Lukas 11
11
Yesus Mangajarkan Tentang Doa
(Mat. 6:9-13; 7:7-11)
1Sinde andau katika Yesus metuh badoa melai ije eka. Katika Yesus salesai badoa, sala ije murid-Ah baisek denga-Ah: “Guru, dohop ajar ih ikei narai je harus imander katika ikei badoa, kilau je iajarkan awi Yohanes Pambaptis dengan murid-Ah.” 2Lalu Yesus bapander dengan ewen: “Amun ikau badoa, mander ih: Bapa ikei, ikuduskan ih aram-Mu, samoga Karajaan-Mu dumah. 3Dohop sadiakan panginan je ikei perlu satiap andau. 4Ampun ih dosa ikei, kilau ikei pun maampun uluh je manampa jahat dengan ikei. Ela ih ijinkan ikei icobai akan manguan dosa.” 5Limbaste Yesus mamander kesah jituh dengan ewen: “Coba itah bayangkan amun sala ije bara ketun tulak ka huma kawal ah metuh bentuk alem tuntang bapander denga ah: Paharingku, taukah ikau manenga aku pire-pire panginan? 6Ije uluh kawalku salenga-lenga dumah ka humaku bara kaije pananjungan. Tatapi aku dia' maina panginan akan inenga denga ah. 7Limbaste amun kawalmu manumbah bara huang huma ah tuntang mamander: Ela nyunhu aku misik, aku jadi mangunci antep. Tuntang kawan anakku jadi batiruh. Jadi, aku dia' handak misik akan manenga panginan. 8Aku akan masanan dengammu awi iye dia' akan manengamu panginan baya awi ikau yelah kawal ah. Tatapi iye akan misik tuntang manenga panginan kakarei je ikau perlukan awi ikau tarus manarus balaku.
9Awi te Aku bapander dengammu, laku ih maka Tuhan akan manenga dengammu, gau ih maka ikau akan manyundau tuntang ngatuk ih antep maka Tuhan akan mambukakan antep dengammu. 10Awi satiap uluh je balaku, akan inenga. Satiap uluh je manggau, akan manyundau tuntang antep akan ibuka bagi satiap uluh je mangatuk ah. 11Pasti dia' tege bapa melai antara ketun je akan manenga handipe dengan anak ah katika anak ah balaku lauk. 12Tuntang dia' akan tege melai antara ketun je akan manenga katipkala katika anak ah balaku hanteluh! 13Walaupun ketun yelah uluh je jahat, tatapi ketun tawan kilenampi manenga panenga je bahalap dengan kawan-anak ketun. Jadi, Bapamu je melai surga je bahalap te labih basadia akan manenga Roh Kudus dengan ewen je balaku ah.”
Yesus Labih Kuat Bara Beelzebul
(Mat. 12:22-30; Mrk. 3:22-27)
14Sinde andau, Yesus mangusir setan je jadi manampa ije uluh dia' tau bapander. Limbas setan malihikan uluh te, iye manjadi tau bapander. Are uluh je tege melai kanih mangkeme heran. 15Tatapi pire-pire uluh melai antara uluh are te bapander ije sama je beken: “Yesus mangusir setan dengan kuasa pandohop Beelzebul, pamimpin kawan setan.” 16Uluh beken handak manguji ah sahingga ewen balaku-Ah manguan mujizat akan manunjukkan awi kakuatan-Ah baasal bara surga. 17Tatapi Yesus tawan narai je ewen pikirkan, lalu Iye bapander dengan ewen: “Amun panduduk ije negeri bakalahi ije sama je beken, maka ewen akan hancur. Kalute kia, amun anggota ije kaluarga bakalahi ije sama je beken, maka ewen akan mahancurkan kaluarga ewen kabuat. 18Dengan cara je sama, amun Setan tuntang roh-roh jahat huang karajaan ah baposit hancur tuntang halajur berperang malawan biti ah kabuat, kilenampi karajaan ah tau batahan? Aku mamander hal jituh awi ikau mamander awi Beelzebul manenga Aku kuasa akan manampa roh-roh jahat malihi kalunen. 19Tatapi kawan panuntutmu kia mangusir setan. Naraikah panuntut-panuntutmu mangusir setan dengan kuasa Beelzebul? Tentu kia dengan kuasa Allah. Jadi, ewen kabuat je manjadi hakim je akan mabuktikan awi tuduhan mu te sala. 20Tatapi amun Aku mangusir setan dengan kuasa Allah, maka hal jituh mamparahan awi Karajaan Allah jadi dumah melai antara ikau.” 21Yesus malanjutkan pangajaran-Ah dengan kesah: “Setan tau iibaratkan sabagai ije uluh je kuat dengan are sanjata. Katika iye mahaga huma ah, maka sagala kaije je itempun ah akan aman. 22Tatapi amun ije uluh je labih kuat bara iye manyarang tuntang manggalahkan ah, uluh te akan manduan uras sanjata je iandalkan ah tuntang akan mambagi-bagikan harta rampas ah dengan uluh beken.
