Lukas 10
10
Yesus nyiu turu pulu murid Da
1Ukah iro, Yesus meli turu pulu murid Da, Belalu nyiu tulak be due-due one tong ja'a ye sagar na asuk Da. 2Semale Da nyiu dali tulak Yesus ngulek tong dali: “Deo kawan ulun ye apu siap percaya tong ka A'ap, tapi beloh erai ulun ye kate ngulek habar buen tong dali. Dali iro ngunaw kabun gandum ye solai ye apu siap na utik, tapi sa sukup ulun di ngutik ye. Aji bedoa tong Tuhan,” 3Alan tulak, A'ap nyiu ko tong ka kawan ulun ngunaw anak domba ye beloh kua te botuk kawan serigala. 4Iya'a ngoit duit, atawa tas, atawa sandal serep. Iya'a besurah ali kawan ulun pas desung te alan. Leka iro di pelambat ko daeh. 5Kaye ko litep tong suang belai, aweng permisi dile jokat litep. Jape ngulek Sejahtera te suang belai ihe, 6Kaye ulun ye nono te biro sinta damai, berkat damai sagar sendro da. Koe iro, kaye sa, arai ego iro deh tau mulik tong ka ko. 7Iya'a tulak neke belai ulun tong belai ye bali. Nono dile biro, man sendro dali. Leka ulun ye begawi iro patut mahan upa da. 8Tiap ko litep tong suang ja'a na'an kawan ulun te biro nerima ko, okan a'a se ye na ene dali tong ka ko. 9Tawas kawan ulun ye beroten ye nono te ja'a iro, pelos ulek tong dali, Kerajaan Allah apu dani. 10Koe iro, kaye ko litep tong suang ja'a belalu kawan ulun te biro sa nerima ko, kaye ngunaw iro alan tulak tong runa kawan ulun ye kate ngeringa engan ko. 11Teneng kawan dabu ye pereket te po'o kain ihe sebagai siri kaye Allah ro sagar ngehukum ko. Tapi, kain kakan kam ketoan ihe: Kerajaan Allah apu dani tong ka ko! 12Yesus be engan ulek Da: “A'ap ngulek tong ko kaye pas te olo penghukuman, Allah sagar tekasi tong kawan ulun te ja'a Sodom dari pada ja'a iro!”
Yesus nguni kawan ja'a
(Mat. 11:20-24)
13“Na kutuk kam kawan ulun Korazin! Na kutuk kam kawan ulun Betsaida! Leka kaye mujizat-mujizat ye apu na ene A'ap te kawan ja'a ko iro terjadi te ja'a ye ba ulun Yahudi sameh ngunaw Tirus ali Sidon, dali pasti apu betobat neke dosa-dosa dali. Dali pasti apu makai empeng kabung belalu merik dabu tong ka unuk dali di petendre kaye dali apu bujur-bujur betobat. 14Aji pas te olo penghakiman, Tuhan sagar petendre belas kasihan Da ye solai tong ka kawan ulun te ja'a Tirus ali Sidon dari pada tong ka kawan ulun ye nono te ja'a Korazin ali Betsaida. 15Belalu tong ka ko hai kawan ulun Kapernaum, iya'a ngomon kaye Allah iro sagar memuliakan ko te surga tamam eso neke ulun bali! Ko sagar na obet tong neraka!”
16Belalu Yesus ngulek tong kawan murid Da: “Nome ye sa nerima ko, sameh ade sa nerima A'ap. Dali ye sa nerima A'ap berarti dali iro sa nerima Allah ye apu nyiu A'ap.”
Turu pulu murid Da mulik nyeruku Yesus
17Ukah iro, turu pulu murid Yesus mulik nyeruku Da. Ulek dali. “Guru, kawan roh-roh jahat iro tunduk tong ka kain pas kain pakai kuasa neke Ko di pelosek kawan uwok iro neke kawan ulun ye kesarungan!” 18Ulek Yesus tong dali: “Pas kawan uwok iro ngeringa kam, A'ap kite Iblis na tengkaleh belalu lotu ngunaw ilap neke langit. 19Dinga ihe, A'ap apu ngokoi kam kuasa malan te munan nipe ali kelewangu. Arti ye, A'ap apu ngokoi kuasa di nengkaleh kawan Iblis taka. Ye ngene beloh erai ti ya kate penare ko. 20Tapi iya'a ko bersukacita leka na'an kuasa te mo'on roh-roh jahat iro, tapi bersukacitalah leka aran ko apu na tulis te surga.”
Yesus be terima kasih tong ka Ma Da
(Mat. 11:25-27; 13:16-17)
21Pas te desung iro ade, Yesus kesa arai ego neke Roh Kudus belalu Da ngulek: “A'ap besukur tong Ko Ma, Tuhan ke mo'on segala ye na'an te langit ali denia. A'ap memuji Ko leka Ko apu ngulek awus ye ihe tong ka ulun ye le'en ye ngunaw kawan tia. Tapi Ko sa ngulek tong kawan ulun ye bijak ali tong kawan ulun ye panei, Ya Bapa, A'ap berkenan tong ka Ko. 22Belalu Yesus ngulek, Ma A'ap apu ngokoi kuasa tong ka A'ap. Beloh erai ye ketaru Anak kaye sa Ma A'ap ley, belalu beloh erai ulun ye ketaru ali Ma kaye sa A'ap, ali kawan ulun ye na peli A'ap di ngulek iro.”
