Lukas 8
8
Kawan bawe ye ngelayani Yesus
1Ukah iro Yesus ali kawan murid Da tulak nyelalo kawan ja'a sambil Da bekhotbah nyenghabar berita Kerajaan Allah tong ka kawan ulun. 2Na'an ade kawan bawe ye na tawas Yesus neke kawan roh jahat ali kawan ulun bali ye na tawas neke penyakit. Te antara kawan bawe iro na'an da Maria ye na ulek Magdalena neke ja'a Magdala ye apu na tawas Yesus neke turu ti roh jahat. 3Te antara dali iro ade na'an da Yohana sao bendahara Herodes ye be aran Khuza. Na'an ade da Susana ali kawan bawe bali ye tuju ngawat ngokoi duit tong ka Yesus ali kawan murid Da.
Paribasa erai ulun ye ngehamur umang
(Mat. 13:1-23; Mrk. 4:1-20)
4Pas deo kawan ulun sulet neke ja'a-ja'a bekumpul nyeruku Yesus. Pas desung iro ade Yesus besurah pakai paribasa tong dali Ulek Da, 5Na'an erai ke ulun ye pu'un ume tulak moyas pare, pas da moyas pare iro, na'an ye lotu te diding tere ajek pelos na okan kawan tempulu ye na'an te langit empe awus. 6Ye bali ye lotu te munan tana ye be batu, belalu pas pare iro tumu, pare iro jaji pate koe beloh be danum. 7Bali ye lotu nete botuk ikut bedui pelos tumu sendro dui iro ye ngene pare iro boreng. 8Ye bali ye lotu tong tana ye subur belalu tumu biro ye ngene hasil ye deo bene. Ukah Yesus ngulek paribasa iro Da ngulek: “Nome ye be kelinge di ngeringa, pakai iro di ngeringa ye buen!”
9Ukah iro, kawan murid Yesus nyituk tong Da se arti paribasa iro. 10Ulek Yesus: “Allah apu ngulek tong ka ko se iro Kerajaan Allah. Tapi A'ap ngulek paribasa di ngajar kawan ulun bali, di peganap se ye na tulis te Kitab Suci: dali kite se ye na ene A'ap, belalu keringa se ye na ulek A'ap, tapi dali sa ketaru se ye na paner A'ap” 11Ihe lah arti paribasa iro: “Umang iro arti ye Firman Allah.” 12Tana ye te diding alan arti ye ulun ye apu ngeringa Firman Allah tapi Iblis iro sulet ngepe Firman iro neke aseng dali ye ngene dali sa harap, Belalu sa na selamatkan neke dosa dali. 13Tana ye be batu-batu arti ye ulun apu ngeringa ali nerima Firman Allah. Tapi dali noi Firman iro bolum suang aseng, ye ngene dali je harap erep-erep a'a belalu kaye dali desung te suang pencobaan dali sa percaya ali Tuhan. 14Tana ye be ikut bedui arti ye ulun ye ngeringa ali percaya tapi sa ola dali tamam ngeno ye, ye ngene dali sa kate tumu ali bebua atawa boreng. 15Tana ye subur iro arti ye ulun ye ngeringa Firman Allah belalu ngonteh suang aseng ye buen.
Paribasa nget lampu
(Mrk. 4:21-25)
16Yesus ngulek paribasa li ulek Da “Kaye ulun nemolum lampu, pasti da sa nalep ye ali mangkok atawa ngonok ye te mat dipan. Tapi da ngonok te munan meja, di ngene ma'a te suang belai. 17Leka, se ye na siok atawa na rahasia pasti nene ye toan. 18Koe iro, dinga bebuen firman Tuhan, leka ulun ye kakan ngerti se ye na ulek A'ap, Tuhan sagar ngokoi deo pengertian, tapi ulun ye noi mengerti, Tuhan sagar ngepe pengertian ye na'an te dali”
Yesus ali kawan erai butung Da
(Mat. 12:46-50; Mrk. 3:31-35)
19Pas desung iro ne'e ali erai butung Yesus kakan besurah tong Da. Tapi dali beloh kate nyerani ye leka deo bene ulun ngerumung Da. 20Pas desung iro ade na'an erai ti ulun ye ngulek tong ka Yesus: “Ne'e ali erai butung Ko na'an te bihe dali kakan besurah ali Ko, nehe dali desung jakat te ongon.” 21Tapi Yesus ngulek tong ka dali awus ye: “Kawan ulun ye keringa paket Allah belalu ngelaku ye sameh ngunaw na ene ali kawan erai butung A'ap.”
