Lukas 5
5
Yesus no'ok kawan murid da ye penela
(Mat. 4:18-22; Mrk. 1:16-20)
1Pas te olo iro, Yesus desung jakat te diding dano Genesaret, deo kawan ulun ngerumung nete keliling Da di keringa Firman Allah. 2Yesus kite due ti jukung ye na ikah ulun ye, ulun ye pu'un ye desung mui lunta dali. 3Yesus bebuat te jukung da Simon, belalu Da nyiu da Simon di nanyak jukung ye tong botuk loyu. Ukah iro, Yesus tue'et ngajar kawan ulun neke jukung iro. 4Ukah Da punah bepaner, Yesus ngulek tong da Simon: “Alan tulak tong botuk loyu ye takei ukah iro timai lunta ko di ngedakep esa.” 5Ulek da Simon: “Guru, kain apu ngeto esa sampuk erai malem, tapi sengke beloh mahan me-me! Tapi, leka Ko ye nyiu! Boh ayu a'a, a'ap nimai lunta ihe.” 6Belalu, pas dali nimai lunta iro, selenga deo bene esa ye kune lunta empe bereset lunta ye koe kawan esa iro. 7Ukah iro, dali ngode tong kawan uyang dali di ngawat muat esa te due ti jukung ye bali. Ye ngene jukung iro dani kakan kayem lian kedeoan esa ye na ahan dali iro. 8Pas da Simon Petrus kite iro, da besujud te one wae Yesus, ulek da. “Alan tulak Tuhan, leka a'ap ihe ulun ye bedosa!” 9Da Simon ngulek ngunaw ro leka dali kemawah kite deo bene kawan esa iro. 10Sameh ade ngunaw da Yakobus ali da Yohanes tamam kemawah, uyang da Simon kawan anak da Zebedeus. Yesus ngulek tong da Simon: “Iya'a ko takut. Ke nehe ko sagar ngelunta meresia di pejaji murid A'ap” 11Belalu ukah dali ngoit jukung tong munan bawo dali ngikah se ye na'an te jukung pelos nemasu Yesus.
Yesus nawas erai ke ulun ye beroten okan kodong
(Mat. 8:1-4; Mrk. 1:40-45)
12Pas Yesus desung te ja'a daerah Galilea te ja'a iro, na'an erai ke ulun ye unuk ye ponu penyakit okan kodong. Pas ulun iro kite Yesus da besujud te one wae Yesus, sambil da laku awat tong ka Yesus, ulek da: “Guru, kaye Ko kate, awat tawas roten a'ap ihe.” 13Ukah iro, Yesus mege ulun iro. Ulek Da: “Oy A'ap hakun, beme apu ko.” Sa ola roten da iro deh selenga beme. 14Aji, Yesus ngelamen ulun iro di sa ngulek tong kawan ulun bali ulek Da: “Alan ko tulak tong runa imam Yahudi. Ukah iro okoi persembahan kurban ngunaw ye na perentah suang Hukum nabi Musa leka ko apu molak neke roten ko, di awus kawan ulun ketoan kaye penyakit ko apu beme.” 15Tapi habar Yesus tesebar te kame-kame ye ngene kawan ulun sulet nyeruku di ngeringa Da, pelos dali laku tawas neke roten dali. 16Tapi, Yesus nanga tulak ngikah awus kawan ulun deo iro tong runa ye luay di bedoa.
