Lukas 9
9
Yesus nyiu due belas murid Da
(Mat. 10:5-15; Mrk. 6:7-13)
1Belalu, Yesus no'ok due belas murid Da di ngokoi kuasa ukah iro Da nyiu due belas murid Da di nawas ulun kesarungan neke kawan penyakit. 2Ukah iro Yesus nyiu kawan rasul iro tulak belalu nyenghabar tong kawan ulun habar penyulet Kerajaan Allah pelos dali nawas kawan ulun ye beroten. 3Semale dali tulak, Yesus ngulek tong dali: “Iya'a ko ngoit me-me pas tulak: tungket, tas, pengokan, atawa empeng serep. 4Pas ko na undang ulun di nono te belai dali, nono a'a dile empe ko ngikah runa iro. 5Tapi kaye kawan ulun ja'a sa nerima ko, ikah ja'a iro. Pas ko tulak, oding dabu neke ja'a iro ke po'o ko.” 6Ukah kawan rasul iro keringa ye, dali langsung tulak di nyenghabar Injil pelos nawas kawan ulun ye beroten neke ja'a bali tong ja'a ye bali.
Da Herodes bingung keringa habar Yesus
(Mat. 14:1-12; Mrk. 6:14-29)
7Pas da Herodes, pimpinan wilayah Galilea, keringa habar se ye na ene Yesus iro da bingung, leka kawan ulun ngulek Yesus iro da Yohanes Pembaptis ye apu bolum li. 8Na'an ade ye bali ngulek: “Yesus iro nabi Elia, ye mula sulet tong denia.” Ulek ye bali li: “Da iro nabi ye apu mate ye mulik bolum li!” 9Tapi ulek da Herodes suang aseng da: “Sa mungkin kaye da iro da Yohanes, Leka a'ap apu nyiu kawan prajurit a'ap di motek utek da Yohanes. Aji, nome sih ulun ihe. A'ap keringa hal-hal ye luar biasa tentang lun ihe?” Ukah iro da Herodes kakan nyeruku Yesus.
Yesus ngokoi okan lime ribu ulun
(Mat. 14:13-21; Mrk. 6:30-44; Yoh. 6:1-14)
10Ukah iro due belas rasul ye na siu Yesus iro apu mulik tong ka Da. Dali bekisah se ye apu na ene dali tong Yesus. Belalu Yesus ngoit dali tong ja'a ye be aran Betsaida, ye ngene je dali daeh ye na'an te biro. 11Tapi deo ye apu ketoan te kame Yesus ali kawan murid Da, ye ngene deo kawan ulun ye nemasu Yesus. Pas kawan ulun iro empe, Yesus nerima dali ali aseng ye ego pelos ngajar dali se iro Kerajaan Allah belalu nawas kawan ulun ye beroten.
12Pas olo apu silang silut due belas murid iro nyerani Yesus belalu dali ngulek: “Guru, awat siu kawan ulun ye deo ihe tulak tong ja'a-ja'a ali tong ume-ume di ngeto pengokan, ali runa turui, leka daerah ihe luay bene.” 13Tapi Yesus ngulek tong dali: “Ko ley ye ngokoi pengokan tong dali.” Ulek dali: “Ngunaw me sih kain ngokoi ye? Kain je na'an lime ti wadai ali due ti esa. Iro gin sa sukup kecuali kain tulak moli dile di pun dali.” 14Dali ngulek iro leka na'an lime ribu ulun ye na'an te biro, Tapi Yesus nyiu kawan murid Da di nyiu awus kawan ulun iro di tu'et, ulek Yesus: “Siu dali iro tu'et di ngene gerup, nete lime pulu ulun, erai gerup ye.” 15Kawan murid Da langsung nyiu kawan ulun ye deo iro tu'et. 16Sa ola, Yesus ngepe wadai lime ti ali due ti esa iro, Da ngengkat tong mo'n langit, sambil Da mengucap syukur tong ka Allah. Ukah iro Da nyiu kawan murid Da di ngebagi kawan pengokan tong kawan ulun deo. 17Kawan ulun iro man isep empe boting. Ukah iro, sisa pengokan dali iro na onok te due belas keranyang ponu.
Da Petrus mengaku kaye Yesus iro Mesias
(Mat. 16:13-20; Mrk. 8:27-30)
18Pas Yesus desung bedoa gegales tong ka Allah, kawan murid Da sulet nyeruku Da. Ukah Da punah bedoa, Da nyituk tong dali ulek Da: “Nome sih A'ap ihe?” 19Kawan murid Da nuing, na'an ye ngulek “Ko iro Yohanes Pembaptis ye bolum li, tapi ye bali ade ngulek kaye Ko iro nabi Elia ye timul li. Na'an li ye ngulek Ko iro kawan nabi ye apu usang mate tapi bolum li.” 20Ukah iro Yesus nyituk tong dali: “Nome A'ap ihe?” Ulek da Petrus: “Ko iro Kristus neke Allah.” 21Belalu Yesus ngelamen dali ulek Da: “Iya'a na kisah tong nome-nome.”
