Lukas 12
12
Pangajaran Khusus Bagi Kawan-Murid
(Mat. 10:26-27)
1Metuh wayah te, kumpulan uluh je puna are jadi bakumpul sahingga kawan-uluh saling mahunjek ije sama je beken. Yesus nampara bapander dengan kawan murid labih helu: “Buah-buah ih mangat ikau dia' manjadi munafik kilau kawan-uluh bara golongan Farisi. Kamunafikkan ewen mampangaruh uras uluh, kilau ragi mampangaruhi adonan. 2Ela ih kilau ewen awi uras kaije je kalunen nyuhukkan akan ibuka awi Tuhan. Ikau dia' tau manyahukkan naraipun akan katatahi ah. 3Jadi, narai je ikau bisikan dengan pire-pire uluh sacara pribadi akan inyampai melai taharep umum, sahingga uras uluh akan mahining ah.” 4Yesus malanjutkan panderan-Ah: “Kawan-kawal-Ku, ela ih ikau mikeh dengan kalunen, walaupun ewen tau mampatei ikau tatapi ewen dia' tau manguan narai-narai hindai taharep ikau limbas te! 5Je harus ikau mikeh yelah Tuhan. Awi Tuhan beken baya manempun kuasa akan mampatei uluh tatapi kia maina kuasa akan manjakah uluh ka huang naraka. Aku bapander dengammu, ije-ije ah je ikau mikeh yelah Tuhan. 6Ikau pasti tawan awi lime kungan burung kurik ijual saharga due koin tambaga. Tatapi walaupun jatun rega ah Allah dia' puji manalingau ije pun bara kawan-burung. 7Amun Iye labih mamikirkanmu! Iye bahkan mangatawan jumlah balau melai takulukmu. Jadi ela ih mikeh, awi ikau labih barega melai mata Allah bara kawan-burung te. 8Aku bapander denganmu: Amun ije uluh mangaku percaya Aku melai taharepmu maka Aku, Anak Kalunen je Allah utus#12:8 Anak Kalunen yelah galar akan Yesus je manunjukkan awi Iye yelah panyalamat je iutus Allah tuntang manunjukkan karandahan-Ah metuh waktu melai dunia kia akan mamander melai taharep Allah tuntang kawan-malaikat-Ah awi uluh te yelah murid-Ku. 9Tatapi eweh bewei je mamander melai taharep uluh beken awi iye beken murid-Ku, Aku kia akan mamander akan Tuhan tuntang kawan malaikat-Ah awi uluh te beken murid-Ku. 10Tatapi Allah tau maampuni eweh bewei je mamander panderan je malawan Aku, Anak Kalunen Je Allah utus tatapi Allah dia' akan maampun eweh bewei je mahina Roh Kudus. 11Jadi katika ewen maimbit ikau ka taharep kawan panguasa tuntang pamimpin eka ibadah uluh Yahudi akan ipariksa awi ketun yelah murid-Ku, ela ih khawatir tentang narai je harus ketun pander akan mambela bitim. 12Awi katika ketun iisek, Roh Kudus akan mangajar ketun narai je pas akan ipander metuh wayah te.”
Yesus Mampaingat Kawan-Uluh Mangat Dia' Sarakah
13Ije uluh hatue bara antara uluh are te bapander dengan Yesus: “Guru, mander ih akan paharingku akan manenga dengangku warisan palihi bapa ikei.” 14Tatapi Yesus manumbah: “Jatun je manunjuk Aku akan manjadi hakim akan manyalesaikan masalah uluh tentang harta benda.” 15Limbaste Yesus bapander dengan ewen: “Buah-buah ih! pastikan ketun dia' sarakah taharep naraipun, awi walaupun ketun maina are harta, te beken ih je paling penting huang belum jituh.”
16Limbaste Yesus masanan ije kesah akan ewen: “Tege ije uluh manempun hasil getem je are. 17Jadi, iye nampara bapikir: Karangking parei jadi dia' cukup akan maina hasil getemku, narai je harus aku nguan? 18Akhir ah uluh te mamutuskan akan mambukar karangking parei ah je tahi tuntang manampa karangking parei je labih hai' tuntang maina hasil getem tuntang harta banda beken ah melai huang karangking parei je taheta. 19Limbaste uluh te bapander dengan biti ah kabuat: Wayahtuh aku jadi maina cukup are barang bahalap je taina akan batahan belum salama banyelu-nyelu. Istrahat, kuman, mihup, tuntang manikmati belum! 20Tatapi limbaste Allah bapander denga ah: Ikau kaliru! Alem jituh Aku akan manduan asengmu. Limbaste uras je ikau ina akan manjadi tempun uluh beken, tuntang dia' manjadi tempunmu! 21Te ih je akan terjadi dengan uluh je manggupulkan harta akan biti ah kabuat, tatapi dia' bausaha mangumpulkan harta surgawi tuntang dia' handak manjadi tatau melai taharep Allah.”