Enus dolek ye tamam na pemolak
(Mat. 8:23-27; Mrk. 4:35-41)
22Belalu te olo bali ye, Yesus litep tong suang jukung sendro kawan murid Da belalu ngulek: “Yu taka getah tong pai dano,” ukah iro dali langsung getah tong pai. 23Pas dali desung getah, Yesus teperui. Ukah iro, sulet enus dolek neke dano iro belalu jukung dali litep danum ye ngene jukung dali iro kakan kayem. 24Belalu, kawan murid Da ngiluk, Da sambil dali ngulek: “Guru! Ngetme taka ihe tau sih sagar mate kayem bihe!” Ukah iro, Yesus bu'et langsung ngereket enus dolek iro deh. Enus dolek iro langsung molak belalu dano iro jaji merengin. 25Belalu Yesus ngulek tong kawan murid Da: “Te kame iman ko?” Kawan murid Da jaji takut belalu kemawah, sambil besurah pede dali: “Nome sih ulun ihe? Da tau nyiu enus dolek iro, belalu dali taat tong ka Yesus.”
Yesus ngusir roh jahat ulun neke Gerasa
(Mat. 8:28-34; Mrk. 5:1-20)
26Yesus ali murid-murid Da empe te wilayah Gerasa, te pai ja'a provinsi Galilea. 27Ukah Yesus ali kawan murid Da losek ke jukung, mula sulet ulun ye kesarungan malan tong ka dali. Ulun ihe tela ye nono te belai nete ja'a be aran Gerasa, tapi nehe nono nete lebeng nelang belawoi 28Pas ulun iro kite Yesus, da ngeraring pelos besujud te one wae po'o Yesus. Ulek ulun iro nelang wale: “Yesus, Anak Allah ye Mahasolai, se di Ko ngawer kain, kain kaweng ampun iya'a nguro kain.” 29Ulun iro ngulek ngunaw ro leka Yesus nyiu kawan uwok iro losek ke unuk ulun iro. Kawan ulun ye bali apu nyuruk da ali rantai, tapi ulun ye kesarungan iro sika tatap lapas belalu kawan uwok iro kakan ngoit ulun iro tong runa ye luay. 30Belalu, Yesus nyituk tong ulun ye desung kesarungan iro ulek Da: “Nome aran ko?” Da nuing, aran a'ap da “Legion” da ngulek aran iro leka apu deo bene uwok ye ngerasuk da. 31Ukah iro kawan uwok iro laku awat tong Yesus di sa pelitep dali tong suang jurang ye beloh be tempak.
32Ukah dali bepaner mula na'an te biro kawan upe ye desung ngeto di okan te wa'a saing. Kawan uwok iro laku awat tong Yesus di pelitep dali tong kawan upe iro, belalu Yesus pekahan dali litep tong kawan upe iro. 33Aji, kawan uwok iro losek neke ulun iro pelos litep tong suang kawan upe, ukah iro kawan upe iro mensit dolui tong dano ye ngene kawan upe iro mate moser.
34Pas ulun ye pu'un kawan upe iro kite, dali mensit sambil takut-takut. Dali tulak tong ja'a dali belalu bekisah tong ka kawan ulun se ye na ite dali deh. 35Belalu, deo kawan ulun ye tulak tong duh neneng se ye desung na ene. Pas dali empe te biduh dali kite upo ye kesarungan iro apu molak nanga desung tu'et te one wae po'o Yesus. Ulun iro apu be empeng berasih, pas dali kite iro tamam dali gaer. 36Dali apu kite se ye na ene Yesus iro, belalu dali bekisah tong kawan ulun bali ngunaw me Yesus ngawat ngunur uwok iro ke unuk upo ye kesarungan. 37Ukah iro, awus kawan ulun ye nono te daerah ja'a Gerasa iro ngulek tong Yesus di tulak ngikah runa dali iro, leka kawan ulun iro gaer. Ukah iro, Yesus bebuat tong suang jukung pelos ngikah runa iro. 38Semale dali tulak, upo ye kesarungan iro deh kakan nyang Yesus. Tapi, Yesus nyiu da tulak, ulek Da, 39“Alan ko uli tong belai belalu ko bekisah se ye apu na ene Allah tong ka ko.” Ukah keringa iro ulun iro langsung tulak tong awus ja'a-ja'a belalu da bekisah se ye apu na ene Yesus tong ka da.
