Lukas 15
15
Kesah Tentang Domba Je Nihau
(Mat. 18:12-14)
1Metuh sinde andau, kawan panagih pajak tuntang are uluh beken je kia ikenal sabagai uluh badosa dumah-dumaha dengan Yesus akan mahining pangajaran-Ah. 2Nampayah te, kawan pangajar hukum Musa tuntang uluh bara golongan Farisi ngomel: “Narai jituh! Iye manarima kawan uluh badosa, bahkan kuman hayak ewen!” 3Limbaste Yesus masanan kesah jituh dengan ewen. Iye bapander: 4“Misalkan sala ije bara ikau tempun saratus kungan domba amun kanihawan sala ije ah. Ikau pasti akan malihi jalatien puluh jalatien domba beken melai padang balantara tuntang tulak manggau domba je nihau sampai ikau manyundau ah. 5Katika iye manyundau domba te, iye puna hanjak sahingga iye mangangkat ah tuntang mangendong ah. 6Limbaste iye haluli ka huma ah, tuntang iye marawei kawan kawal tuntang tatangga ah akan dumah ka huma tuntang mamander dengan ewen: Dumah tuntang hanjak ih hayakku, awi aku jadi manyundau dombaku je nihau!” 7Yesus bapander: “Dengan cara je sama, Allah tuntang kawan malaikat-Ah melai surga akan puna hanjak awi ije uluh badosa je haluli dengan Allah bara jalatien puluh jalatien uluh bahalap je dia' perlu batobat.”
Kesah Tentang Koin Je Nihau
8Yesus masanan ije kesah beken. Iye bapander: “Saandai ah ije uluh bawi tempun sapuluh duit perak tuntang kanihawan ije. Dia'kah iye mampelum sumbu, mamapas huma, tuntang manggau koin je nihau te dengan buah-buah sampai iye manyundau ah? 9Limbaste iye mantehau uras kawan kawal ah je balihi melai tukep ah. Iye bapander: Aku jadi manyundau koin je nihau, dumah ih ka humaku tuntang itah uras tau hanjak bahayak-hayak. 10Dengan cara je sama, aku jamin awi katika ije uluh badosa batobat bara dosa-dosa ah, tege sukacita melai antara kawan malaikat Tuhan.”
Kesah Tentang Anak Je Nihau
11Limbaste Yesus masanan ije kesah beken. Iye bapander: “Ije uluh hatue maina due uluh anak hatue.” 12Anak je tambusu bapander dengan bapa ah: Dohop nenga aku bagianku bara warisan jituh sahindai bapa matei. Bapa ah satuju akan manguan hal jituh tuntang iye mambagi harta ah melai antara kadue anak hatue ah. 13Pire-pire andau limbaste, anak tambusu jituh majual harta banda ah tuntang malihi huma dengan duit je iye dinu ka negeri je kejau. Melai kanih iye mahambur-hamburkan uras duit ah dengan manjalani pambelum je mewah tuntang dia' bamoral. 14Limbas iye mampalepah uras harta ah, terjadi ih klauan je parah melai negeri te, tuntang palus iye manjadi susah tuntang klauan. 15Jadi, limbaste iye tulak bagawi dengan ije uluh manana melai negara te. Uluh te manyuhu ah akan mangurus kawan bawui ah. 16Awi dia' tege uluh je manenga ah kuman tuntang anak te puna blau tuntang handak makuman narai je ikinan awi kawan bawui te 17Katika anak te manyadari kasala ah, iye bapander dengan biti ah kabuat: Uras karyawan bapaku maina are panginan, samantara melai eka jituh aku klauan! 18Aku akan malihi eka jituh akan haluli dengan bapaku tuntang bapander denga ah: Bapa, aku jadi badosa dengan Allah je melai surga tuntang basala dengammu. 19Jadi, aku dia' pantas bagi ikau akan mantehau aku sabagai anakmu. Sabalik ah, perlakukan aku kilau sala ije karyawanmu. 20Limbaste iye nampara manguan pananjungan haluli ka bapa ah. Amun katika iye masih kejau bara huma, bapa ah nampayah pandumah ah tuntang atei ah inguntep dengan rasa kangasi denga ah. Iye hadari manukep tuntang mameluk tuntang manyium ah. 21Anak te bapander: Bapa, aku jadi badosa dengan Allah tuntang manampa sala dengammu. Jadi, aku dia' pantas ikau nyewut sabagai anakmu. 22Tatapi bapa ah manyuhu pire-pire palayan ah: Capat! Imbit ih jubah bahalap je aku tempu tuntang pahapan ih iye dengan jubah te. Kia pahapan ih tisin melai tunjuk tuntang sapatu melai pai ah. 23Limbaste tulak tuntang duan anak sapi je paling baseput, patei tuntang masak ih. Ayu itah manguan pesta akan marayakan haluli anakku! 24Saolah-olah anakku jadi matei, tuntang wayahtuh iye jadi belum haluli. Saolah-olah iye jadi nihau tuntang wayahtuh aku jadi manyundau ah! Maka nampara ih ewen manguan pesta. 25Katika hal jituh terjadi, kaka hatue ah metuh bagawi melai tana. Hamalem te, katika iye mananjung buli tuntang manukep huma, iye mahining suara uluh je metuh main musik tuntang manari. 26Lalu, iye mantehau sala ije palayan tuntang baisek: Buhen kawan uluh marayakan ah kilau jituh? 27Palayan te manumbah: Paharimmu jadi haluli ka huma tuntang bapamu jadi mampatei anak sapi je metuh ikei gembala tuntang jadi manampa pesta hai'. Ikei marayakan ah awi iye jadi haluli dengan salamat. 28Limbaste sang kaka manjadi puna singi tuntang dia' handak tame ka huang huma. Jadi, bapa ah balua tuntang balaku akan tame. 29Tatapi iye dengan basingi manumbah bapa ah: Hining! Salama jituh aku jadi bagawi kilau jipen dengammu. Aku dia' puji malangar ije pun parintahmu. Amun, ikau dia' puji manengaku ije kungan kambing kurik pun mangat aku tau marayakan bahayak-hayak kawan kawalku. 30Tatapi wayahtuh anakmu je beken jadi buli. Iye jadi mampalepah hartamu dengan kawan bawian je dia' bamoral, amun ikau manguan pesta dengan mapatei anak sapi? 31Tatapi bapa ah manumbah: “Anakku, ikau halajur balihi hayakku tuntang uras harta bandaku yelah ikau tempu. 32Tatapi wayahtuh yelah waktu je pas bagi itah akan marayakan tuntang hanjak sanang awi saolah-olah paharimmu jadi matei, tuntang wayahtuh iye belum haluli. Saolah-olah iye jadi nihau tuntang wayahtuh aku jadi manyundau ah!”
Currently Selected:
Lukas 15: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
