Lukas 14
14
Yesus Mapangkeleh Ije Uluh Je Pehe
1Metuh sinde andau Sabat, ije uluh pamimpin uluh bara golongan Farisi marawei Yesus akan kuman hayak dengan uluh beken melai huma ah tuntang kawan uluh Farisi serta pangajar hukum Musa mangawasi ah dengan taliti manggau-gau kasalan-Ah. 2Salenga-lenga ije uluh hatue dengan pai kembang mendeng melai taharep Ah. 3Yesus baisek dengan kawan-uluh bara golongan Farisi tuntang pangajar hukum Musa: “Naraikah Hukum Pengajaran Musa manyuhu ije uluh mapangkeleh uluh pehe metuh andau Sabat, atau dia' manyuhu ah?” 4Tatapi ewen dia' manumbah-Ah. Lalu Yesus maimbing uluh te, mapangkeleh ah, tuntang manyuhu ah buli ka huma ah. 5Limbaste Yesus bapander dengan ewen: “Amun sala ije bara anakmu atau ije kungan sapi manjatu ka huang rumbak metuh andau Sabat, ikau harus selenga manarik ah balua, meskipun andau te yelah andau Sabat.” 6Amun ewen dia' tau mambaleh panderan Ah.
Basikap Ih Randah Atei Tuntang Murah Atei
7Katika Yesus manampayah awi pire-pire tamu kuman hamalem mamilih eka je inyadiakan akan tamu-tamu tahormat, Iye manasehati ewen dengan ije kesah: 8“Katika ije uluh marawei ikau ka pesta perkawinan, ela munduk melai sala ije eka penting. Mungkin akan tege uluh je labih penting bara ikau je kia irawei. 9Amun uluh je labih penting bara ikau dumah, tempun huma je marawei ikau badue akan manguang ikau tuntang bapander: Dohop nenga ekamu dengan uluh jituh. Maka ikau harus munduk melai kursi je paling dia' penting. Hal jituh akan manampa ikau mangkeme puna mahamen. 10Sabalik ah, katika ikau irawei kaije pesta, munduk ih melai eka je paling dia' penting. Limbaste katika tempun huma nampayah ikau, iye akan dumah tuntang bapander: Kawalku, dumah tuntang munduk ih melai eka je labih penting. Maka uras tamu je beken akan nampayah awi tempun huma puna mahormati ikau. 11Kia, ingat ih hal jituh: Allah akan marandah uluh je mahunjun biti. tuntang Iye akan mahunjun kawan uluh je marandah biti.”
Eweh Je Harus Irawei
12Limbaste Yesus bapander dengan uluh je marawei-Ah: “Amun ikau manampa pesta atau perjamuan, ela ih halajur marawei kawan kawal, kaluarga, pahari biti, tuntang kawan tatangga je tatau. Amun ikau manguan ah, ewen kia akan maraweimu ka pesta ewen kabuat, sahingga ewen akan mambalehmu. 13Sabalik ah, satiap kali ikau manampa pesta, rawei ih kawan uluh je dia' maina duit, ewen je cacat, ewen je dia' tau mananjung dengan bahalap, tuntang ewen je dia' tau nampayah. 14Amun ikau manguan hal te, ikau akan irajin awi Tuhan, awi kawan uluh je ikau rawei dia' tau mambaleh ikau. Allah akan mambaleh ah metuh andau kahingkat haluli uras uluh bujur bara kapatei.”