Yesus ngulek menaya penela ali kawan syarat nemasu Da
(Mat. 16:21-28; Mrk. 8:31—9:1)
22Leka A'ap, Anak Meresia puna harus menaya. Tapi kawan tetuha, kawan pimpinan imam belai ibadah ulun Yahudi ali pengajar hukum Musa ye sa nerima A'ap belalu A'ap sagar na hukum empe mate pelos bolum li pas te olo ye ketolu. 23Da ngulek tong ka awus ye dali: “Kaye na'an te antara ko kakan nemasu A'ap, maka ko harus ngikah se ye na akan ko ley-ley, ngoson salib belalu nemasu A'ap. 24Belalu nome ye ngawat pengebolum da ley-ley maka sagar jaweh, Tapi nome ye pengebolum da di na A'ap. Maka da sagar mahan bolum ye kekal. 25Se di nyimpun ye na'an te denia ihe, tapi beloh mahan pengebolum ye abadi?” 26Kaye na'an te antara ko ye mangen leka ajaran A'ap, iro tau ngene A'ap, Anak Meresia, tau mangen leka pas wayah A'ap sulet tong denia suang kemulian A'ap ali kemulian Ma A'ap ali kawan malaikat kudus ye sagar sendro sulet ali A'ap. 27A'ap ngulek tong ko sebujur ye kam ye na'an te bihe male mate semale kite Kerajaan Allah.
Nabi Musa ali nabi Elia petendre unuk ye tong ka Yesus
(Mat. 17:1-8; Mrk. 9:2-8)
28Pas kira-kira walo olo ukah Yesus ngajar dali, Yesus ngoit da Petrus, da Yohanes, ali da Yakobus. Di mengket tong mo'on saing di bedoa tong ka Allah. 29Pas Yesus desung bedoa, wae ali empeng Da berubah. Jaji bura ye ngene empe silau. 30Sa ola ukah iro, mula losek due ti ulun bepaner ali Yesus. Kedue ulun iro nabi Musa ali Elia. 31Kedue ye iro timul nelang be ama kemulian sambil besurah ali Yesus ngunaw me Da nene sagar menggenapi ye nene te Yerusalem. 32Pas desung iro ade da Petrus ali kawan murid ye bali te pe urui. Tapi pas dali buet, dali kite ama ma'a bene neke Yesus. Dali ade kite due ulun ye jakat te dani Yesus. 33Pas sensinu da Musa ali da Elia iro tulak ngikah Yesus, ulek da Petrus: “Guru, ware taka nono te bihe dile! Kain sagar ngene tolu ti ponok erai di pakai Ko, ye due di pun nabi Musa ali nabi Elia” Da Petrus ngulek ngunaw ro leka da sa ketoan se ye desung na surah dali. 34Pas da Petrus desung besurah, jaun selenga sulet ngeliling dali. Ye ngene kawan murid Da takut. 35Ukah iro dali keringa engan Allah ke mo engan ye: “Ihe Anak A'ap ye apu na peli A'ap. Dinga se ye na ulek Da.” 36Ukah engan iro jaweh, je Yesus ali kawan murid Da daeh ye na'an te biro. Dali sa bekisah tong nome-nome ye na ite dali iro.
Yesus ngunur roh jahat neke erai ke tia ye desung kesarungan
(Mat. 17:14-21; Mrk. 9:14-29)
37Pas pita tane ye, Yesus ali kawan murid Da dolui ke mo'n saing iro belalu deo kawan ulun te wa apu be bekerumung ngema Da. 38Na'an erai ulun upo te biro ye gegowo: “Guru, a'ap laku awat anak a'ap leka da anak ye tungal. 39Roh jahat iro ketuju nyarang ye, ye ngene tia iro mula ngeraring empe losek bure ke bowa. Uwok iro pulew penare tia iro nelang uwok iro noi ngikah unuk tia iro.” 40Ulek upo iro. “A'ap apu laku awat kawan murid Ko tapi dali beloh kate pelosek uwok iro. Dali beloh kuasa ye kate nawas ye.” 41Ulek Yesus: “Hai ko ye bolum te zaman ihe, se di sengke sa percaya! Empe kengola me A'ap nono sendro ko tapi ko tatap sa percaya ali A'ap?” Ukah iro Yesus ngulek tong ulun iro: “Oit tia iro tong he.” 42Pas tia iro desung na oit tong ka Yesus, uwok iro ngehampas tia iro tong tana ukah iro nge gunsang unuk tia iro. Tapi Yesus ngulek tong uwok iro di losek ke unuk ye. Yesus nawas tia iro belalu ngokoi tong ma ye. 43aBelalu awus kawan ulun ye kite ye kemawah lian mujizat ye na ene Yesus iro leka kuasa Allah ye solai bene.
