbah: Aku mamohon, Bapa Abraham je tahormat, nyuhu ih Lazarus buli ka huma bapaku. 28Awi aku maina lime pahari hatue. Jadi, biarkan ih iye tulak tuntang mamperendeng ewen mangat batobat, mangat ewen dia' dumah ka eka je kuntep pandaritaan jituh. 29Tatapi Abraham bapander: Kawan paharimmu maina Hukum Musa tuntang kawan nabi huran. Ewen harus mamatuhi narai je ewen tulis! 30Uluh tatau te bapander: Datu hiangku Abraham, te dia' cukup bagi ewen akan batobat. Tatapi amun ije uluh bara eka uluh matei hingkat tuntang tulak mamparingatkan ewen, maka ewen akan batobat. 31Tatapi Abraham bapander: Amun ewen dia' manaati Hukum Musa tuntang kawan nabi, ewen dia' akan percaya tuntang batobat sinde pun tege uluh je dumah bara antara uluh matei akan mamparingatkan ewen.”
Currently Selected:
Lukas 16: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