23Eweh pun je beken kawal-Ku iye yelah musuh-Ku. Eweh pun je dia' mandohop-Ku mangumpulkan kawan uluh akan percaya dengan Tuhan, baarti ewen manampa kawan uluh te mangejau bara Tuhan.”
Haluli Ah Roh Setan
(Mat. 12:43-45)
24Limbaste Yesus kia bapander dengan kawan uluh: “Roh jahat mungkin balua bara ije uluh tuntang bakaliaran melai eka je suni akan manggau eka peristirahatan. Amun iye dia' manyudau ah, iye bapander huang pikiran ah: Aku akan haluli ka uluh je kulihikan. 25Limbaste katika iye haluli tuntang manyudau awi hatue te kilau huma buang je imapas barasih tuntang rapi. 26Limbaste iye tulak tuntang marawei uju roh jahat beken ah je labih jahat bara iye, tuntang ewen balihi melai kanih. Akibat ah, kondisi uluh te labih buruk bara kondisi sulak ah.”
Kawan Uluh Je Iberkati Tuhan
27Limbas Yesus mamander hal jituh, ije uluh bawi je tege melai antara are uluh bapander dengan suara karas tuntang bapander denga-Ah: “Batapa iberkati ah indum-Mu je jadi maanak tuntang mampahai' Ikau!” 28Yesus manumbah: “Tatapi kawan-uluh je mahining tuntang manaati peteh bara Allah labih iberkati hindai.”
Kawan Uluh Balaku Tanda Bara Yesus
(Mat. 12:38-42)
29Katika kumpulan uluh je mangaliling Yesus samakin are, Yesus bapander dengan ewen: “Ikau je belum wayah jituh jahat, awi ikau balaku tanda bara Aku akan mabuktikan awi Allah jadi mautus Aku. Tatapi ije-ije ah tanda je akan ketun payah yelah kilau je terjadi metuh nabi Yunus huran. 30Sama kilau nabi Yunus manjadi tanda dengan kawan-uluh melai kota Niniwe awi Allah jadi mautus ah, kilau te kia Aku, Anak Kalunen je Allah utus, akan manjadi tanda dengan kawan-uluh bara genarasi jituh. 31Metuh Andau penghukuman, ratu negeri melai selatan Israel akan mendeng hayak kawan-uluh je belum metuh andau jituh, tuntang akan manyala ewen awi jadi manguan kasalan. Awi iye dumah bara kota je puna kejau akan mahining panderan Raja Salomo je puna bijaksana. Tatapi Aku bapander dengammu awi melai hetuh hayak ikau wayahtuh tege ije uluh je tempun kabijaksanaan labih hai' bara Raja Salomo, tatapi ikau dia' manarima ajaran-Ah. 32Kilau te kia metuh Andau penghukuman, kawan-uluh kota Niniwe akan ipelum haluli hayak dengan ketun je belum wayah jituh tuntang ewen akan manyala ketun awi kasalan-kasalan ketun. Awi panduduk kota Niniwe batobat bara dosa-dosa ewen katika Yunus bakhotbah, tuntang Aku bapander dengammu awi tege uluh je labih hai' bara nabi Yunus melai hetuh. Tatapi ikau manolak akan batobat.”
Yesus Mangajarkan Tentang Tarang Tuntang Kaput
33Yesus bapander: “Jatun uluh je mampelum sumbu lalu manyahukkan ah. Sabalik ah, iye maandak ah melai eka sumbu, mangat setiap uluh je tame ka huang huma tau nampayah cahaya ah. 34Matan kalunen sama kilau sumbu bagi biti ah. Amun ije uluh tau nampayah dengan jelas uras biti ah saolah-olah kuntep dengan cahaya. Tatapi amun ije uluh dia' nampayah dengan jalas, uras biti ah saolah-olah kuntep dengan kakaput. 35Awi te, buah-buah ih, ela sampai cahaya melai huang bitimmu manjadi kaput. 36Jadi, amun ije uluh ingutep dengan cahaya melai setiap bagian biti ah tuntang dia' tege bagian je kaput, maka uluh te akan kuntep dengan cahaya. Saolah-olah ije sumbu manarang ikau dengan cahaya tarang.”
Yesus Managur Kawan Uluh Farisi Tuntang Kawan Pangajar Hukum Musa.
