Lukas 13
13
Yesus Masanan Uluh Akan Batobat Atau Ewen Akan Matei
1Katika Yesus metuh mangajar, metuh waktu te pire-pire uluh bara kumpulan dumah tuntang masanan dengan Yesus tentang kawan-uluh Galilea je ipatei awi printah Pilatus gubernur Romawi. Ewen ipatei katika metuh mampersembahkan kurban sahingga daha ewen mahasur hayak dengan daha metu kurban ewen. 2Yesus Bapander: “Naraikah ikau bapikir awi kawan-uluh Galilea te ipatei kilau te awi ewen labih badosa bara kawan-uluh Galilea je beken? 3Dia', beken te alasan ah. Tatapi amun ikau dia' haluli dengan Allah bara dosa-dosamu, Allah akan mahukum ikau uras dengan papatei katatahi. 4Kilenampi dengan hanya' balas uluh je matei tapenyet manara melai Siloam? Naraikah manurutmu ewen labih badosa bara kawan-uluh beken je balihi melai kota Yerusalem? 5Dia', beken te alasan ah. Tatapi amun ikau dia' haluli dengan Allah bara dosa-dosamu, Allah akan mahukum ikau uras dengan papatei katatahi.”
Ije Kesah Tentang Batang Bua Je Dia' Tau Mua
6Limbaste Yesus mamander ije kesah dengan ewen: “Tege ije uluh hatue maina batang bua melai kabun anggur ah. Katika sampai waktu ah batang te mamua, iye tulak akan nampayah naraikah batang bua te mamua, tatapi iye dia' manyundau bua ah. 7Jadi, iye bapander dengan tukang kabun ah: Hining, salama telu nyelu aku jadi dumah ka hetuh sacara taratur akan manggau bua melai batang bua jituh, tuntang aku hindai manyudau bua naraipun. Awi te, neweng ih batang te! Ela sampai manyia-nyia petak je bahalap jituh. 8Tukang kabun te manumbah: Tuan, dohop biar ih batang te tatap tege melai kabun ije nyelu hindai. Aku akan mancangkul petak melai sakaliling ah tuntang manenga ah pupuk. 9Amun batang te mamua ije nyelu je harian, maka te bahalap. Amun dia', maka aku akan maneweng ah.”
Yesus Mapangkeleh Ije Uluh Bawi Lumpuh Melai Andau Sabat
10Metuh sinde andau Sabat, Yesus metuh mangajar kawan-uluh melai sala ije eka ibadah uluh Yahudi. 11Melai kanih tege ije uluh bawi je irasuk roh jahat je manampa iye lumpuh salama hanya' balas nyelu, tulang-likut ah maketuk tuntang iye dia' ulih mendeng dengan lurus. 12Yesus nampayah bawi te, tuntang mantehau ah akan dumah denga-Ah tuntang bapander: “Pahari-Ku je bawi, wayahtuh ikau jadi bebas bara kacacatmu.” 13Lalu Yesus maandak lenge-Ah melai hunjun tulang-likut bawi te, tuntang bawi te palus mendeng lurus. Limbaste iye nampara mamuji Tuhan awi jadi mapangkeleh ah. 14Tatapi pamimpin huma ibadah uluh Yahudi te manjadi basingi awi Yesus jadi mapangkeleh metuh andau Sabat. Iye bapander dengan uluh are: “Tege jahawen andau huang saminggu akan bagawi. Awi te, dumah ih metuh andau-andau te tuntang balaku kakeleh bara Tuhan. Ela dumah metuh andau Sabat, awi te sala.” 15Tatapi Tuhan manumbah: “Hei uluh munafik, naraikah ikau dia' bagawi, ikau malapas sapi bara kandang ah metuh andau Sabat tuntang mampahayak ah mihup danum? 16Jadi, dia' sala akan mapangkeleh bawi jituh bara panyakit ah metuh andau Sabat. Awi iye yelah anak bawian Abraham, tuntang Setan jadi malumpuhkan dengan panyakit jituh salama hanya' balas nyelu.” 17Metuh Iye mamander hal jituh, tumbah ah manampa kawan musuh ah mahamen dengan biti ewen kabuat. Uras uluh are makeme hanjak dengan kaajaiban je inguan ah.