Habar ye kedue kisah menaya Yesus
(Mat. 17:22-23; Mrk. 9:30-32)
43bPas Awus kawan ulun kea kemawah leka kite kuasa ye na ene Yesus iro. Da ngulek tong ka kawan murid Da, 44“Dinga Ko bebuen engan A'ap ihe: A'ap, Anak Meresia, sagar na sarah tong kami kuasa kawan ulun jahat.” 45Tapi kawan murid Da sa paham se ye na ulek Yesus iro, Leka arti ye beloh erai ye ketoan te antara dali. Ye ngene dali takut nyituk tong Yesus
Nome ye paling solai te antara murid
(Mat. 18:1-5; Mrk. 9:33-37)
46Belalu, kawan murid Da langsung bulo engan, nome ye paling mo'o pangkat ye. 47Tapi, Yesus ketoan se ye na'an te suang pikiran dali, belalu Da ngepe tia halus pelos mege kami ye, ukah iro Da nyiu tia iro jakat te sila Da. 48Ukah iro, Da ngulek tong kawan murid Da: “Nome ye nerima tia ihe leka aran A'ap, da ade nerima A'ap. Belalu nome ye nerima A'ap, berarti nerima Ma ye nyiu A'ap. Ihe benelei leka nome te antara ko nganggap unuk da ley-ley paling bere, be arti da iro ulun ye paling mulia.”
Na'an erai ke ulun ye ba murid Yesus pelosek uwok ke unuk ulun
(Mrk. 9:38-40)
49Belalu da Yohanes nyituk tong Yesus: “Guru, kain kite ulun ye makai aran Ko di ngunur kawan uwok. Kain apu ngelamen ulun iro leka ulun iro ba kelompok taka.” 50Ulek Yesus tong da Yohanes: “iya'a ko ngelamen ulun iro leka nome ye sa ngelawen ko iro sagar ngawat ko nene.”
Erai ke ja'a ulun Samaria sa nerima Yesus
51Pas Yesus apu dini na engkat tong surga, Da kakan tulak tong ja'a ye be aran Yerusalem sendro kawan murid Da. 52Da nyiu ulun di one tong ja'a ulun Samaria, di nyedia runa Yesus ali kawan ulun onsan. 53Tapi pas kawan ulun neke Samaria iro ketoan kaye Yesus kakan tong ro, dali ngelamen ye. Leka dali kakan tong arah Yerusalem. 54Pas due ti murid Da, da Yohanes ali da Yakobus ketoan iro, dali nyituk tong Yesus: “Tuhan, siu kain ihe di nyiu apui neke langit di nyuru kawan ulun ye na'an te ja'a ye be aran Samaria iro.” 55Tapi, Yesus ngereket dali. 56Belalu Da ali kawan murid da tulak tong ja'a ye bali.
Ye harus na bayar pas ngedasu Yesus
(Mat. 8:19-22)
57Pas Yesus ali kawan murid Da desung malan tong ja'a ye be aran Yerusalem, na'an erai ke ulun ye sulet tong Yesus sambil be engan: “Tuhan, a'ap kakan jaji murid Ko pelos nemasu Ko tong kame Ko tulak.” 58Yesus ngulek tong lun iro: “Serigala nono te suang luang, kawan tempulu te langit ade nono te suang salai ye. Tapi A'ap, Anak Meresia, beloh be belai di runa nono.” 59Ulek Yesus tong kawan ulun bali: “Yu nyang A'ap!” Tapi, ulek ulun iro: “Tuhan, ema dile a'ap kakan ngelebeng ma a'ap ye mate.” 60Tapi, Ulek Yesus tong ulun iro: “Paribasa ye dion ulun ye mate iro na lebeng koe dali ye mate, tapi ko harus tulak nyenghabar kisah Kerajaan Allah.”
61Belalu erai ke ulun bali ade ngulek a'ap sagar ngedasu Ko, tapi dion dile a'ap mulik tong ka aben luhen a'ap pelos bepamitan tong ka dali. 62Ulek Yesus tong lun iro: “Tiap ulun ye ngene ume tapi kea ngelap tong odi, da iro sa tau jaji erai butung te suang Kerajaan Allah.”
Currently Selected:
Lukas 9: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