Yesus nemolum anak Yairus belalu nawas erai ke ulun bawe ye beroten pendarahan
(Mat. 9:18-26; Mrk. 5:21-43)
40Pas Yesus ali kawan murid Da mulik tong ja'a ye be aran Galilea, te biro apu deo ulun ye ngema Da ali arai ego, leka dali apu ola ngema penyulet Da. 41Pas desung iro ade, na'an erai ulun ye be aran Yairus sulet nyeruku Yesus. Da Yairus iro pimpinan te belai ibadah ulun Yahudi ye na'an te biro, da besujud te po'o Yesus belalu laku awat tong Yesus di tulak tong belai da. 42Leka anak da desung beroten empe dani mate. Tia iro anak tungal bawe ye be umur due belas taun, pas Yesus di tulak tong duh, deo ulun ngerumung Da neke hame-hame.
43Pas desung ulun bekerumung te biro na'an bawe ye apu due belas taun kune roten pendarahan. Beloh erai ulun kea ye kate nawas roten da iro. 44Bawe iro nyerani Yesus ke odi belalu da mege tempak empeng jubah Yesus, ye ngene roten pendarahan bawe iro deh selenga molak. 45Ukah iro ulek Yesus: “Nome ye na'an mege A'ap?” Pas kawan ulun ngulek kaye dali beloh ye mege ye, da Petrus ngulek: “Guru, deo kawan ulun ye ngerumung Ko belalu se di Ko nyituk ngunaw ro?” 46Tapi, ulek Yesus: “Na'an erai ulun ye mege A'ap leka A'ap kesa kuasa di pe beme apu losek neke unuk A'ap.” 47Pas bawe iro sadar kaye da apu toan Yesus, ukah iro da langsung sulet tong Yesus sambil ngengker lian takut pelos be sehujud tong ka Yesus. Te one wae kawan ulun, bawe iro ngulek se di da mege empeng jubah Yesus iro ye ngene da mula beme neke roten da. 48Ulek Yesus tong bawe iro: “Anak A'ap, roten ko apu molak leka iman ko apu ngawat ko. Alan ko uli apu tong belai ko ngoit arai ego sendro Allah.”
49Pas Yesus desung bepaner ali bawe iro, na'an ulun ke pimpinan belai ibadah iro sulet belalu ngulek tong da Yairus: “Anak ko ye bawe apu mate. Ya'a ko ngawer Guru.” 50Pas Yesus keringa engan ulun iro, Da ngulek tong ka Yairus: “Iya'a ko takut, tapi percaya a'a tong A'ap, belalu A'ap sagar ngawat ko neke menaya.” 51Pas Yesus empe belai da Yairus, Da je ngoit da Petrus, da Yohanes, ali da Yakobus, nyang ne'e ma tia iro belalu dali litep tong suang kamar tia iro. 52Pas dali litep tong suang kamar kawan ulun desung ngerodoi. Ulek Yesus tong dali: “Uwa apu ngerodoi, leka tia ihe sa mate da desung turui.” 53Pas dali keringa engan Yesus iro. Awus dali ye te suang kamar iro koka, leka dali ketoan kaye tia iro apu mate. 54Tapi Yesus nyerani pelos Da mege kami tia iro belalu Da ngulek. “Anak A'ap, Buet apu!” 55Ukah iro tia iro langsung buet pelos jakat. Belalu Yesus nyiu ulun tuha ye di ngokoi okan. 56Pas Ne'e ali Ma tia iro kite dali kemawah, Yesus ngulek tong ulun ye kite ye di iya'a na ulek tong kawan ulun bali.
Currently Selected:
Lukas 8: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
