Lukas 6
6
Kawan murid nginuk gandum pas te olo ye tentukan di beranai
(Mat. 12:1-8; Mrk. 2:23-28)
1Pas te olo ye na tentukan di beranai, Yesus malan lalo ume ye be pengule'e gandum, kawan murid Da ngepe gandum, ngegusuk ye ali kami dali, ukah iro man ye. 2Kawan ulun Farisi iro ngulek: “Ko beloh ahan ngene koe gawi te olo ye na tentukan di beranai?” Leka te suang Hukum Musa, taka beloh ahan nginuk ensoi gandum pas te olo ye na tentukan di beranai. 3Ulek Yesus tong dali: “Me beloh pini ko ngebaca te kitab suci kisah se ye na ene da Daud. Pas da ali kawan ulun ye sendro da iro desung lau? 4Ye ngene da Daud man wadai persembahan ye na'an te suang Belai Allah pedahal wadai kudus iro beloh ahan na okan, je kawan imam Yahudi daeh ye kate man ye?” 5Ukah iro Yesus nyempunah engan Da: “A'ap, Anak Meresia, ye be kuasa te munan se ye harus ali ye sa ahan na ene, pas te olo ye na tentukan di beranai.”
Yesus nawas ulun lumpuh pas te olo ye na tentukan di beranai
(Mat. 12:9-14; Mrk. 3:1-6)
6Pas te olo ye na tentukan di beranai, Yesus litep tong belai ibadah ulun Yahudi belalu Da ngajar te biro. Te biro na'an erai ti ulun ye kami sila sanan ye lumpuh. 7Kawan pengajar Hukum Musa ali kawan ulun Farisi memperhati Yesus di neneng me Da nawas ulun te olo ye na tentukan di beranai, di dali na'an alasan nenes Da. 8Tapi Yesus ketoan se ye na pikir dali: “Da nyiu ulun ye kami ye lumpuh iro di jakat te one wae kawan ulun, di kawan ulun kite ye.” Belalu ulun iro langsung jakat. 9Ukah iro Yesus ngehadap kawan ulun Farisi pengajar Hukum Musa pelos Da ngulek: “Taka ketoan a'a kaye te olo ye na tentukan di beranai iro ahan ngene koe gawi ye buen belalu beloh ahan penare ulun. Taka ade ketoan kaye te olo ye na tentukan di beranai ahan ngawat ulun tapi beloh ahan munu ulun?” 10Beloh erai ye nuing, Da neneng tong ka kawan ulun ye na'an te biro, ulek Da tong ulun ye lumpuh iro: “Garak a'a kami ko iro.” Ukah iro pas da ngegarak kami da ye lumpuh iro, selenga molak! 11Pas kawan ulun te biro kite ye tamam dali bereket, ukah iro dali besurah pede dali: “Se ye sagar na ene taka tong ka Yesus ihe.”
Yesus meli due belas rasul
6:12-16
(Mat. 10:1-4; Mrk. 3:13-19)
12Pas te olo iro, Yesus tulak tong bukit di bedoa. Te biro Da bedoa tong Allah empe erai malem. 13Pita tane ye, Da no'ok kawan murid Da belalu meli due belas ulun te antara dali, ye na ulek rasul 14Simon ye na ene aran “Petrus,” Andreas erai butung Petrus, Yakobus, Yohanes, Filipus, Bartolomeus, 15Matius, Tomas, Yakobus anak Alfeus, Simon ye na ulek ulun Zelot, 16Yudas anak Yakobus, ali da Yudas Iskariot ye jaji pengkhianat.
Yesus ngajar ali nawas kawan ulun ye deo
(Mat. 4:23-25)
17Yesus ali kawan murid Da dolui ke saing belalu dali singah te tana ye rata. Rombongon kawan murid Da na'an te biro belalu deo kawan ulun bali sulet neke provinsi Yudea, Yerusalem, ali neke daerah diding te kame ja'a Tirus ali Sidon. 18Awus kawan ulun ye sulet te biro kakan ngeringa ajaran Yesus pelos laku tawas neke roten dali. Na'an ade kawan ulun kesarungan ye awus ye na tawas Yesus. 19Awus kawan ulun ye na'an te biro kakan mege Yesus, leka na'an kuasa ye sulet ke unuk Da ye pe beme dali awus ye.
Ngotus arai ego ali was-was
(Mat. 5:1-12)
20Yesus neaw kawan murid Da belalu ngulek tong dali,
“Allah ngeberkati ko ye susah leka kerajaan Allah iro pun ko.
21Na berkatilah ko ye desung semer leka ko sagar boting.
Na berkatilah ko ye desung ngerodoi leka ko sagar koka.
22Na berkatilah ko kaye na'an ulun ye sa rigi ali ko,
ngekupe atawa pe da'i ko leka ko meli di ngedasu A'ap, Anak Meresia
23Maka ye pas desung iro ko harus sanang belalu nempuluk lian ke ngego ye,
leka upa ko solai te surga; koe datu nini dali apu ngene koe gawi ye sameh tong ka kawan nabi bayuh.
24Tapi, selaka lah ko ye sugih leka ko apu mahan bolum ye nyaman.
25Selaka lah ko ye desung boting leka ko sagar kesa semer,
selaka lah ko ye koka leka ko sagar ngerodoi.