Kesah Tentang Karajaan Allah
(Mat. 13:31-33; Mrk. 4:30-32)
18Limbaste Yesus bapander: “Aku akan manenga ije kesah tentang Karajaan Allah dengammu. Kilau jituh ih kaadaan ah. 19Hal jituh kilau bawak sawi je imbul ije uluh melai kabun ah. Bibit te tumbu sahingga manjadi batang je puna hai', tuntang kawan-burung melai udara manampa sarangan melai edan-edan ah.” 20Limbaste Yesus bapander: “Ijinkan ih Aku masanan ije kesah tentang Karajaan Allah dengammu. 21Jituh kilau je terjadi metuh sajumlah kurik ragi je induan awi ije uluh bawi tuntang campur ka huang tepung huang jumlah hai' tuntang manampa uras adonan khamer.”
Eweh Je Akan Isalamatkan
22Katika Yesus malanjutkan pananjungan hayak kawan murid-Ah ka kota Yerusalem, Iye mahalau kota-kota tuntang desa-desa tuntang mangajar tentang Karajaan Allah.
23Ije uluh baisek denga-Ah: “Tuhan, naraikah baya pire-pire uluh bewei je inyalamat bara dosa?” Yesus manumbah dengan uras uluh je tege melai kanih: 24“Bausaha ih sakuat tanaga akan tame ka huang Karajaan Allah, je bagaikan antep je sasak melai huang huma. Aku bapander dengammu: Are uluh akan bausaha tame, tatapi ewen dia' akan tau maname ah. 25Limbas tempun huma misik tuntang manutup antep, maka ikau akan balihi melai luar. Ketun akan mangatuk antep tuntang mamohon: Bapa, dohop izinkan ikei tame! Tapi iye akan manumbah: Aku dia' mangasene ikau atau bara kueh ikau baasal. 26Limbaste ikau akan nampara bapander: Tapi Guru, ikei puji kuman hayak Ikau. Tuntang Ikau mangajar melai jalan-jalan kota ikei. 27Tatapi iye akan manyangkal awi iye mangasene ikau. Iye akan manyewut ikau sabagai uluh je dia' bujur tuntang manyuhu ikau akan tulak. 28Metuh waktu te ikau akan manangis tuntang hakarit kasinga huang kasingi, awi ikau akan nampayah Abraham, Ishak, Yakub, tuntang uras nabi melai huang Karajaan Allah, tatapi ikau kabuat akan inganan. 29Tuntang are uluh beken Yahudi akan dumah bara uras dunia tuntang akan kuman melai pesta melai Karajaan Allah. 30Fakta ah, tege pire-pire uluh je tempun eka tarandah huang belum wayahtuh je akan tempun eka paling hunjun melai masa kanbaun, tuntang tege kia je tempun eka paling hunjun wayahtuh je akan tempun eka tarandah melai masa kanbaun.”
Kasih Yesus Dengan Kawan Uluh Melai Kota Yerusalem
(Mat. 23:37-39)
31Metuh waktu te dumah ih pire-pire uluh bara golongan Farisi tuntang maparingatkan Iye, pander ah: “Ikau harus malihi eka jituh tuntang tulak ka eka beken, awi Herodes handak mampatei Ikau.” 32Tatapi Yesus bapander dengan ewen: “Herodes te sama dengan serigala je licik. Mander ih denga ah awi Aku akan mangusir setan tuntang mapangkeleh uluh huang waktu je singkat, tuntang Aku akan palus manyalesaikan gawian-Ku. 33Naraipun je terjadi, Allah handak Aku malanjut pananjungan akan samantara waktu manuju kota Yerusalem. Tentu dia' bujur amun ije uluh nabi kilau Aku ipatei melai kueh pun kacuali melai kota Yerusalem. 34Oh! Ketun panduduk kota Yerusalem! Aku puna sedih dengan ketun! Ikau tabiasa mampatei kawan nabi je iutus Allah dengammu dengan majakah ewen dengan batu sampai matei! Aku rancak kali handak mamelukmu dengan jiret, kilau indu manuk je mameluk kawan anak ah melai penda palapas ah, tatapi ikau dia' mangizinkanku! 35Hining ih, Bait Sucimu akan ilihi awi Tuhan. Ikau dia' akan puji nampayah Aku hindai sampai ikau bapander: Ayu ih itah mamuji Iye je dumah dengan kuasa Tuhan.”
Currently Selected:
Lukas 13: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