23Belalu Yesus bebalik tong kawan murid Da pelos ngulek: “Allah apu ngeberkati kam awus ye belalu kam apu kite se ye na ene A'ap ihe. 24Leka A'ap apu ngulek tong ko, kaye deo kawan nabi ali raja ye bolum te zaman bayuh, kakan bene kite se ye na ite ko ali se ye na dinga. Tapi dali beloh kate kite ali keringa ye se ye na ene A'ap ihe.”
Ulun Samaria ye buen bene
25Pas Yesus desung ngajar, mula sulet erai ke ulun pengajar hukum Musa belalu, nyituk di ketoan se ye sagar na tuing Da. Ulek da: “Guru, Se ye harus na ene a'ap supaya Allah ro ngokoi a'ap bolum ye kekal?” 26Ukah iro Yesus ngulek: “Se ye na'an na tulis te suang Hukum Musa iro? Se ye na baca ko biduh?” 27Ulun iro nuing: “Kasihilah Tuhan, Allah ko, ali awus ye na'an te suang aseng ko, ali seganap unuk ko, seganap kekuatan ko, ali seganap akal budi ko. Belalu, kasihilah sesameh meresia ngunaw ko mengasihi ko ley-ley.” 28Ulek Yesus: “Ko apu ngulek ye bene. Belalu kaye ko ngeringa se ye na siu iro, maka Allah sagar ngokoi ko bolum ye Kekal.” 29Tapi ulun iro nanga pe bene se ye na situk da iro, ulek da tong Yesus: “Se ye na maksud meresia sesameh a'ap?” 30Ulek Yesus pakai paribasa: “Na'an erai ti ulun ye malan ke ja'a Yerusalem tong ja'a Yerikho, pas desung te alan kawan ulun ngerampok da pelos nyarang da belalu ngejampas awus ye na oit da iro, belantak empeng da. Dali mumpuk da empe ane mate ukah iro dali langsung ngikah runa iro.” 31Ukah iro sa ola, na'an erai ti ulun imam Yahudi tulak tong ja'a Yerikho lalo alan iro, pas da lalo alan iro da kite ulun ye ponu awa desung be peloku te alan, tapi da nanga malan ke alan sila ye. 32Ukah iro na'an li erai ke ulun neke suku Lewi lalo alan iro ade belalu kite upo be peloku te biduh. Tapi, pas da kite upo iro da nanga malan lalo alan sila ade. 33Belalu, na'an ulun neke Samaria ye lalo alan iro ade ukah iro kite upo ye kune rampok ye ane mate iro deh desung be peloku te alan, ulun Samaria iro tekasi kite upo iro. 34Ukah ro, ulun Samaria iro nyerani upo iro, belalu da nawas ye da ngeduru minyak zaitun ali anggur ukah iro da nyuruk kawan awa upo iro. Ukah iro da pekengket upo iro tong munan keledai da pelos ngoit upo iro tong runa ye kate onsan supaya kate durung ye. 35Pas tane ye, ulun Samaria iro deh ngokoi logam 2 dinar tong lun ye pun belai runa dali due turui iro, ulek da: “Awat ko durung da ye awa iro pelos tawas ko da. Belalu, kaye duit iro awus atawa na tengkawus ko, tau a'ap nganti ye pas a'ap mulik tong he li.” 36Ukah iro, ulek Yesus tong ka pengajar Hukum Musa iro: “Ngetme kira ko, nome te antara dali tolu iro deh ye sameh meresia neke upo ye na ako iro deh?” 37Pengajar Hukum Musa iro nuing: “Ulun ye apu ngawat upo iro.” Ukah Yesus nuing: “Alan tulak, pelos ene ngunaw ye na ene ulun iro.”
Da Maria ali da Marta
38Pas Yesus ali kawan murid Da, nepelos alan, dali litep tong ja'a, te biduh na'an erai ke ulun bawe ye be aran Marta ye ngoit singah tong belai da. 39Da Marta be erai butung ye be aran Maria. Ye desung tu'et te dani po'o Yesus sambil ngeringa se ye paneran Yesus. 40Da Marta bereket ali koe gawi ye na ene da, belalu da nyerani Yesus pelos ngulek: “Tuhan, erai butung a'ap ihe sa ngawat koe gawi a'ap ihe, belalu a'ap laku awat siu Ko di da ngawat a'ap!” 41Ulek Yesus tong da: “Marta ko tamam bene ye na pikir empe deo parah ye na keno ko. 42Pedahal ye penting iro je erai. Tapi ko Maria apu meli ye bene, ye beloh kate na epe ke da.”
Currently Selected:
Lukas 10: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