26Selaka lah ko kaye awus kawan ulun ngamung ko.
Leka ngunaw iro ade datu nini dali bayuh ngamung kawan nabi ye palsu.”
Kasihilah musuh ko
(Mat. 5:38-48)
27Dinga engan A'ap ihe, A'ap ngulek tong ka kam: “Kasihilah kawan musuh ko. Ene koe gawi ye buen tong ka ulun ye sa rigi ali ko.” 28Ukah iro aweng neke Allah laku berkati ulun ye nyumpah ko, belalu bedoa di pun dali ye ngekupe ko. 29Kaye ulun nempeleng sila kuyem ko, siu da nempeleng sila ye ade. Kaye na'an ye ngepe empeng ko, dion da ade ngepe empeng ko. 30Kaye na'an tiap ulun ye kaweng tong ka ko, maka okoi tong da. Belalu iya'a kaweng li neke ulun ye apu ngepe pu'un ko. 31Ene lah ko gawi tong ka ulun bali ngunaw me ko kakan na koe gawi dali. 32“Kaye ko je'e mengasihi ulun ye mengasihi ko, se ke pujian ye na okoi tong ka ko? Leka ulun bedosa pun mengasihi ulun-ulun ye mengasihi dali 33Kaye ko je ngelaku hal ye buen tong ka ulun ye ngelaku hal buen tong ka ko, me pantas ko mahan pujian? Leka, ulun pendosa pun ngelaku hal ye sameh. 34Kaye ko pekihaw barang tong ka ulun bali ali ngeharap imbalan, se ke pujian ye na okoi tong ka ko? Leka, ulun bedosa pun pekihaw tong ka ulun bedosa lain ye di dali mahan nerima mulik ali jumlah ye sameh. 35Tapi, kasihilah musuh ko pelos ene koe gawi ye buen, belalu pekihaulah tong ka ulun bali tanpa ngeharap balesan, belalu ngunaw ro ko sagar mahan upa ye solai ko ade sagar jaji anak Allah Ye Mahaemo, leka Allah iro buen tong ka kawan ulun ye sa tau be terima kasih ali ye jahat. 36Leka iro, harus ye ko sameh ngunaw ma ko ade ye ponu ali kasih tong ka awus ye kawan ulun.”
Iya'a nenes ulun
(Mat. 7:1-5)
37Yesus nempelos engan Da: “Iya'a ko menghakimi ulun bali di ko sa na hakimi, belalu iya'a nyinta supaya ko sa na sumpah. Ampuni a'a maka ko sagar na ampuni. 38Okoi se na parlu ulun bali belalu ko sagar nerima se ye na perlukan ko ali ukuran ye buen ye na tempadat, belalu na gunsang empe ponu bene pelos beduru ukah iro sagar na okoi tong ka ko leka ye na takar iro sagar na pakai di engko ade.”
39Yesus bekisah tong ka dali paribasa ihe, Me kate ulun posa ngayak ulun posa? Pasti dali due sagar lotu tong suang luang?
40Erai ke ulun murid ye sa empe harat neke guru da. Tapi tiap murid ye apu belatih pasti sagar jaji ngunaw guru da.
41Se di ko kite dosa ye halus ngunaw dabu ye te ma'te erai butung, tapi sa ngehiraw dosa ko ye solai ngunaw rabuk kayu te ma'te ko ley. 42Ngunaw me, me mungkin ngulek: “Uyang, dion a'ap pelosek dabu ye halus te mat'e ko! Hai ko ye munafik! Tela-tela ye obet dile kayu ye solai iro neke mat'e ko ley. Ukah iro ko kate kite tena di pelosek dabu halus ye na'an te ma'te ulun bali.”
Tonga ali bua ye
(Mat. 12:33-35)
43Yesus nempelos engan Da, ulek Da: “Tonga ye subur sa sagar mahan bua ye boto, belalu tonga ye sa subur sa sagar mahan bua ye buen. 44Leka tiap tonga pasti na kenentaru ke bua ye na hasilkan ye. Mustahil ulun ngutik bua ye buen nget bua ara ali bua anggur ke tonga ye sa buen ngunaw tonga ye bedui. 45Ngunaw cara ye sameh, ulun ye buen ngulek hal-hal ye buen leka suang ate dali buen. Ulun ye ngene koe gawi da'ai pasti aseng dali jahat. Aji, se ye na ulek ke bowa ulun pasti neke suang aseng dali ley.”
Due macam dasar
(Mat. 7:24-27)
46Se di ko no'ok A'ap: “Tuhan, Tuhan,” tapi sa ngelaku se ye apu na ajar A'ap? 47A'ap sagar ngulek tong ka ko, ngunaw me ulun ye sulet tong ka A'ap, ngeringa ajaran A'ap ali ngelaku ye, 48Da ngunaw ulun ye ngene erai bua belai, belalu ngali tetakei, ukah iro da ngonok ori ye te munan batu, Pas danum iro empet, danum kois ngehantam belai iro, tapi sa kate pehansur belai ye leka na ene emper teguh. 49Tapi, ulun ye ngeringa ajaran A'ap belalu sa ngeringa ye, da iro ngunaw ulun ye ne'muet belai te munan tana beloh be ori. Desung danum iro empet, belai iro runtun ye ngene hansur tamam bene.
Currently Selected:
Lukas 6: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