Yesus nawas erai ke ulun ye lumpuh
(Mat. 9:1-8; Mrk. 2:1-12)
17Na'an erai ke olo pas Yesus desung ngajar, na'an kawan ulun Farisi ali kawan pengajar Hukum Musa desung tu'et te biro. Dali sulet neke kawan ja'a te provinsi Galilea ali provinsi Yudea, ali neke ja'a Yerusalem. Yesus petendre kuasa Tuhan di nawas ulun ye beroten. 18Pas Yesus desung ngajar, na'an kawan ulun ye sulet ngoit erai ti ulun ye lumpuh te munan runa turui, belalu dali kakan ngoit ye tong suang pelos ngonok ulun iro te one wae Yesus di nawas ye. 19Tapi dali beloh ruku cara di pelitep ulun ye beroten iro tong suang belai leka deo bene ulun ye. Ukah iro dali mengket tong munan sapo di ngene luang te sapo pelos pedolui ulun iro sendro lapik da nete botuk kawan ulun deo iro, pas te one wae Yesus. 20Pas Yesus kite iman percaya dali, ulek Da: “Hase Erai Butung, dosa ko apu na ampuni.” 21Keringa iro Kawan pengajar hukum Musa ali kawan ulun Farisi be engan te suang aseng dali: “Nome sih ulun ye ngekupe aran Allah ihe? Nome ye kate ngampuni kawan dosa kaye sa Allah daeh?” 22Pas Yesus ketoan se ye na'an suang aseng dali, Da ngulek: “Se di ko bepikir ngunaw ro?” 23Ulek tong ka A'ap ye hame ye murah na ulek: “Dosa-dosa ko apu na ampuni, atawa Jakat pelos inam malan?” 24Tapi, di ko ketoan kaye Anak Meresia be kuasa ngokoi pengampunan neke dosa, Ulek Yesus tong ka ulun lumpuh iro: “Bu'et apu, neke runa turui ko iro, alan uli apu.” 25Sa ola, ulun iro langsung kate jakat te one wae kawan ulun, belalu da ngoit runa turui da iro deh pelos da uli sambil memuji Allah. 26Awus kawan ulun ye na'an te biro kemawah belalu dali memuji Allah ade. Nelang na'an penya'an ye takut-takut tong ka Allah ulek dali “Olo ihe kain apu kite ye ngene kain empe kemawah!”
Yesus meli erai ke ulun Tukang Tagih Pajak ye be aran Lewi di jaji erai ke ulun Murid Da
(Mat. 9:9-13; Mrk. 2:13-17)
27Ukah iro, Yesus losek tong ongon, Da kite erai ti ulun penagih pajak ye be aran Lewi ye desung tu'et te runa nagih pajak. Yesus ngulek tong da: “Yu nyang A'ap.” 28Keringa iro da Lewi langsung nemasu, da ngikah se ye na'an te biro.
29Apu deo kawan tukang pajak ye bali ngema te belai da Lewi, leka da Lewi ngene acara solai te belai da di Na Yesus. 30Belalu kawan ulun Farisi ali pengajar Hukum Musa suang kelompok dali protes kite se ye na ene Yesus iro. Dali nyituk tong ka kawan murid Yesus: “Se di Ko man ali isep sendro tukang tagih pajak nyang kawan ulun ye bedosa?” 31Yesus ngulek: “Ulun sehat iro sa parlu ali tabib, tapi ulun ye beroten iro jape parlu tabib. 32A'ap sulet beaw di no'ok kawan ulun ye buen, tapi sulet di no'ok kawan ulun ye bedosa di dali betobat.”
Yesus na situk tentang hal bepuasa
(Mat. 9:14-17; Mrk. 2:18-22)
33Ulek dali tong ka Yesus: “Kawan murid da Yohanes ye tuju bepuasa ali bedoa. Ngunaw kawan ulun Farisi. Tapi kawan murid ko man isep.” 34Yesus ngulek tong dali: “Me kate ko nyiu kawan penggapit penganten upo iro di puasa pas penggapit iro kea sendro ali dali. 35Tapi, pas te olo ye nene pas penganten upo iro na epe neke dali, belalu pas te olo iro ade dali sagar bepuasa.”
36Yesus ade bekisah paribasa ihe tong dali: “Beloh erai ti ulun ye kate ngereset empeng ye kado di nambal empeng ye apu usang. Leka, ulun iro ngerusak empeng ye kado iro 37Belalu ulun sa nili anggur kado te upak anggur ye usang. Kaye ulun ngene koe gawi iro, anggur kado iro sagar ngerusak upak setua iro. Anggur iro sagar awus, belalu upak ye iro sagar hansur. 38Ngunaw ro ade kebalikan ye, ulun ye sagar nili anggur kado te suang upak ye kado. 39Beloh erai ti ulun ye ukah isep anggur usang, kakan isep anggur ye kado leka dali ngulek, Anggur ye usang iro nyaman.”
Currently Selected:
Lukas 5: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