(Mat. 23:1-36; Mrk. 12:38-40; Luk. 20:45-47)
37Limbas Yesus salesai bapander, ije uluh bara golongan Farisi marawei-Ah akan kuman melai huma ah. Maka Yesus pun dumah lalu munduk tuntang kuman. 38Uluh bara golongan Farisi te heran katika nampayah Yesus dia' mamenyau lenge sasuai dengan kabiasaan uluh Yahudi sahindai kuman. 39Maka Tuhan Yesus bapander dengan ah: “Ikau uluh bara golongan Farisi puna buah-buah huang mamatuhi adat istiadat je manampamu tampayah bujur melai matan uluh kilau dengan mamenyau tuntang mamparasihkan bagian luar galas tapi malihikan bagian huang ah rigat. Ketun manuntut adat istiadat mamenyau lenge tapi mambiarkan ateimu kuntep dengan kasarakahan tuntang kajahatan. 40Ketun sala! Tuhan, je manciptakan biti kalunen, kia manciptakan atei kalunen. Maka bara te ateimu kia harus tatap barasih, beken cuma lenge bewei. 41Jadi jaga ih ateimu mangat tatap murni dengan manenga hartamu dengan uluh susah. Ateimu kia harus barasih, beken cuma lenge bewei. 42Hei kawan uluh bara golongan Farisi, ikau akan mandinu kasulitan hai', awi ikau gagal manguan uluh beken dengan adil tuntang gagal mangasihi Allah. Tatapi ikau dengan buah-buah manenga sapuluh persen bara rampah tuntang bumbu-bumbu dapurmu dengan Allah. Memang bahalap amun ikau manenga perpuluhan, tatapi ela nalingau akan manguan uluh beken dengan adil tuntang mangasihi Allah. 43Hei kawan uluh bara golongan Farisi, ikau akan mangalami kasulitan hai', awi ikau handak munduk melai eka je tahormat melai eka Ibadah uluh Yahudi. Ikau kia handak kawan uluh manyapa ikau dengan hormat melai eka umum. 44Ketun akan mangalami kasulitan hai' ketun uluh Farisi, awi ketun sama kilau kuburan je dia' tampayah. Kawan uluh mananjung mahalau dia' mangatawan awi melai huang tege uluh matei je manampa ah manjadi rigat.”
45Lalu ije uluh pangajar hukum Musa bapander dengan Yesus: “Guru, katika Ikau mamander hal-hal jituh dengan kawan uluh Farisi, Ikau kia mahina ikei.” 46Tatapi Yesus manumbah: “Ketun akan mangalami kasulitan hai' ikau kawan pangajar hukum Musa, awi ikau mambebani kawan uluh dengan aturan-aturan je sulit akan itaati, tatapi ikau kabuat dia' bausaha akan manaati aturan-aturan te. 47Wahai kawan pangajar hukum Musa, ikau akan mandinu kasulitan hai' awi ikau mamasang batu-batu bahalap akan mahias kuburan kawan nabi je jadi ipatei awi datu hiangmu. 48Dengan manguan te, ikau mabuktikan awi ikau satuju dengan narai je inguan datu hiangmu. Ewen mampatei kawan-nabi tuntang ikau malanjutkan gawian ewen dengan mambangun kuburan ewen. 49Awi te ih Tuhan dengan bijak bapander tentang ikau: Aku akan mautus kawan nabi tuntang kawan murid dengan bangsa Israel. Tatapi bangsa Israel te manganiaya sabagian bara ewen tuntang mampatei sabagian je beken. 50Sabagai akibat ah, kawan uluh melai zaman jituh akan batanggung jawab hunjun papatei uras nabi je jadi datu hiangmu nguan metuh Tuhan manciptakan dunia. 51Nampara bara papatei Habel je sulak sampai papatei tarakhir taharep Zakharia, je ipatei melai antara mezbah#11:51 mezbah yelah eka mamapui kurban persembahan akan Tuhan tuntang bangunan Bait Suci. Aku jamin awi Allah akan mahukum ketun awi papatei je datu hiang ketun nguan. 52Kasulitan hai' akan ketun alami hei pangajar hukum Musa, awi ketun jadi mahalangi uluh sahingga ewen dia' mangatawan jalan je bujur manuju Allah, tatapi ikau kabuat dia' manuntut jalan te tuntang ikau mangahana ewen je handak manuntut jalan te.”
53Limbas Yesus tulak bara hete, kawan uluh bara golongan Farisi tuntang kawan pangajar hukum Musa manjadi puna basingi tuntang nampara manenga berbagai macam paisek je sulit. 54Ewen handak manjabak Yesus mangat mamander kaije je sala mangat ewen tau mangajukan tuntutan taharep-Ah.
Currently Selected:
Lukas 11: AKV
Highlight
Copy
Compare
Share
Want to have your highlights saved across all your devices? Sign up or sign in
Kahayan Bible by Beyond Translation is licensed under Creative Commons Attribution-ShareAlike 4.0 License.
