Lukas 7
7
Yesus nawas erai ti ulun anak buah pasukan Romawi
(Mat. 8:5-13; Yoh. 4:46-53)
1Ukah Yesus punah ngajar kawan ulun deo Da tulak tong ja'a ye be aran Kapernaum. 2Te biro na'an pengelima Romawi ye be batak ripen ye na sayang da. Batak ripen iro desung beroten empe dani kakan mate. 3Pas pengelima iro ngeringa habar Yesus: “Da nyiu tetuha ulun Yahudi nyeruku Yesus di laku awat nawas batak ripen da iro.” 4Pas dali apu bekeruku ali Yesus dali laku awat Da di ngawat pengelima iro, ulek dali: “Pengelima iro patut na awat Ko, 5Leka da mengasihi taka, ali kawan ulun Yahudi belalu Da ade ye nemu'et belai ibadah ulun Yahudi di nan taka.” 6Ukah iro tulak dali sendro Yesus tong belai pangelima iro. Pas Yesus dani di empe belai ye, panglima iro nyiu ulun bali di ngulek tong Yesus: “Guru, iya'a Ko pekuyuh Ko ley-ley empe sulet tong belai a'ap, leka a'ap sa patut nerima Ko te belai ihe,” 7A'ap ade sa patut nyeruku Ko. Maka ye iro, laku siu Ko di ngulek: “Beme apu, belalu engan Ko iro tau ngene roten batak ripen a'ap iro molak.” 8A'ap ngulek ngunaw ro leka a'ap ihe ade bawahan ulun ye tunduk ali perentah atasan, belalu a'ap ade be pasukan ye te wa'a a'ap. Kaye na siu: “Alan tulak tong duh,” dali tulak, kaye na ulek sulet tong he, dali sulet. Belalu tiap a'ap nyiu dali ngene koe gawi ihe: “dali ngelaku ye.” 9Yesus empe kemawah keringa engan ulun iro. Ukah iro Yesus ngulek tong ka kawan ulun ye nemasu Da ulek Da: “A'ap ngulek tong ka ko, A'ap beloh pini ruku ulun ye harap ali A'ap ye lain ulun Yahudi. Mele te antara ulun Israel.” 10Pas dali iro mulik tong belai, belalu dali kite batak ripen iro apu beme.
Yesus nemolum tia bujang te ja'a be aran Nain
11Ukah iro Yesus ali kawan murid Da sendro kawan ulun ye deo tulak tong ja'a ye be aran Nain. 12Pas Yesus apu dini gerbang ja'a iro Da kite kawan ulun ye desung ngoit bangkei tia upo losek ke ja'a di ngelebeng ye. Bangkei upo iro anak neke bawe balu, pas desung iro ade deo kawan ulun ye sendro bawe iro tong lebeng. 13Pas Tuhan kite bawe iro Da tewasi, Da ngulek: “Iya'a ngerodoi.” 14Yesus malan nyerani tandu iro pelos Da mege. Pas kawan ulun ye ngoson iro singah, Yesus ngulek: “Hai tia ye te suang tandu ihe, A'ap ngulek tong ka ko bu'et apu, bolum li ko!” 15Ye langsung bu'et tia ye mate iro pelos tu'et sambil besurah, ukah iro Yesus ngoit tia iro mulik tong ne'e da 16Awus kawan ulun ye kite na ene Yesus iro empe kemawah nelang takut-takut. Ukah iro dali langsung memuliakan Allah ulek dali: “Na'an kuasa nabi ye nyedro taka, belalu Allah sulet di ngawat taka umat Da.” 17Habar se ye na ene Yesus iro tesebar nete daerah provinsi Yudea.
Yohanes Pembaptis ngoit paket tong ka Yesus
(Mat. 11:2-19)
18Pas da Yohanes keringa habar iro neke kawan murid da, da no'ok due ti murid da. 19Belalu nyiu dali nyituk tong ka Yesus: “Me puna Ko Mesias ye apu na janyi Allah atawa kain harus ngema ulun bali?” 20Pas kawan murid iro bekeruku Yesus dali ngulek: “Yohanes pembaptis nyiu kain nyituk tong ka Ko: ‘Me puna Ko Mesias ye apu na janyi Allah atawa kain harus ngema ulun bali.’” 21Pas desung iro ade Yesus nawas kawan ulun deo neke kawan penyakit pelos melosek roh-roh jahat belalu Da ade nawas kawan ulun ye posa di kate kite li. 22Ukah iro Yesus ngulek tong kawan murid da Yohanes “Alan ko mulik nyeruku da Yohanes di ngisah tong dase na ite ali na dinga ko: ‘Ulun posa kate kite, ulun lumpuh tau malan, ulun ye bepenyakit okan kodong na tawas belalu na rasih, ulun rongen tau keringa, ulun mate bolum li, belalu Habar Buen na ulek tong kawan ulun susah.’ 23Na berkatilah ulun ye percaya ali A'ap.”