Kesah Tentang Kawan Uluh Je Rajin Baalasan
(Mat. 22:1-10)
15Mahining hal jituh, sala ije tamu kuman hamalem bapander dengan Yesus: “Uluh je akan manghadir perjamuan melai huang Karajaan Allah iberkati awi Allah.” 16Yesus masanan kesah jituh dengan ah: “Tege ije uluh je handak manampa pesta hai' tuntang iye marawei are uluh akan dumah. 17Katika uras jadi sadia akan pesta, iye mautus ije uluh palayan akan manyampaikan peteh jituh dengan kawan tamu je jadi irawei: Dumah ih ka pesta te, awi uras ah jadi sadia. 18Tatapi ewen uras nampara mamander denga ah alasan je babeda buhen ewen dia' tau dumah. Uluh kasulak bapander: Maafkan aku. Aku dia' tau dumah awi aku jadi mamili ije petak tuntang harus tulak mameriksa ah. 19Uluh kadue bapander: Mohon maafkan aku. Aku dia' tau umba awi aku harun bewei mamili lime pasang sapi, tuntang aku akan tulak wayahtuh akan nampayah naraikah ewen tau bagawi dengan bahalap. 20Uluh katelu bapander: Maafkan aku, aku dia' tau mahadiri pesta jituh, awi aku harun bewei kawin. 21Palayan te haluli tuntang masanan dengan tuan ah narai je jadi ewen mander, tuntang tempun huma te manjadi puna basingi dengan ewen. Limbaste iye bapander dengan palayan ah: Tulak ih dengan capat ka satiap jalan hai' tuntang jalan satapak melai kota jituh. Rawei kawan uluh je dia' tege duit, ewen je cacat, ewen je dia' tau mananjung dengan bahalap, tuntang ewen je dia' tau nampayah akan dumah ka pesta te. 22Katika palayan te haluli, iye bapander: Tuan, aku jadi manguan narai je tuan nyuhu. Amun, masih tege pire-pire kursi melai pesta te je buang. 23Maka tuan ah bapander: Tulak ih ka luar kota, ka jalan-jalan utama tuntang jalan-jalan kurik, tuntang imbit ih kawan uluh akan dumah ka pesta te, sahingga humaku akan kuntep dengan uluh. 24Aku bapander dengammu, dia' ije uluh pun bara ewen je jadi Kurawei talabih helu akan mangkeme panginan je jadi kusadiakan.”
Manjadi Ije Uluh Murid
25Metuh ije andau, are uluh je metuh mananjung hayak Yesus huang pananjungan manuju kota Yerusalem. Yesus babalik tuntang bapander dengan ewen: 26“Amun ikau handak manjadi murid-Ku, ikau harus mangasihi Aku labih bara kasihmu dengan bapa tuntang indummu, kabalimmu, kawan anak tuntang kawan paharimmu, tuntang bahkan tahasengmu kabuat. Amun dia', ikau dia' tau manjadi murid-Ku. 27Ikau dia' tau manjadi murid-Ku amun ikau dia' sadia memikul salib panderitaan tuntang manuntut Aku.
28Misalkan ikau handak mambangun ije bangunan je gantung. Kasulak-sulak ikau akan munduk tuntang bahitung dengan taliti pire biaya ah. Limbaste ikau akan nampayah naraikah ikau maina cukup duit akan manyalesaikan pambangunan ah. 29Amun ikau dia' mamperhitung ah, ikau mungkin baya akan manyalesaikan pandasi bewei tatapi dia' tau malanjutkan pambangunan tisa ah awi kakurangan duit, maka uras uluh je nampayah ah akan manantawe ikau. 30Ewen akan bapander: Uluh jituh dia' tau manyalesaikan pambangunan gedung gantung je jadi inampara!
31Sinde hindai, amun ije uluh raja balua dengan sapuluh ribu uluh akan malawan raja beken je dumah dengan due puluh ribu uluh, iye akan munduk talabih helu tuntang mamutuskan naraikah iye cukup kuat akan mangalahkan raja beken te. 32Amun raja manyadari awi dia' mungkin manang, maka iye akan mangirim utusan akan manyundau raja musuh samentara raja beken tuntang pasukan ah masih kejau akan mamander: Narai je harus itah nguan mangat itah dia' perlu berperang? 33Jadi dengan cara je sama, ikau dia' tau manjadi murid-Ku kacuali ikau basadia akan manyarahkan uras je ikau tempu.
34Kilau je ikau katawan: Uyah memang baguna, tatapi amun uyah kanihawan rasa, dia' tege je tau mangaluli rasa ah. 35Uyah samacam te dia' tau ihapan bahkan sabagai pupuk akan manyuburkan petak, sahingga uluh manganan ah. Eweh pun je handak mamahami narai je aku mander harus mahining aku bahalap-halap.”
Currently Selected:
Lukas 14: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