Tende Ih Khawatir Tuntang Percaya Ih Dengan Tuhan
(Mat. 6:25-34)
22Limbaste Yesus bapander dengan kawan-murid-Ah: “Te ih awi ah Aku bapander dengammu, tende ih mangakhawatirkan hal-hal je ketun perlukan huang belum jituh, kilau narai je akan ketun kinan atau narai je akan ketun hapan. 23Awi belum ikau labih penting bara panginan je ikau kinan. Bitimmu labih penting bara pakaian je ikau hapan. 24Payah ih kawan-burung melai hunjun. Ewen dia' perlu maimbul tuntang mangetem, tuntang dia' perlu manampa karangking tatapi Allah manyadia panginan akan ewen. ikau perlu tawan awi melai matan Allah ikau kejau labih barega bara kawan-burung. 25Jadi ela khawatir! Awi kakhawatiranmu dia' akan mamperpanjang umurmu isutpun. 26Awi te, amun ikau bahkan dia' tau manguan hal kurik kilau te, maka ikau dia' perlu mangkhawatirkan hal beken huang pambelum. 27Payah ih kilenampi cara kambang tumbu. Ewen dia' bagawi karas, kia dia' manampa pakaian ewen kabuat. Tatapi Aku bapander dengammu awi Raja Salomo huang kamegahan ah, pakaian ah dia' labih bahalap bara sala ije bara kambang te. 28Amun Tuhan puna paduli dengan kambang-kambang tuntang uru beken, walaupun andau jituh tege tuntang jewu imapui, maka Tuhan akan marawatmu, hei ketun je kurang baiman. 29Ela halajur mamikirkan narai je ikau kinan tuntang mihup. Ela khawatir tentang hal-hal te. 30Kalunen dia' tawan awi Allah mamperhatikan uras hal te. Tatapi Bapamu je melai surga tawan awi ikau mamerlukan ah. 31Awi te, pusatkan parhatian metuh narai je tau ikau nguan akan Karajaan Allah, maka Tuhan akan manyadiakan hal-hal je ikau perlu.
32Ikau yelah kalompok kurik kawan murid-Ku. Ela ih mikeh, awi Bapamu je melai surga dengan hanjak atei manenga Karajaan-Ah dengammu.
33Jadi, jual ih narai je ikau tempu tuntang nenga ih duit ah dengan kawan uluh susah. Kumpulkan ih harta akan bitimmu kabuat melai surga. Harta surgawi te dia' akan puji kanihawan nilai ah. Dia' tege ije pun je tau manakau ah tuntang dia' tege gagiring je tau makuma ah.” 34Melai kueh pun hartamu tege, melai hete ih ateimu tege.
Pandumah Anak Kalunen Je Allah Utus
(Mat. 24:43-51)
35Yesus malanjutkan tuntang bapander: “Basadia ih halajur akan Aku, sama kilau hamba-hamba je mahapan pakayan akan bagawi dengan sumbu je hajelak. 36Jadi ih kilau palayan je manunggu tuan ah buli bara pesta perkawinan. Katika iye dumah tuntang mangatuk antep, ewen palus mambukakan antep akan ah tuntang manyambut ah. 37Katika tuan haluli tuntang manyundau kawan palayan ah jadi misik tuntang basadia akan manyambut pandumah ah, iye akan puna hanjak dengan ewen. Aku jamin iye akan mahapan pakayan bagawi, manyuhu ewen munduk melai meja tuntang manyadiakan panginan. 38Bahkan amun tuan haluli melai bentuk alem atau sahindai matan andau dumah, katika iye dumah tuntang manyundau kawan palayan jadi misik tuntang basadia akan haluli ah iye, iye akan puna hanjak dengan ewen. 39Jituh yelah contoh beken je tau ikau pikirkan. Amun ikau tawan pea ije uluh panakau barancana akan manakau kaije bara humamu, ikau akan tatap tajaga akan mangahana panakau jituh tame. 40Kilau te kia ikau, ikau harus halajur basadia-sadia, awi Aku, Anak Kalunen je Allah utus, akan dumah haluli metuh wayah je dia' ikau sangka-sangka.”