24Pas murid da Yohanes tulak uli, Yesus jape nyurah kisah da Yohanes tong kawan ulun deo: “Pas ko tulak tong padang jone ye karing, pasti ko sa tulak di neneng paring ye begunsang kune tamput enus.” 25Kaye ba iro, belalu se ye na teneng ko? Me ngunaw upo ye be empeng buen? Leka ulun be empeng buen pasti bolum ye te istana. 26Aji se na teaw ko? Me ko tulak di neaw da Yohanes iro nabi, tapi A'ap ngulek tong ka ko kaye da Yohanes iro mo'o neke kawan nabi ye na'an. 27Leka da Yohanes iro ulun ye na siu ye na tulis ene nabi bayuh. Da nulis,
“Allah apu be firman tong Kristus: A'ap sagar nyiu ulun semale A'ap nyiu Ko.
Da sagar besiap pas penyulet Ko nene.
28A'ap ngulek tong ka ko, da Yohanes iro ulun ye penting. Tapi nehe, nome ye litep tong suang Kerajaan Allah mo'o eso ke da Yohanes, mele na anggap be di.” 29Desung kawan ulun deo ali tukang kawan pengumpul pajak ngeringa hal iro, dali awus ye ngaku Allah adil leka dali apu na baptis da Yohanes. 30Tapi kawan ulun Farisi ali kawan pengajar Hukum Musa sa terima rencana Allah leka dali noy na baptis da Yohanes.
31Ukah iro Yesus bepaner: “Ali me Ap ngeumpama kawan ulun ye bolum te zaman ihe? Ngunaw me dali? 32Dali ngunaw kawan tia ye tu'et te pasar,
ye abut mengke to'ok pede dali ulek dali, Kain ngene lagu ye sanang pelos nyiup suling di engko tapi ko sa nuye.
Ukah iro kain be nyanyi lagu ye ngene nare aseng tapi ko sa ngerodoi.
33Leka pas da Yohanes pembaptis sulet da sa man. Belalu da je sa isep anggur ukah iro ko ngulek kaye da iro kesarungan uwok. 34Ukah iro Anak meresia sulet, Da man ali isep anggur, belalu ko ngulek, Da semeroboh ali tuju isep anggur deo, da be uyang ali kawan ulun ye bedosa ali ulun pengumpul pajak. 35Tapi hikmat ye bene na terima kawan ulun ye nerima ye.”
Yesus na urapi ene bawe ye bedosa
36Ulun Farisi ye be aran Simon iro ngoit Yesus tong belai da di sendro man. Belalu Yesus tulak tong belai ulun iro pelos da tu'et man te meja pengokan ye na'an te belai iro. 37Te ja'a iro, na'an erai ulun bawe ye bedosa. Pas da ketoan kaye Yesus desung man te belai Simon ulun Farisi iro, da ngoit erai botol minyak harum. 38Ukah iro, bawe iro jakat te sila Yesus, sambil ngerodoi empe diu elu da lotu tong po'o Yesus, da musut ali balo pelos ngenok ye. Ukah iro da ngegusuk minyak harum te po'o Yesus. 39Pas Yesus te belai iro, ulun Farisi iro kite se ye apu na ene bawe iro, da besurah suang aseng “Ihe ngebuktikan kaye Yesus iro lain nabi, kaye Da nabi pasti ketoan nome bawe ye musut po'o Da iro!” 40Yesus keringa engan suang aseng da Simon iro ulek Da. “Na'an ye kakan na ulek A'ap tong ko.” Tuing da Simon: “Oy, Guru, ulek a'a.”
41Belalu Yesus bekisah tong da: “Na'an erai ti ulun ye pekihaw logam tong due ti ulun. Da pekihaw lime jatus kapeng perak belalu tong da ye erai lime pulu kapeng perak. 42Pas dali sa kate bayar, da ye pekutang iro ngampuni utang dali due, Kaye ngunaw ro nome te antara dali due ye sagar mengasihi da ye pekutang iro?” 43Tuing da Simon: “Ulun ye deo ngihaw duit iro ahe a'ap ye paling na ampuni Da. Yesus nuing Simon, Bene ko iro.” 44Ukah iro Yesus ngelap tong bawe iro sambil besurah ali da Simon: “Me ko ketoan se ye apu na ene bawe ihe, ko ye ngundang A'ap tong belai ko, ko sa nyedia danum di mu'i po'o A'ap tapi bawe ihe mu'i ali diu elu mat'e da pelos ngerasih ali balo da 45Belalu Ko sa nyamut A'ap ali salam tapi ke akat A'ap litep tong he bawe iro ngenok po'o A'ap. 46Ko sa musut utek A'ap ali minyak zaitun, tapi da musut ye iro te po'o ap ali minyak harum. 47Leka iro, A'ap ngulek tong ka ko, dosa da ye deo apu na ampuni leka da peteaw kasih da ye solai. Tapi, ulun ye dis na ampuni, maka dis ade mengasihi.” 48Ukah iro Yesus ngulek tong ka bawe iro: “Dosa ko apu na ampuni.” 49Kawan ulun ye tu'et man sendro Yesus jaji nyituk suang aseng dali ley: “Nome sih ulun ihe ye mula tau ngampuni dosa ulun?” 50Yesus ngulek tong ka bawe iro: “Iman ko apu ngawat ko neke kawan dosa ko, belalu ko apu kate tulak ke he ngoit arai ego.”
Currently Selected:
Lukas 7: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