41Petrus baisek: “Tuhan, naraikah Ikau bapander tentang kesah jituh baya akan ikei atau akan uluh beken?” 42Limbaste Tuhan manumbah: “Aku mamander uras hal jituh akan uras uluh. Jadi ih kilau ije uluh palayan je bijaksana tuntang tau ipercaya je tau ipilih awi tuan ah akan mangurus palayan-palayan je beken tuntang manenga ewen panginan metuh waktu je pas. 43Palayan te akan bauntung amun tuan nampayah iye malaksanakan tanggung jawab ah katika tuan ah haluli ka huma. 44Aku jamin awi tuan ah akan manenga tanggung jawab akan mangalola uras harta banda. 45Amun, palayan te bapikir awi tuan dia' akan haluli huang waktu je tahi, maka palayan te mungkin akan nampara mamukul kawan palayan hatue tuntang bawian. Tuntang iye mampalepah are waktu akan bapesta tuntang babusau-busau. 46Limbaste tuan akan haluli metuh andau je sama sinde dia' iharapkan awi palayan te. Tuan manenga ah hukuman je babehat tuntang mangirim ah tulak akan bagabung dengan kawan-palayan beken je dia' taat.
47Palayan je mangatawan kahandak tuan ah tatapi dia' basadia-sadia atau dia' manguan ah akan manarima pukulan je karas. 48Tatapi hamba je dia' mangatawan kahandak tuan ah tuntang manguan hal-hal je manampa iye pantas ihukum, akan manarima labih isut pukulan. Ije uluh tuan balaku are bara uluh je jadi iye nenga are tuntang tuan balaku labih are hindai bara uluh je iye nenga tanggung jawab labih are.”
Kawan Uluh Akan Manantang Ije Sama Je Beken Awi Ajaran Yesus
(Mat. 10:34-36)
49Limbaste Yesus bapander: “Tujuan-Ku dumah ka dunia yelah akan mampelum apui melai antara kalunen. Tuntang Aku puna baharap apui te jadi hajelak! 50Tatapi kasulak-sulak aku harus mahalau baptisan kapehe je babehat. Aku akan puna mandarita sampai uras ah salesai. 51Ela bapikir awi pandumah-Ku ka bumi akan maimbit pandamaian melai antara kalunen. Sabalik ah, Aku dumah akan manyebabkan perpecahan melai antara kalunen. 52Nampara wayahtuh, amun tege lime anggota huang ije kaluarga, ewen akan saling manantang. Telu uluh akan malawan due uluh, tuntang due uluh akan malawan telu uluh, awi Aku. 53Akan tege perpecahan antara bapa tuntang anak hatue, indu tuntang anak bawian, empu tuntang manantu bawi, awi Aku.”
Yesus Manyuhu Uluh Are Akan Basadia-Sadia Manaharep Narai Je Akan Terjadi
54Limbaste Yesus bapander dengan uluh are: “Amun ikau nampayah awan kaput mandai' bara laut melai hila barat, palus ikau bapander awi hujan akan palus muhun. Tuntang hal te memang terjadi. 55Tuntang katika riwut ngahimbun bara salatan, ikau bapander awi cuaca akan balasut, tuntang hal te memang terjadi. 56Dasar uluh munafik! Ikau tau mamperkira cuaca dengan nampayah bumi tuntang langit. Buhen ikau dia' mamahami makna bara peristiwa je metuh terjadi wayahtuh?
57Buhen ikau dia' mamutuskan kabuat narai hal je pas akan ikau nguan? 58Amun ije uluh manuduh ikau tuntang handak maimbit ikau ka pangadilan nguan ih uras je ikau tau akan manyalesaikan masalah sahindai ikau sampai melai pangadilan. Amun dia', iye mungkin akan maimbit ikau sacara paksa ka taharep hakim, je limbaste akan manyarah ikau ka polisi tuntang ikau akan ipanjara. 59Aku jamin, ikau dia' akan puji balua bara panjara sahindai ikau mambayar uras utangmu.”
Currently Selected:
Lukas 12: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
